ЗАПРАШЭННЕ да МАЛІТВЫ: -за айца Ігара Кандрацьева, які сёння (4.11.2022), у судзе ў Брэсце атрымаў 12 сутак арышту; - за Ігара Бараноўскага, які атрымаў 15 сутак

5 лістапада 2022: ПАПА ФРАНЦІШАК да католікаў АРАВІІ: У час св. Імшы на нацыянальным стадыёне Авалі ў Бахрэйне Папа заахвоціў каталікоў (розных абрадаў), якія прыбылі з Бахрэйна, Кувейта, Катара і Саудаўскай Аравіі, а таксама з іншых краін Персідскага заліва, "любіць заўсёды, любіць усіх".

Вялікая Вячэрня на нядзелю, 6 лістапада
https://cssr.by/2019-03-04-08-41-21/chasaslou/195-vyachernya-uvechary.html

Слава Ісусу Хрысту! 6 лістапада 2022, у Беларускай грэка-каталіцкай Царкве: Нядзеля 22-я, на Боскай Літургіі чытанні Слова Божага: Апостал - Ліст да Галатаў 6:11-18; Евангелле - паводле Лукі 16:19-31.

ГРЭКА-КАТАЛІЦКАЯ ПАРАФІЯ МАЦІ БОЖАЕ ФАЦІМСКАЙ, ГАРОДНЯ
вул. Гараднічанская 32а

РАСКЛАД НАБАЖЭНСТВАЎ
на 7-13 лістапада

панядзелак-чацьвер
18.00 – Літургія св. Яна Залатавуснага
8 лістапада, аўторак
Сабор арханёла Міхаіла і ўсіх бесцялесных сілаў
18.00 – Літургія св. Яна Залатавуснага

12 лістапада, субота
Св. Язафата, архібіскупа Полацкага
18.00 – Літургія св. Яна Залатавуснага

13 лістапада, нядзеля
10.00 – Літургія св. Яна Залатавуснага

Пакуль мы прабываем у гэтым свеце, нам трэба змяніць сваё мысленне! Бо мы гліна ў руках ганчара. Ганчар, калі зробіць начынне, якое ў яго руках крышыцца і ламаецца, лепіць яго нанова. Але калі паставіць яго ў агонь, не можа ўжо больш змяніць яго. Так і мы, пакуль жывём у гэтым свеце, усім сэрцам давайце будзем адварочвацца ад усялякіх нашых грахоў, здзейсненых у целе, каб выкарыстаць дадзены нам час дзеля навяртання і атрымання збаўлення ад Госпада.

Калі пакінем гэты свет, не зможам ужо больш ні вызнаваць нашыя правіны, ні вярнуцца на Божы шлях. Таму, мае браты, выконваючы волю Айца, захоўваючы чысціню, трымаючыся Божых запаведзяў, мы атрымаем вечнае жыццё. Бо Госпад кажа ў Евангеллі: «Калі вы ў малым не былі верныя, хто даручыць вам сапраўднае? Таму кажу вам: “Верны ў малым і ў вялікім верны”» (пар. Лк 16, 10-11). Гэта значыць, захоўвайце чысціню цела, захоўвайце беззаганную пячатку хросту – і атрымаеце жыццё.

Ніхто з вас няхай не кажа, што цела не спазнае суда і што яно не ўваскрэсне. Толькі падумайце: у чым, калі не ў гэтым менавіта целе вы былі адкупленыя і атрымалі духоўны зрок? Дык будзем жа сцерагчы нашае цела як Божую святыню. Як у целе вы былі пакліканыя, таксама ў целе вы і пойдзеце. Калі Ісус Хрыстос, наш Збаўца, будучы перад гэтым духам, прыняў людское цела і такім нас паклікаў, то мы таксама ў гэтым целе атрымаем узнагароду.

Таму будзем любіць адзін аднаго, каб мы ўсе маглі ўвайсці ў Божае Валадарства. Пакуль маем час на аздараўленне, даверымся Боскаму лекару і ахвяруем плату. Якую? Шчырае навяртанне. Будзем праслаўляць Яго не толькі вуснамі, але таксама сэрцам, каб Ён прыняў нас як сваіх дзяцей. Бо Госпад сказаў: «Браты Мае – гэта тыя, хто выконвае волю Майго Айца» (пар. Лк 8, 21).

