Рәсәйҙең билдәле онкологтары Башҡортостан белгестәре менән бергә ҡатмарлы операциялар яһаны

Республика клиник онкология диспансерында «Яман шеште дауалау, заман хирургия алымдары»на бәйле Халыҡ-ара ғилми-ғәмәли конференция үтте. Рәсәйҙең билдәле онкологтары Башҡортостан белгестәре менән бергә ҡатмарлы операциялар яһаны, тәжрибә уртаҡлашты.

Бөгөн Өфөлә “ЮлдашХит” йыр фестивале үтә

Тамашала Уҡытыусы һәм остаз, шулай уҡ Ғаилә йылына арналған сығыштар була. Башҡортостанда йыр сәнғәте үҫешенә тос өлөш индергән ижадсылар бүләкләнә. Шулай уҡ “Юлдаштың халыҡ йырсыһы” асыҡлана. Уны тамашасылар билдәләй. Маҡтаулы исемгә дәғүә иткән башҡарыусылар өсөн концерт аҙағына тиклем тауыш бирергә мөмкин. Фестиваль “Башҡортостан” дәүләт концерт залында уҙа.

Өфөлә "аҡыллы светофор"ҙар урынлаштырыла

Бындай приборҙар тағы 51 урында ҡуйылды. Транспорт һәм юл хужалығы министрлығынан хәбәр итеүҙәренсә, әле республика баш ҡалаһында 101 "интеллектуаль" урам киҫелеше бар. Бындай система хәрәкәт тығыҙлығын иҫәпкә алып светофор уттарының яныу ваҡытын көйләй. Эштәр "Хәүефһеҙ сифатлы юлдар" милли проектына ярашлы башҡарыла.

Башҡортостанда микроплазма инфекцияһы менән ауырыусылар һаны артыуы күҙәтелмәй

Был турала Ҡулланыусылар хоҡуҡтарын яҡлау хеҙмәтенән хәбәр итәләр. - Микроплазма инфекцияһы - яңы ауырыу түгел, ул күптән билдәле һәм өйрәнелгән. Табиптар был сирҙе дауалай. Республикала даими мониторинг алып барыла. Микроплазма инфекцияһы һирәк теркәлә. Ауырыу ОРВИ һымаҡ үтә, - тип белдерәләр ведомствонан.

Һөйөнсө! 💐

Башҡортостан юлдаш телевидениеһының иң талантлы, тәжрибәле алып барыусыларының береһе Гөлнур Вәлиеваның ғаиләһе ишәйҙе! Хеҙмәттәшебеҙ икенсегә өләсәй булды.

Уның ҡыҙы Лилиә һәм кейәүе Денис Өмөтбаевтарҙың ҡыҙҙары тыуҙы.
😍Сабыйға һәм ата-әсәһенә ныҡлы сәләмәтлек, бәхетле бәрәкәтле ғүмер теләйбеҙ!

Башҡортостан орлоҡто күберәк һата башлаған

Ауыл хужалығын күҙәтеү хеҙмәте мәғлүмәттәре буйынса быйыл сит илдәргә 160-тан ашыу партия менән йөк оҙатылған. 3 мең 200 тоннанан ашыу орлоҡ сығарылған. Был уҙған йылдан 2 мең тоннаға күберәк. Башҡортостан орлоғон Әрмәнстан, Беларусь, Германия, Ҡаҙағстан һәм Ҡырғыҙстан алған.

Өфөләге "Искра" кинотеатры мәҙәни мираҫ объекттары исемлегенән алына

Дәүләт экспертизаһы һөҙөмтәләре буйынса шундай ҡарар ҡабул ителгән. Комиссия һығымталарына ярашлы, бина тарихи-мәҙәни әһәмиәтен юғалтҡан. Бында күп тапҡыр реконструкция эшләнгән. "Искра" кинотеатры 1970 йылда асыла. 2021 йылда ябылды.

