Радий Хәбиров баҡса юлдарын төҙөкләндереүҙе дауам итергә ҡушты

Бөгөн "Тура бәйләнеш" барышында Иглин районында йәшәүсе Елена Калтаева юлдар төҙөлөшө буйынса һорау бирҙе. "Аҡса юлдарҙы тәртиптә тотоу, электр менән тәьмин итеү, сүп-сар сығарыу өсөн тотонола башланы. Баҡса - ул шөғөл урыны, шулай уҡ аҙыҡ--түлек әҙерләү. Баҡсасылар юл һорай. Киләһе йылда бюджетта сығымдар ҡаралған. Ҡаҙна ҙурайһа, тағы өҫтәрбеҙ. Әммә баҡса ширкәттәрендә һайланған етәксе, документтар теүәлләге, тәртип булырға тейеш", -тине Радий Хәбиров.

Туристик объекттарға илткән юлдарҙы ремонтлау программаһы булдырыла

-Күп туристик объекттарға яҡшы юлдар төҙөлә, - тине Радий Хәбиров бөгөн Тура бәйләнеш барышында. - Быйыл Ишембай районында Верхоторҙан Мәләүез районы Воскресенк ауылына тиклем юлды тәртипкә килтерә башланыҡ. Һыуһаҡлағысҡа туристарҙың бер өлөшө ошонан үтә. Туризм министрлығы туристик объекттарға юлдарҙы төҙөкләндереү буйынса программа булдырырға тәҡдим итә. Салауат районында уникаль паркка илткән 4 километр юлда эш алып барыла. Киләһе йылда асабыҙ. Ишембай районында Ҡуҡрауыҡ шарлауығына ла юл төҙөлө. Шүлгәнташҡа ла юл юҡ ине. Хәҙер юл һалынды, интернет бар, газ үткәрәбеҙ, -тине Радий Хәбиров.

"Рәсәй - спорт державаһы" форумын киләһе йылдың көҙөндә уҙғарыу көтөлә

Радий Хәбиров "Тура бәйләнеш" барышында Башҡортостандың "Рәсәй - спорт державаһы" форумын 2024 йылдың октябрендә Өфөлә уҙғарыуҙы тәҡдим итеүе тураһында белдерҙе. "Аныҡ ҡарарҙы Рәсәй Президенты хакимиәте ҡабул итә. Ни өсөн октябрь? Август аҙағында Көрәш һарайын төҙөп бөтөргә планлаштырабыҙ. Форумды шунда уҙғарырға мөмкин. Был спорт һәм физкультура үҫешен анализлау, һөҙөмтәләрҙе барлау буйынса төп форум", - тине Радий Хәбиров.

Рәсәй һәм Ҡаҙағстан төбәктәре форумын Өфөлә уҙғарыу ҙур әһәмиәткә эйә

Республика Башлығы Радий Хәбиров бөгөн "Тура бәйләнеш" барышында Рәсәй һәм Ҡаҙағстан төбәктәре форумының Башҡортостанда уҙғарылыуы ҙур мәртәбә тип белдерҙе. Был йыйын киләһе йылда Өфөлә үтә. - Тышҡы иҡтисади эшмәкәрлек алып барған предприятиелар һөҙөмтәлерәк эшләй. Яңыртыу, хеҙмәт хаҡы түләү өсөн яңы мөмкинлектәр була. Бөгөн Беларусь, Ҡаҙағстан, Үзбәкстан менән авиабәйләнеш булдырылған. Беҙҙең күршеләр - мөһим сауҙа партнерҙары. Хеҙмәттәшлек яңы етештереү ҡеүәттәре асырға булышлыҡ итә, - тине Радий Хәбиров.

