Ҡурай борон-борондан башҡорт яугирҙарының тоғро юлдашы, моңдашы булған. Тыныс тормошта ла, яуҙа ла ҡурай уны оҙатып йөрөгән. Батырҙар уға ҡушылып йырлаған, моңланған, уйланған. Ҡурай менән ул тыуған ерен данлаған. Бөгөнгө көндә лә МХО биләмәһендә хеҙмәт иткән егеттәр ҡурай моңонан айырылмай.

(Видеояҙма Башҡортостан яугирҙарының архивынан алынған)

Ер аҫты байлыҡтарын намыҫһыҙ табыусылар яуапҡа тарттырыла

Башҡортостанда ер аҫты байлыҡтарын файҙаланған намыҫһыҙ компаниялар 35 миллиард һум компенсация түләргә тейеш. Владимир ҡалаһындағы Беренсе арбитраж апелляция суды Өфөнән “Альтинвест” ойошмаһына Урал аръяғында алтын табыуҙы тыйҙы. Республиканың көньяҡ-көнсығышында ер аҫты байлыҡтарын вәхшиҙәрҙә файлаҙанған компанияларға ҙур штраф һалынды. Бынан тыш 5 ойошма етәксеһе тәбиғәтте һаҡлау ҡануниәтен боҙған өсөн суд алдында яуап бирәсәк. 2021 йылда Республика ер аҫты байлыҡтарын файҙаланыу буйынса ведомство-ара комиссия ойошторолдо. Ошо ваҡыт эсендә 13 намыҫһыҙ компанияның лицензияһы тартып алынды.

Коммерцияға ҡарамаған ойошмалар Рәсәй президенты грантына дәғүә итә ала

1 февралдән заявкалар ҡабул ителә башлай. 11 йүнәлеш буйынса проекттар тәҡдим итергә була. Халыҡҡа социаль ярҙам күрһәтеү, сәләмәтлек, фән, тәбиғәтте һаҡлау буйынса грант юлларға мөмкин. Ғаризаны 15 мартҡа тиклем тултырырға кәрәк. Башҡортостан Йәмәғәт палатаһы конкурста ҡатнашырға теләгән ойошмалар өсөн вебинарҙар ойоштора.

Өфөлә агросәғәнәғәт форумы барышында 9 һөнәри конкурс ойошторола

Ауыл хужалығы министрлығынан хәбәр итеүҙәренсә, малсылыҡта заманса технологиялар ҡулланыу, ауыл хужалығында яңы сорттар сығарыу, үҫемлекселекселектә фәнни тикшеренеүҙәр алып барыу һәм башҡа йүнәлештәр буйынса иң яҡшылар асыҡлана. "Агрокомплекс" күргәҙмәһе һәм Агросәнәғәт форумы Өфөлә март аҙағында уҙғарыла.

Башҡортостан башлығы Евразия фәнни-мәғариф үҙәгенең вуз-ара студенттар кампусында булды

Радий Хәбиров айкью паркта эш башлаған уҡыу йорттарының аудиторияларын, лабораторияларын ҡараны, ғалимдар менән аралашты. Айкьюпарк ете башнянан торған күләмле проекттың тәүге сираты ғына, ул яҡын арала файҙаланыуға тапшырыла.

Башҡортостанда һауаны бысратыуҙы кәметеү өсөн саралар күрелә

Мәскәүҙә “Рәсәй” халыҡ-ара форум-күргәҙмәһендә Экология көндәре уҙҙы. Рәсәй Тәбиғәт ресурстары һәм экология министрлығы, Башҡортостан Хөкүмәте һәм Стәрлетамаҡ заводтары килешеүгә ҡул ҡуйылды. Документҡа ярашлы ҡалала һауаны тикшереү буйынса автоматик систамалар урынлаштырыла. Быйыл атмосфераға сығарылған ағыулы матдәләрҙе 40 тоннаға кәметеү ҡарала. Форум барышында сәнәғәт ойошмалары вәкилдәре менән ултырыш уҙҙы. Унда тәбиғәтте һаҡлауҙа яңы алымдар ҡулланыу, зыян эҙемтәләрен бөтөрөү буйынса фекер алышыу булды.

Башҡортостанда милли проект буйынса медицина ҡорамалдары ҡайтарыла

Башҡортостанда милли проект буйынса медицина ҡорамалдары ҡайтарыла. Балаҡатай район үҙәк дауаханаһында эндоскопия аппараты ҡуйылды. Бындай йыһаз юғары технологиялы хирургик операциялар үткәрергә мөмкинлек бирә. “Сәләмәтлек” милли проектына ярашлы ауыл һәм бәләкәй ҡалалар дауаханалары медицина ҡорамалдары менән йыһазландырыла.

