😱Ейәнсура районында йортоноң ҡыйығын таҙартып торған уҙамандың өҫтөнә ҡар өйөмө төшкән. Һаҡ булығыҙ!

Өфөлә ташҡынға әҙерлек башланды

Граждандарҙы һаҡлау идаралығы һәм янғын һағы хеҙмәткәрҙәре һыу баҫыу хәүефе булған биләмәләрҙә йәшәүселәр менән осраша. Ҙур һыу мәлендә хәүефһеҙлек тураһында консультация бирелә. Республика кимәлендә лә ташҡынға әҙерлек бара. Һыу баҫыу хәүефе булған урындар һауанан күҙәтелә, шулай уҡ ҡайһы бер биләмәләрҙә боҙҙо шартлатыу эштәре алып барыласаҡ.

Армия тураһында фейк таратыусының мөлкәте тартып алына

Президент армия тураһында ялған мәғлүмәт өсөн мөлкәтте тартып алыу хаҡында законға ҡул ҡуйҙы. Һүҙ илдең именлегенә ҡаршы енәйәт эшмәкәрлеген финанслау өсөн файҙаланылған йәки тәғәйенләнгән аҡса тураһында бара. Бынан тыш, хәҙер суд ҡарары менән бындай эштәр өсөн почетлы исемдәрҙән мәхрүм итеүҙәре ихтимал. Рәсәйгә ҡарата санкциялар индерергә саҡырыу, нацизмды реабилитациялау һәм Рәсәй ҡатнашмаған ойошмалар, йәки сит ил дәүләт органдары ҡарарҙарының үтәлешенә булышлыҡ итеү ҙә ҡанун боҙоу тип ҡабул ителә.

Бөгөн Афғанстандан совет ғәскәрҙәрен сығарыуға 35 йыл

Иҫтәлекле дата айҡанлы бөгөн Башҡортостан башлығы Радий Хәбиров, министрлыҡтар, ведомстволар етәкселәре, хәрби ветерандар, яугир-интернационалистар «Хәсрәтле әсә» һәйкәленә сәскә һалды. Һәләк булғандарҙы иҫкә алды.

Махсус хәрби операцияла ҡатнашҡан яҡташтарыбыҙ ялдан һуң фронтҡа юлланды

Отпускыға бергә ҡайтҡан кеүек, махсус хәрби операция биләмәһенә лә яугирҙар ойошҡан рәүештә «Өфө -Арена» спорт һарайы алдынан ҡуҙғалды. Ир-егеттәрҙе хеҙмәт урынына «Башавтотранс» автобустары алып барасаҡ. Транспорт саралары маршруты республика башлығы Радий Хәбиров ҡушыуы буйынса ойошторола. Көс туплап, туғандары менән ваҡыт үткәргән яҡташтарыбыҙ Ватанды һаҡларға әҙер. Оҙатыусылар араһында әле алғы һыҙыҡтағы яугирҙарҙың туғандары ла булды. Улар егеттәрҙән махсус хәрби биләмәгә күстәнәс, хаттар тапшырыуҙарын һораны.

Махсус хәрби операцияла ҡатнашыусы мәктәп директоры уҡыусыларына «Ҡаһарманлыҡ дәресе» ойошторҙо

Махсус хәрби операцияла ҡатнашыусы мәктәп директоры уҡыусылары менән осрашып, «Ҡаһарманлыҡ дәресе» ойошторҙо. Стәрлетамаҡ районы Оло Ҡуғанаҡ мәктәбе директоры Рушан Сәғитов ике аҙнаға иҫәпләнгән ялға ҡайтып балалар менән аралашты. Рушан Вәкил улы 2022 йылдың көҙөндә үҙ теләге менән махсус хәрби операция биләмәһенә юлланған.

👩‍⚕️ 1 марттан табиптарҙың эш хаҡы артасаҡ!

Был хаҡта Владимир Путин белдерҙе. Президенттың һүҙҙәренсә, 50 меңдән алып 100 мең кешегә тиклем йәшәгән ҡалаларҙа табиптар эш хаҡынан тыш, өҫтәмә 29 мең һум, урта персонал 20 мең аҡса аласаҡ. 50 меңдән аҙыраҡ кеше йәшәгән ҡалаларҙа — 50 мең һум һәм 30 мең һум аҡса түләнәсәк. 👍

«БСТ | Яңылыҡ»тар телеграм-каналына яҙылығыҙ.

