Сизлар хоҳлаганча илм ўрганаверинглар. Аллоҳга қасамки, амал қилмагунингизча Аллоҳ сизларга унинг учун ажр бермайди. Аҳмоқлар ҳиммати ривоят қилиш, уламолар ҳиммати риоя қилишдир.

Ўлимни бир тавоққа солиб бозорда сотадиган бўлсалар эди, уни охиратни севадиганлар олган бўларди.

Оғизларингиз Қуръон йўлидир, уни мисвок билан тозалангиз.

Одамларга одамларнинг ёқимлироғи одамлардан беҳожат бўлгани ва улардан ҳеч нарса сўрамайдиганидир. Одамларга одамларнинг ёқмайдигани уларга муҳтож бўлганидир.
Аллоҳ учун одамларнинг суюмлироғи Аллоҳга муҳтож бўлгани ва Ундан сўрагани, Аллоҳга одамларнинг ёмонроғи Ундан беҳожат бўлгани ва ҳеч нарса сўрамаганидир.

Гар эрса қалблар Холиқин зикридин мосуво,
Алар жасад ичидин жой олган тош каби гўё.

Ҳамманинг олдида одамлардан уялганингиз сингари ёлғиз қолганда ҳам Аллоҳ таолодан ҳаё қилинглар.

Макоримул – ахлоқ (юксак хулқ) қуйидаги ўн хислатдан иборатдир: саховат ва ҳаё, ростгўйлик ва омонатни жойига бериш, камтарлик ва рашк, шижоат ва ҳалимлик, сабр ва шукр.

Икки киши бесамар иш қилган ва бенаф ташвиш чеккан: бири – бойлик тўплаб, фойдалана билмаган ва иккинчиси – илм ўрганиб, унга амал қилмаган.

Ёки илмли бўл, ёки илмга таяниб иш тутадиган бўл, лоақал илмни тинглаб эшитадиган бўл, аммо тўртинчиси бўлма, чунки касодга учраб ҳалок бўласан.

Киши ўзи билан Аллоҳ ўртасидаги алоқасини яхшиласа, Аллоҳ ҳам бандалари ва унинг ўртасидаги алоқасини яхшилайди.

Илм молдан яхшидир, у сени муҳофаза қилади, молни эса сен қўриқлайсан. Илм ҳоким, мол маҳкумдир. Мол нафақа қилиш билан камайса, илм зиёда бўлади.

Ҳар ким ўз нафсига насиҳат қилмоққа қуввати етса, ўзгаларга ҳам насиҳат қилмоққа қудрати етади.

Тўрт ерда тўрт нарсадан сақланинг: амал ичида риёдан, олар вақтида таъмадан, бермоқ вақтида миннатдан ва ҳосил вақтида бахилликдан!

Ақлини ишлатган одам ақллидир. Бошқаларнинг ҳам ақлини ишлатган одам ундан-да ақллироқдир.

Кимда-ким ғаразгўйлик жилови билан бир нарсага эришишга ҳаракат қилар экан, у шу истагига эришолмайди, ҳатто ажали ҳам етмай ўлиб кетади.

Ҳақиқий бойлик шуки, ўз тенгиларингдан беҳожат бўласан. Ҳақиқий йўқсиллик эса ўз тенгиларингга муҳтож бўласан.

Умид хавф аҳлининг қувватидир!

Ҳар ким Аллоҳдан қўрқса, барча нарса ундан қўрқар. Ҳар ким Аллоҳдан қўрқмаса, ҳеч нарса ундан қўрқмас. Банда Аллоҳдан қандай қўрқса, унга дунё ва охиратда шундай манфаат бўлади!

Тоат аҳли ўлса тирилади, гуноҳ аҳли тириклигида ўликдир.

Гуноҳни тарк қилмоқ уч нарсадандир. Аввало, дўзах қўрқувидан; иккинчиси, жаннат умидидан; учинчиси, Аллоҳнинг фазлу карамидан.