Асҡындар махсус хәрби операция биләмәһендәге яҡташтарыбыҙға ярҙам күрһәтә

Ылау оҙаҡ һаҡлана торған аҙыҡ-түлектән, йылы ойоҡбаш, окоп шәмдәре һәм башҡа әйберҙәрҙән туплана. Ҡубыяҙ ауылында йәшәүселәр районда маскировка селтәрҙәрен тәүгеләрҙән булып үрә башлай. Бөгөн ауыл халҡы бер көс, тыл булып берләшкән.

Башҡортостан һәм Ҡаҙағстан араһында төрлө йүнәлештәрҙә 86 килешеү төҙөлгән

Республика Хөкүмәтенән хәбәр итеүҙәренсә, Өфө һәм Астана алмаш программаларҙы уңышлы тормошҡа ашыра. Күрше илдән 700-ҙән ашыу студент Башҡортостан юғары уҡыу йорттарында белем ала. Көнбайыш Ҡаҙағстан аграр университетында Өфө дәүләт нефть техник университеты вәкиллеге эшләй. Өс мәғариф программаһы буйынса уртаҡ курстар уҙа һәм студенттар ике диплом алып сыға. Белгестәр үҙа-ара тәжрибә уртаҡлаша һәм белемен камиллаштыра. Өфө һәм Астана араһында самолеттар оса. Былтыр 16 меңдән ашыу пассажир файҙаланған. Бынан тыш, Алматаға аҙнаһына ике авиарейс башҡарыла.

Күгәрсен районында рөхсәтһеҙ өс сүплек юҡ ителгән

Былтыр Ауыл хужалығын күҙәтеү төбәк идаралығы баҫыуҙарҙы тикшергән. Асыҡланыуынса, өс ауыл янында 1,1 гектарҙа ҡалдыҡтар ташланған. Район хакимиәте идаралыҡ белгестәре менән берлектә үткәргән саралар ярҙамында баҫыуҙарҙа сүплектәр бөтөрөлгән һәм биләмәләр ауыл хужалығы ерҙәре әйләнешенә кире индерелгән.

Башҡортостанда берҙәмлек бар һәм уны береһе лә ҡаҡшата алмаясаҡ

Был турала Радий Хәбиров аҙналыҡ оператив кәңәшмәлә белдерҙе. Төбәк башлығы әйтеүенсә, үткән аҙнала уҙған «Көслө республика-көслө Башҡортостан» митинг-концерты быны тағы бер ҡабат иҫбатланы. Берҙәмлекте күрә, аңлау һәм күрһәтә белеү мөһим. Радий Хәбиров район башлыҡтары, етәкселәргә халыҡ менән аралашырға, асыҡ булырға өндәне. Тулыраҡ киләһе яҙмала.

Радий Хәбиров Башҡортостан төбәктәрендә йәмәғәт киңлектәрен төҙөкләндереү буйынса кәңәшмә үткәрҙе

Унда баш ҡаланың тарихи үҙәгендә Ленин, Карл Маркс, Пушкин, Коммунистик һәм Яңы күпер урамдарын яңыртыуҙың «юл картаһы» тәҡдим ителде. Бының өсөн быйыл миллиард ярым һум аҡса йүнәлтеү планлаштырыла. Һүҙ тротуарҙарҙы яңыртыу, урамдарҙы яҡтыртыу, йорттарҙың фасадтарын ремонтлау хаҡында бара. Өфөнөң юбилейына 450 эре йүкә ағасы ултыртыласаҡ.

Башҡортостан Үҙәк һайлау комиссияһы рәйесе вазифаһына Азат Ғәлимханов тәғәйенләнде

Рәсәй Президентын һайлауға 45 көн ҡалғанда, Башҡортостан Үҙәк һайлау комиссияһы рәйесе вазифаһына Азат Ғәлимханов тәғәйенләнде. Һайлауға федераль ведомство вәкилдәре видеобәйләнеш аша ҡушылды. Рәсәй Үҙәк һайлау комиссияһы тәҡдиме буйынса яңы рәйес вазифаға бер тауыштан һайланылды.

