#adiblar_ijodidan

HAYOTGA MUHABBAT

Sendan uzoqlashib boraman tun-kun,
Balki bir qadamdir, balki, bir, yarim,
Fanoning bagʻriga singanman beun,
Payqamas gʻanimlar, bilmas doʻstlarim.

Shamollar qaydan ham boʻlsin xabardor,
Men axir safarga otlangan banda.
Qushlar davra qurar tepamda takror,
Tomosha qilishar, hech boʻlmaganda.

Qoʻl chuzsa yetkudek yulduzlarim ham,
Sezishmas oʻrnimdan kuchganligimni.
Bir umr ularga boʻlsam-da hamdam,
Endi-chi nogahon oʻchganligimni.

Umrning poyoni anglaysan biroq,
Uni koʻrib turish ogʻirdir faqat.
Tiriklik dunyoda baxt erur porloq,
Ayri tushmoq esa eng qora qismat.

Boqib atofinga boshing qashlaysan,
Qarzing qolmaganmi biror kimsadan.
Hisob-kitobingni oʻylay boshlaysan,
Sendan rozimikan elu yurt, Vatan.

Yelpinib haydaysan tumanni goʻyo,
Yana koʻz oldingda sheʼriyat, bayot.
Baribir, shirindir bu taxir dunyo,
Baribir, goʻzaldir shu qari hayot.

✍ABDULLA ORIPOV
O‘zbekiston Qahramoni, xalq shoiri

👇Bizni kuzatishda davom eting!
👉@ima_myim

#adiblar_ijodidan

XOHI INON XOHI INONMA

Sensan sevarim, xohi inon, xohi inonma,
Qondur jigarim, xohi inon, xohi inonma.

G’am shomi firoqingda kabob etti falakni
Ohi saharim, xohi inon, xohi inonma.

Nogah sari zulfung sori bo’ldum sanga moyil,
Ey toji sarim, xohi inon, xohi inonma.

La’ling g’amidin ko’nglum erur g’uncha kibi qon,
Gulbargi tarim, xohi inon, xohi inonma.

Zahri g’ami hajring meni o’ldurg’ali yetti,
Ey labshakarim, xohi inon, xohi inonma.

Mashrab, bo’lubon ko’yinga chun barqi tajalli,
Qolmay asarim, xohi inon, xohi inonma.

✍Boborahim Mashrab

👇Bizni kuzatishda davom eting!
👉@ima_myim