❗️Күгәрсен районында аварияла дүрт кеше һәләк булған

Күгәрсен районында Магнитогорск-Ира автоюлында ҡурҡыныс авария булған: «десятка» еңел машинаһы ҡаршы һыҙатҡа сыҡҡан һәм «Шевроле Ланос» автомобиленә бәрелгән.

«Шевроле» пассажирҙары - ҡатын, 2021 һәм 2023 йылғы балалар һәләк булған. Сит машинаһы водителе дауаханаға оҙатылған.

«ВАЗ-2110» машинаһының бер пассажиры һәләк булған. Водителе һәм ике пассажиры дауаханаға оҙатылған.

Авария урынында ашығыс хеҙмәттәр эшләй. Фажиғә сәбәптәрен асыҡлау маҡсатында БР ЮХДДИ идаралығы начальнигы Күгәрсен районына юлланған.

Өфөлә билдәле эшҡыуар, йәмәғәт эшмәкәре Илдар Бикҡужин вафат булған

Был хаҡта «Башинформ» агентлығы хәбәр итә.
Илдар Бикҡужин тәүге һөнәре буйынса фотограф, БДУ-ның журналистика факультетын тамамлаған. Туризмды популярлаштырыу менән шөғөлләнде. 2022 йылда уның командаһы «Башҡортостан йөрәгенә инклюзив тур» һәм «Мин башҡорт телен өйрәнәм» проекттары менән Башҡортостан Башлығының Гранттар фондында еңеү яуланы.

Илдар Рәшит улының ҡатыны Венера менән бергә Ростуризм гранты ярҙамында асҡан «Бишбармаҡ» милли аш-һыу оҫтаханаһы өфөләрҙең яратҡан урынына әүерелде.

Башҡортостанда Торатау янында этнокомплекс асыла

Тантана 4 майға планлаштырылған, тип хәбәр итәләр Республика хөкүмәтенән. Этнокомплекс 6 башҡорт тирмәһен берләштерә. Улар халыҡты йыл әйләнәһе ҡабул итә. Бөтә тирмәләр ағас һуҡмаҡтар менән тоташтырылған.

Бөйөк Ватан һуғышының тере шаһиты һәм геройы

Бөгөн «Яңылыҡтар» хеҙмәте хәбәрселәре Ишембай районының Ҡанаҡай ауылында йәшәүсе 100 йәшлек һуғыш ветераны Әүхәҙи Батыргәрәй улы Миңлеғоловта ҡунаҡта булды. Гөлназ Хәйбуллинаның сюжеты «Яңылыҡтар»ҙың бөгөнгө сығарылышында 22:30 сәғәттә ҡарағыҙ.

Ике баланы һыуға батыуҙан ҡотҡарған

Башҡортостан буйынса “Росгвардия” идаралығы хеҙмәткәре, полиция капитаны Айҙар Шәйәхмәтов һыуҙа батып барыусы ике баланы ҡотҡарғаны өсөн Башҡортостан Ғәҙәттән тыш хәлдәр буйынса дәүләт комитеты тарафынан булдырылған “Батырлыҡ өсөн” миҙалы менән наградланды.

2023 йылдың июлендә Айҙар Шәйәхмәтов үҙе йәшәгән Бишбүләк районының Айыт ауылы ихатаһында булғанда, улы йүгереп килеп, Димдә балаларҙың һыуға батыуын хәбәр итә. Айҙар Нуриәхмәт улы шунда уҡ ярҙамға ташлана. Йылғаға килеп етеү менән һыуҙа батмаҫҡа тырышып тыпырсынған ҡыҙ һәм малайҙы күрә. Ир хәлде тиҙ генә баһалап, тәүҙә ҡыҙ баланы ярға сығара, аҙаҡ икенсеһенә ярҙамға ташлана. Бер нисә тапҡыр сумып, һыуға батҡан баланы табып, өҫкә сығара. Малай аңын юғалтҡан була. Медицина хеҙмәткәрҙәре килеп еткәнсе, “Росгвардия” идаралығы хеҙмәткәре балаға тәүге медицина ярҙамын күрһәтә.

Баймаҡта «Хәтер баҡсаһы» акцияһы үтте

«Хәтер баҡсаһы» гөрләп үҫһен. Талҡаҫ күле буйында Дәүләт Думаһы депутаты Зариф Байғусҡаров менән берлектә, төрлө ойошма хеҙмәткәрҙәре, студенттар, мәктәп уҡыусылары, ирекмәндәр ағас ултыртты. Акция һуңында күл буйы сүп‐сарҙан таҙартылды. Экологик өмә хаҡында киләһе яҙмала.