Радий Хәбиров Өфө ҡаласығы һәм "Әр-Рәхим" мәсете буйынса фекерен әйтте

Республика Башлығы "Тура бәйләнеш" барышында Өфө ҡаласығы буйынса һорауға яуап бирҙе. Уның әйтеүенсә, халыҡта борсолоу тыуҙырырға кәрәкмәй, бөгөн православ ҡорам төҙөлөшө туҡтатылған. - Андрей Назаров менән был мәсьәлә буйынса кәңәшләштек. Мосолмандар талабы ла ғәҙел, тағы бер ҡорам төҙөгәнсе, мәсетте төҙөп бөтөргә. Был проект менән шәхсән шөғөлләнәсәкмен. Ныҡлап тикшерәбеҙ. Бер манара көмбәҙе килеп төштө инде. Ҡарар ҡабул ителде, финанслау сығанаҡтары билдәле. Быйыл, йә киләһе йыл яҙ манараларҙа эш башлана. Ә ҡорам буйынса әүҙем ҡаршы сыҡтылар, ҡолаҡ һалырға кәрәк. Унда депозитарий була, - тине Радий Хәбиров.

Башҡортостан Палестинанан ҡасаҡтарҙы ҡабул итергә әҙер

Бөгөн Радий Хәбиров "Тура бәйләнеш" барышында Палестина халҡына ярҙам тураһында һорауға яуап бирҙе. - Беҙҙең төп байлыҡ - күп милләтле берҙәмлек. Беҙ һәр төрлө хәлгә әҙер булырға тейеш. Башҡортостанға мәғлүмәти яҡтан күпләп һөжүм итәләр. Милләт-ара татыулыҡты нығытырға кәрәк. Беҙ күпмелер кешене ҡабул итергә әҙер. Ундай мөмкинлек бар, -тине Радий Хәбиров. Палестина халҡына миллиард ярым һум ярҙам, 20 тонна йөк тупланған. Ылау ойошторолоуы көтөлә.

Юлай Ильясов доброволец булып махсус хәрби операцияға юллана

Көйөргәҙе район хакимиәте башлығы Юлай Ильясов махсус хәрби операцияла ҡатнашыу тураһында ҡарар ҡабул иткән. Был турала бөгөн "Тура бәйләнеш" барышында Радий Хәбиров белдерҙе. "Юлай Талха улы контракт төҙөнө. Ул еңел булмаған ҡарар ҡабул итте. Беҙҙең командала лайыҡлы кешеләр эшләй", - тине Радий Хәбиров.

Башҡортостан Башлығы тура эфирҙа Башҡортостан халҡы менән аралашты

Радий Хәбировҡа 4 меңдән ашыу һорау килде һәм 216 видеомөрәжәғәт әҙерләнгәйне. Аралашыу өс сәғәт ярымдан ашыу барҙы. Тура бәйләнештә республика етәксеһе көнүҙәк һорауҙарға яуап бирҙе. Махсус хәрби операция, торлаҡ-коммуналь хужалыҡ, социаль объекттарҙы төҙөкләндереү һәм юлдарҙы тәртипкә килтереү төп темалар иҫәбендә булды. Эфирға эләкмәй ҡалған һорауҙар ҙа иғтибарға алынды. Улар хәл ителеү өсөн төрлө ведомстволарға ебәрелә.

Радий Хәбиров менән тура бәйләнеш: халыҡты ниндәй мәсьәләләр борсой

Бөгөнгө тура бәйләнеш Радий Хәбиров өсөн бишенсеһе. Башҡортостан Башлығы 2018 йылдан алып халыҡтың һәм журналистарҙың һорауҙарына яуап бирә.
Йылдан-йыл республика етәксеһенә мөрәжәғәт итеү мөмкинлектәре арта, тура линияны трансляциялау даирәһе киңәйә. Был юлы Радий Хәбировҡа һорауҙарҙы социаль селтәрҙәр, Башҡортостан башлығының рәсми сайтында бирергә мөмкин ине. Тура бәйләнеш республиканың барлыҡ теле һәм радиоканалдары, социаль селтәрҙәр аша трансляцияланды.

