#kitap_ruwhıy_baylıq
#mektep_kitapxanasınan

ALLAYAR DOSNAZAROVTÍŃ BALALÍǴÍ
(Povest)

Allayar duwtardı sazlap, “Bozataw” namasın baslap jiberdi. Posqınlardıń arasına ózi de aralasıp ketkendey sezindi. Birazdan beri kórmegen anası esine tústi me kózinde jas qalqıdı. Alaman arasınan shıqqan “há, bárekella” degen dawıslar onıń háwijge shıǵıwına kúsh quwat berip turar edi. Qosıq juwmaqlanǵan waqıtta “jupla, jupla” degen dawıslar esitildi. Arqası qozǵan Allayar taǵı duwtarǵa jan endirip “Ellerim bardı”nı shertip basladı. “Há de”, “bárekella” degen dawıslar onı belgisiz iláhiy álemge alıp shıǵıp, alıs, alıslarǵa sharıqlatar edi.
Qosıqtı juwmaqlaǵan Allayar alaman qatarında turǵan duwtar iyesine iyilip turıp duwtarın usındı. Baqsı duwtarın uslamay turıp Allayardı qushaǵına basıp turıp qulaǵına:
-Aldıńdı alla ashsın. Doynaǵıńda bar eken balam, - dep baqsı balanı qattı bawırına bastı.
Onıń júzinde baǵanaǵı ızanıń izi de qalmaǵan edi.
Allayar ózin qustay jeńil sezdi. Duwtar iyesine qayta, qayta alǵıs aytıp minnetdarshılıǵın bildirdi. Ol endi adamlardıń arasınan aralasıp dárwazǵa jaqınladı. Dárwaz astındaǵı eki masqarapaz eki betin qızılǵa boyap, baslarına kishkene baspayǵa taqabbil tóbesi shoshayǵan, pópekli bas kiyim kiyip alǵan. Birin biri basqılap kúlkili háreketleri menen adamlardı kúlkige ǵarıq qılıp júr.

✍️ Avtor: Beknazar Ernazarov

Website | Telegram | Instagram | YouTube | Facebook

#kitap_ruwhıy_baylıq
#mektep_kitapxanasınan

AYDAYQÍZ
(povestler hám gurrińller)

🍁 Gúz ayı. Xámmege belgili bul kúnleri saat bes bolıwdan kún batıp kózdi ashıp jumǵansha qarańǵı túsıp qaladı. Qansha shaqqanlassań da bir kúnlik isińdi pitıre almay qalasań. Ol mektepten keshlew shıqtı da balalar baqshasına entelep jaqınlaǵanı sol, joldıń shep jaǵınnan birden: mama! - degen ayanıshlı dawıs Gúlhásenniń tula boyın juwlatıp jiberdi hám “menıń balam! Meniń balamnıń dawısıǵoy! Ne bolıp qaldı eken! Úkesi aman bolǵay da!...” dep dawıs esitilgen tárepke jandalbas penen elewlep úmtıldı. Kelse qolında papkası bar kishilew bala ebil-sebili shıǵıp qalay bolsa solay mamalap eńirep otır. Gúzdegi ızǵırıq ayaz boyına sińip, tońıp qalıptı. Balanıń túr-túsi Gúlhásennıń balalarınan aynımaǵan, balanı turǵızıp, ústilerin qaǵıp, sádeplerin ilip, soraw jawdırıp atır.

✍️ Avtor: Gúlaysha Esemuratova

Website | Telegram | Instagram | YouTube | Facebook

#kitap_ruwhıy_baylıq
#mektep_kitapxanasınan

TAŃLAMALÍ SHÍǴARMALAR 4 tom
(povest)

Solay etip, men ózimniń shıǵısımdı bilip aldım hám hesh qashan jolǵa qaramaytuǵın, hesh kimdi kútpeytuǵın boldım. Írasın aytsam, adamlardı jek kóre basladım. Sharbaǵımızdıń qasınan ótken hayallardı kórsem, ol tap úsı dógereklerge shırıldaǵan nárestesin taslap ketkendey seziler edi. Bálkim, búlardıń ıshınde meni taslap ketken anam da bar shıǵar, múmkin, ol meni kórermen be dep úsı jerden ótip baratırǵan shıǵar dep oylayman. “Eger anań kelip, seni alıp ketse barar ma edıń?” dep sorayman ózimnen-ózim. “Joq-dep juwap beredi hújdanım.

