#oqıwshılar_dóretiwshiliginen

SHIYRIN SÓZDIŃ KÚSHI
(gúrrıń)

Bir awılda Murat ismli jas jigit jasaytuǵın edi. Ol bárqulla adamlarǵa járdem beriwge háreket etedi. Biraq onıń mashqalası bar: ol aytıp atırǵan sózlerine ózi juwap bere almaydı, “qızıp ketip”, ózin basqara almaydı, kóbinese insanlardıń kewline tiyip aladı. Ol usı mashqalanı sheshiw ushın nuranıy bir aqıllı jasıúlkenniń aldına barıp, másláhát soraydı.
– ...Ata, men adamlardıń kewlin awırtıwdı qálemeymen-aw. Biraq awzımnan shıqqan sózlerimdi basqara almayman, – dedi.
Ǵarrı kúlimsirep qoydı, úndemey onı óziniń baǵına alıp bardı hám:
– Men saǵan bir tapsırma beremen. Hár bir jaman sózdi aytqanda, birewdiń kewlin qabartqanda mine usı terekke shege qaǵasań. Hár saparı jaǵımlı sóyleseń, sol shegelerdi suwırıp al. Qáne, kóreyik, sen tilińdi qalay ózgerte alasań? – dep tapsırma berdi.
Murat endigiden bılay sol ǵarrınıń aytqanın qılıp, hàr adamnıń kewilin awırtqan waqıtta terekke bir shege qaqtı. Tez arada terek shegelerge tolıp ketti. Murat bunnan júda qapa boldı.
Aradan biraz waqıt ótken soń, ol jaǵımlı sóylewdi, basqalardı tıńlawdı hám jaqsı pikirlewdi ùyrene basladı.
Hátte ol bir kúnde úsh shegeni suwırıp aldı. Bir neshe háptede terekte birde-bir shege qalmadı. Ol quwanıp, danıshpan ǵarrınıń qasına bardı da:
– Terekte birde bir shege qalmadı, – dedi. Ǵarrı terekti kózden ótkerip:
– Júdá jaqsı, biraq terekke jaqsılap qara. Shegeler suwırılǵan jerde tesilgen iz qaldı, durıs pa?
– Awa, – dep juwap berdi.
Ǵarrı :
– Adamlardıń kewli de terekke uqsaydı. Awır sózler shege sıyaqlı iz qaldıradı. Onı qalay piteyseń...Jaǵımlı sózler menen dúzetiwge háreket etseń de, geyde jaralar umıtılmaydı. Sonıń ushın hámiyshe jaqsı sóylewge hàreket qıl, – dedi.
Murat ushın bul danalıq sózler – bir ómirlik sabaq boldı.

✍️ I.Yusupov atındaǵı dóretiwshilik mektebiniń 9-klass oqıwshısı A.Sharapatdinova

📱 Website |📱 Telegram | 📱 Instagram |📱 YouTube |📱 Facebook

#oqıwshılar_dóretiwshiliginen

🎭 TEATRǴA JÚR!

Keypiyatıń joq pa, meniń menen júr!
Sıyqırlı álemge seni erteyin,
Asıqpa, azǵana meni kúte tur,
Sıyqırlı namanı ózim sherteyin.

Tárbiya oshaǵı, bilimler káni,
Zerikpeyseń hasla, paydalı bári.
Kózińdi quwantar, sánli saxnası,
Awa, bul teatr, kewlińe dári.

Aktyor, aktrisa, baslı qaharman,
Ertekler álemin gezip kelgendey.
Kórip, men ádewir máni shaǵarman,
Olar bárshesin bir, sezip kelgendey.

Teatr, ádebiyat, túbi tuwısqan,
Kimlerdur túsiner, kimge qurı sóz.
Olar bir-biriniń izin quwısqan,
Onı tek kóredi, kewildegi kóz.

Janlı hawazlarda atqarılar rol,
Tek sizden ótinish, berilip tıńlań.
Bazda kórsetiler, teńiz hám de shól,
Der onda: Teńizim, qaytadan janlan!

Teatr, arzıwlar tolı bir mákán,
Bir márte barıp kór, óziń sezerseń.
Bunı túsinedi, pútkil jer jáhán,
Barsań, erteklerdiń elin gezerseń.

