Бал ҡорттарын химик препараттарҙан һаҡлау буйынса закон проекты әҙерләнде

Ул парламентта беренсе уҡыуҙа ҡабул ителде. Документҡа ярашлы, химикат ҡулланырға тейешле урындан ете километрға тиклем алыҫлыҡта йәшәүсе халыҡ һәм умартасылар кәмендә биш көн алдан иҫкәртелергә тейеш була. - Бал продукцияһы төрлө өлкәлә ҡулланыла. Бал ҡорттары үҫемлектәрҙе һеркәләндереүҙә мөһим роль уйнай, аҙыҡ-түлек хәүефһеҙлегенә,экологик именлеккә йоғонто яһай, тип белдерҙе парламент рәйесе Константин Толкачев.

Ҡотҡарыусылар "Салауат Юлаев" Кубогы өсөн көрәшә

Бөгөн Өфөлә “Салауат Юлаев” кубогына янғын-ҡотҡарыу спорты буйынса Бөтә Рәсәй ярыштары үтә. Илебеҙҙең төрлө төбәктәренән 150-нән ашыу спортсы, 14 команда ҡатнаша. Республика данын Өфө радиоэлектроника һәм телекоммуникация хәүефһеҙлеге колледжы һәм Ғәҙәттән тыш хәлдәр министрлығының башҡа уҡыу йорттары вәкилдәре яҡлай.

Өфөлә баҡсасылыҡ ширҡәттәрендә рейдтар үтә

Ҡаланың граждандарҙы һаҡлау идаралығынан хәбәр итеүҙәренсә, төп маҡсат - янғын хәүефһеҙлеген тәьмин итеү. Баҡса йорттарында даими йәшәүселәргә электр ҡорамалдарын, йылытыу приборҙарын ҡулланыу буйынса кәңәштәр бирелә. Рейдтар киске сәғәттәрҙә лә үтә.

Мортаза Рәхимовҡа бағышланған күргәҙмә асыла

Өфөлә Башҡортостандың беренсе президенты Мортаза Рәхимовтың тыуыуына 90 йыл тулыуға бағышланған күргәҙмә асыла. Экспозицияла архив документтар, шәхси әйберҙәр була, Мортаза Рәхимовтың эш кабинеты интерьеры күрһәтелә. Күргәҙмә 7 февралдә Башҡортостан милли музейында асыла. Мортаза Рәхимов уҙған йылдың ғинуарында вафат булды.

Өфөнөң 450 йыллыҡ юбилейына баш ҡалала бер юлы бер нисә спорт объекты асыласаҡ

Уларҙың береһе - «Газпром - балаларға» программаһы сиктәрендә төҙөлә. Өлфәт Мостафин исемен йөрөтәсәк физкультура-һауыҡтырыу комплексында алып барылған эш менән Башҡортостан башлығы Радий Хәбиров та танышты.

Башҡортостандың халыҡ артисы Юлай Ғәйнетдинов 70 йәшлек юбилейын билдәләне

Башҡортостандың халыҡ артисы, Рәсәйҙең атҡаҙанған мәҙәниәт хеҙмәткәре, Салауат Юлаев исемендәге дәүләт премияһы лауреаты, ҡурайсы, фольклорсы Юлай Ғәйнетдинов 70 йәшлек юбилейын билдәләне. Тантана Рәми Ғарипов исемендәге республика башҡорт гимназияһында үтте. Рәсәй һәм донъя күләмендә ҙур танылыу яулаған сәнғәт эшмәкәренең Башҡортостан телевидениеһы фондында 300-ҙән ашыу тапшырыуы һаҡлана.

"Салауат Юлаев" Континенталь хоккей лигаһының плей-офф этабына сыҡты

Юлаевсылар 77 мәрәй тупланы. Был һөҙөмтә даими беренселектә Көнсығыш конференцияла көслөләр рәтендә булыу мөмкинлеге бирә. Плей-офф 29 февралдә старт ала. "Салауат Юлаев" даими беренселектә киләһе уйынын 1 февралдә Тольяттиҙан "Лада" менән уҙғара.

