#Taziya

Buxoroda kadastr tizimi og‘ir judolikka uchradi. Bugun, Davlat kadastrlari palatasi Buxoro viloyati boshqarmasi Qorako‘l tumani filiali bosh muhandisi Shukurov Suxrob Tagirovich vafot etdi.

Suxrob Shukurov 1987-yil Buxoro viloyati Qorako‘l tumanida tug‘ilgan. Mehnat faoliyatini 2013-yilda Buxoro viloyati Qorako‘l tumani Yer tuzish va ko‘chmas mulk kadastri davlat korxonasi mutaxassisi sifatida boshladi, keyinchalik ushbu tashkilotning "Bir oyna" bo‘limi mutaxassisi va bosh muhandisi bo‘lib ishladi.

2021-yilda S.Shukurov Davlat kadastrlari palatasi Buxoro viloyati boshqarmasi Bino-inshootlar va davlat yer kadastrini yuritish bo‘limi bosh mutaxassisi lavozimida mehnat qildi. Keyinga taqdiri uni o‘zi tug‘ilib, kamol topgan zamin tomon boshladi hamda bir muddat Davlat kadastrlari palatasi Qorako‘l tumani filiali boshlig‘i vazifasini ham bajardi. 2022-yildan to bugungi kunga qadar Davlat kadastrlari palatasi Buxoro viloyati boshqarmasi Qorako‘l tumani filiali bosh muhandisi lavozimida mehnat qildi.

Suxrob Tagirovich qayerda, qanday vazifada ishlamasin, o‘zining bilim va tajribasi, fidoiyligi bilan bor salohiyatini va tajribasini yurtimiz taraqqiyoti, xalqimiz farovonligi yo‘lida safarbar etdi.

O‘zining kasbiy salohiyati, rahbarlik mahorati, bilim va tajribasi, amaliy tashabbuslari bilan keng jamoatchilik o‘rtasida yuksak hurmat-e’tibor qozongandi.
Jonkuyar kadastr sohasi fidoyisi, kamtarin va samimiy inson Shukurov Suxrob Tagirovichning yorqin xotirasi qalblarimizda hamisha saqlanib qoladi.

Kadastr agentligi hamda Davlat kadastrlari palatasi Buxoro viloyati boshqarmalari jamoasi marhumning yaqinlariga chuqur hamdardlik bildiradi.