Радий Хәбиров «Газпром трансгаз Өфө» 70 йыллыҡ юбилейы менән тәбрикләне

Башҡортостан башлығы Радий Хәбиров «Газпром трансгаз Өфө» яуаплылығы сикләнгән йәмғиәтте 70 йыллыҡ юбилейы менән тәбрикләне. Иҫтәлекле дата уңайынан предприятиеның алдынғы хеҙмәткәрҙәренә дәүләт наградалары һәм почет грамоталары тапшырылды. Республика етәксеһе, «Газпром трансгаз Өфө» йәмғиәтенең социаль ярҙам һәм инвестициялар йүнәлешен билдәләне.

Радий Хәбиров Мәскәүҙә «Рәсәй» күргәҙмәһе хаҡындағы тәьҫораттары менән уртаҡлашты

Төбәк башлығы экспозиция менән яҡындан танышып, был турала Беренсе каналдағы «Халыҡ фронты» программаһында һөйләне. «Күсмә халыҡтан алып пилотһыҙ аппараттарға тиклем» тип исемләнгән экспозиция аша халҡыбыҙ тарихының нисек үтеүе күрһәтелә. Башҡортостан хәҙер Рәсәйҙең үҫешкән терәк субъекты. Был иң яҡшы машиналар, хәрби двигателдәр, пилотһыҙ осоу аппараттары, - тип аңлатты Радий Хәбиров.

Махсус хәрби операция яугиры үҙенең кумиры Фидан Ғафаров менән күреште

Яу яланындағы адресат менән сәхнәләге адресант осрашты. Махсус хәрби операция яугиры үҙенең кумиры Фидан Ғафаров менән күреште. Быға легендар артисыбыҙ фронтҡа ебәргән хат сәбәпсе була. Фидан Ғафаров яҙған өсмөйөш ҡағыҙҙы «Маугли» ҡушаматлы яугирға беҙҙең коллегабыҙ Гүзәл Хәмитова «Һалдатҡа хат» проекты сиктәрендә тапшырған. Ул үҙ сиратында отпускаға ҡайтҡанда кумиры менән осрашып, күҙмә-күҙ аралашырға теләк белдергән.

Алдағы көндәрҙә Башҡортостанда сатлама һыуыҡтар көтөлә

Ҡаҙанлыҡтар ҡатмарлы шарттарҙа эшләргә әҙерләнә, табиптар йылыраҡ кейенергә, алкоголдән тыйылырға кәңәш итә. Алдағы көндәрҙә Башҡортостанда сатлама һыуыҡтар көтөлә. Һауа температураһы урыны менән 38 градусҡа тиклем түбәнәйеүе ихтимал. Бындай һыуыҡтар оҙаҡ һаҡланырмы, мәктәпкә ҡасан бармаҫҡа мөмкин? Яуап видеояҙмала.

Бөгөн Өфөлә Бөрйән районы командаларының спартакиадаһы башланды

Волейбол буйынса тәүге ярыш Башҡорт дәүләт аграр университетының спорт залында үтте. Бөрйәндәр араһында спартакиада ойоштороу тәҡдимен яҡташтар берлеге күтәреп сыҡҡан. Был ойошманың икенсе күләмле проекты. Тәүгеһе Бөрйән уҡыусылары уйнаған «Урал батыр» эпосын башҡала сәхнәһендә күрһәтеү булһа, икенсеһе спартакиада. Ул 16 спорт төрөн үҙ эсенә ала. Командалар ауыл биләмәләре иҫәбе буйынса төҙөлгән.

Ҡайғылы хәбәр...

Республикаға ғына түгел, ил кимәлендә билдәле булған һәүәҫкәр рәссам Марат Ғафаров арабыҙҙан китте. Уның 3D форматындағы һүрәттәре бик күптәрҙә һоҡланыу тыуҙырған ине. Тыуған яҡ тарихына, тәбиғәтенә арналған картиналары ла бихисап ине уның. талант эйәһен яуыз сир аяманы.

Ул үҙенең илһөйәрлеге, тормошто, тәбиғәтте яратыуы менән айырылып тора ине. Нисәмә кешегә матурлыҡ бүләк итте?! Һанап бөткөһөҙ.

Мәрхүмдең ғаиләһенә һәм яҡындарына күркәм сабырлыҡтар теләйбеҙ. Йәне йәннәттә булһын, иманын юлдаш итһен.
Тыныс йоҡла, рәссам...

Ауыр саҡта хеҙмәттәшебеҙгә ярҙам итәйек!

Кисә Архангел районынан ҡот осҡос хәбәр килде. Билдәле оператор, БЮТ каналы хеҙмәткәре Эдуард Ғәйнанов юл фажиғәһенә эләккән. Ҡыҙғанысҡа ҡаршы, ҡатыны һәләк булған. Өс сабый әсәйһеҙ ҡалды. Эдуард Адис улы дауаханала, табиптар операция эшләгән.