Нуғай ауылында бер ир 7 йәшлек малайҙы ҡотҡарған

Бында шәхси йорта ут сыҡҡан. Өйҙә бала бер үҙе булған, ата-әсәләре эшкә киткән. Йортта янғын башланыуын эргәләге төҙөүсе ир күреп ҡалған. Ул өйгә инеп ванна бүлмәһендә ҡалған малайҙы тышҡа алып сыҡҡан. Бала дауаханаға оҙатылған. Ут һүндерелгән, тип хәбәр Ғәҙәттән тыш хәлдәр министрлығынан.

Владимир Путин Андрей Мигуновҡа үлгәндән һуң Рәсәй Геройы исемен бирҙе

Ил президенты Владимир Путин «Башҡортостан» мотоуҡсылар полкының Сергей Зорин исемендәге танк батальоны командиры, подполковник Андрей Мигуновҡа үлгәндән һуң Рәсәй Геройы исемен бирҙе. Был хаҡта үҙенең социаль селтәрҙәрендә Башҡортостан Башлығы Радий Хәбиров яҙған.

Өфөлә Башҡортостан буйынса эске эштәр министрлығының киңәйтелгән коллегия ултырышы үтте

Енәйәтселекте асыҡлау йөҙ процентҡа еткән. Былтыр республикалағы оператив хәл тотороҡло булды, тине Радий Хәбиров Башҡортостан буйынса эске эштәр министрлығының киңәйтелгән коллегия ултырышында. Полиция хеҙмәткәрҙәре 25 мең енәйәт эшен асыҡлаған. Шул иҫәптән 5 мең ярымы айырыуса ауыр һанала. Былтыр сәләмәтлеккә зыян килтереү, талау, урлау рецидив, иҫерек килеш ҡылынған енәйәтселек кәмегән.

Радий Хәбиров бөгөн блогерҙар менән осрашты

Популяр авторҙарҙың социаль селтәрҙәрҙәге сәхифәләренә бөтәһе 15 миллиондан ашыу кеше яҙылған. Уларҙың блогы төрлө йүнәлештәрҙе үҙ эсенә ала.
Осрашыуҙа төбәк етәксеһенә төрлө темаларға ҡағылышлы һорауҙар бирергә мөмкин ине. Радий Хәбиров блогерҙарҙың потенциалын рупор тип атаны. Сөнки һәр автор мәғлүмәт яҙып ҡына ҡалмай, йыш ҡына был анализланған материал. Шуға ла Радий Хәбиров, йәмәғәт фекерҙәре лидерҙарының аудиторияға объектив ысынбарлыҡты еткереүен теләне.

Иртәгә «Рәсәй» форум-күргәҙмәһендә Башҡортостан телевидениеһы көнө уҙа

Республика стенды бер көнгә БСТ төҫтәренә мансыла. Популяр алып барыусылар ҡунаҡтарҙы телеканал программалары менән таныштыра, ә теләгән һәр кем үҙен алып барыусы ролендә һынап ҡарай ала. Башҡортостандың төп каналында көн дауамында хәбәрселәр илдең баш ҡалаһынан тура бәйләнешкә сығасаҡ. Ойоштороусылар Мәскәү халҡын һәм ҡунаҡтарын ВДНХ-ға килергә һәм Башҡортостан стендын ҡарарға саҡыра. Төбәк стенды 75 павильонда урынлашҡан.

Баймаҡта «Йыл уҡытыусыһы - 2024» конкурсы башланды

Һөнәри оҫталыҡ бәйгеһе. Баймаҡта «Йыл уҡытыусыһы - 2024» конкурсы башланды. Бәйгелә төбәктең 10 мәктәбенән 15 педагог ҡатнаша. Теманың дауамы киләһе репортажда.

Яҙғы ташҡынға әҙерлек башланды

Хөкүмәттә кәңәшмә үтте. - 2023 йылда йылғалар ғәҙәттәгенән иртәрәк асылды. Ташҡын тыныс үтте. Был алдан күрелгән сараларға ла бәйле, - тине Премьер-министр Андрей Назаров. Ғәҙәттән тыш хәлдәр буйынса дәүләт комитетында оператив штаб булдырыла. Боҙ тығылыу хәүефе булған урындарҙа алдан уҡ шартлатыу эштәре алып барыласаҡ.

