Бугун 31 октябрь. 1993 йилнинг 31 октябрида Чироқчининг Олмазорида Бахтинисо деган қизимиз туғилган. Уни бутун республикамиз ёшлари, ижодкорлари яхши танирди. Катта давраларда бўлди, кўпларнинг дуосини олди. Ўзбекистоннинг яхши инсонларини атрофида бирлаштира олди. Беғуборлиги, кўзларининг порлаб туриши, эркаланиб гапириши, қатъияти, ижодга меҳри, қалбининг ҳарорати кўз олдимдан бир-бир ўтяпти. Олмазордаги 66-уйда қанча ижодий суҳбатлар бўлган. Кўп ёшлар йўқлаб келишарди. Соатнинг аҳамияти йўқ. Чунки у ерда бобоси ва момоси ардоғидаги Бахтинисо бор эди. Набиралари учун, унинг меҳмонлари учун очиқ эшиклар бор эди. Тўғри, тиббиёт ходимлари кўп қадам қўйган. Чунки баъзи кун, баъзида тун оғриқлари унинг жисмини шунчалик чарчатган эдики, 103 доимо келиб турди. Аммо бу оғриқлар руҳини эга олмади. Иродаси кучли қиз эди. У адабиётдан куч олди, изланди, ўқиди, гаплашди, тафаккур қилди, шунчаки таслим бўлмади. Ўйлаганларини ёзди, ўчирди, ёзди. Эринмади. Яна ўқиди, яна ёзди. Газеталарга мақола ёзди. Барча нашрларда чоп этилган мақолалар дастасини кўриб, мана ижодкор дедим. Ўзи бўлса ҳам майли, тенгдошлари ва бошқа ижодкорларнинг саҳифаларини тайёрлади. Альманахларга, тўпламларга бошчилик қилди. Бу жисм қандай улгурди экан бунча оғриқ билан дейман. Момоси билан 9 ойлаб шифохонада ётган фурсатлар нималарни ўйлади экан. Елкалари зада бўлмадимикин? Қалбини қандай асради экан? Момоси билан суҳбатлашиб тураман. Унинг билан танловгами, учрашувгами, шифохонагами бирга боришга ўрганиб қолганликлари, набираларининг овозини, ўша жисмни соғинганликларини айтадилар. Момо Сизнинг иродангиз, бобосининг иродаси уни БАХТИНИСО қилди. Агар муҳит яхши бўлса, истеъдодлар албатта юзага чиқишига яна бир бор намуна бўлдингиз. Қанча ручка, қанча қоғоз, қанча китоб олиб келган экансиз уйга бу ижод намуналари чиқиши учун. Сизга раҳмат Ойнахол момо! Бобо Сизга раҳмат! 
У ҳақдаги хотираларим бисёр. Бахтинисо тимсолида халқимизнинг куч-қувватини, меҳрини, саховатини ҳис этдим. Ва қанчалик оғир, қийин ишлар бўлмасин, биргаликда уддалаш мумкинлигига амин бўлдим. Фақат ўлимдан бошқа. Ўша фурсат қанча яхши инсонлар ёрдам беришди. Ўзим гувоҳман, давлат идоралари ҳам бажонидил хайрли ишга бош бўлишди. Банк ходимидан тортиб, ҳокимият вакилларигача. Барчага раҳмат айтаман. Ҳаммани бирлаштира олган куч Бахтинисо эди. 
Аллоҳнинг иродаси. Руҳинг шод бўлсин! Таҳририятга ёзган мактубларинг, компьютерингдаги хотираларинг, ижодкорлар учун ёзганларинг шунчалик кўпки, ўқиб тугатиб бўлмайди. Бахтинисода яхшигина китоблар жамланибди. Уларни неча қайта ўқиб чиқди экан? Сенинг телефонинг ижодкорлар суҳбатини соғингани ҳам бор гап. Атрофингда меҳрни, оқибатни бирлаштира олдинг! 
Бахтинисо бўлганида бу кунни бошқача нишонлар эдик. ОХИРАТИНГ ОБОД БЎЛСИН!
БИЗ СЕНИ СОҒИНДИК, БАХТИНИСО! 
2024 йил 31 октябрь.
@baxtiniso

#Men_bilansan

🎧 🎼 🎧 🎼 🎧 🎼 🎧 🎼 🎧 🎼

Men bilansan,
Kunlarimda ohor bordir,
Ohang bordir,
Kuzlarimda bahor bordir.
Ko‘zlarimda muruvvat bor va zor bordir,
Men bilansan!

Muhabbat bor, muzlarimga olov bergay,
Olam bergay,
So‘zlarimga oro bergay.
Bir yig‘lasam, yupatguvchi birov bergay,
Men bilansan!

Osmonlarda faqatgina qushlar qolmish,
Goh zaminiy, goh samoviy kuchlar qolmish.
Yulduz sanab… tushlarimda tushlar qolmish…
Men bilansan!

