Zominda o’tgan uch kun bu ijodkorlar hayotidagi eng muhim va go’zal davr. Hayotimizda tub burilish yasovchi, bizni yanada ijod qilishga ilhomlatiruvchi uch kun edi. Birinchi bor Zomin seminariga faqat bir marta ishtirok etish mumkin degan gapni eshitganimda negaligini anglay olmagan edim. Lekin u yerda ishtirokchi sifatida qatnashar ekanman, u yerda oladigan motivatsiyamiz bizga bir umrga ta'tigulik kuch va g’ayrat berishiga amin bo’ldim.
Sirdaryodan  avtobusga chiqishimiz bilan seminar muhiti havosiga duch keldik. Yosh tengdosh ijodkorlarning baxtdan yongan ko’zlari kelasi uch kun ajoyib o’tishining isbotini ko’rsatib turardi. Avtobusda davom etgan mushoira davomida yosh ijodkorlarning qalamiga bot-bot tan berdik. Tajimonlik yo'nalishidan borgan bo’lsam ham mushoiralar davomida Zomindoshlarni tinglash menga o’zgacha zavq va ilhom bag’ishladi.
Afsonaviy ustozlar bilan bir muhitda bo’lish bu hammasidan ham a’lo edi . Seminar davomida biz afsonalar bilan suhbatdosh bo’ldik, ulardan muhim saboqlar va bilimlar olish nasib qildi. Qiziqarlisi shundaki, seminarning har oni ajoyib tasodiflarga boy bo'lib, siz shunchaki tonggi zomin sayridan qaytayotib Farida Afro’zni uchratib qolishingiz va ular bilan ikki og’iz suhbatdosh bo’lishingiz mumkin.
Seminar yakunida barcha ishtirokchilarga qimmatli sovg’alarning taqdim etilishi ijod qilishga, vatanimiz doimo bizni qo’llab-quvvatlashiga mehnatlarimiz hech qachon e’tibordan chetda qolmasligiga ishonchimizni mustahkamladi.
Adabiy anjumanning ilk kuni ustozlardan biri shu so’zni aytgan edi: “Tog’ga kelganlar tog’ bo’lib qaytadi” va bu, albatta, o’z isbotini topdi deb o’ylayman...

©Muxlisa IBROHIMOVA,
Zomin seminari ishtirokchisi
(Badiiy tarjima yo'nalishi)

