Башҡортостан Башлығы коронавирусҡа ыңғай тест тапшырған

Радий Хәбиров үҙизоляцияға киткән. Был хаҡта республика етәксеһенең матбуғат хеҙмәте хәбәр итә. Әйткәндәй, быйылғы миҙгелдә йоғошло сиргә ҡаршы вакцинация яһатыу талап ителмәй. Был турала Федерация советындағы «Хөкүмәт сәғәте»ндә Анна Попова белдерҙе. Роспотребнадзор етәксеһе билдәләүенсә, вирус кешеләргә һиҙелерлек хәүеф тыуҙырмай.

2023 йыл иң эҫеһе булып сыҡҡан

Донъя ғалимдары асыҡлауынса 125 мең йыл дауамында бындай күренеш беренсегә теркәлгән. Быйыл октябрҙә уртаса һауа температураһы +15 градус күрһәткән. Метеокүҙәтеүҙәр тарихында бығаса булмаған юғары күрһәткес. Эль-Ниньо тәбиғәт күренешә бәйле океан йылына һәм ике ярымшарҙа ла һауа температураһы күтәрелә. Башҡортостанда ла ғәҙәти булмаған йылылыҡ күҙәтелә. Ноябрҙә һауа температураһы +13 градусҡа етте. Көҙҙөң аҙаҡҡы айы өсөн бындай юғары күрһәткес 62 йыл элек булған.

Йәш эшҡыуарҙарға дәүләт ярҙамы

Иглин районында бер юлы ике йүнсел милли проектта еңеү яуланы. «Бәләкәй һәм урта эшҡыуарлыҡ һәм шәхси башланғыстарға булышлыҡ итеү» программаһына ярашлы уларға 500 мең һум күләмендә аҡсалата ярҙам күрһәтелә.

Башҡортостан бюджеты түбән дефицитлы булып ҡала

Республика Хөкүмәте вице-премьеры – Финанс министры Лира Иғтисамова Дәүләт Йыйылышы–Ҡоролтай депутаттарын киләһе йылдарға ҡаҙна проекты менән таныштырҙы. 2024 йылда бюджет 289 миллиард һумға тулылана, сығым 10 миллиард һумға күберәк була. Артабанғы ике йылда ҡаҙна дефицитһыҙ көтөлә. Төп финанс документ социаль йүнәлешле итеп әҙерләнгән. Мәғариф, һаулыҡ һаҡлау, социаль ярҙам күрһәтеүгә аҡса күберәк йүнәлтелә.

Өфөлә Рәсәй һәм Ҡаҙағстан форумын юғары кимәлдә уҙғарыу маҡсаты ҡуйыла

Был турала социаль селтәрҙә Радий Хәбиров яҙа. Форум сауҙа-иҡтисади, гуманитар бәйләнештәр үҫешенә ҡеүәт бирәсәк. Башҡортостан менән Ҡаҙағстан сәнәғәт, ауыл хужалығы, фән өлкәләрендә хеҙмәттәшлек итә. Беҙҙе уртаҡ тарих, мәҙәниәт яҡынайта, беҙҙең тамырҙар бер, - ти Радий Хәбиров. Бөгөн Ҡаҙағстанда ике илдең төбәк-ара хеҙмәттәшлек форумы үтә. Унда Рәсәй президенты Владимир Путин киләһе йылда йыйынды Башҡортостан ҡабул итәсәк тип белдерҙе.

Башҡортостан Ҡаҙағстан менән хеҙмәттәшлекте нығыта

Бөгөн вице-премьер-Ауыл хужалығы министры Илшат Фәзрахманов Көнсығыш Ҡаҙағстан өлкәһе башлығы Ермек Кошербаев менән осрашты. Умартасылыҡ, ауыл хужалығы мәсьәләләре, төрлө фестивалдәр уҙғарыу темаһы ҡаралды. Илшат Фәзрахманов белдереүенсә, беҙ ҙур күләмдә продукция етештерәбеҙ, ул Ҡаҙағстанға ла оҙатыла. Туризм, сәнәғәт өлкәләрендә хеҙмәттәшлекте нығытыу мөмкинлектәре бар. Иң мөһиме бөгөн башҡорт, ҡаҙаҡ ерендә эшләйәсәк кешеләр, инфраструктура темаһы күтәрелә, - тине Илшат Фәзрахманов.

Башҡортостан делегацияһы Ҡаҙағстан һәм Рәсәй төбәк-ара форумында ҡатнаша

Бында "Ауыл хужалығы - көслө иҡтисад нигеҙе" тигән тема һайланған. Форум Костанай ҡалаһында уҙғарыла. Рәсәй сауҙа-сәнәғәт палатаһы вице-президенты Владимир Падалко белдереүенсә, уҙған йылда ике ил араһында сауҙа 28 миллиард долларҙан артҡан. Быйыл 30 миллиардҡа яҡынлаша. Сауҙаны тағы йәнләндереү мөмкинлектәре бар, инвестиция шарттарын яҡшыртырға кәрәк. Бөтә проблемалар хәл итерлек, - тине ул. Киләһе йылда ике илдең төбәк-ара хеҙмәттәшлек форумын Өфө ҡабул итә.