- Barmayman, endi hámmesi kesh. Meniń eń qızıqlı payıtlarım ótip ketti. Endi meni hesh kim alaqanında sekirte almaydı hesh kim meni “kóz monshaǵım” dep kózlerimnen súwe almaydı. Maǵan ol ananıń erinleri muzday bolıp tiyedi. Ol men ushın biygáná, men onıń ushın biygánáman”. Bul dunyada meniń ákem de joq, anam da joq, tuwǵan-tuwısqanım da, aǵayınim de joq, qol-ayaǵı topır, jurday jetim bolıp qalǵan edim. Men úsı demlerden baslap haqıyqat jetimlikti túsindim hám onıń ashshı demlerın hesh kimge bildirmey ishime juta berdim, juta berdim. Jıllar shıǵırdıń túsindey aylanıp, hámme nárseni de izde qaldırıp baradı eken. Biz hámmemiz balalar úyinde er jettik. Endi búrınǵıday oyın oynamaymız. “Áke” degen newe? dep hesh kimnen soramaymız. Seniń apań joq, seniń ákeń joq dep te hesh kimge aytpaymız. Sebebi, búl jerdegi aǵıl-tegil ómirdiń ishinde múdamı jetpey túratuǵın bir kemtarlıq ádewir eseytip taslaǵan edi. Biz hár birimizdiń kózimizdegi quwanıshtı hám múńdı aytpay túsinise alatuǵın bolǵanbız. Sonlıqtan, balalar úyindegi xoshlasıw keshemiz dım ǵana ǵamgún ótti.

✍️ Avtor: Muratbay Nızanov

Website | Telegram | Instagram | YouTube | Facebook

#kitap_ruwhıy_baylıq
#mektep_kitapxanasınan

JETIMNIŃ JÚREGI
(povest)

Jaslıq dáwir qanday jaqsı. Teńizbe-tawma, toǵayma, tońba, suwma, sahrama, qıspa, jazba, gúzbe, báhárme tap bári birdey kórinedi. Barlıǵı ráhát, barlıǵı jaqsı. Jaqsı bolǵanda da sonday jaqsı báhár gúllerindey qulpı dónip, sup-sulıw bolıp ǵana kórinedi. Jaslıq minutlardıń qızıǵı bir-birinen mazalı, bir-birinen tatlıday kórinedi. Ráhátke bólengen minutlardıń qaysı biri yadıńda qaladı. Bunday mazalı minutlardı esaplap ushlıǵına shıǵıw múmkin emes ǵoy. Haqıyqatında da mazalı minutlar esaplanbastan óziniń dástúrli tártibi menen sawlatqa sáykes bolıp óte beredi. Onıń hár kúni bir jılday, bir jılı on jılday bolıp ótedi.

Eger de jaslıq penen ǵarrılıq jaqtı esaplaǵanda ǵarrılıq qıs, jaslıq báhár emespe?! Ǵarrılıq quwraǵan shóp, jaslıq qulpı dóngen gúller ǵoy. Ǵarrılıq gónergen qılısh, jaslıq jaynaǵan jıldırım ǵoy.

Mine bizler sol jaslıqtıń qushaǵındamız. Ámet ekewimiz bazda awır oylanamız, al ne ushın oylanatuǵınımızdı ózimizde tolıq bilmeymiz. Bizge ne jetpeydi, hawa ma, suw ma, jer me, nan ba, kiyim be, joq barlıǵı da jetedi. Kewilge ráhát jaynaǵan ay gezekme-gezek júzimizdi jadıratıp tur. Aspan ashıq girshiktey taza. Hesh qanday girbiń joq.

✍️Avtor: Jolmurza Aymurzaev

Website | Telegram | Instagram | YouTube | Facebook

#kitap_ruwhıy_baylıq
#mektep_kitapxanasınan

G.ESEMURATOVA SHIǴARMALARI
(V tom)

Báhár. Gúzde egilgen biyday jelkildep ósip atır. Kúnde azanda ornımnan turıwdan biyday qıytaqqa juwıraman... Biydaydıń sulıwlanıp ósip atırǵanına zawıq penen qarap, atız shelinde biraz otıraman, soń qaytaman.

Sondaǵı ósip turǵan biyday ósimligi masaqlarınıń samal menen birin-biri quwalap shayqatılıp, tolqınlanıp turǵan sulıwlıǵına, onnan ańqıp turǵan murındı jararlıq jaǵımlı nan iyisine ájeplenip, atız basınan ketkim kelmeydi. Biyday nannıń bunshelli mazalı bolatuǵının sonda bilgenmen. Hárqıylı quslardıń, gúbelek, iyneliklerdıń qanatın dirildetip, tap aeroplannıń polosaǵa qonǵanınday qanatın dirildetip kelip, jańa gúllegen biyday baslarına qonıp oyın quratuǵınların aytpaysız ba? Bul jaratılıstıń sırları qanday qúdiretli deyseń!!.
Bir kúni biydayımnıń basları sarǵayıp, pisiwge meyilleskenine “endi tez kúnde” shaytan arba”ǵa minetuǵın boldım” degen isenim menen úyge kiyatırsam, biziń klasta oqıytuǵın baslıqtıń balası” shaytan arba”sınıń aldına klasımızdıń bir qızın mingizip zırlap kiyatır....
Sálemnen keyin ol:

- Háy, Jabbar jora, biydayıń qashan pisedi? Biydayıńa buyrıq ber, tezirek pissin, jarısayıq, kimnıń” shaytan arba”sı zor eken,- dep qoydı.

✍️Avtor: G.Esemuratova

Website | Telegram | Instagram | YouTube | Facebook