Berilip tamasha et, úzbe kózińdi,
Túsip qalarsań sen, ózge álemge.
Isene ber, jalǵan deme sózimdi,
Men sol kúnnen, ashıq boldım qálemge.

✍️I.Yusupov atındaǵı dóretiwshilik mektebiniń 8-klass oqıwshısı Madina Dolımbekova

📱 Website |📱 Telegram | 📱 Instagram |📱 YouTube |📱 Facebook

#oqıwshılar_dóretiwshiliginen

Eger de maqsetiń bolmasa, alǵa ilgerilew bolmaydı.

WATANÍM
Ana Watan, aytshı, bunsha ázizseń,
Seni ana deymen, meniń anamsań,
Miyirmansań, bárshege qádirliseń,
Ul-qızıńdı qásterlegen sen panamsań.

Ana Watan, sen qızıl gúl jaynaǵan,
Álemge nur shashqan quyashlı kúnim,
Seni saǵınaman, bir kún bolmasam.
Bastı iyip, saǵan etemiz tájim.

Watan ushın beremiz, tándegi jandı,
Jas waqıtta kórset, elge barıńdı,
Ata-babam qásterlegen Ana Watan,
Súyemiz, ardaqlap, hár bir giyańdı.

Anam aytqan háyyiwdiń namasısań,
Átam qurǵan baǵlardıń búlbiliseń,
Ájem kiygen KÓK kóylek naǵısısań,
Hárbir shóbi qádirli –Watanımsań!

✍️ I.Yusupov atındaǵı dóretiwshilik mektebiniń 10-klass oqıwshısı Qutlmuratova Orıngúl

📱 Website |📱 Telegram | 📱 Instagram |📱 YouTube |📱 Facebook

#oqıwshılar_dóretiwshiliginen

WATAN

Men bir náwshe talman, kókke talpınǵan,
Suwsınıń qanıma, boyǵa taraǵan,
Hátte topıraǵıń berer kúsh-quwat,
Meni ózińe baylap alǵansań - Watan.

Ómirimniń mazmunı - usı ana jurt,
Besigime háyyiw aytqan sen anam,
Teberik diyarım - qutlı mákanım,
Mushtay júregimniń soǵıwı-Watan.

Basqa eller menen teńlestirmeymen,
Hesh kim umıtpaydı tuwǵan irgesin,
Ájayıp álem tek usı jer deymen,
Kózime ısıqsań bárinen -Watan.

Sen ullı Bayterek - shaqańman seniń,
Gúliń, gúbelegiń - altın balalıq,
Saǵan arnap, qosıq jazdım júrekten,
Óziń menen baxıtlıman Watanım.

✍️ I.Yusupov atındaǵı dóretiwshilik mektebiniń 9-b klass oqıwshısı Erjanova Aqsungul

📱 Website |📱 Telegram | 📱 Instagram |📱 YouTube |📱 Facebook

#oqıwshılar_dóretiwshiliginen

QISTÍŃ BIRINSHI QARÍ
(Gúrriń)

Úlkemizge qar jawǵanı hámmeniń kewlin kóterip jiberdi.
Ásirese balalar quwanısıp, shadlanıp, oynap qaladı.
Kún suwıq bolsa da, jeti jastan jetpis jasqa shekemgi adamlardıń júzlerinde kúlki, qálbinde quyash nurları parlaydı.
Tap keshe túni menen jawǵan qar qalamız kórkine kórk qosıp, ábden shıraylandırıp jiberdi.
Mektebimiz aldındaǵı shırshalar “kelinshektey” appaq kóylek kiyip alǵan, tánepiste úlken, kishi klass oqıwshıları quwanısıp, qarda súwretke túsip, bir-birine qar atıp, ház etip oynap atır. Appaq qarlardı basqıń kelmey turadı, kórip kewliń kóteriledi. Ásirese, qardıń ǵırshıldaǵan sestin aytpaysań ba?
Balalıqta hamme de men qusap, qardı “muzqaymaq” dep jalap kórgen shıǵar…
Jer beti misli aq kórpe jamılıp alǵanday... Qar jawsa, diyqanlarǵa jaqsı. Sebebi qar ónimdarlıqtıń belgisi. Jerler jumsarıp, topıraq ızǵarlanadı, hawa ıǵallanadı. Hawadaǵı mikroblar nabıt boladı. Kóplegen keselliklerdiń aldın aladı.
Endi awılımızǵa barsaq úkelerim menen ayaz ata soǵamız, qar atısıp oyınaymız. Ótken jılı qar jawǵanda úkem úyge kirmesten, keshke shekem oynadı, óǵan “Keshte úyge kir endi, azanda oynaysań!” degenimizde ol, “Qardı da úyge alıp kiremen, úyde qar menen oynayman”- dep, shataq shıǵarıp edi. Bıyıl ol sál úlkeydi, endi olay demeytuǵın shıǵar-aw…
Men qıs máwsımın unataman, ásirese bunday gózzallıqtan qattı zawıqlanıp, qosıqlar, gúrrıńler jazaman.
Haqıyqattan da, qıstıń kórki qar eken.