Невядомы аўтар 2 ст.

8 ЛіСТАПАДА : Сабор арханёла Міхаіла і ўсіх нябесных сіл бесцялесных - свята візантыйскай Царквы ў гонар нябесных бесцялесных сіл на чале з арханёлам Міхаілам. Свята адзначаецца 8 (21) лістапада.
= Устанаўленне свята звязваецца з рашэннем Лаадыкійскага сабора (360 г.), які асудзіў як ерэтычнае пакланенне анёлам як творцам і кіраўнікам свету.
=Выбар дня святкавання абумоўлены наступным:
восьмы дзень месяца служыць указаннем на "дзень восьмы" - Сабор усіх сіл нябесных у дзень Страшнага суда.
=Згодна з Месінскім Тыпіконам (1131 год), як парэмію свята чытаецца фрагмент кнігі Ісуса Навіна аб з'яве яму арханёла Міхаіла (Нав. 5:13-15).

Папа Францішак сустрэўся з Першаіерархам Украінскай Грэка-Каталіцкай Царквы.
7 лістапада 2022 г., падчас адмысловай аўдыенцыі ў Ватыкане Вярхоўны Архіепіскап Кіева-Галіцкі Святаслаў (Шаўчук) распавёў Святому Айцу аб тым, што Украінская Грэка-Каталіцкая Царква засталася блізкай да людзей, а ўсе храмы і будынкі сталі прытулкамі.
Сустрэча праходзіла ў бібліятэцы Апостальскага палаца. Яна стала першай з пачатку вайны.

Як паведаміў сакратарыят Вярхоўнага Архіепіскапа Кіева-Галіцкага, Папа запэўніў у прыхільнасці Святога Пасада міру і заклікаў Украінскую Грэка-Каталіцкаю Царкву быць побач з насельніцтвам.

Першаіерарх Святаслаў падзякаваў Яго Святасці Францішку за ўсё, што было зроблена для спынення вайны, вызвалення закладнікаў і палонных, а таксама атрымаў запэўненне Папы ў тым, што ён не перастае быць побач з украінскім народам у малітве і на справе.

Вярхоўны Архіепіскап прынёс на аўдыенцыю асколак расійскай міны, якая ў сакавіку 2022 года разбурыла фасад грэка-каталіцкага храму ў Ірпіне. Ён падзяліўся тым, што бачыў на тэрыторыях найбольш пацярпелых ад вайны. “Я распавёў Папу аб служэнні нашых біскупаў, святароў, законнікаў і законніц на акупаваных тэрыторыях. Я патлумачыў, што кожны наш сабор, царква і манастыр сталі цэнтрамі прытулку, прыёму і гуманітарнай дапамогі,” - прызнаўся Першаіерарх. -Паводле: Марыя Валодзіна – Vatican News

Папа Францішак моліцца за Украіну і салідарызуецца з кіпрыётамі
Напрыканцы агульнай аўдыенцыі, 9 лістапада 2022 года, Папа заклікаў да малітвы за Украіну і выказаў салідарнасць з кіпрыётамі, якія смуткуюць пасля смерці Хрызастома ІІ.

=“Зноў запрашаю да малітвы за змучаную Украіну. Папросім у Бога міру для людзей, якія пакутуюць, зносяць столькі жорсткасці ад наймітаў, якія вядуць вайну”, - звярнуўся да вернікаў Францішак.