Ҡытай инвесторҙары Башҡортостанда фиброцемент материалдар етештереүҙе яйға һала

Республика Хөкүмәтенән хәбәр итеүҙәренсә, етештереү майҙансыҡтарын "Алға" биләмәһендә урынлаштырыу тәҡдим ителә. Бында төрлө ташлама ҡаралған. Ҡытай инвесторҙары менән тәүге осрашыу Башҡортостан делегацияһының был дәүләткә сәфәре барышында булды. Һөйләшеүҙәр Өфөлә Халыҡ-ара бизнес аҙналығында дауам итте. Ошо көндәрҙә Ҡытай эшҡыуарҙары етештереү өсөн тәҡдим ителгән биләмәне ҡараны.

Бөгөн Өфөлә Бөтә Рәсәй юристар форумы башлана

Ул илдә билдәләнгән Юристар көнө уңайынан ойошторола. Бөгөн “Шәхси хоҡуҡ тураһында диалог” тигән фәнни-ғәмәли конференция була. 1 декабрҙә Рәсәй Президенты янындағы гражданлыҡ закондарын камиллаштырыу Советының күсмә ултырышы үтә. Унда федераль закон проекттары хаҡында фекер алышыу ҡаралған. Форум барышында Павел Крашенинниковтың китабы менән таныштырыу була. Эшлекле йыйын программаһына Рәсәй юристар берләшмәһенең Башҡортостан бүлексәһе конференцияһы ла ингән. Сара аҙағында “Йыл юрисы” премияһы тапшырыла.

Рәсәй Ҡыш Бабайының тимер юл сәйәхәте дауам итә

Поезд 11 ноябрҙә Бөйөк Устюгтан ҡуҙғалып китте. Кисә ул Ханты-Мансы автономиялы округында – Нижневартовскийҙа булды. Иртәгә Омск ҡалаһына барып етә. Поезд 32 мең километрҙан ашыу юл үтә, Рәсәйҙең 80 ҡалаһында туҡталыш яһай. 19 декабрҙә Ҡыш Бабайҙы Өфөлә ҡаршылайҙар. Байрам ойоштороусылар 27 декабрҙә Мәскәү халҡын тәбрикләй. Яңы йылды Петрозаводск ҡалаһында ҡаршылай.

Шаҡша күпере көтөлгәндән тиҙерәк файҙаланыуға тапшырылыуы мөмкин

Ҡала хакимиәтенән хәбәр итеүҙәренсә, контракт буйынса эштәр 2025 йылдың апрелендә теүәлләнергә тейеш. Әлеге графикка ярашлы 2024 йылдың декабрендә төҙөп бөтөү мөмкинлеге бар. Шаҡша ауылы янында Өфө йылғаһы аша күпер милли проектҡа ярашлы төҙөкләндерелә. Ремонт быйыл июлдә башланды. Капиталь эштәр өсөн 2 миллиард һумдан ашыу аҡса тотонола.

Башҡортостанда быйыл 2,6 миллион квадрат метр торлаҡ файҙаланыуға тапшырылды

Төҙөлөш һәм архитектура министрлығынан хәбәр итеүҙәренсә, йыл аҙағынаса тағы 500 мең квадрат метр торлаҡ тапшырыу бурысы ҡуйылған. Торлаҡ төҙөлөшө күрһәткесе буйынса беҙҙең республика Волга буйы округында икенсе урында килә. Лидерҙар араһында Өфө, Стәрлетамаҡ, Октябрьский, Нефтекама ҡалалары, Өфө, Иглин, Стәрлетамаҡ, Ҡырмыҫҡалы һәм Әбйәлил райондары күрһәтелгән.

Башҡортостан вәкилдәре Russian Event Awards конкурсында 31 наградаға эйә булды

Ошо көндәрҙә Түбәнге Новгородта Бөтә Рәсәй туристик премияһының финалы уҙҙы. Беҙҙең республиканан алты проект Гран-при яуланы. “Башҡорт аты” халыҡ-ара фестивале, “Әйҙә уйнарға!” балалар байрамы, Рәсәй һәм Беларусь төбәктәре форумы, “Шүлгәнташ” музей комплексы, Бөрө ҡалаһы һәм Башҡортостан республикаһы иң юғары бүләккә лайыҡ булды. Быйыл “Туризм” милли проекты буйынса беҙҙең республика 552 миллион һум йәлеп иткән.