Өфөлә “Диктор тауышы” конкурсы еңеүселәрен бүләкләү тантанаһы үтә

Ижади ярыш легендар диктор, Башҡортостандың халыҡ артисы Әхәт Мортазиндың яҡты иҫтәлегенә арнала. "6 февралдә Әхәт Мотаһар улының тыуған көнө. Беҙҙең арала булһа, уға 65 йәш тулыр ине. “Был көндө иң оҫта йәш алып барыусыларҙы “Башҡортостан” телерадиотапшырыуҙар компанияһына саҡырҙыҡ, - ти ярышты ойоштороу комитеты ағзаһы Гүзәл Ситдиҡова.

"Башҡортостан тауары" проектында ҡатнашыусылар арта

Биш йылда уларҙың һаны 70 процентҡа күбәйгән, тип хәбәр итәләр Сауҙа һәм хеҙмәттәр министрлығынан. "Башҡортостан тауары" беҙҙең республикала етештерелгән сеймалдан әҙерләнә, хәүефһеҙлек талаптарына яуап бирә. Бөгөн республикала 29 мең төр продукция ошондай тамға менән сығарыла.

«Хеҙмәт» Бөтә Рәсәй конкурсы премияһы лауреаты Салауат районы Миәшәгәр ауылында йәшәй

«Кеше яҙмышы- Ватан ғорурлығы»номинацияһында еңеү яулаған Илнара Сафинаға Миәшәгәр ауыл биләмәһе башлығы булып эшләй. Тормош иптәше махсус хәрби операцияға юлланғас, депутаттар уны яуалы вазифаға тәҡдим иткән. Иңдәренә ҙур яуаплылыҡ алған Илнара Сафинаға юғары награданы ил Президенты Владимир Путин «Кесе Ватан-Рәсәй ғорурлығы» форумы барышында тапшырҙы. Халыҡ мәнфәғәте, ил берҙәмлеге өсөн хеҙмәт итеүсе менән БЮТ ижади төркөмө лә осоашты.

Бөгөн Мәскәүҙә «Рәсәй» халыҡ-ара форум-күргәҙмәһендә БСТ телеканалы көнө үтә

Ошо уңайҙан ВДНХ майҙанында Башҡортостан юлдаш телеканалына арналған стенд ойошторолған. Күргәҙмә ҡунаҡтары үҙҙәрен зәңгәр экрандарҙа һынап ҡарап, оҫталыҡ дәрестәрендә ҡатнаша, республиканың төп телеканалы тарафынан әҙерләнгән бай йөкмәткеле тамаша менән таныша ала. Ваҡиға урынында БЮТ ижади төркөмө лә эшләй.

Бөр төркөм яугирҙар ике аҙна отпускта булып махсус хәрби операция биләмәһенә юлланды

Ҡыҫҡа ялдан һуң йәнә алғы һыҙыҡҡа. Бөр төркөм яугирҙар ике аҙна отпускта булып махсус хәрби операция биләмәһенә юлланды.
Өфө-Арена боҙ һарайына яугирҙарҙы оҙатырға туғандары, рәсми вәкилдәр йыйылды. Әммә улар һаубуллашыу өсөн генә килмәй. Республика етәкселеге һәр яугирҙың хәлен һораша, проблемалары бар икән шундуҡ хәл итеү бурысы ҡуйыла.

“Рәхимов уҡыуҙары” фәнни-ғәмәли конференцияһына эштәр ҡабул итеү тамамлана

Сара Күмертау ҡалаһында Башҡортостандың беренсе Президенты Мортаза Рәхимов исемендәге 3-сө Башҡорт республика гимназия-интернатында ойошторола. Конференцияла 5-11-се класс уҡыусылары ҡатнаша ала. Мәктәп директоры Шайморат Тимербулатов әйтеүенсә, бер нисә йүнәлештә ғилми эштәр ебәрергә була. “Рәхимов уҡыуҙары” төбәк-ара фәнни-ғәмәли конференцияһы Башҡортостандың беренсе Президентының тыуған көнөндә, 7 февралдә үтә. Ғилми эштәр 1 февралгә тиклем ҡабул ителә.