Ыуылдырыҡ сәсеү осоронда балыҡ тотоусыларҙы асыҡлау буйынса рейд башланды

Башҡортостандың Тәбиғәттән файҙаланыу һәм экология министрлығы инспекторҙары күл һәм быуаларҙы тикшерә. Рейдтар «Асылыкүл» тәбиғәт паркында ла үтте.

Ишембай районында йәшәүсе 100 йәшлек Бөйөк Ватан һуғышы ветераны Еңеү яҙын ҡаршыларға әҙерләнә

Курск дуғаһын үткән яугир. Ишембай районы Ҡанаҡай ауылынан 100 йәшен тултырған Әүхәҙи Миңлеғолов сираттағы Еңеү яҙын ҡаршыларға әҙерләнә. 1942 йылдың авгусында һуғышҡа саҡырылып, ул махсус хәрби әҙерлек үткән. Фронт һыҙығында немецтарҙы әсирлеккә алып, ҡаһарманлыҡ күрһәткән, Днепр йылғаһының икенсе ярына сыҡҡанда ҡаты яраланған ветеран менән БЮТ ижади төркөмө осрашты.

Өфө лимонарийында ысын йәй башланды

Хеҙмәткәрҙәр башҡорт сакураһы тип йөрөткән миндаль ҡыуаҡлығы, бугенвиллия һәм башҡа үҫемлектәр шау сәскәгә күмелгән. Өфө лимонарийында барлығы 700 төр үҫемлек менән танышып, ял көндәрен йәшеллектә үткәрергә мөмкин.

Хмелевский ҡалды, Коледов китте

Александр Хмелевский "Салауат Юлаев" менән килешеүен оҙайтты. Уның менән өс йылға контракт төҙөлдө. Уҙған миҙгелдә һөжүмсе юлаевсылар өсөн 67 уйын уҙғарҙы, 27 шайба индерҙе, 29 һөҙөмтәле пас бирҙе.
Павел Коледов менән контракт өҙөлдө. Һаҡсы Өфө командаһы өсөн 2018 йылдан уйнаны. Юлаевсылар менән 355 осрашыуҙа ҡатнашты, тип хәбәр итә клубтың матбуғат хеҙмәте.

Радий Хәбиров Күсмә халыҡтар цивилизацияһы Евразия музейы төҙөлөшө буйынса күсмә кәңәшмә үткәрҙе

Башҡортостан башлығы Радий Хәбиров Күсмә халыҡтар цивилизацияһы Евразия музейы төҙөлөшө буйынса күсмә кәңәшмә үткәрҙе. Шишмә районындағы Турахан кәшәнәһе янында туристарҙы йәлеп итәсәк объектты асыу мәсьәләһе ҡаралды. Музейҙың визит-үҙәге быйыл 6 июлдә асылыр тип көтөлә. Бынан тыш, Радий Хәбиров биләмәләрҙе төҙөкләндереү һәм йәшелләндереү предприятиеһында, «Башҡорт ихаталары» программаһы буйынса яңыртылған биләмәлә булды, урындағы ауыл хужалығы колледжын төҙөкләндереү маҡсаты ҡуйылды.

Башҡортостандан махсус хәрби операция биләмәһенә сираттағы гуманитар ылау оҙатылды

Яугирҙарға гуманитар йөк туплауға тотош республика халҡы ҡушылған, предприятиелар ҙа, эшҡыуарҙар ҙа үҙ өлөшөн индергән. Ылауҙа төҙөлөш материалдары ла, медицина препараттары ла, кейем-һалым да, аҙыҡ-түлек тә бар.

Башҡортостандың исемле хәрби подразделениелары республиканан сираттағы ярҙам алды

123-сө гуманитар ылау адресаттарына барып етте. Башҡортостандың исемле хәрби подразделениелары республиканан сираттағы ярҙам алды. Был юлы ла яугирҙарға башлыса техника, элемтә ҡорамалдары һәм көнкүреш кәрәк-яраҡтары тупланған. Улар хәрбиҙәрҙең дислокация урынына уҡ алып барып етеп тапшырылды.