=Яго Святасць Папа Францішак выказаў салідарнасць з народам Кіпра, які аплаквае смерць Архібіскупа Хрызастома II. Прадстаяцель (першаіерарх) Кіпрскай Праваслаўнай Царквы памёр ва ўзросце 81 года. “Ён быў дальнабачным пастырам, чалавекам дыялогу, міралюбівым чалавекам, які імкнуўся спрыяць прымірэнню паміж рознымі супольнасцямі ў краіне. Я з удзячнай любоўю ўспамінаю братэрскія сустрэчы, якія мы мелі на Кіпры падчас майго візіту ў мінулым годзе. Памолімся аб вечным супакоі для яго”, - заклікаў Пантыфік. —Аляксандр Амяльчэня - Vatican News

Грэка-каталіцкія манахі і манахіні з Украіны размаўлялі з Папам

Пантыфік асабіста падышоў да ўкраінскіх кансэкраваных асоб і правёў з імі некалькі хвілін. Ён выказаў заклапочанасць тым, што адбываецца ва Украіне, і падтрымку яе народу, і даручыў яго апецы Маці Божай, запрашаючы прысутных разам памаліцца Вітай, Марыя за мір на іх Радзіме. Таксама Францішак маліўся за дзяцей-сірот і ўсіх, хто пацярпеў у выніку вайны, і прасіў законнікаў маліцца за два народы: украінскі і расійскі. Дзякуючы за падарунак Святы Айцец яшчэ раз назваў вайну Расіі супраць Украіны жорсткай і поўнай нянавісці.

Да чаго нас заклікае Ісус Хрыстос?

Вядучай тэмай гісторыі Старога Запавету з'яўляецца абяцанне Збаўцы. Калі надыходзіць час, Бог выконвае абяцанне: ад Дзевы Марыі нараджаецца Сын Божы - Ісус Хрыстос. Ісус Хрыстос жыў сярод людзей, навучаў, тварыў цуды, лячыў, прапаведаваў Валадарства Нябеснае, пакутаваў, памёр і ўваскрос: «Ён смерцю перамог смерць». Ісус Хрыстос выратаваў чалавека ад граху, смерці, пагібелі. Ён - наш Збаўца.

Са Святога Пісання мы даведаемся, што Ісус Хрыстос жыў, выконваючы дзесяць Божых запаведзяў і заклікаў да гэтага іншых. У прыватнасці, на пытанне багатага юнака: «Што мне рабіць, каб атрымаць жыццё вечнае?» ― Ісус дае ясны адказ: «Ведаеш запаведзі: не пралюбадзейнічай; не забівай; не крадзі; не сведчы лжыва; не крыўдзі; шануй бацьку твайго і маці» (Мр 10, 19). Так Хрыстос паказвае на важнасць выканання гэтых запаведзяў, бо яны з’яўляюцца асновай жыцця кожнага чалавека.

Дзесяць Божых запаведзяў носяць выхаваўчы характар. Яны выхоўваюць чалавека, накіроўваюць яго на шлях, які вядзе да Бога. Толькі з прыходам Божага Сына – Ісуса Хрыста – у поўнай меры раскрываецца таямніца Божай любові. Ісус паказвае новыя, поўныя любові адносіны чалавека з Богам, іншымі людзьмі і светам. Хрыстос дапаўняе закон Старога Запавету ласкай: «Не думайце, што Я прыйшоў адмяніць закон ці прарокаў: не адмяніць прыйшоў Я, але дапоўніць» (Мц 5, 17).

Ісус Хрыстос заклікае нас быць цэласнымі: каб наша вера і поўная надзея на Бога выяўлялася ў нашым светапоглядзе, ацэнцы падзей, рашэннях і ўчынках. Ён пераносіць акцэнт са знешняга выканання запаведзяў і прадпісанняў Закона на ўнутраны свет чалавека: каб Бог стаў цэнтрам яго жыцця, згодна з якім чалавек упарадкоўвае свае памкненні, думкі, шкалу каштоўнасцяў, адносіны і ўчынкі. Каб не сказалі пра нас: «Набліжаюцца да Мяне людзі гэтыя вуснамі сваімі і шануюць Мяне языком; а сэрца іх далёка адлягае ад Мяне» (Мц 15, 8).

Ідучы да Айца, Хрыстос абяцае сваім вучням, што застанецца з імі да сканчэння веку. Гэта абяцанне здзяйсняецца праз спасланне Святога Духа. Ласка Святога Духа робіць нас моцнымі і адважнымі, вучыць, што трэба рабіць, а чаго пазбягаць, каб выканаць Божую волю, каб годна адказаць на Божае пакліканне.