Yuragimga yuragini to‘kdi shomlar,
To‘ldi shomlar.
Daryolarga cho‘kdi shomlar.
Meni olib ketgunicha namozshomlar,
Men bilansan,
Men bilansan,
Men bilansan!

✍ Baxtiniso Mahmudova she'ri

Inna lillahi va inna ilayhi rojiun🤲

🎙 Shuhrat Daryo ijrosi

@baxtiniso

Жилва

(Бахтинисо Махмудова шеърига тазмин)

Ҳолимдан бехабар ўтади қуёш,
Десанг эшитдим-ку нур овозини!
Кўкдан танҳо сен деб кўтараркан бош,
Зиёга тўлдириб кошонасини!

Осмон шарқ-у ғарбнинг кўксини кесиб,
Изларкан манзилинг шамолда елиб.
Қонлайверар кўкнинг пешонасини,
То йиқилмас экан пойингга келиб.

Қушлар – табиатнинг эркаларига,
Офтоб дейди: куйланг, суюклим учун.
Юрагини тутиб қолар дарахтлар,
Рашк ўтида лов-лов ёнгайдир очун.

Ариқнинг бўйида мизғиган шамол,
Муҳаббат тушидан уйғонади лол.
Энг сўнгги майсани бир-бир варақлар:
“Севарми-севмасми, айтинг, ойжамол!”

Бунда ҳар не сокин, ҳар не осойиш,
Сезиб қолдим ҳаёт орзиқар жим-жим.
Бемалол ярашар ёнмоқ ҳам куймоқ,
Хижронда табиат тўлғонур сим-сим…

Недандир бир илинж ахтарар хазон,
Келақол, аллалай, чайқатма шамол!
Нечундир руҳимни бўғади қийноқ,
Ишқ боқийдир, демак, боқийдир висол…

Шошилиб йиғлайди кечиккан ёмғир,
Лек шу томчи сабаб жонланар такрор!
Кузги чорбоғларга айланар армон,
Ахир кузакда ғарқ пишади анор!

Тўрт фасл тўзғиган азоби билан,
Ўртаниб Мажнундек тониб ақлимдан!
Кўнглимга тўкилиб тушар, Дунёжон,
Майли, розиман ишқ сўра – Қалбимдан!

Бобур Нусратов

@baxtiniso

Qalblarda qolgan qalam izi...

Boʻlajak adabiyotshunos boʻlganim uchun , adiblar, shoir va shoiralar hayotini oʻrganishim , shifokorning dorilar tarkibini bilishidek gap. Shuning uchun imkon qadar quroli qalam boʻlgan insonlar hayoti bilan tanishishga harakat qilayapman.Shu yaqin kunlarda adabiyotshunoslik fanida domla Boburjon Nusratov, Baxtiniso Mahmudova degan shoira hayoti va ijodi bilan bizni tanishtirdilar. Ochigʻi ilgari bu shoira haqida hech eshitmagan edim. Oʻsha kungi darsta uning sheʼrlari , hayoti haqida yozgan hikoyalarini tinglar ekanman , nimasi bilandir meni oʻziga shaydo qildi. Uyga kelgach hayoti haqida batafsilroq bilishga kirishdim.Buni boshqalar ham bilishini xohlardim.Baxtiniso Mahmudova 1993-yil 31- oktabirda Qashqadaryo viloyati Chiroqchi tumanida dunyoga kelgan.2019-yil esa dunyodan koʻz yumgan.Shu oz yillar ichida , u million yilga tatigulik umr kechirdi menimcha.Bu qisqa umir yoʻlini sizga bayon qilsam , bir kitob boʻladi. Oʻylaymanki uning atiga 26 yil umr koʻrib, ayni bugungi zamonda ijod qilib , ilmli insonlar yodida mangu qolganini bilgach , bu hayot yoʻli qay darajada mashaqqatli boʻlgani , shunga qaramay yetuk shoira barchamizga oʻrnak boʻladigan matonat bilan hayot kechirigani sizni qiziqtirb qoʻyadi va balkim eng soʻngida menga oʻxshab "Baxtiniso Mahmudova hali ham hayot" , degan fikrga kelarsiz.

Miraxmedova Xonzodabegim

@baxtiniso

Men bilansan...

@Baxtiniso Mahmudova

Qalblilar kanali:
@ijod_sarchashmalari

BAXTINISO NOMIDAGI AYOL-QIZLAR ADABIY TANLOVI

Biz asrlar davomida ayol vujudimizda yolg'iz hayot uchun, kimlarningdir hayoti uchun sarsona oqqan qonimizga olov, o'zini o'ylamay urgan yuragimizga SHAXSIYAT tuhfa etmoqchimiz. Bizning millat ayollari, ayniqsa ijodkor ayollari hali o'zini o'zi ham to'liq kashf qilgani yo'q. Biz sizga ana shu OCHILISH imkoniyatini bermoqchimiz.