✍️ I.Yusupov atındaǵı dóretiwshilik mektebiniń 9-a klass oqıwshısı N.Biysenbaeva

📱 Website |📱 Telegram | 📱 Instagram |📱 YouTube |📱 Facebook

#oqıwshılar_dóretiwshiliginen

BÁHÁR KIYATÍR

Qıs qáhári áste pásine qaytıp,
Quyash átirapqa jıllı nur shashıp,
Quslar shadlı báhár qosıǵın aytıp,
Mine, elimizge báhár kiyatır.

Tórt pasıldıń sırları álwan-álwan,
Báhárde tús alar ózgeshe jáwlan,
Tábiyat oyanıp, qısqı uyqıdan,
Jáne dabıl qaǵıp, báhár kiyatır.

Jer beti jamılar kók kórpe naǵız,
Tap oyıp qoyǵanday gilemge naǵıs,
Quslar qaytıp keler, ketse de alıs,
Xosh xabarın aytıp, báhár kiyatır.

Báhár tańı qızarıp, erterek atqan,
Qarlar erip boldı tawlarda jatqan,
Móldir suw máwjirep, dáryama aqqan,
Elim, kútip alıń, báhár kiyatır.

✍️ I.Yusupov atındaǵı dóretiwshilik mektebiniń 9-b klass oqıwshısı Erjanova Aqsungul

📱 Website |📱 Telegram | 📱 Instagram |📱 YouTube |📱 Facebook

#oqıwshılar_dóretiwshiliginen

SHAYÍRA ZULFIYAǴA

Zulfiya-
Ol báhardi súyip jirlaǵan,
Insanlar qálbine nur quya alǵan,
Erik gúllerinen tajlar kiydirip,
Qosıqqa jan bergen sabır-taqattan

Jazǵım keler dártli bir qosıq,
Qosıǵıma zer naǵıs qosıp,
Niyetim sol, kózge ilinsem,
Zulfiyanıń shákirti bolıp.

Qosıq áleminiń Siz málikası,
Súydińiz ádillikti hám páklikti,
Xalıqtıń júreginen orın alǵan.
Shayırasız el-súygen, eń ardaqlı.

✍️ I.Yusupov atındaǵı dóretiwshilik mektebiniń 10-a klass oqıwshısı Jetkerbaeva Gúlnur

📱 Website |📱 Telegram | 📱 Instagram |📱 YouTube |📱 Facebook

#oqıwshılar_dóretiwshiliginen

BÁHÁR
Qáhárli qıs ketip, báhárim keler,
Japlarda móldir suw aǵar sıldırlap,
Jipek samal shaqıradı terekler,
Jasıldan gilem jamıladı átirap.

Báhárdiń samalı-janǵa jaǵımlı,
Ráńbáreń gúller bezer baǵımdı,
Qıs qáhári áste izge sheginer,
Qarlıǵashlar seni júdá saǵındı.

I.Yusupov atındaǵı dóretiwshilik mektebiniń 10-klass oqıwshısı Nursulıw Abdikamalova

📱 Website |📱 Telegram | 📱 Instagram |📱 YouTube |📱 Facebook

#oqıwshılar_dóretiwshiliginen

TÓRTLIKLER

Tuwǵan jerge muhabbat tuyǵısın,
Tuwılǵannan baslap sezgenbiz.
Biraq,elden ayra túsiw qayǵısın,
Elimizden alıslap-aq bilgenbiz.

* * *
Usta imaratqa gerbish qoyǵanda,
Qáte qoyıp alsa onıń birewin,
Mańlay teri menen qurǵannıń bári,
Qulaydı bir ǵana gerbish sebepli.