Башҡортостан - Геройҙарҙың тыуған ере

Беҙ һәр ваҡыт ҡаһарманлыҡ күрһәткән егеттәрҙең батырлыҡтарын иҫтә тотасаҡбыҙ. Радий Хәбиров республика халҡын Геройҙар көнө менән ҡотланы. Төбәк етәксеһе Өфөнән Максим Серафимов, Әбйәлилдән Тамерлан Илһамов, Яңауылдан Игорь Нәсибуллин, Әлшәйҙән Алмаз Сафин, Бөрөнән Борис Дудко, Октябрьскийҙан Степан Белов, Өфөнән Денис Чернавинға батырлыҡтары өсөн рәхмәт белдергән. Был егеттәрҙең барыһы ла илебеҙҙең Юғары наградаһына - Рәсәй Геройының «Алтын Йондоҙона» лайыҡ булды.

Өфөлә йәшәүсе Денис Чернавин юғары наградаға лайыҡ шәхестәрҙең береһе

Махсус хәрби операция башланғандан алып яугир йөҙәрләгән хәрби осошҡа сығып дошмандарҙы һәм уларҙың хәрби техникаһын юҡҡа сығарған. Һәләтле хәрби вертолетсыың яҡындары менән БЮТ ижади төркөмө аралашты.

Мушниковсылар сафы тулыланды

Тантаналы сара Советтар Союзы Геройы Георгий Мушниковтың исемен йөрөткән 74-се мәктәптә үтте. Байрам легендар летчиктың 100 йыллыҡ юбилейына тап килде.

Башҡортостандың 117 ауылы мобиль элемтәгә һәм юғары тиҙлекле 4G интернетҡа тоташтырылған

Башҡортостан башлығы Радий Хәбиров белдереүенсә, заман технологиялары «2.0 һанлы тигеҙһеҙлекте бөтөрөү» федераль проекты ярҙамында индерелгән. Программа 100-ҙән 500-гә тиклем халыҡ йәшәгән биләмәләргә тарала. Элемтә станциялары урынлаштырылған төбәктәр араһында Бөрйән районы ла бар.

«БСТ» телеканалы Яңы йыл тамашаһы әҙерләй

«Аптыраған» тип исемләнгән шоу баш ҡалала төшөрөлә. Башҡортостандың төп телеканалында күптән бындай тамаша булғаны юҡ, тип белдерә ижади коллектив. Өр-яңы форматтағы тапшырыуҙы камералы форматта әҙерләү өҫтөндә бер нисә тиҫтәләп кеше - режиссерҙар, операторҙар, ут һәм декорация оҫталары һәм башҡалар эшләй. Тамаша күңелле музыка һәм уйын-көлкөгә бай буласаҡ.

Тыуған илемә ярҙам итергә теләйем, мин – патриот

“Муза” ҡушаматлы яугир шулай тип белдерҙе. Ул мотоуҡсылар ғәсҡәрҙәрендә медицина ротаһында контракт буйынса шәфҡәт туташы булып хеҙмәт итә. “Беҙ көн һайын һалдаттарға тәүге һәм кисектергеһеҙ ярҙам күрһәтәбеҙ”, - ти ул.
Муза Стәрлетамаҡтан. Өйҙә уны тормош иптәше һәм балалары көтә.

Башҡортостан фәнни-технологик яҡтан үҫешкән төбәк

Беҙҙең республика Рәсәйҙә 2022 йыл һөҙөмтәләре буйынса алдынғылар рәтенә инде. Был турала социаль селтәрҙә Республика Башлығы хакимиәте етәксеһе Максим Забелин хәбәр итә. - 2022 йылда төбәктәр 33 күрһәткес буйынса баһаланды. Беҙҙә йәш ғалимдар һаны арта, фәнни тикшеренеүҙәргә күберәк аҡса бүленә, етештереүҙә алдынғы технологиялар ҡулланыла. Евразия фәнни-белем биреү үҙәге эшмәкәрлеге лә рейтингка йоғонто яһай, - тип яҙа Максим Забелин.