Yoshlik — taqdirnomamizning oltin sahifasi. Ishonch va imkoniyatlar esa unga berilgan nodir javohirlar-u, betakror ziynatlardir. Muhtaram prezidentimiz qarorlari bilan ijod maktabi oʻquvchilariga berilgan anʼanaviy "Zomin seminari"da toʻgʻridan toʻgʻri ishtirok etish imkoni ham soʻzimizning isbotidir.
    Adabiyot mehri bilan koʻnglimda qad rostlagan nazm qoʻrgʻoni mana shunday omadli oʻquvchilar qatorida boʻlish baxtiga muyassar etdi. Zomin zaminida oʻtgan uch kunim asrlarga alishilmas kun boʻldi. Men nafaqat yangi ijodkorlar, balki oʻzim bilan qaytadan tanishgandek boʻldim goʻyo. Azim togʻlar bagʻrida qalblari, ruhlari bir-biriga qarindosh ijodkorlar oʻzbek adabiyotining tirik afsonalari bilan eng qimmatli lahzalarimizda birga boʻldik. Adabiyot haqidagi anglamlarimga yanada yorqin boʻyoqlar oraladi. Poytaxtdan tashrif buyurgan ustozlarimiz, jumladan, nazm yoʻnalishida bizga rahnamolik qilgan insonlar — Sirojiddin Sayyid, Mahmud Toir, Farida Afruz, Rustam Musurmon, qolaversa, oʻzining maslahatlaridan bir dars oʻlaroq bizni  bebahra qoldirmagan qalami oʻtkir shoir va adabiyot dargʻalari bilan koʻngil tilida dilkash davra suhbatlarini olib borishga musharraf boʻldik.
    "Zar qadrini zargar biladi", deb bejiz aytmaganlar. Zero, soʻz qiymati va qudratiga uning haqiqiy ustasigina munosib taʼrifni bera oladi. Mana shu uch kun mobaynida tutgan yoʻlimda asosiy qurolim, ham hamrohim boʻlmish soʻzning asl mohiyatini uning haqiqiy zargarlaridan anglab yetdim. Qoraqalpogʻiston xalq shoiri Rustam Musurmonning adabiy hayot tajribalari, Sirojiddin Sayyid, Farida Afruzning dilga yaqin soʻzlari, insonga in'om etilgan yoza olmoqlik neʼmatiga munosib ijodkor boʻlish yoʻlidagi maslahatlari yuksak maqsadlarimizni yana bir pogʻonaga yuksaltirdi. Ruhimga yaqin ruhlar orasida oʻzligimni, qulfi dilim kalitini topdim. Bu viqorli tabiat menga faqatgina ilhom, yaxshi kayfiyat ulashibgina qolmay, yangi oilamni, yangi isteʼdodlarni, rango-rang tuyg'ular va sheʼriyatning zamirida yotgan tushunchalarni, pok tuygʻulardan yaralgan pokiza asarlarning asl bahosini qaytadan, ong-u shuurimga singib borar darajada kashf etishimda, adabiy olamning katta sarhadlariga tashlangan ilk va asosiy qadamimdayoq mukammal "kompas"imni topishimda zamin yaratdi.
    Yurakka sigʻmas qaynoq taassurotlar va unga munosib boʻlmoqlik masʼuliyati ila senga rahmat aytaman, Zomin!

©Dilnoza JABBOROVA,
Zomin seminari ishtirokchisi
(Nazm yo'nalishi)

Zomin bu shunchaki har yog'i tog'lar bilan o'ralgan, salqin bir hudud emas. Unda qandaydir yashirin vazminlik, ilohiy dard bor.
Avtobusdan tushishim bilanoq dimog'imga urilgan sof havo va haybati bilan ham cho'chitib, ham allaqanday mayin erkalagan tog'lar hatto ijoddan benasib qolgan odamlarga ham ilhom bera olishini idrok etdim.
Men shoir emasman, ammo bu tog'lar meni hatto she'r yozishga undagandek bo'ldi.
Biz Zominda atigi uch kungina bo'ldik va quchog'imiz to'la sovg'a, xotiralar va bir dunyo ilhom bilan uyga qaytdik. Men shundagina angladim nega bu seminar uchun aynan Zomin zamini tanlanganini. Sababi, ijodkorga erkinlik, toza havo va qalbdosh insonlar kerak. Men bu kunlar davomida o'zimdek bo'lajak yozuvchilar ichida bo'ldim, ular bilan yangi g'oyalar va yaratilajak asarlar haqida fikr almashdik.Bu jarayon hammamizga ko'tarinki ruh va ijodiy rag'bat berdi.
Kelgusida, albatta, asarlarimiz o'zbek adabiyotida yangilik o'laroq xizmat qiladi. Va bunda Zomin seminarining roli juda yuqori.
Hikoyalarim ham endi Zomin chizgilari bilan to'lib toshadi. Bu tog'larning viqori, shabadalarning o'ynoqiligi ham asarlarimda aks etadi. Bizni bunday ijodiy parvozga yo'llagan mazkur seminar tashkilotchilariga o'z minnatdorchiligimni bildirib qolaman.