Өфөлә Афғанстандан совет ғәскәрҙәрен сығарыуҙың 35 йыллығына арналған тантаналы йыйылыш үтте

Афған ветерандары бөгөн дә сафта һәм илһөйәрлек өлгөһө булып тора. Был турала Башҡортостан башлығы бөгөн Афғанстандан совет ғәскәрҙәрен сығарыуҙың 35 йыллығына арналған тантаналы йыйылышта белдерҙе. Радий Хәбиров яугир-интернационалистарға ил алдындағы бурысын лайыҡлы үтәгән өсөн рәхмәт һүҙҙәрен еткерҙе, Шайморатов ордендарын һәм миҙалдарын тапшырҙы. Сарала ҡатнашыусылар бер минут тынлыҡ менән хәрби бәрелештәрҙә һәләк булғандарҙы иҫкә алды.

Өфөлә Рәсәй фәндәр академияһының 300 йыллығын билдәләнеләр

Өс йөҙ йыл элек нигеҙ һалынған фәнни үҙаллылыҡ бөгөн дә көнүҙәклеген юғалтмай. Ватаныбыҙ бөгөн дә фән һәм технологиялар суверенитеты, импортҡа алмаш табыу йүнәлешендә көрәшә. Һәм был көрәштә ғилми йәмғиәттең хеҙмәте баһалап бөткөһөҙ. Бөгөн фән өлкәһе хеҙмәткәрҙәре үҙҙәренең һөнәри байрамдарын билдәләй. Быйыл илдә фәндәр академияһы барлыҡҡа килеүгә лә өс йөҙ йыл. Ғалимдарҙы республика башлығы Радий Хәбиров тәбрикләне.

Стәрлебаш районында «Атайсал - Ватан көсө» зональ форумы үтте

«Атайсал»ға яңы һулыш биреп. Республикала тыуған төйәктәге проблемаларҙы хәл итеүгә йүнәлтелгән проект уңышлы эшләп килә. Уның тирәләй меңәрләгән кеше берләшеп, яҡташтарының тормошон яҡшыртыусы изге эштәр башҡарыуын дауам итә. Проектҡа яңы һулыш биреү өсөн нимәләр кәрәк? Был турала Стәрлебаш районында үткән «Атайсал - Ватан көсө» зональ форумында һөйләштеләр. Унда һигеҙ муниципалитет вәкилдәре ҡатнашты.

Илин районында мемориал хоккей турниры үтте

Спорт ярышы яугир-интернационалист көнө сиктәрендә, ҡыҙыу нөктәләрҙә, махсус хәрби операция биләмәһендә һәләк буған һалдаттар иҫтәлегенә арналды. Иглин районында ойошторолған спорт сараһы хаҡында тулыраҡ киләһе яҙмала.

❗️Бәләбәйҙә 15 йәшлек малай үҙ-үҙенә ҡул һалған

Бәләбәй ҡалаһында әсә улының үле кәүҙәһен сарлаҡта тапҡан. 8-се класс уҡыусыһы бығаса яҡындарына бер ни ҙә һөйләмәгән. Полиция вәкилдәре ваҡиға урынынан кеҫә телефоны табып алған.

Бала тулы ғаиләлә тәрбиәләнгән: әсәһе рәсми рәүештә бер ҡайҙа ла эшләмәгән, атаһы урындағы предприятиела экскаваторсы булып эшләгән. Шулай уҡ ғаиләлә тағы бер ҡыҙ тәрбиәләнгән, ул 4-се класта белем ала. Үҫмер хаҡында барыһы ла яҡшы фекерҙә, ул психиатрҙа иҫәптә тормаған.

Енәйәт эше ҡуҙғатылған.

Башҡортостанда мал зыяраттары юҡ ителә

Дәүләт Йыйылышы–Ҡоролтайҙа ветеринарияға бәйле законға үҙгәреш әҙерләнә. Уға ярашлы, республикала яңы мал зыяраттары булдырыу тыйыла. Бындай ҡарар кешеләр һәм малдар араһында йоғошло ҡурҡыныс ауырыуҙар таралыуын иҫкәртеү өсөн ҡабул ителә. Ғәмәлдәге мал зыяраттарын 2030 йылға тиклем ҡулланыу рөхсәт ителә, элеккеләрен юҡ итеү бурысы ҡуйыла. Әле республикала 900-гә яҡын мал зыяраты иҫәпләнә. Улар нығытылған биотермик соҡор ҡоролмаларын хәтерләтә.

Башҡортостанда илдә тәүгеләрҙән булып шәхси ҡарттар йорттары булдырыла

Республика Хөкүмәтенән хәбәр итеүҙәренсә, дәүләт-шәхси партнерлыҡ шарттарында биш пансионат асыла. Бының өсөн 43 миллион һум инвестиция йәлеп ителә. Республикала 22 район һәм ҡалала буш торған социаль ойошмалар исемлеге әҙерләнгән. Килешеү буйынса инвесторға ер һәм бина түләүһеҙ тапшырыла. Шәхси ҡарттар йорттарында 130-ҙан ашыу урын барлыҡҡа киләсәк.