* * *
“Jaqsılıq qıl, dáryaǵa tasla”
Degen gáp bar aramızda.
Biraq, soǵan ámel etiwi
Júdá qıyın usı zamanda.

* * *
Bir awız ǵana jıllı sóz benen,
Doktor emlemegen nawqas emlerseń.
Tek bir awız jıllı sóz benen,
“Muzlap qalǵan” kewildi de eriterseń.

✍️ I.Yusupov atındaǵı dóretiwshilik mektebiniń 9- klass oqıwshısı Biysenbaeva Nurdana

📱 Website |📱 Telegram | 📱 Instagram |📱 YouTube |📱 Facebook

#oqıwshılar_dóretiwshiliginen

🏢 Ibrayım Yusupov atíndaǵí dóretiwshilik mektebi

AWÍLÍM
Abbaz shayır tuwılǵan mákаn,
Saǵınaman ketsem awıldan,
Hárbir giyań maǵan qádirdan,
Dúnyada teńi joq – meniń awılım.

Awılımda aǵalarım aybatlı,
Qızları bar Tumaristey sawlatlı,
Bárshesi-bárshesi júdá talantlı,
Jasları watanǵa sadıq – awılım.

Jigitleri jawǵa qarsı turǵanday,
Qızları bar sulıw, júrek alǵanday,
Pidayı, erjúrek, órnek bolǵanday.
Basqalarǵa isi órnek – awılım.

Kewili haq, nahaq joldan júrmeydi,
Miynet eter bárha, tınım bilmeydi,
Jas áwladtı hadal jolǵa silteydi,
Miynetkeshler eli – meniń awılım.

“Qaraoy”dan shıqqan qansha danalar,
Abbaz shayır mudam tilge alınar,
Usı ullı insan izin basıwshı,
Izbasarlar eli–meniń awılım.

Atalarım bárha násiyat aytar,
Jaslardı tuwrılıq jolına baslar,
Watandı qorǵawǵa mudam taq turar,
Keleshegi nurlı bostan–awılım.

✍️ 11-klass oqıwshısı Abdikamalova Nursulıw

📱 Website |📱 Telegram | 📱 Instagram |📱 YouTube |📱 Facebook

#oqıwshılar_dóretiwshiliginen

🏢 Ibrayım Yusupov atíndaǵí dóretiwshilik mektebi

JAZ KELDI

Japta aǵıp ılay suwlar,
Jerde jaynap kók maysalar,
Quwanısıp oynap kúler,
Jaz keliwden jas balalar.

Oqıwdı da tamamladı,
Demalısqa shıqtı taǵı,
Oynap kúlip júr ǵoy bári,
Jaz máwsimin súyer bári.

Kúnler qattı ısıp ketti,
Miyweler de pisip jetti,
Kópten kútken kúnler jetti,
Jaz máwsimi kirip keldi.

✍️ Bekbaulieva Rayxan 10-klass oqıwshısı

📱 Website |📱 Telegram | 📱 Instagram |📱 YouTube |📱 Facebook

#oqıwshılar_dóretiwshiliginen

🏢 Ibrayım Yusupov atíndaǵí dóretiwshilik mektebi

SHEBER ANAM BAR

Aq kóylegim, qızıl kóylegim,
Kiysem jarasadı, sulıw bunshama,
Anam tigip bergen kóylegim,
Qollarıń dárt kórmesin, Ana!

Naǵısları shıraylı, gúlleri túrlı
Aq monshaqtan bezek taqqan,
Doslarıma kórsettim, onı,
Doslar ayttı, “Sheber eken” dım.

Kún-tún tiger sulıw kóylekler,
Sonday sheber qollı anam bar,
Jurttı ırza etip, maqtaw esiter,
“Qollarıń dárt kórmesin” der adamlar.

