Ҡырмыҫҡалы районы халҡы яугирҙарға маскировка селтәрҙәре әҙерләй

Ҡырмыҫҡалы районы Һәүәләй ауылында махсус хәрби операцияла ҡатнашыусыларға маскировка селтәрҙәре үреү буйынса ирекмәндәр төркөмө булдырылған. Гүзәл заттар мәҙәниәт йорто фойеһына йыйылып эшләй. Әлегә иҫәп буйынса йөҙөнсө септә үрелә. Раушания Рамаҙанованың изге башланғысын күрше ауылдарҙа йәшәүселәр ҙә күтәреп алған, төбәктә ирекмәндәр хәрәкәте көсәйә генә. Маскировка селтәренә алғы һыҙыҡта ихтыяж юғары, был турала хәрбиҙәрҙең яҡындары ла билдәләй. Япмалар танкты һәм башҡа техниканы хәрби һөжүмдән йәшерергә ярҙам итә.

Республика ФАП-тарында кәрәкле дарыуҙар һатыу тергеҙелә

Республика ФАП-тарында тергеҙелгән дарыу һатыу халыҡҡа кәрәкле препараттарҙы ауыл ерлегендә һатып алыу мөмкинлеген бирә. Быйыл Благовар районы Иҫке Абзан ауылында ла ошондай мөмкинлек булдырылған. Ауылдағы ФАП «Һаулыҡ һаҡлау» милли проекты сиктәрендә 2020 йылда төҙөлгән.

Өфөлә Миңлеғәле Нәҙерғоловтың 70 йәшенә арналған ижади осрашыу үтте

Әҙәбиәт ғилемен өйрәнеүгә бағышланған ғүмер. Мәжит Ғафури мемориал йорт-музейында филология фәндәре докторы Миңлеғәле Нәҙерғоловтың 70 йәшенә арналған ижади осрашыу үтте. Сарала халҡыбыҙҙың рухи мираҫын өйрәнеүсе ғалимдың тормош һәм ижад юлы барланды.

Бөрйәндә яугир әсәләрен ҙурланылар

Райондың Байназар ауылында махсус хәрби операцияла ҡатнашҡан ир-егеттәрҙең яҡындары ҡатнашлығында сара үтте. Ул 26 ноябрҙә билдәләнгән Әсә көнөнә арналды. “Улдарыбыҙ алғы һыҙыҡта. Улар ил именлеген һаҡлай. Һалдаттарыбыҙ иҫән-имен ҡайтһын өсөн доға ҡылабыҙ”, - ти яугирҙәрҙең әсәләре Әлиә Ғазина һәм Гөлсирә Науразбаева.
Республикала яугирҙәргә һәм уларҙың ғаиләләренә социаль ярҙам ҡаралған. “Бөрйәндә лә махсус хәрби операцияла ҡатнашыусылар һәм уларҙың яҡындары һәр ваҡыт иғтибар үҙәгендә. Хоҡуҡтарын аңлатабыҙ, хәстәрлек күрһәтәбеҙ”, - ти район хакимиәте башлығы урынбаҫары Венера Вәлиева.

Өфөлә Көнсығыш сығыу юлы 80 процентҡа әҙер

Транспорт һәм юл хужалығы министрлығынан белдереүҙәренсә, “Хәүефһеҙ сифатлы юлдар” милли проектына буйынса күпер, эстакада һәм юл айырсаһында асфальт түшәлде. Объектта төҙөлөш һәм ҡороу эштәре тәүлек әйләнәһе бара. Көнсығыш сығыу юлы буйлап автомобиль хәрәкәте киләһе йылдың беренсе кварталында башланырға тейеш. Проектҡа ярашлы, бында тоннель төҙөлдө, күпер һалынды, М-5 “Урал” федераль трассаһына сыҡҡан тиҙ йөрөшлө автомобиль юлы барлыҡҡа килде.

Рәсәйҙә киләһе йыл Ғаилә йылы исеме аҫтында уҙа

Президент Владимир Путин тейешле указға ҡул ҡуйҙы. Ғаиләне яҡлау өлкәһендә дәүләт сәйәсәтен танытыу, традицион ғаилә ҡиммәттәрен һаҡлау маҡсатынан шундай ҡарар ҡабул ителгән. Хөкүмәткә йыл аҙағына тиклем исемле йылға бәйле ойоштороу комитетын булдырырға ҡушылған. Рәйес вазифаһына вице-премьер Татьяна Голикова тәғәйенләнгән.

Өфөлә ун алтынсы халыҡ-ара эшҡыуарлыҡ аҙналығы дуам итә

Күләмле форумда быйыл 4 мең тирәһе кеше ҡатнаша, ике тиҫтәнән ашыу ил вәкилдәре эшҡыуарлыҡта уртаҡлыҡтарҙы барлай. Радий Хәбиров форумдың пленар ултырышында ҡатнашты. «Иртәгәнән һуң халыҡ-ара йәмәғәтселек күҙлегенән» тип аталған йыйылышта оҙайлы осорҙа сит ил партнерҙары менән үҙ-ара эш итеү мөмкинлектәре тикшерелде.