Ауыр минутта ярҙам ҡулы һуҙайыҡ. 89191410960 телефон һандары буйынса аҡса ебәрергә мөмкин. Хәмитова Гүзәл Сулпан ҡыҙы, «Башҡортостан» телерадиокомпанияһының баш мөхәррире.

Радий Хәбиров “Рәсәй” форум-күргәҙмәһенән тәьҫораттары менән уртаҡлашты

Республика Башлығы “Халыҡ фронты” тапшырыуында сығыш яһаны. 3 декабрҙә Мәскәүҙә күргәҙмә барышында Башҡортостан көнө ойошторолдо. Радий Хәбиров әйтеүенсә, “Күскенселәрҙән пилотһыҙ осҡостарға тиклем” тигән төшөнсә буйынса әҙерләнгән стенд халыҡта ҙур ҡыҙыҡһыныу уята. “Рәсәй” форум-күргәҙмәһе Мәскәүҙә ВДНХ-комплексында урынлашҡан. Унда бөтә 89 төбәк ҡаҙаныштары менән таныштыра. Экспозиция 12 апрелгә тиклем эшләй.

Радий Хәбиров “Газпром трансгаз Өфө” ойошмаһын 70 йыллығы менән ҡотланы

Башҡортостан Башлығы компания юбилейы уңайынан алдынғы хеҙмәткәрҙәргә дәүләт наградалары тапшырҙы. Компания инвестиция программаһында әүҙем ҡатнаша, социаль проекттар үтәлешенә яуаплы ҡарай. Радий Хәбиров әйтеүенсә, бөгөн ойошма республиканың стратегик партнерҙарының береһе иҫәпләнә. Республикала газ үткәреү буйынса социаль программа уңышлы тормошҡа ашырыла. Мохтаждарға сертификаттар бирелә, йортҡа тиклем газ торбаһы бушлай һуҙыла. Халыҡтың 85 проценты “зәңгәр яғыулыҡ” менән ҡуллана.

Башҡортостанда юл хеҙмәттәре көсәйтелгән тәртиптә эшләй

Һауа торошона бәйле шундай ҡарар ҡабул ителгән. Транспорт һәм юл хужалығы министрлығынан белдереүҙәренсә, республика юлдарына 900-ҙән ашыу берәмек махсус техника сығарылған. Ошо көндәрҙә һауа температураһы -36 градусҡа тиклем түбәнәйә. Сатлама һыуыҡтар сәбәпле Өфөлә ваҡытлыса туҡталыу урындары йыһазландырылған.

Башҡортостан фәнни йәмәғәтселеге танылған тарихсы Әнүәр Әсфәндиәровты иҫкә ала

Бөгөн Өфө фән һәм технологиялар университетында Әсфәндиәров уҡыуҙары башланды. Бөтә Рәсәй ғилми-ғәмәли конференция “17-се – 20-се быуат башында Рәсәй халыҡтары: империяға ҡушылыу тәжрибәһе” тигән темаға арнап ойошторола. “Башҡорт халҡы тарихы” үҙәгенең әүҙәүсе белгесе, филология фәндәре кандидаты Искәндәр Сәйетбатталов әйтеүенсә, Әнүәр Әсфәндиәров башҡорт халҡы тарихын өйрәнеүҙә тәрән эҙ ҡалдырған шәхес. Әсфәндиәров уҡыуҙары барышында башҡорт старшинаһы һәм ғәскәр башлығы, абыҙ Кинйә Арыҫлановтың 300 йыллығына бағышланған түңәрәк өҫтәл дә уҙғарыла.

Башҡортостанда 3 меңдән ашыу ғаилә әсәлек капиталынан айлыҡ пособие ала

Социаль фонд буйынса төбәк бүлексәһенән хәбәр итеүҙәренсә, сабыйға 3 йәш тулғансы ғаиләләр айлыҡ түләү юллай ала. Ул балаға йәшәү минимумы йәғни 12 мең 271 һумға тиң. Киләһе йылдың февраленән Рәсәйҙә әсәлек капиталы 7,5 процентҡа арта. Икенсе бала өсөн түләү 833 мең 800 һумға етә.

Ил Президентын киләһе йылдың 17 мартында һайлайбыҙ

Федерация Советы һайлау көнөн билдәләне. Ҡарар бөгөн ҡабул ителде. Президент өсөн өс көнлөк тауыш биреү тураһында ла проект бар. Ул иртәгә Үҙәк һайлау комиссияһында ҡараласаҡ, тип белдерҙе комиссия рәйесе Элла Памфилова. Конституцияға ярашлы, Президент 6 йылға һайлана.