Башҡортостан вәкилдәре Ҡытайҙа миллиардтарса һумға килешеүҙәр төҙөнө

Республиканан рәсми делегация сит илгә бизнес-сәфәр ҡылды. Сауҙа һәм хеҙмәттәр министрлығынан хәбәр итеүҙәренсә, эшҡыуарҙарҙың береһе 8 миллиард һумға 4 контракт төҙөгән. Ҡытай вәкилдәре ҙур һаҡлағыстарҙа йөк күтәреү техникаһын сығарасаҡ. Эшҡыуарҙар сит илгә ҡош ите, шәкәр сөгөлдөрө ҡалдығын экспортларға килеште. Ҡытайҙан электрон техника, кер йыйыу онтағы индерелә. Бизнес-сәфәр барышында 20-гә яҡын килешеүгә ҡул ҡуйылды.

Өфөлә республикалағы оҙаҡ төҙөлгән иң ҙур йорт файҙаланыуға тапшырылды

Кузнецов затоны биҫтәһендә 900 фатирлыҡ торлаҡ төҙөлдө. Яҡын арала 400-ҙән ашыу ғаиләгә асҡыстар тапшырыла башлай. Биҫтәлә ҙур төҙөлөш 2014 йылда башлана. Әммә финанс ҡыйынлыҡтар сәбәпле компания бурысын үтәй алмай. Республика Башлығы Радий Хәбиров алданған өлөшсөләр мәсьәләһен хәл итергә ҡушты. Биш йылда 9 меңдән ашыу кеше йортло булды. Әле 1 мең 300-ләп фатир хужаһы сиратта тора. Тиҙҙән алданған өлөшсө тигән төшөнсә ҡалмаҫҡа тейеш.

Рәсәй президенты Владимир Путин эш сәфәре менән Астанаға килде

Дәүләт башлыҡтары үҙ-ара һәм делегациялар ҡатнашлығында һөйләшеүҙәр үткәреп, бер нисә документҡа ҡул ҡуйыуҙы планлаштыра. Владимир Путин видеобәйләнеш аша Ҡостанайҙа барған Ҡаҙағстан менән Рәсәйҙең ХХ төбәк-ара хеҙмәттәшлек форумының пленар ултырышына ҡушылды. Ул «Ауыл хужалығы - көслө иҡтисад нигеҙе» тип атала.

Башҡортостан делегацияһы XX Рәсәй-Ҡаҙағстан форумында ҡатнашты

Башҡортостан делегацияһы Көнсығыш Ҡаҙағстан өлкәһе менән агросәнәғәт комплексын үҫтереү мәсьәләләрен тикшерҙе. Ул «Ауыл хужалығы - көслө иҡтисад нигеҙе» төбәк-ара форум сиктәрендә ҡаралды. Ике дәүләт араһындағы фекер алышыуҙар умартасылыҡ, ауыл хужалығы, логистика кеүек темаларға ла айырым туҡталды.

Рекультивация урынына йәшерен рәүештә алтын ҡаҙыу эшен дауам итәләр

Һүҙ Учалы районында эшмәкәрлек алып барған «Альтинвест» йәмғиәте һәм уның подрядсыһы «Гассад» компанияһы тураһында. Компания эшмәкәрлеге Ер аҫты байлыҡтарын файҙаланыу буйынса ведомство комиссия ултырышында тикшерелде. Комиссия Башҡортостан башлығы рәйеслегендә эшләй. Радий Хәбиров мәсьәләне даими рәүештә контролдә тота һәм был өлкәлә хоҡуҡ боҙоуҙарға юл ҡуймауҙы талап итә. Бөгөнгө ултырышҡа Учалы районы алтын ятҡылыҡтарындағы хәл осраҡлы ғына сығарылманы. Башҡортостанда ҡаҙылма байлыҡтар табыуға бирелгән 70 федераль лицензияның, 50-һе тап ошо төбәккә тура килә. Намыҫһыҙ эш итеүселәр ҙә бар. Бөгөнгө ултырышта ла «алтын биҙгәген» йоҡторған ойошмалар эшмәкәрлеге һәм был «сиргә» дауа табыу юлдары ҡаралды.

