Assalomu alaykum, aziz buxoroliklar!

Jonajon diyorimizga yangi – 2025-yil kirib kelmoqda.

Mana shu shukuhli damlarda duogoʻy otaxon va onaxonlarimizni, mehribon opa-singillarimizni, barcha sohalar vakillarini, azmu shijoatli yoshlarimizni, chet ellardagi viloyatdoshlarimizni ushbu qutlugʻ ayyom bilan chin qalbimdan samimiy tabriklayman.

Joriy yil yakunlarini sarhisob etadigan boʻlsak, albatta, 2024-yil el-yurtimiz uchun qut-barakali va omadli keldi.

Buxoroda ham Hurmatli Prezidentimiz Shavkat Mirziyoyev rahbarliklarida har bir jabhada asrlarga tatigulik bunyodkorliklar, yaratuvchilik ishlari amalga oshirilganini alohida taʼkidlash lozim.

Xususan, hayotbaxsh dasturlar doirasidagi qurilish hamda bunyodkorlik ishlari viloyat markazidan tortib, eng chekka qishloqlarni ham qamrab oldi. Barcha hududlarda zamonaviy sanoat korxonalari va infratuzilma tarmoqlari, bogʻcha va maktablar, madaniyat va sport obyektlari barpo etildi. Ozodlik, obodlik, farovonlik va qulay tadbirkorlik muhiti tufayli ichki va tashqi investitsiya hajmi, shunga mos ravishda turizm jozibadorligi ham karrasiga oʻsmoqda. Yangi-yangi ish oʻrinlari yaratilmoqda. Natijada aholining hayot darajasi yuksalib bormoqda.

Taʼbir joiz boʻlsa, Yangi Oʻzbekiston orzusi real haqiqatga aylanmoqda. Shubhasiz, bu jarayonlarda har bir buxorolikning oʻz oʻrni va hissasi bor.

Shu oʻrinda erishilayotgan yutuqlarimiz uchun siz, aziz buxoroliklarga chin dildan minnatdorlik bildiraman.

Qadrli buxoroliklar!

Sizlarni Yangi yil bayrami bilan yana bir bor qutlab, barchangizga sihat-salomatlik, oilaviy baxt, xonadonlaringizga tinchlik va fayzu-baraka tilayman.

2025-yilning ham qadami qutlugʻ va barakali kelsin!

Yangi yilingiz muborak boʻlsin, azizlar!

Buxoro.uz | Facebook | Instagram | YouTube