Ауыл хужалығында эшләүсе йәш белгестәргә дәүләт ярҙамы

5-се февралдән Башҡортостан ауыл хужалығы министрлығында был программала ҡатнашырға теләгән йәш белгестәрҙән рәсми документтар ҡабул ителә башлай. 2023 йылдан Республика бюджетынан дәүләт ярҙамы ярты миллиондан 750 мең һумға тиклем күтәрелгән. Бындай ярҙамды файҙаланған йәш белгестәр Эвелина һәм Павел Стог ғаиләһе янында беҙҙең ижади төркөм булды.

Уҙған аҙнала Владимир Путин «Һөйөклө туғандар» Бөтә Рәсәй форумында Ғаилә йылына старт бирҙе

Был сарала Башҡортостандан ике династия ҡатнашты. Улар иҫәбендә йыл ғаиләһе конкурсы еңеүселәре - Өфө районы Шамонин ауылында йәшәүсе Мәхмүтовтар. Әбйәлилдә тыуып үҫкән Лилиә менән Күгәрсен егете Илнур ҡорған татыу ғаиләне беҙ быға тиклем дә күрһәткәнебеҙ бар ине. Тырыш һәм уңған пар тураһында киләһе яҙмала.

Республикала видеокүҙәтеү аша идарасы компаниялар эшмәкәрлеген ҡарап була

“Дәүләт хеҙмәттәре. Йорт” ҡушымтаһында яңы алым барлыҡҡа килде. Торлаҡ һәм төҙөлөштө күҙәтеү буйынса дәүләт комитетынан хәбәр итеүҙәренсә, идарасы компанияларҙың фатир хужаларын видеосервисҡа тоташтырыу мөмкинлеге бар. Халыҡ онлайн тәртибендә ихатала ҡар таҙартыуҙы ҡарап бара, коммуналь хеҙмәттәргә ҡамасауламаҫ өсөн автомобилен ситкә алып ҡуйырға мөмкин. Рәсәйҙә 1 миллиондан ашыу кеше видеосервис менән файҙалана. Бының өсөн махсус сайтта заявка ҡалдырырға кәрәк.

Бал ҡорттарын химик препараттарҙан һаҡлау буйынса закон проекты әҙерләнде

Ул парламентта беренсе уҡыуҙа ҡабул ителде. Документҡа ярашлы, химикат ҡулланырға тейешле урындан ете километрға тиклем алыҫлыҡта йәшәүсе халыҡ һәм умартасылар кәмендә биш көн алдан иҫкәртелергә тейеш була. - Бал продукцияһы төрлө өлкәлә ҡулланыла. Бал ҡорттары үҫемлектәрҙе һеркәләндереүҙә мөһим роль уйнай, аҙыҡ-түлек хәүефһеҙлегенә,экологик именлеккә йоғонто яһай, тип белдерҙе парламент рәйесе Константин Толкачев.

Ҡотҡарыусылар "Салауат Юлаев" Кубогы өсөн көрәшә

Бөгөн Өфөлә “Салауат Юлаев” кубогына янғын-ҡотҡарыу спорты буйынса Бөтә Рәсәй ярыштары үтә. Илебеҙҙең төрлө төбәктәренән 150-нән ашыу спортсы, 14 команда ҡатнаша. Республика данын Өфө радиоэлектроника һәм телекоммуникация хәүефһеҙлеге колледжы һәм Ғәҙәттән тыш хәлдәр министрлығының башҡа уҡыу йорттары вәкилдәре яҡлай.

Өфөлә баҡсасылыҡ ширҡәттәрендә рейдтар үтә

Ҡаланың граждандарҙы һаҡлау идаралығынан хәбәр итеүҙәренсә, төп маҡсат - янғын хәүефһеҙлеген тәьмин итеү. Баҡса йорттарында даими йәшәүселәргә электр ҡорамалдарын, йылытыу приборҙарын ҡулланыу буйынса кәңәштәр бирелә. Рейдтар киске сәғәттәрҙә лә үтә.

Мортаза Рәхимовҡа бағышланған күргәҙмә асыла

Өфөлә Башҡортостандың беренсе президенты Мортаза Рәхимовтың тыуыуына 90 йыл тулыуға бағышланған күргәҙмә асыла. Экспозицияла архив документтар, шәхси әйберҙәр була, Мортаза Рәхимовтың эш кабинеты интерьеры күрһәтелә. Күргәҙмә 7 февралдә Башҡортостан милли музейында асыла. Мортаза Рәхимов уҙған йылдың ғинуарында вафат булды.