Жорий йил 12 март куни видеоселектор тарзида ўтказилган мазкур йиғилишда Парламент ва Ҳукумат аъзолари, соҳага масъул вазирлик ва идоралар, нодавлат-нотижорат ташкилотлари раҳбарлари ва масъул ходимлар, вилоят, туман-шаҳар ҳокимлари, республика ва ҳудудий идоралараро мувофиқлаштирувчи штаб ва ишчи гуруҳ аъзолари иштирок этишди.

Йиғилишда Ўзбекистон Республикаси президентининг 03.01.2025 йилдаги “2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш чора-тадбирлари тўғрисида”ги ПҚ-1-сон қарори ижроси аҳволи, йўл қўйилган хато ва камчиликлар бирма бир кўриб чиқилди.

Шунингдек, Коррупцияга қарши курашиш Миллий кенгаши йиғилишида давлат раҳбари томонидан берилган топшириқлар ижросини ташкил этиш масалалари муҳокама қилинди.

Танқидий руҳда ўтказилган йиғилишда жиноятчилик ва ҳуқуқбузарликларнинг олдини олишда йўл қўйилган хато-камчиликлар аниқ рақамлар ва мисолларда кўрсатиб ўтилиб, галдаги вазифалар белгилаб олинди.

Жумладан, намунали хавфсиз йўлак ва кўчаларни ташкил этиш, маҳаллаларни тўлиқ видеокузатув билан қамраб олиш, аҳолининг ҳуқуқий онгини ошириш, “маҳалла еттилиги” томонидан “ижтимоий профилактика” тамойили асосида фаолиятни янада жадаллаштириш, ҳар бир “қизил” ва “сариқ” тоифали маҳаллалар бўйича манзилли чора-тадбирлар ишлаб чиқиш бўйича масъулларга аниқ топшириқлар берилди.

Тадбир давомида ҳудудлар ҳамда республика идора ва вазирликларнинг раҳбарлари, масъул ходимлари тушунтириш ва ахборотлари эшитилди.

Республика идоралараро йиғилиш якунида мавжуд камчиликларни бартараф этиш ва муҳокама қилинган соҳаларда фаолият самарадорлигини оширишга қаратилган қарор қабул қилинди.

Францияга давлат ташрифи билан борган Шавкат Мирзиёев Эммануэл Макрон билан Парижда ўтказган музокаралар якунида икки мамлакат ўртасида стратегик шериклик муносабатларини ўрнатиш тўғрисида қарор қабул қилди.

Иккала давлат раҳбарлари савдо-иқтисодий ва инвестиция ҳамкорлигини кенгайтириш, Франциянинг етакчи компаниялари билан қўшма лойиҳаларни амалга ошириш масалаларини муҳокама қилди. Ўтган йилда товар айирбошлаш ҳажми илк бор 1 миллиард евродан ошгани, қўшма корхоналар сони эса 4 баробарга кўпайгани қайд этилди.

Музокаралар натижасида стратегик шериклик тўғрисидаги декларация қабул қилинди, мутахассислар ва талабалар ҳаракатчанлиги ҳақида ҳукуматлараро битим имзоланди.

Шунингдек, икки мамлакат ўртасида 6,5 млрд евро қийматидаги инвестиция ва инновация ҳамкорлик дастури тасдиқланди. Франция тараққиёт агентлиги билан 2026-2030 йилларга мўлжалланган ҳамкорлик келишуви ҳам имзоланди.

Шу билан бирга, Ўзбекистон-Франция университети ташкил этиш тўғрисидаги битим, реадмиссия келишуви, мусиқа, кино ва театр соҳаларида ҳамкорлик ҳамда Тошкент ва Париж ўртасида шериклик муносабатларини ўрнатиш тўғрисидаги баённома ҳам имзоланди.

Ўзбекистон президенти Шавкат Мирзиёев Франциянинг энг олий мукофоти Фахрий легион ордени билан тақдирланди. Юксак мукофотни Шавкат Мирзиёевга Франция Президенти Эммануэль Макрон тантанали равишда топширди.

Фахрий легион ордени (Ordre national de la Légion d’honneur) – Франциянинг энг олий давлат мукофоти бўлиб, у 1802 йил 19 майда Наполеон Бонапарт томонидан таъсис этилган.

Фахрий легион ордени соҳиблари орасида қуйидагилар бор:

Шарль де Голль – генерал ва Франция президенти
Уинстон Черчилль – Буюк Британия бош вазири
Луи Пастер – олим, микробиология асосчиси
Жан-Поль Бельмондо – француз актёри
Александр Дюма (ота) – ёзувчи, «Уч мушкетёр» асари муаллифи
Юрий Гагарин – биринчи космонавт
Нельсон Мандела – Жанубий Африка Республикаси президенти
Франклин Рузвельт – АҚШ президенти
Елизавета II – Буюк Британия қироличаси
Ли Куан Ю – Сингапур бош вазири

Эндиликда Ўзбекистон президенти ҳам ушбу рўйхатдан жой олди.