Башҡортостанда 585,5 миллиард һумға инвестиция йәлеп ителгән

Быйыл был күрһәткес 107 процентҡа еткән. Республика Хөкүмәте беренсе вице-премьеры – Иҡтисади үҫеш һәм инвестицион сәйәсәт министры Рөстәм Моратов белдереүенсә, сәнәғәт, ауыл хужалығы, туризм һәм юл яны сервисы өлкәһендә проекттар әүҙем тормошҡа ашырыла. Импортҡа алмаш мәсьәләләре лә уңышлы хәл ителә. Әле дөйөм исемлектә 1,2 триллион һумға баһаланған 2 меңдән ашыу инвестиция проекты күрһәтелгән.

Бишбүләккә маскировкалау селтәрҙәре үреү өсөн туҡымаларҙың тәүге партияһы оҙатылды

Район ирекмәндәре тауарға ҡытлыҡ барлығын республика башлығы менән тура бәйләнеш ваҡытында белдергәйне. Радий Хәбиров ҡушыуы буйынса республиканың сәнәғәт , энергетика һәм инновациялар министрлығы был мәсьәләне хәл итте.
Бишбүләк ирекмәндәренә Туймазы районында эшләгән мебель фабрикаһы ярҙам иткән. Сәнәғәт, энергетика һәм инновациялар министрлығы башҡа предприятиелар менән дә һөйләшеүҙәр алып бара. Мәсьәлә хәл ителһә бушлай туҡымаларҙы башҡа район ирекмәндәре лә аласаҡ.

Башҡортостан командаһы Бөтә Рәсәй ҡышҡы гимназиадаһында беренсе урын алды

Спорт ярышы Силәбелә уҙҙы. Унда 11 төбәктән мәктәп уҡыусылары һәм урта һөнәри уҡыу йорттары студенттары ҡатнашты. Егеттәр һәм ҡыҙҙар саңғы һәм коньки уҙышы, спорт йүнәлешен билдәләү, мини-футболда көс һынашты. Республика командаһы 27 алтын, 12 көмөш һәм 16 бронза миҙал яуланы.

Өфөлә сыҙамлыҡты арттырыу һәм һаулыҡты яҡшыртыу өсөн үҙенслекле ысул уйлап табылған

Оҙон ғүмер өсөн биологик актив матдәләр. Өфө фән һәм технологиялар университетында сыҙамлыҡты арттырыу һәм һаулыҡты яҡшыртыу өсөн үҙенслекле ысул уйлап табылған. «Өҫтөнлөк - 2030» федераль программаһының стратегик проекты сиктәрендә уҡыу йортонда һаулыҡты яҡшыртыу өсөн бер нисә эшләнмә уйлап табылған.

Баш ҡалала «Өфө пехота полкының легендар даны» документаль китабының исем туйы үтте

Өфө тарихы музейында тарих фәндәре кандидаты, хәрби тарихты өйрәнеүсе Рәмил Рәхимовтың «Өфө пехота полкының легендар даны» документаль китабының исем туйы үтте. Баш ҡаланың 450 йыллыҡ юбилейы айҡанлы ойошторолған сарала хәрби тарихты төплө өйрәнеүсе ғалим асыҡ лекция уҡыны.

Башҡортостанда ҡала яны поездарында йөрөгән миллиардынсы пассажирҙы ҡаршыланылар

Республика Башлығы Радий Хәбиров һәм “Рәсәй тимер юлы” компанияһының Куйбышев бүлексәһе етәксеһе Вячеслав Дмитриев “Өфө” станцияһында юбилейлы пассажирҙы ҡотланы. Өфө фән һәм технологиялар университеты студенты Карина Янбарисоваға иҫтәлекле бүләктәр тапшырылды. Радий Хәбиров әйтеүенсә, “Рәсәй тимер юлы” компанияһы менән хеҙмәттәшлек эҙмә-эҙлекле үҫешә. Йылдан-йыл пассажирҙар һаны арта. Быға хеҙмәтләндереү сифаты яҡшырыуы ла булышлыҡ итә.Быйыл республикала 5 миллион пассажир тимер юл хеҙмәте менән файҙаланған. Был күрһәткес былтырғыға ҡарағанда, 21 процентҡа артҡан.

Республикала 14,5 мең сығарылыш уҡыусыһы йомғаҡлау иншаһын яҙҙы

Мәғариф һәм фән министрлығынан шул турала белдерәләр. Берҙәм дәүләт имтихандарына рөхсәт алыу өсөн мотлаҡ инша йәки изложение яҙып тапшырырға кәрәк. Егеттәр һәм ҡыҙҙарға алты тема тәҡдим ителгән. Инша һөҙөмтәләре өсөн юғары уҡыу йортона ингәндә өҫтәмә балл бирелә. Киләһе йылда Берҙәм дәүләт имтихандары 23 майҙа башлана.