✍️ Bekbergenova Gúljamal 8-klass oqıwshısı

📱 Website |📱 Telegram | 📱 Instagram |📱 YouTube |📱 Facebook

#oqıwshılar_dóretiwshiliginen

ARAL TEŃIZINIŃ KÁRAMATÍ ALTÍN SABAǴÍ
         (gúrrıń)

Men Aral tuwralı eń dáslep qayjerde, kimnen esitkenimdi bilmeymen.
Biraq, apam menen atamnıń dasturqan basında aytqan áńgimelerinen, muzeydegi kartinalardan, kinofilmlerden, jazıwshı, shayırlardıń shıǵarmalarınan haqıyqıy Araldı tanıǵanman hám sonıńday jaqsı kórip qalǵanman. Hám sonda Aral teńizi xalqımızdıń tariyxı, ótmishi, búgini hám keleshegi ekenligin túsindim.
Bir kúni shańaraq aǵzalarım menen asıǵıslıq penen kútken Aral teńizin kóriw ushın Moynaqqa jol aldıq. Aral teńiziniń qashshan-aq qurıp qalǵanlǵın da biler edim. Biraq báribir ishimde ózgeshe sezimler menen barıp sol Araldiń sahraǵa aylanıp ketkenligin óz kózim menen kórgende, kewlim ezilip ketti. Qasımdaǵı sińlim Araldı kórip, hayran qalıp soraw berdi:
–Haw! Sizler Aral teńizine baramız degen edińiz-ǵoy. Teńizlerde suw bolıwı kerek emespe? Kemeler de nege qumda turıptı? Olar da suwda bolıwı kerek ǵoy!–dedi.
Onıń bul sorawlarına apam:
– Durıs aytasań kemeler suwda bolıwı kerek. Bul jerde de bir waqıtları suw tolıp-tasıp turǵan, –  dep juwap berdi apam.
– Sonda aldın usı qumlardıń ornında suw bolǵan ba? Qalayınsha? Qalayınsha úlken teńiz birden qurıp qalǵan?–dep qızıqsına berdi sińlim.
– Bul sorawdıń juwabı hammemiz ushın jumbaq. Juwabın heshkim bilmeydi,–dedi apam.
Apamnıń sózlerin esitkennen soń, Ózbekstan qaharmanı, Qaraqalpaqstan xalıq shayırı Ibrayım Yusupovtıń qálemine tiyisli usı qatarlar hesh oyımnan ketpedi:

Tawlar shógip, jerge kirmegen shıǵar,
Juldızlar hám birden, sónbegen shıǵar,
Dunya hesh waqıtta da kórmegen shıǵar,
Bir maydanda teńiz qurıp qalǵanın.

(Dawamı bar)

✍️ I.Yusupov atındaǵı dóretiwshilik mektebiniń 10-klass oqıwshısı Sharapatdinova Ayjamal.

📱 Website |📱 Telegram | 📱 Instagram |📱 YouTube |📱 Facebook

#oqıwshılar_dóretiwshiliginen
#Dawamı

ARAL TEŃIZINIŃ KÁRAMATÍ ALTÍN SABAǴÍ
         (gúrrıń)

Hám usı qatarlardı áste qumǵa jaza basladım. Qasıma sińlim kelip:
–Bul kimniń qosıǵı? Bul qosıqta usi Aral teńizi tuwralı aytilǵan ba?–dedi.
– Awa, qosıqta Aral teńizi názerde tutılǵan. Shayır Ibrayim Yusupovtıń qálemine tiyisli qosıq,–dep juwap berdim.
Meniń sózimdi esitken apam:
– Ajapań Aral tuwralı kóp shıǵarmalar oqıǵan. Sen de onnan sorap al, kitaplar oqı. Bálkim sonda sorawıńa juwap tabarsań,–dedi sińlime.
–Qanday kitaplar oqıdıńız? Aytip beriń da,–dedi sińlim.
Men Ibrayim Yusupovtıń “Aral elegiyalari”, Tólepbergen Qayıpbergenovtıń “O dúnyadaǵı atama xatlar”, Káramatdin Sultanovtıń “Aqdárya”, Ótegen Ayjanovtıń “Aral qushaǵında”, Asan Begimovtıń “Balıqshınıń qızı”, Keńesbay Karimovtıń “Araldıń úmiti” ham taǵı basqa da shıǵarmaların oqıǵanımdı aytıp, úyge qaytqan soń “saǵan da berip turaman”,–dedim.
Hám sonnan soń sińlim sol kitaplardı oqıp shıqtı hám mektebindegi kitapxanasınan alıp, basqada hár túrli kitaplardı oqıydı.
Sol oqıǵan kitapların apam menen atama hár kúni aytıp beredi. Hátte klasındaǵı kitap uslamaytuǵın oqıwshalardı májbúrlep, kitapxanaǵa alıp barıp:
–Hesh bolmasa ertek kitap oqı,–deytuǵın eken. Aldın sińlim qaraqalpaq tilindegi kitaplardı qolına da almaytuǵın edi. Bilmedim, balkim rus klasında oqıǵanı ushın shıǵar. Biraq, usı Aral teńizi arqalı sińlimniń kitap oqıwǵa bolǵan qızıǵıwshılıǵı oyandı.
Hám bul Aral teńiziniń káramatı–“altın sabaǵı” boldı.