Бишбүләк районы «Атайсал» проектында әүҙем ҡатнаша

Ошо төбәктә тыуып үҫеп әле илдең төрлө мөйөштәрендә йәшәгән яҡташтар Кесе Ватанының тормошон яҡшыртыуға үҙ өлөшөн индерә. Улар социаль объекттарҙы ремонтлай, Бөйөк Ватан һуғышы ветерандарының иҫтәлеген мәңгеләштереү буйынса эш алып бара, һәйкәлдәрҙе, обелисктарҙы яңырта, балалар, спорт майҙансыҡтары төҙөй, йәшелләндереү буйынса экологик ацияларҙа ҡатнаша. Йәғни, бишбүләктәр ҡайҙа ғына йәшәһә лә, ниндәй генә дәрәжәләргә өлгәшһә лә атайсалынан айырылмай. Иттихат ауылында төҙөлгөн иман йорто ла ошо бәйләнештең бер сағылышы.

87 йәшен туйларға әҙерләнеүенә ҡарамаҫтан, бүләһе өсөн үҙ ҡулдары менән ике ҡатлы йорт һала

Бәхетле ҡартлыҡта. 87 йәшен туйларға әҙерләнгән Фәнис Сруровтың тормошо күптәргә өлгө булырлыҡ. Оло йәшенә ҡарамаҫтан физик күнекмәләр яһай, һигеҙ телдә иркен аралаша, бүләһе өсөн үҙ ҡулдары менән ике ҡатлы йорт һала. Төҙөлөш урынында Фәнис Фазыл улы менән БЮТ ижади төркөмө осрашты.

1 май — Яҙ һәм хеҙмәт байрамы менән!

Күгебеҙ аяҙ, еребеҙ тыныс, донъялар имен булһын! Һәммәгеҙгә ныҡлы һаулыҡ, бәхет һәм именлек теләйбеҙ!

Маҡсатлы йүнәлтмә буйынса ҡабул итеү ҡағиҙәләре үҙгәрә

Яңы норма ил буйынса бөгөндән ғәмәлгә инә. Республика менән идара итеү үҙәгенән хәбәр итеүҙәренсә, хәҙер бер йүнәлтмә менән бер генә ВУЗды һайларға мөмкин. Уҡыу йорто ярты йыл һайын студенттың нисек өлгәшеүе тураһында мәғлүмәт биреп бара. Диплом алып сыҡҡас студентты уҡытыуға заказ биргән ойошмала кәмендә 3 йыл эшләргә кәрәк була.

Һөжүмсе Джошуа Ливо Өфөлә ҡала

"Салауат Юлаев" Канада һөжүмсеһе менән контрактты оҙайтты. Килешеү бер йылға иҫәпләнгән. Джошуа Ливо уҙған миҙгелдә 47 уйында 19 шайба индерҙе, 28 һөҙөмтәле пас бирҙе. Шулай уҡ Александр Хмелевский менән контракт оҙайтылды. Һаҡсы Павел Коледов менән килешеү өҙөлдө. Ҡапҡа һаҡсыһы Илья Ежов карьераһын тамамланы.

Тәүлек эсендә "112 системаһы"на һыу баҫыу тураһында хәбәр килмәгән

Өфө ҡалаһы янында ҙур йылғалар кимәле бер аҙ кәмегән. Күгәрсен һәм Көйөргәҙе райондарында Ағиҙелдә һыуҙың күтәрелеүе теркәлгән, тип хәбәр итәләр Ғәҙәттән тыш хәлдәр буйынса дәүләт комитетынан. Бөгөн Баймаҡ, Шишмә райондарында, Өфө ҡалаһында һыу баҫыуға бәйле 7 хәл даими контролгә алынған.

Радий Хәбиров «Өфө-хеҙмәт ҡаһарманлығы ҡалаһы» стелаһына сәскә һалды

Бөгөн - яҙ һәм хеҙмәт байрамы. Байрам айҡанлы Башҡортостан башлығы Радий Хәбиров, дәүләт һәм йәмәғәт эшмәкәрҙәре «Өфө-хеҙмәт ҡаһарманлығы ҡалаһы» стелаһына сәскә һалды. Яҙ һәм хеҙмәт байрамына арналған тантаналар икенсе йыл инде ошо стела янында башлана. Дуҫлыҡ Монументы аҫтында, Ағиҙел йылғаһы ярында урынлашҡан һәйкәл халҡыбыҙҙың Бөйөк Ватан һуғышы йылдарындағы хеҙмәт батырлығын мәңгеләштерә.