"Халққа холис хизмат қилиш учун нима етишмаяпти?" — Олий суд раиси

Жиззах вилояти судларининг янги биноси тантанали равишда фойдаланишга топширилди.

Олий суд раиси Бахтиёр Исломов бинода яратилган шароитлар билан танишар экан, халққа холис ва адолатли хизмат кўрсатишда нима етишмаётганини аниқлаш мақсадида ходимларни саволга тутди.

Таъкидлаш жоизки, сўнгги вақтларда суд тизимида судьялар адолатли ва холис қарор чиқаришда турли қийинчиликлар ва тўсиқларга дуч келмоқда. Баъзи ҳолатларда ташқи таъсирлар ва манфаатдор шахслар судьяларнинг мустақил ишлашини чеклаб, адолат қарорларини чиқариш жараёнига салбий таъсир кўрсатиши мумкин. Бу эса суд тизимида холислик ва самарадорликни таъминлашни мураккаблаштирмоқда.

Ҳозирча энг катта муаммо — судьяларга ҳуқуқий ва амалий шароитлар етишмаслиги ҳамда уларнинг мустақиллик ва холислик тамойиллари самарали таъминланмаслиги.

Telegram I Facebook I YouTube I Instagram

Ургутда ҳоким ёрдамчиси ва адвокатга нисбатан жиноят иши қўзғатилди

Самарқанд вилояти Ургут туманида тиббиёт бирлашмасида аниқланган 61 млн. сўмлик камомад бўйича прокуратура томонидан Жиноят кодексининг 167-моддаси (ўзлаштириш ёки растрата) бўйича жиноят иши қўзғатилди.

Тумандаги маҳалла фуқаролар йиғинидаги ҳоким ёрдамчиси мазкур ишда гумонланувчи шахснинг қисмига тегишли масалани танишлари ёрдамида ижобий ҳал қилиб бериш эвазига 2 500 АҚШ доллари олган вақтда Давлат хавфсизлик хизмати ходимлари томонидан ушланди.

Тадбир давомида шу пуллар маҳаллий адвокатлик бюроси адвокатга берилиши кераклиги аниқланиб, адвокат ҳам 2 500 АҚШ долларини олган вақтда ушланди. Адвокат мансабдор танишлари орқали жиноят ишини гумондор шахсга тегишли қисмини ЖПКнинг 84-моддаси билан тугатиб беришни ваъда қилган.

Ҳозирда ҳоким ёрдамчиси ва адвокатга нисбатан Жиноят кодексининг 168, 28 ва 211-моддалари бўйича жиноят иши қўзғатилиб, тергов ҳаракатлари олиб борилмоқда.

Маълумки, ҳоким ёрдамчиси муқаддам ЖКнинг 167-моддаси бўйича, адвокат эса 168-моддаси бўйича судланган бўлишига қарамасдан, ўз хатоларидан хулоса чиқармаган.

Telegram I Facebook I YouTube I Instagram

"Қўлингиз дард кўрмасин, азиз шифокорлар" – президент тиббиёт ходимларини касб байрами билан табриклади

Президент Шавкат Мирзиёев 8 ноябрь — Тиббиёт ходимлари куни муносабати билан соҳа вакилларини самимий табриклади. Давлат раҳбари халқ саломатлигини муҳофаза қилаётган шифокор ва тиббиёт ходимларига миннатдорлик билдириб, уларнинг меҳнати орқали мамлакатда тиббиёт тизими янги босқичга кўтарилаётганини таъкидлади.

Президент сўзларига кўра, сўнгги йилларда соҳага ажратилаётган маблағлар 6 баробар ошган, 490 та муассаса қайта ташкил этилган, 350 та мустақил oilaviy поликлиника фаолияти йўлга қўйилган. Бирламчи тиббий ёрдамнинг янги модели жорий этилди, юқори технологияли хизматлар минтақаларгача етказилди.

2017 йилдан буён оналар ўлими 21 промилледан 11 промиллеге, чақалоқлар ўлими 11,5 промилледан 7,8 промиллеге тушган. Тиббиётда рақамлаштириш жараёнида DMED ягона электрон платформа ишга туширилиб, 36 млн нафар фуқаронинг маълумотлари киритилди.

Шунингдек, хусусий клиникалар сони 3,5 мингдан 9 мингга етди, фармацевтика ишлаб чиқариши 1,4 трлн сўмдан 6,3 трлн сўмга ошди. Президент таъкидлаганидек, тиббиёт олий таълим муассасалари ичида Тошкент давлат тиббиёт университети ташкил этилди, Самарқанд университети эса халқаро рейтингда ўз ўрнига эга бўлди.

Давлат раҳбари шифокорларнинг соғлом миллат барпо этишдаги хизматларини юксак баҳолаб, уларга сиҳат-саломатлик, бахт ва фаолиятларида катта муваффақиятлар тилади.

