#ёшлар_ойлиги

Юртимизда 3 июндан ёшларни жисмонан соғлом, маънавий етук инсонлар этиб тарбиялаш, уларнинг илмий ва ижодий салоҳиятини рўёбга чиқаришга кўмаклашиш, ҳуқуқлари, эркинликлари ва қонуний манфаатларини самарали ҳимоя қилиш, мамлакатда амалга оширилаётган демократик, ижтимоий ва иқтисодий ислоҳотларга фаол жалб қилиш мақсадида “Янги Ўзбекистон ёшлари, бирлашайлик!" шиори остида “Ёшлар ойлиги” бошланди.

Шу муносабат билан Бухорода ҳам турли маданий-маърифий, кўнгилочар тадбирлар, учрашувлар ўтказиш режалаштирилган.

Бугун, 8 июнь куни Бухоро шаҳрида Абу Али Ибн Сино номидаги Фавворалар майдонида ташкил қилинган ёшлар сайли вилоятимизда ушбу йўналишда ўтказиладиган тадбирларнинг дебочаси бўлди.

Тадбирда вилоят ҳокими Ботир Зарипов, Давлат хавфсизлик хизмати Бухоро вилояти бошқармаси, Ўзбекистон ёшлар ишлари агентлиги мутасаддилари сўзга чиқиб, мамлакатимизда ёшлар учун яратилаётган имкониятлар ҳақида тўхталдилар.

— Юртимизда қандай ислоҳотларга қўл урилмасин, аввало, сиз каби ёшларга, сизларнинг куч-ғайратингиз, азму шижоатингизга суянилади. Барчангиз яхши биласиз, бугун ўз олдимизга улкан марралар қўйганмиз. Она Ватанимизда Учинчи Ренессанс пойдеворини яратишга киришдик. Ишонаманки, мамлакатимиз тараққиётининг янги пойдеворини яратишда сизлар сингари фидойи ва ватанпарвар ёшларимиз бизга камарбаста бўлиб, муносиб ҳисса қўшасизлар. Ҳар бирингиз жонажон Ватанимиз ва халқимизга сидқидилдан хизмат қилиш орзуси билан ёниб яшайсизлар, – деди вилоят раҳбари.

Шундан сўнг ёшлар ўртасида ўтказилган спорт турлари бўйича Давлат хавфсизлик хизмати кубоги мусобақаларининг туман ва шаҳар босқичи ғолиблари тантанали тақдирланди.

Шу билан бирга мини-футбол ва футбол мусобақаларининг вилоят босқичига расман старт берилди.

Эстрада хонандалари иштирокидаги катта концерт дастури ёшларга бир олам қувонч, унутилмас таассуротлар улашди.

Buxoro.uz | Facebook | Instagram | YouTube