Tanlovga ham ishtirokchi, ham homiylarni chorlab qolamiz. G'oliblar kamida
1 000 000 so'm bilan taqdirlanadi.

Homiylar uchun karta raqami:9860010102719001

Tanlov nizomi quyida👇👇👇
https://raufparfi.uz/archives/439


@baxtiniso

Мазкур адабий танлов Мустақил ижодкор ёшлар ташаббуси билан ўтказилмоқда. Ташаббускорлар ижодкор аёл-қизларнинг асарларини кенгроқ аудиторияга етказиш, уларни маънавий ва моддий қўллаб-қувватлаш, ижодий ва интеллектуал соҳаларда кучли эканлигини намоён этишни ўз олдига мақсад қилган.

Танлов низоми билан танишиш учун босинг!

Тасалли
Бир кунлар келади сен учун пайдо,
Ғамига ҳам жонинг тўшайсан, кўнглим.
Озорларига ҳеч қилмайин парво,
Сен ҳали бахтиёр яшайсан, кўнглим.

Орзуинг қошингда айланиб юрар,
Бўғзингдан отилиб чиқар ҳасратлар.
Шунда ишончингни қайтариб берар,
Бағринг ҳувиллатиб кетган фурсатлар.

Армонинг рўёга ғарқ бўлар гўё,
Жон таслим қилади аламинг, дардинг.
Пушаймондан ранги заъфарон, сиёҳ,
Сендан йироқлашган умидларингнинг.

Бахт омадлар келар чеҳраси кулган,
Ҳаётинг эгаллай бошлайди баҳор.
Ҳали жамолини кўрсатмай юрган
Ойнинг ёришажак қанча туни бор.

Бир кунлар келади, танҳо сен учун,
Ҳатто хаёл боғинг бўлади сўлим.
Фақат сен ҳозирча чўкиб кетмагин,
Фақат сен ҳозирча йиғлама, кўнглим.
2013

@baxtiniso

Suratga
Kech kuzakda, loy ko’chamizda, yirtiq kalishda tushgan bolalikdagi suratimda allaqanday sehr bor.

Sen kimsan,
Yo nesan?
Bilolmam also,
Qog’ozmi, yurakmi yo yarim ko’ngil?
Qandaydir sirlisan, nigohing tanish,
Kimimgadir o’xshar manov loyli yo’l.

Shu qadar yaqinsan, shu qadar olis,
Ruhim sahifasin titaveraman.
Senga eltar yo’lga xarita topmay,
Men yana adashib ketaveraman.

Bargida osmonni ko’targan daraxt
Kemtik bag’ir-kuzga bo’lganmi malham.
Xazonlar qo’ynida nolasizmi-ey,
Aravasiz qolgan g’ildiraging ham.

Bari… kechagidek yodimda bari,
Mana sen guvohlik berib turibsan.
Ko’zim o’ngida-yu, qalbim qo’rida,
Hech nesiz malika bo’lib yuribsan.

Men kimman?
Hamma narsali faqir,
Eng dardlisi bo’ldim baxtlar ichida.
Armonlar opamday, akamday g’amlar,
Eng baxtlisi bo’ldim, dardlar ichida.

Senga parvo qilmas, meni tushunmas,
Yuragi qashshog’-u, ro’zg’ori boylar.
Bugun sof ko’nglimni egallab oldi,
Yirtiq kalishingga yopishgan loylar.

@baxtiniso

*  *  *
   «Туркияда қолишни истамайман. Ўзбекистонга бориб яшамоқчиман. Менга ёрдам беринглар!..»
   Толгай Али Арслан

Толгай, Ўзбекистон чиндан жаннатдир,
Қуш каби яшайсиз келсангиз, Толгай.
Лекин сиз кетсангиз, дўстингиз кетса,
Айтинг, Ватанингиз кимга суянгай?

Кўргуликлар бисёр менинг момомда,
Қирғинбаротлардан эзилган тани.
Айтар: “Белбоғлилар кўп бўлса элда,
Тупроқ топталмайди, Ватан ўлмайди!”

Тунов кун йўқолди битта жўжамиз,
“Тулки олиб кетган!”- онам йиғлаган.
Қўлга ҳивчин олиб, тўнин ёпиниб,
Катакнинг ёнида ухлади укам.

Саҳар туриб ўзин уйда кўрди-ю,
Кўп тўполон қилди, қичқирди атай:
“Энди мени тулки қўрқоқ деб ўйлар!”..
Негадир юрагим йиғлади, Толгай.

Чунки улғайганди кўзида Ватан,
Чунки унга шу юрт дахлдор эди.
Чунки юрагида ўзидан улкан,
Ўзидан ўзган ор-ғурур бор эди.

Келсангиз, уйимиз тўри сизники,
Ош-нон ҳам берамиз, қорнингиз тўйгай.
Фақат... ичингизда кечган жанглардан
Қаерларга қочиб кетасиз, Толгай?!

@Baxtiniso Mahmudova

Inna lillahi va inna ilayhi rojiun