Радий Хәбиров ҡаҙнасылыҡ етәксеһе урынбаҫары Эли Исаев менән осрашты

Башҡортостанда республика бюджетын үтәүҙә финанс дисциплина юғары кимәлдә. Муниципаль берәмектәрҙең эшмәкәрлек һөҙөмтәлелегенә иғтибар бүлеү мөһим. Был турала федераль ҡаҙнасылыҡ етәксеһе урынбаҫары Эли Исаев белдерҙе. Ул Башҡортостанға эш сәфәре менән килде.

Дәүләт Йыйылышы - Ҡоролтайҙың өсөнсө ултырышы үтте

Парламентарийҙар Дәүләт думаһы тарафынан тикшереүгә тәҡдим ителгән закон проекттары өҫтөндә эшләне. Көн тәртибендә алдағы йылдарҙа республика бюджетын планлаштырыу, килемдәрҙе һәм сығымдарҙы геосәйәсәт мәсьәләһенән сығып билдәләү, граждандарҙы социаль хеҙмәтләндереү һорауҙары иғтибар үҙәгендә булды.

Өфөлә эш урынында йәрәхәтләнеүсе граждандарға автомобиль асҡыстары тапшырылды

Республиканың төрлө район-ҡалаларынан 11 кеше бар уңайлыҡтары менән йыһазландырылған машиналы булды. Быйыл мөмкинлене сикләнгән 50 кешенең машинаһы яңыртылған.

Башҡортостанда ирекле батальондар төҙөү буйынса үҙәк штабына - 9 ай

Тыуған илгә һөйөү, хөрмәт һәм хәрби бурысҡа тоғролоҡ. Махсус хәрби операцияла ҡатнашыусыларҙы ошондай сифаттар берләштерә.
Быйыл февралдә Башҡортостанда ирекле батальондар төҙөү буйынса үҙәк штаб ойошторолдо. Тәүге булып Даян Мурзин исемендәге батальонға ир-егеттәр ҡабул ителә башланды. Һуңғараҡ башҡа исемле батальондарҙы ла ойошторорға команда килде. 9 ай эсендә штаб коллективы бер нисә мең кешене йыйып, оборона министрлығына һәм Росгвардияға оҙата.

Зубов ауылы «Белем» мәғариф үҙәге хеҙмәткәрҙәре яугирҙарға «Нива» оҙатырға әҙерләнә

Өфө районы яугирҙарҙы ҡеүәтләй. Зубов ауылы «Белем» мәғариф үҙәге хеҙмәткәрҙәре махсус хәрби операция биләмәһенә «Нива» машинаһын оҙатырға әҙерләнә. Техниканы учреждение директоры интернет киңлектәрендә табып, һатып алған. Ирекмәндәр машинаны ремонтлап, буятҡан. Ошо көндәрҙә уға махсус наклейкалар ҙа йәбештерелгән. Машина декабрҙә Өфө районынан гуманитар конвой сафында Украиналағы хәрби бәрелештәр биләмәһенә оҙатыласаҡ.

Мәктәпкәсә белем биреү учреждениеларында үткәрелгән төҙөкләндереү эштәре тикшерелде

Балалар баҡсаһына сират кәмене. Башҡортостан буйынса баш федераль инспектор Алексей Касьянов мәктәпкәсә белем биреү учреждениеларында үткәрелгән төҙөкләндереү эштәре һөҙөмтәһе менән танышты. Тикшереү Волга буйы федераль округында Рәсәй президентының тулы хоҡуҡлы вәкиле Игорь Комаров ҡушыуы буйынса үткәрелде. Мәктәпкәсә белем биреү системаһын модернизациялау дәүләт программаһы Өфөнөң 144-се балалар баҡсаһында дүрт, 324-се балалар баҡсаһында ике төркөм асыу мөмкинлеге бирҙе.

Өфөлә Халыҡ-ара эшҡыуарлыҡ аҙналығы үтә

Форумда Рәсәй төбәктәренән һәм 21 илдән делегациялар ҡатнаша. Эшлекле йыйында бизнесҡа дәүләт ярҙамы саралары, төҙөлөштөң һанлы киләсәге, электрон сауҙа, заман шарттарында эшҡыуарлыҡты яҡлау ҡарала.Рәсәйҙең Төркиәләге сауҙа вәкиллегендә Башҡортостан вәкиле Марат Танһыҡҡужин белдереүенсә, йыл башында логистика һәм аҡса әйләнешендә ҡатмарлыҡ булып алған. Элек сауҙа долларҙа алып барылһа, хәҙер төрөк лираһы һәм Рәсәй һумы менән иҫәпләнә.