©Subhidam ABDULHAMIDOVA,
Zomin seminari ishtirokchisi
(Nasr yo'nalishi)

"Sizning xavfsizligingiz davlat tomonidan kafolatlanadi va sizlar davlat himoyasida va tasarrufidasizlar", - bekatda bizni olib ketishlarini kutar ekanman, poytaxtlik va viloyatlik ijodkorlar yetib kelgach, biz sirdaryoliklarga qarata aytgan shu jumlalaridan ta'sirlandim, boisi bizni xavfsizligimiz va manzilga omon - eson yetib olishimiz uchun oldinda yo'l patrul xizmati mashinasi qoʻriqlab ketdi. Avtobusga chiqqanim hamono Zomin nafasi keldi goʻyo. Turli hududlardan kelgan, koʻzlari:"adabiyot, ijod", deya porlagan ijodkorlarni koʻrib dilingiz yayraydi. Ular uchinchi renessans yoshlari! Zomin shahriga kirib borar ekanmiz, purviqor togʻlardan tortib, gul-u rayhonlargacha, maysalar, toshlar - bari menga yuzlanib: "Xush kelibsan, biz seni kutgandik", - deya so'ylayotgan va bag'riga olayotgandek goʻyo.
Ayniqsa, biz kitoblarda oʻqigan afsonaviy adabiyot vakillarini oʻz koʻzimiz bilan koʻrish, ular ila bir davrada boʻlish, suratga tushish, nogoh hovlida yohud liftda uchratib qolib, qisqa boʻlsa-da suhbat qurish, bari bari shirin tushdek. U shunday tushki, uygʻonib ketishdan choʻchiyman.
Ochilish marosimida shoir Farida Afruzning bizga qarab:"Vatan shu yerdan boshlanadi, Vatanni siz kabi ijodkor va bunyodkor yoshlar quradi!", deb aytgan gaplari, undan tashqari, Oʻzbekiston Yozuvchilar uyushmasi raisi, shoir Sirojiddin Sayyidning:"Sizlar bugundan boshlab prezidentimizning jamoasidasizlar, ular bilan birga harakat qilasizlar!", - deya yuksak ishonch bilan toʻlqinlanib soʻzlagan nutqlari biz ijodga tashna qalblarnida toʻlqinlantirib yubordi.
Shoʻbalarga boʻlingach, Badiiy publitsistika sho'basi rahbarlari boʻlgan mahoratli puplitsist Oʻktam Mirzayorov hamda Yozuvchilar uyushmasi Jizzax viloyati boʻlimi rahbari Mehribon Abdurahmonovalar tomonidan olib borilgan yuksak saviyali mahorat darslari, ustozlarning har birimizning ijodiy ishlarimiz bilan erinmasdan tanishib, xato-kamchiliklarini aytib, har birimiz bilan alohida alohida shug'ullanishi, Oʻktam Mirzayorovning: "Yaxshi yozgan yaxshi yozolmaydi, balki, yaxshi oʻqigan yaxshi yozoladi, shuning uchun tanlab oʻqinglar", deya xitob etganlari kelajakda yaxshi puplitsist va professional jurnalist boʻlishimizda poydevor boʻladi, buning uchun ustozlarga  oʻz minnatdorchiligimni bildiraman. Shuningdek, shoir Sirojiddin Sayyid shoʻbamizga tashrif buyurgan chogʻi:"Iya, badiiy publitsistika shu yerda ekan-da, bilasizlarmi, aslida frontda sizlar turasiz va ortingizdan xalqni ergashtirasiz! Yozuvchilikka publitsistikadan qadam qoʻyiladi", deya ishonch bildirshi biz puplitsistlarni yaxshiroq yozishga daʼvat etdi.
Albatta, men ham boshqalar kabi Zominda, azim togʻlar, chinorlar orasida oʻzimni yangitdan kashf etdim, yangi Matlubani yaratdim, bu Matlubaning qoʻlidan adabiyot uchun hali koʻp ishlar kelishini va qila olishini angladim. Yangi hayot, yangi Matluba, yangi doʻstlar bari uchun senga cheksiz tashakkur, Zominjon! Hayot kitobimda Zomin sahifasi zarvaraqlar-la muhrlanib qoldi, hech qachon bu yerdagi oltin damlarni unutmayman. Zero, unutmoq gunoh!

©Matluba SHAKAROVA,
Zomin seminari ishtirokchisi
(Badiiy publisistika yo'nalishi)