Дәүләт программаһы ярҙамында Бөрөлә бассейн төҙөкләндерелгән

«Урындағы башланғыстарҙы хуплау программаһы» ярҙамында төрлө мәсьәләләр хәл ителә. Бөрө ҡалаһының 7-се балалар баҡсаһы 19 проект араһында еңеп яулап, бассейнды төҙөкләндереүгә өлгәшә. Бының өсөн республика, ҡала бюджетынан аҡса бүленә, бағыусылар һәм ата-әсәләр ҙә ҡушыла. Яңырыу кисергән бассейнда йөҙөү буйынса дәрестәр башланған.

Заһир Исмәғилев исемендәге Өфө дәүләт сәнғәт институты ойошторолоуға 55 йыл

Музыка, театр, хореография һәм һынлы сәнғәт өлкәһендә белгестәр әҙерләүсе юғары уҡыу йорто юбилей датаһын лайыҡлы ҡаршылай.

Йәштәр баҫмалары бер быуатлыҡ юбилейын билдәләне

Йәштәр баҫмаларына 100 йыл. Өфөлә «Йәшлек», «Өмөт» һәм «Молодежная газета»ның бер быуатлыҡ юбилейын билдәләү сараһы ойошторолдо. Йәштәр баҫмалары бөгөн дә заман менән бергә атлай,рухиәтте үҫтереү, телде һаҡлау, йәштәр араһында илһөйәрлек, белемгә ынтылыу, өлкән быуынға хөрмәт менән ҡарау сәйәсәтен уңышлы алып бара.

Башҡортостан йорттарында ҡыйыҡтар яңыртыла

Был эш алдағы бер нисә йылда теүәлләнергә тейеш. Радий Хәбиров социаль селтәрҙә яҙыуынса, киләһе йылда йорттар ҡыйығын ремонтлау өсөн тәүҙә 100 миллион һум планлаштырылғайны, 430 миллион һум тотоноу тураһында ҡарар ҡабул ителде. 59 район һәм ҡалала 100-ҙән ашыу йорт тәртипкә килтереләсәк, - ти Республика Башлығы. Башҡортостанда ике йыл эсендә 62 ҡыйыҡ ремонтланған.

Оборона министрлығы менән контракт төҙөүселәргә өҫтәп тағы 100 мең һум түләнә

Республика Башлығы Радий Хәбиров айырым граждандарға өҫтәмә социаль ярҙам саралары тураһында Указға ҡул ҡуйҙы. Документҡа ярашлы, мобилизация, йә мотлаҡ саҡырылыш буйынса хәрби хеҙмәткә алынып, 10 ноябрҙән һуң контракт төҙөүселәр өсөн өҫтәмә түләү була. Был норма Шайморатов исемендәге һәм башҡа ирекле батальондар составына ҡағылмай. Республика хәрби комиссары Михаил Блажевич белдереүенсә, мобилизация буйынса алыныусылар араһында контрактлы хеҙмәткә күсергә теләүселәр байтаҡ. Мотлаҡ саҡырылыш буйынса алыныусыларҙың да закон буйынса контракт төҙөү мөмкинлеге бар, тине ул.

Быйыл Башҡортостанда 59 баланы уллыҡҡа алғандар

Был уҙған йылдың ошо осорондағынан күберәк. Ғаилә, хеҙмәт һәм халыҡты социаль яҡлау министры Ленара Иванова белдереүенсә, Башҡортостанда ата-әсә ҡарауынан мәхрүм һәм етем 10 мең 609 бала бар. Уллыҡҡа алыусы ғаиләләр өсөн Әсәлек капиталы күләмендә финанс ярҙам бирелә. Аҡсаны торлаҡ шарттарын яҡшырыу, һаулыҡты нығытыу, балаға белем биреү өсөн тотонорға мөмкин.

“Дөрөҫлөк. Яуаплылыҡ. Батырлыҡ” тигән премия булдырылды

Башҡортостанда журналистарға яңы премия тапшырыла. Республика Башлығы Радий Хәбиров тейешле указға ҡул ҡуйҙы. “Дөрөҫлөк. Яуаплылыҡ. Батырлыҡ” тип аталған премияға Башҡортостанда ижад иткән журналистар дәғүә итә ала. Йәмәғәттә танылыу алған көнүҙәк мәғлүмәт еткергән 20 хәбәрсегә 300 мең һумлыҡ бүләк тапшырыла.

Өфөгә декабрҙә Ҡыш Бабай киләсәк

Яңы йыл тылсымсыһы 11 ноябрҙән ил буйлап сәфәргә сыға. Ҡыш Бабай Бөйөк Устюг ҡалаһынан Байкал-Амур тимер юлы буйлап сәйәхәт итә. Маршрутта 70-тән ашыу бәләкәй һәм ҙур ҡала күрһәтелгән. Өфөгә Ҡыш Бабай 19 декабрҙә килеп етә. Тимер юл вокзалында сағыу байрам сараһы ойошторола, балаларға тылсымсы вагондары буйлап экскурсия ойошторола, ҡурсаҡтар театры сығыш яһай.