Башҡортостанда янғын хәүефе һаҡлана

Ғәҙәттән тыш хәлдәр министрлығынан хәбәр итеүҙәренсә, бөгөн иртән Өфөлә Блюхер урамында күп фатирлы йортта ут сыҡҡан. Төтөн өҫкө ҡаттарға таралған. Йорттан 8 кеше сығарылған. Зыян күреүселәр юҡ. Ут һүндерелгән. Был хәл буйынса тикшереү бара. Кушнаренко районында ла янғын булған. Ахлыстин ауылында ағас йорт янған. Ут һүндерелгән. Өлкән йәштәге ирҙең тәне бешкән, ул район дауаханаһына оҙатылған.

Өфөләге ВУЗ-ара кампуста уҡыусылар робототехника менән шөғөлләнә

Бында робот техникаһы лабораторияһы булдырыла. Роботтар эшләп сығарыу, виртуаль ысынбарлыҡ технологияларын өйрәнеү мөмкинлеге була. Был турала Республика Хөкүмәтенән хәбәр итәләр. 3-сө - 4-се класс уҡыусылары өсөн робототехника буйынса махсус курс әҙерләнгән. Өлкән кластар өсөн тағы ике белем биреү программаһын башлау көтөлә.

🎼Моң, илһам, күңел…

🔥Хөрмәтле дуҫтар, оло йыр байрамына саҡырабыҙ!
14, 15 декабрҙә «Башҡортостан» дәүләт концерт залында иң популяр проекттарҙың береһе — «Башҡорт йыры» республика телевизион конкурсының гала-концерты уҙа.

✨Башҡортостан һәм Татарстан йондоҙҙары Азамат Тимеров, Айҙар Ғәлимов, Лилиә Биктимерова, Фәдис Ғәниев, Вилдан Яруллин, Рәсүл Ҡарабулатов, Айгөл Һағынбаева, Радик Вәлмөхәмәтов, Рөстәм Ғиззәтуллин, Алһыу һәм Азат Фазлиевтар, Заһир Иҫәнсурин, Рөстәм Шаһбалов, Гөлсөм Бикбулатова, Дамир Тайыпов, Зилиә Бәхтиева һәм башҡа эстрада йондоҙҙары бер сәхнәлә!

🎊Тамашасыларҙы онотолмаҫлыҡ Яңы йыл алды мөхите, яратҡан йырҙар һәм, әлбиттә, музыкаль сюрприздар көтә!

Башҡортостанда сатлама һыуыҡтар арҡаһында сүп-сар сығарыу тотҡарлана

Тәбиғәттән файҙаланыу һәм экология министрлығынан хәбәр итеүҙәренсә, машиналарҙы һалҡын көндәрҙә файҙаланыу буйынса сикләү бар. Температура ныҡ түбәнәйһә гидравлик механизмдар сафтан сығыуы мөмкин. Сүп йыйылып киткән урындарҙан көнкүреш ҡалдыҡтары тиҙҙән алына. Эш нормаға ярашлы температура булғас ғәҙәти тәртиптә ойоштороласаҡ.

Башҡортостанда элемтә һәм интернет сифаты яҡшырған

Был турала Һанлы үҫеш министрлығынан хәбәр итәләр. - Баһаны эшҡыуарҙар бирҙе. Телекоммуникация хеҙмәттәре менән күптәр ҡәнәғәт, - тип белдерелде. Киләһе йылда Башҡоростанда тағы 50 ауылды мобиль элемтә һәм интернетҡа тоташтырыу планлаштырыла.

Имен-һау йөрөп ҡайт, Рафиҡ Үзбәк улы!

Башҡортостан юлдаш телевидениеһы хәбәрсеһе Рафиҡ Әхмәтшин Рәсәйҙең Оборона министрлығы менән контракт төҙөп, махсус хәрби операцияға юлланды. Рафиҡ Үзбәк улы хәрби хәбәрсе булараҡ, күп тапҡыр Донбасста булып ҡайтты, илебеҙгә ҡушылған төбәктәрҙең тормошон яҡтыртты, данлыҡлы генерал Шайморатов исемен мәңгеләштереүгә күп өлөш индерҙе.

Бөгөн ул илебеҙ именлеге һәм аяҙ күк йөҙө өсөн көрәшәсәк. Хеҙмәттәшебеҙгә имен-һау әйләнеп ҡайтыуын теләйбеҙ!