Сёння 35 гадоў з дня жорсткага здушэння пратэстаў студэнтаў і рабочых на плошчы Цяньаньмэнь у Пекіне. Па розных ацэнках, тады загінула ад некалькіх сотняў да некалькіх тысяч чалавек.

У гадавіну гэтай трагедыі кітайскія ўлады закрылі доступ да плошчы ў Пекіне, у той час як у Ганконгу паліцыя ўзмацніла патруляванне некаторых раёнаў. Актывісты ў Ганконгу, якія арганізоўвалі акцыю памяці больш за 30 гадоў, знаходзяцца ў турме.

Тайвань – адзіная частка кітайскамоўнага свету, дзе можна адкрыта казаць пра здарэнне ў 1989 годзе.

У гадавіну трагедыі праваабарончая арганізацыя Human Rights Watch апублікавала даклад, у якім адзначае, што кітайскія ўлады спрабуюць заглушыць памяць аб падзеях 35-гадовай даўніны. Апошнім часам урад выкарыстоўвае больш жорсткі новы закон аб нацыянальнай бяспецы супраць тых, хто хоча ўшанаваць памяць пра падзеі на плошчы Цяньаньмэнь.

Ва Францыі пачаліся памятныя мерапрыемствы з нагоды 80-х угодкаў высадкі саюзнікаў у Нармандыі падчас Другой сусветнай вайны. У выніку аперацыі у Заходняй Еўропе зноў быў адкрыты сухапутны фронт супраць нацысцкай Нямеччыны. У цырымоніях, якія праходзяць на месцы высадкі, бяруць удзел лідары ЗША, Францыі, Вялікай Брытаніі, Нямеччыны і Канады. Там таксама знаходзіцца брытанскі кароль Карл III і прэзідэнт Украіны Уладзімір Зяленскі. З-за вайны ва Украіне на цырымонію не запрасілі Уладзіміра Пуціна. З гэтай нагоды расейскі правадыр выказаў незадаволенасць. У 2014 годзе яго запрашалі на 70-годдзе высадкі ў Нармандыі, нягледзячы на анексію Крыму і абвастрэнне стасункаў з Захадам. Фота: bbc.com

Здымкі высадкі саюзных войскаў у Нармандыі 6 чэрвеня 1944 года. Фота: Reuters