🇨🇳 Çin beşinci nəsil J-20 qırıcılarının istehsal gücünü iki dəfə artırıb.

Pekin hava üstünlüyü uğrunda ABŞ-la rəqabət aparmaq niyyətindədir.

Bu məqsədlə J-20 üçün ən vacib komponentləri istehsal edən müasir və qeyri-adi “Dark Factory” zavodu istifadəyə verilib.

Diqqətçəkən məqam odur ki, bu müəssisə işıqsız fəaliyyət göstərir. Zavod tam avtomatlaşdırılıb və bu model təyyarələr üçün əsas ehtiyat hissələrinin istehsal səmərəliliyini iki dəfə artırıb.

🇮🇷 İran Hörmüz boğazından keçən gəmilər üçün “Hormuz Safe” adlı sığorta saytı istifadəyə verib.

İranda Hörmüz boğazından keçən dəniz yüklərinin sığortalanması üçün nəzərdə tutulan xüsusi “Hormuz Safe” platforması işə salınıb.

Elektron platformanın qaydalarına əsasən, müştərilərə sığorta polislərinin operativ rəsmiləşdirilməsi və kriptoqrafik təsdiq imkanı təklif olunur.

Qeyd olunur ki, bu mexanizm Fars körfəzi, Hörmüz boğazı və ona bitişik su yolları ilə daşınan yüklərə şamil edilir.

Xüsusilə vurğulanır ki, platforma çərçivəsində bütün sığorta ödənişləri rəqəmsal valyutada həyata keçiriləcək.

🇬🇧 Böyük Britaniyanın Baş naziri Starmer yaxın müttəfiqlərinə istefa vermək niyyətində olduğunu və gedişi üçün “nizamlı qrafik” hazırladığını bildirib.

Bu barədə “Daily Mail” yazır.

Britaniya hökumətindəki mənbə nəşrə bildirib ki, Starmer “siyasi reallığı anlayır” və hakimiyyət daxilindəki hazırkı böhranı “davamlı olmayan” vəziyyət hesab edir.

Onun sözlərinə görə, baş nazir “ləyaqətlə və öz şərtləri ilə” getmək istəyir.

Məqalədə iddia olunur ki, Leyboristlər Partiyası daxilində mümkün istefa bəyanatının vaxtı artıq müzakirə edilir.

Bununla belə, Starmerin bəzi müttəfiqləri onu iyunun 18-də Makerfild dairəsində keçiriləcək aralıq seçkiləri gözləməyə çağırırlar. Həmin seçkidə Mançester meri Endi Bernhem namizəd ola bilər. O, Starmerin mümkün varislərindən biri kimi göstərilir.

Qəzetin yazdığına görə, Bernhemin tərəfdarları isə Starmerin gedişini vaxtından əvvəl elan etməsinin kampaniyanı çətinləşdirə biləcəyindən ehtiyat edirlər.

Merin müttəfiqlərindən biri bildirib ki, onlar üçün seçkiləri bu şüarla aparmaq daha sərfəlidir: “Endiyə səs versəniz, o, Vestminsterə gələcək və Starmeri Dauninq-stritdən çıxaracaq”.

🇮🇷 İranda kütləvi manipulyasiyanın yeni forması: Boş hərbi mundirə sitayiş

İranda keçirilən kütləvi aksiya zamanı ölkə rəhbərliyi cəmiyyətə təsir göstərmək üçün növbəti qeyri-adi üsula əl atıb. Mitinq iştirakçılarının qarşısına ləğv edilmiş generallardan birinin boş hərbi geyimi çıxarılıb və kütlənin bu mundirə ehtiram nümayiş etdirməsi təşkil olunub.

Uzun illərdir davam edən ideoloji təbliğatın təsiri altında olan kütlənin boş hərbi formanı alqışlaması və ona sitayiş etməsi Tehrandakı mövcud rejimin ictimai şüuru tamamilə idarə etmək rıçaqlarına sahib olduğunu nümayiş etdirir.

Bu hadisə İran daxilində tətbiq olunan ideoloji manipulyasiya mexanizmlərinin hansı səviyyəyə çatdığını aydın göstərir. Total təbliğat və sistemli psixoloji təsir nəticəsində cəmiyyətin rasionallıq hissinin itirilməsi regional təhlükəsizlik kontekstində ciddi risk amilidir.

Rəsmi Tehranın bu cür irrasional metodlarla daxili auditoriyanı mobilizasiya etmək və radikallığı qoruyub saxlamaq cəhdləri, onun xarici siyasətdə də proqnozlaşdırıla bilməyən və aqressiv addımlar atmaq potensialının hələ də yüksək olduğunu sübut edir. Bu vəziyyət Cənubi Qafqaz regionu, xüsusilə Azərbaycan ilə sərhəddə gərginliyin saxlanılması fonunda ideoloji kütlənin hər an kənar hərbi-siyasi hədəflərə yönəldilə biləcəyi riskini artırır.

🇺🇸 ABŞ hərbi-nəqliyyat aviasiyasını Yaxın Şərqdən çıxarır ABŞ Silahlı Qüvvələri Yaxın Şərq regionundakı hərbi-nəqliyyat təyyarələrinin böyük hissəsini kütləvi şəkildə təxliyə etməyə başlayıb.

Hərbi ekspertlər Vaşinqtonun bu addımını regionda gərginliyin pik həddə çatması fonunda zəruri təhlükəsizlik tədbiri kimi qiymətləndirirlər. Mütəxəssislərin qənaətinə görə, bu qərar İranla gözlənilən mümkün genişmiqyaslı müharibə zamanı strateji aviasiya parkının hədəfə gəlməsi və ciddi itkilərə məruz qalması riskini minimuma endirmək məqsədi daşıyır.

Pentaqonun loqistika və təchizat baxımından mühüm əhəmiyyət kəsb edən bu resursları geri çəkməsi Yaxın Şərqdə böyük hərbi toqquşmanın qaçılmaz olduğunu və ABŞ-nin müdafiə xarakterli preventiv addımlara keçdiyini göstərir.

Bu proses Cənubi Qafqaz regionu, xüsusilə Azərbaycan üçün də ciddi siqnallardan xəbər verir. İranın daxil olacağı böyükmiqyaslı regional müharibə qonşu dövlətlərin təhlükəsizlik arxitekturasına birbaşa təsir edəcək, qaçqın axını və logistik xətlərin qırılması kimi riskləri aktuallaşdıracaq.

Eyni zamanda, regionda yaranacaq güc boşluğu regional sabitliyə təhdid yaradan destruktiv qüvvələrin aktivləşməsinə şərait yarada bilər.