“Қўлингиз дард кўрмасин, азиз шифокорлар”,

— дея табрик сўзини якунлади президент Мирзиёев.

Telegram I Facebook I YouTube I Instagram

Андижонда вояга етмаган қизлар жанжали бўйича текширув бошланди

Ижтимоий тармоқларда Андижон шаҳрида бир қизни бошқа қизлар гуруҳ бўлиб ургани акс этган видео тарқалди. Вилоят ички ишлар бошқармаси мазкур ҳолат юзасидан расмий изоҳ берди.

Маълум қилинишича, воқеа 7 ноябрь куни Андижон шаҳрининг “Мустақиллик” маҳалласидаги кўп қаватли уй олдида содир бўлган. Шу маҳаллада яшовчи вояга етмаган Е.М. ва Шўрбулоқ маҳалласида истиқомат қилувчи Й.Д. ўзаро келишмовчилик сабаб жанжаллашган. Жанжалга Й.Д. билан бирга бўлган яна уч дугона ҳам аралашиб, Е.М.га тан жароҳати етказишган.

Ҳозирда воқеа юзасидан Андижон шаҳар ИИО ФМБ томонидан терговга қадар текширув ишлари олиб борилмоқда.

Шунингдек, вояга етмаган Й.Д., Ш.Б., А.И. ва И.М.ларнинг ота-оналарига нисбатан Маъмурий жавобгарлик тўғрисидаги кодекснинг 47-моддасига асосан маъмурий баённомалар расмийлаштирилган.

Эслатиб ўтамиз, бундан олдин Андижон шаҳридаги 10-мактабда ўқийдиган қизлар тунги клубларда ишлаётгани ҳақида хабар берилганди. Уларнинг хулқи ва хатти-ҳаракатлари юзасидан бир неча бор профилактик суҳбатлар олиб борилган.

Шунингдек, Самарқанд вилояти Ургут туманидаги 41-умумтаълим мактаби 9-синф ўқувчи қизлари жанжаллашгани хабар қилинган эди.

Telegram I Facebook I YouTube I Instagram

Бир ярим йилда 400 дан ортиқ шахс экология билан боғлиқ жиноят учун судланган

Экология ва атроф-муҳитни муҳофаза қилиш соҳасидаги ҳуқуқбузарликлар Олий суд ахборот хизмати томонидан таҳлил қилинди.

Маълумотга кўра, 2024–2025 йилнинг 1-ярмида судлар томонидан 220 та жиноят иши кўриб чиқилиб, 403 нафар шахс жавобгарликка тортилган. Энг кўп жиноятлар Қорақалпоғистон Республикаси ва Самарқанд вилояти ҳиссасига тўғри келган.

Асосий ҳолатлар:
🔵ҳайвонот ва ўсимлик дунёсига зиён етказиш,
🔵ўрмон ва экинзорларни шикастлаш ёки нобуд қилиш ҳолатлари.

Шу билан бирга, судлар томонидан 2 737 нафар шахсга нисбатан 2 466 та маъмурий иш кўрилган.

Бу ҳолатлар асосан сувдан фойдаланиш, ов ва балиқ овлаш қоидаларини бузиш ҳамда рухсатсиз қазилма қазиш билан боғлиқ бўлган.

Telegram I Facebook I YouTube I Instagram

Марҳамат тумани ҳокимлигида сунъий интеллектли виртуал мухбир иш бошлади

Андижон вилоятининг Марҳамат тумани ҳокимлиги матбуот хизмати ахборот технологияларини жорий этишда янги босқични бошлади.

Туман ҳокимлигида эндиликда янгиликлар сунъий интеллект асосида ишловчи виртуал мухбир орқали тайёрланиб, аҳолига тақдим этилади.

Лойиҳа мақсади — ахборотни тез, аниқ ва замонавий усулда етказиш, шу билан бирга ҳудудда рақамли ислоҳотларни жадаллаштиришдан иборат.

Марҳамат тумани ҳокимлиги бу ташаббус орқали оммавий ахборот соҳасида сунъий интеллект технологияларини амалда қўллаш бўйича илк тажрибалардан бирига айланди.

Telegram I Facebook I YouTube I Instagram

Зироат Мирзиёева — онкология соҳасидаги энг нуфузли 100 нафар аёл қаторида

OncoDaily халқаро платформаси саратон касаллигига қарши кураш соҳасидаги жаҳон етакчилари орасидан "Онкология соҳасидаги энг нуфузли 100 нафар аёл" рейтингини эълон қилди. Ушбу нуфузли рўйхатдан Ўзбекистон Республикасининг Биринчи хоними, "Замин" халқаро жамоат фонди Васийлик кенгаши раиси Зироат Мирзиёева ҳам ўрин олди.