Мәскәүҙә Башҡортостан менән яҡындан танышырға була

“Рәсәй” халыҡ-ара күргәҙмә-форумы барышында 3 декабрҙә Башҡортостан Республикаһы көнө уҙа. Унда Радий Хәбиров етәкселегендә рәсми делегация ҡатнаша. Ҡунаҡтарға бай мәҙәни программа тәҡдим ителә. ВДНХ-ла “Терра ҡыш” фестивале һәм “Башҡорт оҙон ғүмерлеге” проекты презентациялана, башҡорт биҙәүестәре һәм ҡурай эшләү, башҡорт бейеүҙәре буйынса оҫталыҡ дәрестәре ойошторола, милли ризыҡтарҙан ауыҙ итергә була. Башҡортостан сәнғәт оҫталары әҙерләгән ҙур концерт программаһы ла күрһәтелә.

Рәсәй Хөкүмәте доброволецтарға страховка түләү тәртибен раҫланы

2022 йылдың 24 февраленән үҙ теләге менән махсус хәрби операцияла ҡатнашҡан яугирҙәргә яраланған йәки контузия алған, шулай уҡ инвалид булған осраҡта компенсация бирелә. Яуҙа һәләк булған доброволецтар өсөн страховканы уның яҡын туғандары алырға хоҡуҡлы. Компенсацияны юллау өсөн хәрби комиссариатҡа мөрәжәғәт итергә кәрәк. Быйыл августа Рәсәй Президенты Владимир Путин доброволецтарҙы мотлаҡ страховкалау буйынса указға ҡул ҡуйҙы. Документҡа ярашлы, махсус хәрби операцияла һәләк булған яугир өсөн туғандары 3,1 миллион һум ала, беренсе төркөм инвалидтарға 2,3 миллион һум түләнә.

Башҡортостан Йәмәғәт палатаһының 6-сы составы эш һөҙөмтәләрен барлай

Бөгөн палатаның йомғаҡлау ултырышы үтте. Коронавирус пандемияһы, махсус хәрби операция... Алтынсы составҡа ил, республика өсөн ҡатмарлы шарттарҙа эшләргә тура килә. Әммә йәмәғәт палатаһы ағзалары әүҙем гражданлыҡ позицияһы күрһәтә, илһөйәрлек өлгөһө булып тора.

Өфө районының Шамонин ауылы халҡы һирәк йөрөгән йәмәғәт транспортына зарлана

Ауыл йылдам үҫешә, әле унда 3 мең ярым кеше йәшәй. Уларҙың күбеһе көн һайын Өфөгә йөрөп эшләй, уҡый. Йәмәғәт транспорты хеҙмәте менән ҡулланыусылар ҙа бихисап. Ләкин автобустарҙың хәрәкәт итеү интервалы бер сәғәткә тиклем еткәне лә бар, ти урындағы халыҡ.

Өфөнөң 2-се балалар поликлиникаһын яңырыу көтә

Медицина учреждениеһы эшмәкәрлеге менән бөгөн Башҡортостан башлығы яҡындан танышты. Поликлиника Киров районы балалары сәләмәтлеге һағында тора. Өфөлә уның 6 бүлексәһе эшләй, 7 -сеһе тиҙҙән Һынаусылар урамында сафҡа инергә тейеш. 40 меңдән ашыу пациент беркетелгән. Башҡортостан башлығы 2-се балалар поликлиникаһының Степан Кувыкин урамындағы филиалында булды. Ул табиптарҙың эш бүлмәләрен, процедура кабинетын, фтизиотерапия, рентген, функциональ диагностика һәм УЗИ бүлмәләрен ҡараны.