✍️ I.Yusupov atındaǵı dóretiwshilik mektebiniń 10-klass oqıwshısı Sharapatdinova Ayjamal.

📱 Website |📱 Telegram | 📱 Instagram |📱 YouTube |📱 Facebook

#oqıwshılar_dóretiwshiliginen

XOSH IYISLI ÓSIMLIK
(ertek)

Bir bar eken, bir joq eken. Burınǵı ótken zamanda toǵaydıń eń shetinde ayıw jasaptı. Ol toǵaydı basqaradı eken. Pal hárreleri ayıwdıń qarawında xızmet islepti. Bir kúni ayıwdıń qattı qáhári kelip, óziniń jep júrgen hám kún kórisine jarap turǵan azıqlarınan nalınıp, qarawındaǵı pal hárrelerine: – “Sizler, maǵan eń mazalı azıqtı tawıp ákelińler. Eger maǵan unasa onı kúndelikli azıǵıma aylandırıp alaman. Sizlerge úsh kún múddet” – depti.
Pal hárreleri sol kúnniń ózinen-aq berilgen tapsırmanı orınlaw ushın iske kirisip ketipti. Azannan keshke deyin azıq izlep taba almaptı. Sonıń menen berilgen múddettiń sońǵı kúni de jetip kelipti. Hárreler iyisti jaqsı sezgenlikten, xosh iyis shıqqan tárepke “bası awıptı”. Azanlı kesh miynet etip tınbaǵan pal hárreleriniń ábden dińkesi qurıptı. Bir topardıń ishindegi hárre sharshaǵanlıqtan, terektiń shaqasına qonıp, tereń uyqıǵa ketipti. Ol uyıqlaǵan terek úlken lalazardıń ishinde jaylasqan edi.
Aradan biraz waqıt ótkennen keyin turıp qarasa, xosh iyisli, jumsaq, átirapı qıp-qızıl japıraqlar menen qorshalǵan ósimliktiń ishine túsip ketipti. Keyin ushıp shıǵıp qarasa ózgeshe bir gúl eken. Bul aqırǵı kún bolǵanlıqtan ayıwǵa ne apararın bilmey, gúldiń ishindegi jumsaq nektardı alıp barıptı. Baraman degenshe nektar mazalı suyıqlıqqa aylanıptı. Ayıw bos kelgen hárrelerge óz aldına jaza qollanadı. Eń sońında mazalı suyıqlıqtıń dámin tatıp kóredi hám ayıwǵa maqul keledi. Sonnan baslap pal ayıwdıń súyikli taǵamına aylanıp, al hárrelerdi bolsa jańa jumıs penen támiyinlepti.

✍️ I.Yusupov atındaǵı dóretiwshilik mektebiniń 10-klass oqıwshısı Nurdana Bisenbaeva.

📱 Website |📱 Telegram | 📱 Instagram |📱 YouTube |📱 Facebook

#oqıwshılar_dóretiwshiliginen

KITAP

Kitap – ol dos adamlarǵa mıńlaǵan
Oqıp insan bul ómirdi ańlaǵan,
Tariyxta talaylar bilimlı bolıp,
Jáhánde danıshpan bolıp jańlaǵan.

Kitap – haslı gáwharlarǵa teń bolǵan
Kitapqa dos júzler nurlı zer bolǵan,
Bilimsizler kitap penen dos bolsa,
Kúnler kelip, bilimlige teń bolǵan.

Alımlar ilimde túspekte gúres,
Geyde kompyuteriń de beredi keńes,
Kitap hám texnologiya birlesse,
Almaytuǵın tawıń joq, beles-beles.

✍️ I.Yusupov atındaǵı dóretiwshilik mektebiniń 10-klass oqıwshısı Qutıbaeva Shaxsánem

📱 Website |📱 Telegram | 📱 Instagram |📱 YouTube |📱 Facebook