Башҡортостанда сит ил студенттары һаны артыуы көтөлә

Был турала Өфөлә Халыҡ-ара бизнес аҙналығында белдерелде. Евразия халыҡтары ассамблеяһы эксперттары фаразлауынса киләсәктә башҡа төбәктәрҙән һәм илдәрҙән белем алырға килеүселәр һаны биш тапҡырға артыуы мөмкин. - Евразия фәнни-мәғариф үҙәгенең студентар кампусын булдырыу студенттар йәлеп итеүгә ҡеүәт бирәсәк, - тип белдерҙе Республика мәғариф һәм фән министры Илдар Мәүлетбирҙин.

Дәүләкән районы Ивановка ауылы янында юл төҙөкләндерелде

Ремонт "Хәүефһеҙ сифатлы юлдар" милли проекты буйынса башҡарылды. Бүздәк-Дәүләкән трассаһының 3 километры тәртипкә килтерелде. Быйыл милли проект буйынса 74 километр төҙөкләндерелергә тейеш, тип хәбәр итәләр Транспорт һәм юл хужалығы министрлығынан.

Теләге булғандар хәрби операцияла ҡатнашыу өсөн контракт төҙөй ала

Республика хәрби комиссариатында буласаҡ яугирҙарға хәрби хеҙмәткә инеү тәртибен, льготалар һәм түләүҙәр тураһында консультация бирә, ниндәй документтар кәрәклеген аңлата. Контракт төҙөүгә запастағы граждандар, яңы хәрби хеҙмәтен тултырыусылар, шулай уҡ хәрби хеҙмәттә булмаған, әммә юғары йәки урта һөнәри белем алған ир-егеттәр хоҡуҡлы, ти контракт буйынса хәрби хеҙмәткә һайлап алыу пункты инспекторы Азамат Шәрәфетдинов.

Башҡортостанда ашлыҡ үҫтереү өсөн баҫыуҙар инвесторға сауҙа үткәрмәйенсә бирелә

Ер һәм мөлкәт мөнәсәбәттәре министрлығында аграр компанияһы менән килешеү төҙөлдө. Благовар районында 328 гектар биләмәлә бөртөклө һәм техник культуралар үҫтереү ҡарала. Бының өсөн 120 миллион һум инвестиция йәлеп ителә. Республика ҡануниәтенә ярашлы, фермерҙар ашлыҡ үҫтереү өсөн баҫыуҙарҙы сауҙа үткәрмәйенсә 5 йылға тиклем ҡуртымға алырға хоҡуҡлы. Быйыл 27 мең гектарҙа 225 ер биләмәһе ваҡытлыса файҙаланыуға тапшырылған.

Башҡортостанда йыл башынан 4 мең 200-ҙән ашыу социаль контракт төҙөлгән

Ғаилә, хеҙмәт һәм халыҡты социаль яҡлау министрлығынан хәбәр итеүҙәренсә, халыҡҡа 607 миллион һумлыҡ финанс ярҙам күрһәтелгән. Социаль контрактҡа ярашлы, аҡсаны үҙ ҡарамағыңа тотонорға ярамай. Уны эшҡыуарлыҡ менән шөғөлләнеү, ҡайтанан белем алыу, ярҙамсыл хужалыҡ булдырыу йәки башҡа йүнәлештәрҙә ҡулланырға кәрәк. Мәҫәлән, бизнес алып барыу өсөн 350 мең һум субсидия юлларға була.

🎖 «Унда минең улым»: Стәрлетамаҡ районынан уҙаман улы артынан махсус операцияға киткән

Стәрлетамаҡ районынан Николай исемле уҙаман быға тиклем эшҡыуарлыҡ менән шөғөлләнгән. Әммә көтмәгәндә килемле бизнесын ҡалдырған һәм үҙ теләге менән махсус операцияға киткән.

- 2022 йылдың сентябрендә кесе улымды алып киткәндәре бирле үҙемә урын таба алманым. Уны яу яланына оҙатыу бик ауыр булды. Урамдан үтергә лә уңайһыҙландым. Кешеләр, улы тегендә һуғыша, ә атаһы өйҙә ултыра, тиер кеүек ине. Үҙем дә ярҙамға барырға булдым. Унда минең улым, унда беҙҙең егеттәр - кемдәрҙең ғәзиз балалары. Ҡартатайым Бөйөк Ватан һуғышында ҡатнашҡан, хәбәрһеҙ юғалған. Ул саҡта атаһы артынан улы, әсәйемдең ағаһы, фронтҡа киткән. Бөтә яу юлын үтеп, тыуған яғына Еңеү менән ҡайтып төшкән. Беҙ еңеүселәрҙең вариҫтары. Шуға күрә мин үҙемдең ҡарарымда икеләнмәнем. Ғәҙәттәге тормошта ни эшләргә белмәнем. Үҙем генә йәшәйем, ҡатыным менән айрылышҡанбыҙ. Әммә ҡаты шарттарға яраҡлаша алырыма һәм һынауҙарҙы йырып сығырыма ышанысым ҙур ине, - ти яугир.