11-12-13 лістапада 2022 -- у гэтыя дні грэка-католікі ў Беларусі ўшаноўваюць святамучаніка Язафата: Пятніца - 11.11.2022 у 18:30 у Мінску ў Парафіі Прав. Язэпа; 12.11 (субота) у Віцебску ў 12:00 і 18:00; 13.11 (нядзеля) у Полацку 10:30. =У нядзелю святкуюць іншыя парафіі ў Беларусі.

ГРЭКА-КАТАЛІЦКАЯ ПАРАФІЯ СВЯТЫХ КІРЫЛЫ І МЯТОДА, БАРАНАВІЧЫ
вул. Шаўчэнкі, 6 (храм Найсвяцейшай Тройцы айцоў-вербістаў)

РАСКЛАД НАБАЖЭНСТВАЎ

НЯДЗЕЛЯ
12.00 – Святая Літургія

Праліў сваю кроў за адзінства Царквы

Паводле цудоўнага намеру Бога Царква ўстаноўлены так, каб у поўні часу магла паказаць сябе як вялікая сям’я, што ахоплівае ўсё чалавецтва. Ведаем, што паводле Божай волі вылучаецца яна, акрамя іншых цудоўных рысаў, таксама экуменічнай еднасцю.

Калі Хрыстос Госпад сказаў: «Дадзена Мне ўсялякая ўлада на небе і на зямлі. Дык ідзіце і навучайце ўсе народы» (Мц 28, 18-19), - не толькі Апосталам даручыў заданне, якое Сам атрымаў ад Айца, але таксама пажадаў, каб калегія Апосталаў утварала дасканалую еднасць, каб унутрана была звязана самым моцным падвойным вузлом: той самай верай і той самай любоўю, якая «вылілася ў сэрцы нашыя праз Духа Святога» (пар. Рым 5, 5), а знешне: кіраўніцтвам аднаго над усімі праз даручэнне Пятру першынства сярод Апосталаў, як трывалага прынцыпу і фундаменту еднасці. Каб гэтая еднасць і згода трывала заўсёды, Бог у сваім Провідзе асвяціў яе нібы адначасова пячаткай святасці і мучаніцтва.

Атрымаць такую хвалу быў годны архібіскуп Полацка Язафат, усходняга славянскага абраду, у якім мы бачым цудоўную хвалу і апірышча ўсходніх славянаў. Бо ніхто больш за яго, напэўна, не праславіў іх імя і не прычыніўся да збаўлення тых народаў, як гэты пастыр і апостал, асабліва, калі праліў сваю кроў за еднасць святой Царквы. Пад уплывам Божага натхнення зразумеў, што найбольш зможа зрабіць для аднаўлення еднасці, калі ў паўсюднай Царкве захавае ўсходні славянскі абрад і базылянскую рэгулу манаскага жыцця.

У клопаце найперш аб еднасці сваіх землякоў з пасадам св. Пятра ўсюды шукаў магчымасці будавання гэтай еднасці і яе ўмацавання. Асабліва даследаваў літургічныя кнігі, якія, паводле рэкамендацый Айцоў, выкарыстоўваліся на Усходзе, таксама адлучанымі хрысціянамі. Пасля такой стараннай падрыхтоўкі распачаў справу па аднаўленні еднасці. Рабіў гэта з такой моцаю, і адначасова лагоднасцю, і так плённа, што ягоныя ворагі назвалі яго «душахватам».

Энцыкліка Ecclésiam Dei папы Пія ХІ

Вялікая Вячэрня на нядзелю, 13 лістапада
https://cssr.by/2019-03-04-08-41-21/chasaslou/195-vyachernya-uvechary.html

Дарадца высокі, сьвяты Язафаце,
Зірні на спаганены край,
Адчуй сябе ў кожнай душы,
Як на сьвяце,
Зьнявераных не дакарай.
У любасьць да бліжніх –
У моцныя латы
Адданцаў сваіх апрані.
Малітваю шчырай жывуць уніяты,
Бароняць свае карані.
Здымі з крывічоў багавейных пракляцьце,
Хай зоркі адлічваюць час.
Заступнік пакутны, сьвяты Язафаце,
Напомні нябёсам пра нас.
+++
Рыгор Барадулін