* Муносабат

САМАРҚАНД САММИТИ: ЮРТИМИЗ НУФУЗИ ЯНАДА ОШАДИ

2001 йил 15 июнда беш давлат – Хитой, Қозоғистон, Россия, Тожикистон, Қирғизистон ва Ўзбекистон раҳбарлари томонидан Шанхай ҳамкорлик ташкилотига асос солинган эди. Бугунги кунга келиб Ҳиндистон ва Покистон давлатларининг қўшилиши натижасида 8 мамлакат ШҲТнинг доимий аъзоси ҳисобланади, 4 мамлакат эса кузатувчи мақомига эга (Беларус, Афғонистон, Эрон, Мўғулистон) ва 6 мамлакат мулоқот бўйича ҳамкорлар саналади (Туркия, Озарбойжон, Непал, Шри-Ланка, Камбоджа, Арманистон).
Бугун кўҳна ва ҳамиша навқирон Самарқанд Шанхай ҳамдўстлик ташкилотига аъзо ҳар бир давлатнинг фаровонлиги ва равнақига хизмат қиладиган янги илғор таклиф ҳамда ташаббуслар билан нуфузли анжуманни ўтказишга шай ҳолатда бағрини очиб турибди. Бу эса ҳар Ўзбекистон фуқароси қалбида фахр, ғурур ҳиссини пайдо қилиши шубҳасиз. ШҲТ саммитининг айнан Ўзбекистонда – Самарқандда ўтказилиши дунё миқёсида Ўзбекистон нуфузуни янада юксакларга кўтаради, албатта.
Президентмиз “Шанхай ҳамкорлик ташкилотининг Самарқанд саммити: ўзаро боғлиқликдаги дунёда мулоқот ва ҳамкорлик” номли мақоласида таъкидлаганидек, “Шанхай ҳамкорлик ташкилоти – сиёсий ёки ҳарбий блок эмас, балки очиқ, кенг минтақавий ва глобал ҳамкорлик тарафдори, унда барча иштирокчилар тенг ва бир-бирларининг манфаатларига ҳурмат билан қарайди. Қолаверса, шаклланаётган янги дунёда ШҲТ бугуннинг ва келажакнинг чақириқ ва таҳдидларига қарши самарали мулоқот механизми бўлиши керак”.
Дарҳақиқат, саммитда муҳокама этиладиган масалалар қитъалар, минтақалараро тинчлик ва барқарорликни сақлаб қолиш, транспорт йўлакларини очиш, ўзаро манфаат келтирадиган савдо-иқтисодий муносабатларни кенгайтириш, тараққиёт йўлида ҳамкорликни мустаҳкамлаш ва маданиятлараро дўстона мулоқот борасида муҳим аҳамиятга эга.
Саммитда ШҲТ тарихида муваффақиятларнинг яна бир саҳифаси очилиши кутилмоқда. ШҲТ тарихида илк бор 30 га яқин ҳужжат кўриб чиқилади ва муҳокама этилади. Мазкур ҳужжатлар ташкилотнинг минтақа ва дунё миқёсидаги ўрни ва ролини оширишга хизмат қилади.
Шу жумладан, ёшлар масаласи кенг ўрганилаётган бугунги кунда Президентимиз ташаббуси билан анжуманда рақамли саводхонликни ошириш масаласи кўрилиши кутилмоқда. Дунё миқёсида кенг оммалашаётган бу масала Ўзбекистон учун ҳам жуда муҳим саналади. Бу орқали Ўзбекистон ёшлари мамлакатимизда туриб чет элларга ўз хизматини экспорт қилиши, қўшимча даромадга эга бўлиши мумкин бўлади.
Кейинги яна бир ташаббус – бу узоқни кўзлаб тузилаётган дастур сунъий интеллект бўйича махсус дастур ҳисобланиб, бу ҳозирги кунда Хитой, Россия, Ҳиндистон каби ривожланган давлатларда юқори даражага кўтарилган.
Хуллас, анжуманда имзоланиши кутилаётган ҳужжатлар халқаро миқёсдаги ҳамкорлик истиқболларига кенг йўл очиши, томонлар манфаатларига мослиги, бағрикенглик ва тенглик тамойилларига асосланганлиги билан биз ва ҳамкорларимиз учун ниҳоятда аҳамиятлидир.

Гулнора АСТАНОВА,
БухДУ доценти,
филология фанлари доктори

Buxoro.uz | Facebook | Instagram | YouTube

#SCO2022Samarkand

14 сентябрь куни Шанхай ҳамкорлик ташкилоти саммитида иштирок этадиган давлат ва ҳукумат раҳбарлари Самарқанд шаҳрига ташриф буюрдилар

Buxoro.uz | Facebook | Instagram | YouTube