Ўзбекистонда Ҳаж зиёрати 364-сонли ҳукумат қарорига асосан, Дин ишлари бўйича қўмита ва Саудия Арабистони Ҳаж ва Умра вазирлиги ўртасида ҳар йили имзоланадиган шартнома асосида Ўзбекистон мусулмонлари идораси томонидан амалга оширилади. Бу ҳақда эслатган Дин ишлари бўйича қўмитага кўра, Ҳаж зиёратига олиб бориш фаолияти билан бошқа ташкилотларнинг шуғулланишига йўл қўйилмайди.

Умра зиёрати учун эса Ўзбекистон мусулмонлари идораси ҳузуридаги Ҳаж-умра маркази ҳамда 12 та тадбиркорлик субъектларига лицензия берилган.

Маълум қилинишича, айни кунларда Дин ишлари бўйича қўмита ҳамда мутасадди идоралар Ҳаж ва Умра зиёратларини тартибга солиш бўйича чоралар кўрмоқда.

Хусусан, сўнгги икки ойда Ҳаж ва Умра зиёратини қонунга хилоф равишда ташкил этишнинг олдини олиш мақсадида ўтказилган текширувларга кўра:

– «Умра» лицензиясига эга бўлмасдан, ушбу хизматни кўрсатаётган 31 та сайёҳлик фирмаси масъулларига нисбатан Жиноят кодексининг 168-моддаси билан жиноят иши қўзғатилди;

– «Лицензиялаш, рухсат бериш ва хабардор қилиш тартиб-таомиллари тўғрисида»ги қонун талаблари асосида Умра фаолиятини лицензиясиз амалга оширган 24 та турфирмада текширув ўтказилди ҳамда уларнинг 19 тасига 75 млн сўмдан жарималар қўлланди. Улардан 5 таси «Реклама тўғрисида»ги қонунчиликка асосан Рақобат қўмитасига ва ҳуқуқни муҳофаза қилувчи органларга қонуний кўриб чиқиш учун юборилди.