Экспертлар Зироат Мирзиёеванинг болаларда онкологик касалликларни эрта аниқлаш ва даволаш бўйича ташаббусларини илгари суриш, болалар онкологияси соҳасида халқаро ҳамкорликни мустаҳкамлаш ҳамда оғир касалликларга чалинган болаларнинг яшовчанлик даражасини ошириш бўйича глобал ҳаракатни қўллаб-қувватлашдаги фаолиятини алоҳида эътироф этди.

Шунингдек, у 2025 йил сентябрь ойида БМТ Бош Ассамблеяси доирасида Жаҳон соғлиқни сақлаш ташкилоти ва St. Jude тадқиқот шифохонаси ҳамкорлигида ўтказилган “Саратон ва бошқа ҳаёт учун хавфли касалликларга чалинган болаларнинг яшовчанлигини ошириш ва азоб-уқубатларини камайтириш бўйича глобал ҳаракат” номли форумга раислик қилган. Форумда у жаҳон ҳамжамиятини саратонга чалинган болаларнинг яшовчанлик даражасини ошириш учун шошилинч чоралар кўришга чақирган.

Зироат Мирзиёеванинг фаолиятида айниқса яшовчанлик кўрсаткичлари паст бўлган мамлакатларда болаларга тиббий ёрдамдан тенг фойдаланишни таъминлаш масалалари муҳим ўрин тутади. У миллий стратегияларни 2030 йилга бориб саратон касаллигига чалинган болаларнинг яшовчанлик даражасини 60 фоизга етказиш мақсадида халқаро дастурлар билан боғлаш орқали Ўзбекистоннинг глобал соғлиқни сақлаш сиёсатдаги нуфузини янада мустаҳкамламоқда.

Зироат Мирзиёеванинг мазкур халқаро рейтингга киритилиши унинг юқумли бўлмаган касалликларга қарши курашни миллий ва глобал даражада кучайтиришга қўшган шахсий ҳиссасининг эътирофи, шу билан бирга, Янги Ўзбекистонда соғлиқни сақлаш соҳасида амалга оширилаётган ислоҳотлар самарадорлигининг яна бир исботидир.

Telegram I Facebook I YouTube I Instagram

Тошкент аэропортида 205 миллион сўмлик дори воситалари контрабандаси фош этилди

“Тошкент-АЭРО” Ихтисослаштирилган божхона комплекси “Тошкент халқаро аэропорти” чегара божхона пости ходимлари томонидан Деҳлидан келган йўловчининг ҳийла билан дори воситаларини яширинча олиб киришга уриниши фош этилди.

Маълумотларга кўра, йўловчи аэропортнинг келиш залида Умра сафарида бўлган зиёратчилар ҳам қайтаётганини кўриб, улар орасига аралашиб назоратдан четлаб ўтиш мақсадида ҳийла ишлатган. У ҳожатхонада кийимини алмаштириб, ўзини зиёратчи сифатида кўрсатишга уринган.

Бироқ чегара божхона пости ходимлари унинг хатти-ҳаракатларидан шубҳаланиб, назоратни кучайтирди. Текширув натижасида йўловчининг чамадонида турли номдаги 1 798 дона дори воситаси топилди. Уларнинг умумий қиймати салкам 205 миллион сўм экани аниқланди.

Ҳозирда мазкур ҳолат юзасидан тегишли божхона текширувлари ва ҳуқуқий чоралар кўриш ишлари олиб борилмоқда.

Telegram I Facebook I YouTube I Instagram

⚡️Водилда шов-шувли можаро: Фарғонада тиббиёт муассасаси ноқонуний равишда хусусий қўлга ўтказиляптими?

8 сентябрь куни номаълум шахслар санаторий ҳудудига келиб, муассаса “уларнинг ихтиёрига ўтгани”ни билдириб, ходимлар ва беморлардан биноларни бўшатишни талаб қилган.

Фарғона туманида жойлашган Фарғона вилоят болалар фтизиатрия сихатгоҳи “Водил” фаолияти катта хавотирлар остида. Шу сабабдан сихатгоҳ ходимлари Президент Администрацияси раҳбари Саида Мирзиёевага мурожаат йўллади.

Ходимлар сўрови:

1. Фарғона вилояти болалар фтизиатрия сихатгоҳи “Водил” фаолияти билан боғлиқ Давлат-хусусий шерикчилик битимини қонуний жиҳатдан текшириб чиқиш,

2. Агар у қонун талабларига зид тузилган бўлса, битимни бекор қилиш чораларини кўриш,

3. Муассаса ходимларининг меҳнат ва ижтимоий ҳуқуқларини ҳимоя қилиш масаласини шахсан назоратингизга олишингизни сўраймиз.

Ҳурмат билан, Фарғона вилояти болалар фтизиатрия сихатгоҳи “Водил” ходимлари

👉 https://youtu.be/Mq3XiDpENv8