Башҡортостанда төҙөкләндерелгәндән һуң 35 почта бүлексәһе үҙ эшен башланы

Бөгөн уларҙы асыу тантанаһында республика етәксеһе Радий Хәбиров менән «Рәсәй почтаһы» генераль директоры Михаил Волков ҡатнашты. Республика халҡының өстән бер өлөшө ауыл ерендә йәшәй, улар өсөн почта бүлексәләре мөһим социаль һәм күп функциялы үҙәк булып тора тип билдәләне республика етәсеһе.

Өфөлә инвалидтар өсөн көндөҙгө файҙалы мәшғүллек үҙәгенең яңы бүлексәһе ойоштороласаҡ

Өфөнөң Азатлыҡ урамында инвалидтар өсөн көндөҙгө файҙалы мәшғүллек үҙәгенең яңы бүлексәһе ойоштороласаҡ. Әле ҡала хакимиәте тарафынан ҡуртымға тапшырылған объектты реконструкциялауға әҙерлек эштәре бара. Иҫегеҙгә төшөрәбеҙ, күләмле проект 2021 йылда тормошҡа ашырыла башлағайны. Уның сиктәрендә менталь һәм физик мөмкинлектәре сикләнгән йәштәргә хеҙмәт оҫтаханалары булдырыла. Мәктәпте тамамлағандан һуң профориентация саралары үтеп, эш башлаған егет-ҡыҙҙар менән БЮТ ижади төркөмө осрашты.

Рәсүл Ҡарабулатов яугирҙәр алдында сығыш яһаны

Башҡорт батальоны яугирҙәре өсөн 10 көн эсендә 7 концерт ҡуйыла.

“Егеттәр йылы ҡабул итте. Махсус хәрби операция биләмәһендә алдында сығыш яһау башҡаса. Егеттәрҙең тыуған илде һағыныуы, яҡындары, балалары, һөйгәндәре тураһында һөйләүенән күҙгә йәш тулды. Әбйәлил, Ейәнсура, Бөрйән, Күгәрсен, Туймазы, Ишембай, Белорет, Хәйбулла, Бәләбәй, Благовар райондарынан яҡташтарҙы осраттым. Егеттәрҙең берҙәмле һәм дуҫлығына һоҡландым. Улар тормош ҡәҙерен белгән, үлем менән күҙмә-күҙ осрашҡан кешеләр. Ысын геройҙар киләсәк быуын өсөн батырлыҡ һәм илһөйәрлек өлгөһө булып тора”, - ти халыҡ артисы.

Башҡортостанда спиртлы эсемлектәрҙе ҡойоп һатыу кибеттәрен ябырға рөхсәт ителде

Президент Владимир Путин тейешле законға ҡул ҡуйҙы. Уға ярашлы, төбәктәр ресторан, бар, кафе һәм буфеттарҙа хәмер һатыуға талаптар ҡуя ала. Бынан тыш, күп фатирлы йорттар йәки улар эргәһендә урынлашҡан йәмәғәт туҡланыу урындарында иҫерткес эсемлек һатыу ваҡытын сикләргә рөхсәт ителә. Закон 1 апрелдән көсөнә инә. Дәүләт Йыйылышы – Ҡоролтайҙа ла спиртлы эсемлектәрҙе ҡойоп һатыу кибеттәрен тыйыуға бәйле закон проекты ҡаралғайны.

Башҡортостанда Дмитриевка-Кушнаренко юлы ремонтлана

Транспорт һәм юл хужалығы министрлығынан белдереүҙәренсә, бындағы трасса Шишмә һәм Кушнаренко райондары халҡы өсөн мөһим. Эштәр "Хәүефһеҙ сифатлы юлдар" милли проекты буйынса башҡарыла. Бишкәзә Иҫке Ғүмәр, шулай уҡ Иҫке һәм Яңы Туҡмаҡлы араһы тәртипкә килтерелә. Ремонт яҙын башлана, йыл аҙағына тамамлау планлаштырыла.

«Өфө» индустриаль паркы биләмәһендә яңы предприятие эш башланы

«Россильбер» яуаплылығы сикләнгән йәмғиәт нефть-газ һәм металлургия тармаҡтары, машиналар эшләү, сәнәғәт, юл төҙөлөшө өлкәһе өсөн төрлө продукция етештерә. Завод тулы ҡеүәтенә йәйгә эшләй башлаясаҡ, уның ике етештереү линияһының технологик асышы менән республика башлығы Радий Хәбиров, Рәсәйҙең сәнәғәт һәм сауҙа министры урынбаҫары Алексей Беспрозванных танышты.