Башҡортостанда балыҡсылар бәләгә тарыған

Ҡотҡарыусылар Павловка һыуһаҡлағысында рейд уҙғарған. Ике балыҡсы ярҙам һораған. Уларҙың кәмәһенең моторы сафтан сыҡҡан. Балыҡсылар ярға сығарылған. Бынан тыш тағы өс кешегә ярҙам талап ителгән. Уларҙың кәмәһендә бензин бөткән. Ҡотҡарыусылар ярҙам күрһәткән, хәүефһеҙлек буйынса кәңәштәр биргән. Быйыл Башҡоростан йылға-күлдәрендә 30-ҙан ашыу балыҡсы батып үлгән.

"Салауат Юлаев"ҡа Николас Мелош ҡушылды

Канада һаҡсыһы карьераһын Өфөлә дауам итә. Был турала клубтың генераль директоры Ринат Бәширов белдерҙе. Юлаевсылар составында Канаданан тағы бер хоккейсы, Джошуа Ливо бар. Ул һөжүмсе позицияһында уйнай.

Рәсәйҙә тәмәке тартмаусы хеҙмәткәрҙәргә өҫтәмә ял бирергә тәҡдим итәләр

Думала ошондай тәҡдим әҙерләнгән, ул Һаулыҡ һаҡлау министрлығы ҡарауына тапшырылған. Сәләмәт тормош алып барыусыларға ай һайын өҫтәп бер көн ял биреү башланғысы бар. Проект авторҙары фекеренсә, бындай сара уларға спорт менән шөғөлләнеү өсөн өҫтәмә мөмкинлек бирә, тәмәке тартыусылар өсөн иһә насар ғәҙәтен ташлауға тағы бер стимул була.

Башҡортостанда мәҙәниәт учреждениеларын яңыртыу өсөн 800 миллион һумдан ашыу аҡса тотонолған

Был турала социаль селтәрҙә Республика мәҙәниәт министры Әминә Шафиҡова хәбәр итә. - Федераль ярҙам менән Милли йәштәр театрында, Нефтекама балалар художество мәктәбендә, Ишембай районы Урман -Бишҡаҙаҡ ауылындағы мәҙәниәт йортонда, Дүртөйлө тарих һәм тыуған яҡты өйрәнеү музейында ремонт эшләнде, - ти ул. Башҡортостан мәҙәниәт учреждениелары конкурстарҙа әүҙем ҡатнаша һәм президент фондтарынан грант ярҙамы ала. 42 миллион һумға 70 яңы мәҙәни программа әҙерләнгән.

Башҡортостандың зубр үрсетеү буйынса тәжрибәһе федераль кимәлдә баһаланды

Мәскәүҙәт Рәсәй һәм Беларусь Тәбиғәт министрлыҡтары колллегия ултырышы булды. Рәсәйҙәге тәүге зубрҙар популяцияһын булдырыу уңышлы тип аталды. Мораҙым тарлауығында хайуандар үҙҙәрен яҡшы тоя, сирләмәгән, беҙҙең республика тәбиғәтенә яраҡлашҡан. Ноябрь аҙағына тиклем Башҡортостанға тағы 9 зубр килтерелә.

Радий Хәбиров Совет майҙанындағы Почетлы ҡарауыл вахтаһы тураһында яҙып сыҡты

Башҡортостан Башлығы Радий Хәбиров социаль селтәрҙә Өфөләге легендар комдив Миңлеғәле Шайморатов һәйкәле эргәһендәге Почетлы ҡарауыл вахтаһы тураһында яҙып сыҡты. Мәғлүм булыуынса, Рәсәй Геройына баш ҡаланың Совет майҙанында ҡуйылған һәйкәл янында яңы традиция генерал Шайморатовтың тыуған көнөндә барлыҡҡа килде һәм маҡтаулы миссияны үтәү ике тапҡыр Советтар Союзы Геройы Муса Гәрәевтың исемен йөрөткән Өфө башланғыс осоу әҙерлеге мәктәп-интернаты кадеттарына йөкмәтелде.

Башҡортостан Донбассҡа сираттағы гуманитар ылау оҙатты

Башҡортостан Донбассҡа 97-се гуманитар ылау оҙатты. Ярҙамды республиканың исемле полктары, мобилизацияланғандар һәм шефлыҡҡа алынған Красный Луч ҡалаһының социаль учреждениелары ла аласаҡ. Йәмғеһе 18 йөк машинаһы оҙатылды. Уны туплауҙа йәмәғәт ойошмалары, предприятиелар һәм ун район халҡы ҡатнашҡан.

Благовар районы Яңы Абзан ауылында мосолман зыяраты тәртипкә килтерелә

Изге эшкә ауылдаштар хеҙмәт ветераны Рима Сәмиғуллинаның тәҡдиме менән тотонған. Халыҡты берләштергән акция хаҡында киләһе яҙмала.

Йылайыр районында йөк автомобиле аҫтында ҡалып яраланған айыу балаһын дауалағандар

Тайыштабан үҙен ҡараусы Алексей Гаврилов менән дуҫлашып та өлгөргән. Был күренеш барыһына ла билдәле йәнһүрәтте хәтергә төшөрә хатта. Кеше менән айыу балаһының йылы мөнәсәбәттәре хаҡында киләһе яҙмала.

Башҡортостанда баҡса маршруттары ябылды

Бөгөндән "Башавтотранс" автобустарының баҡсаға йөрөүе туҡтатыла. Был маршруттар яҙын баҡса эштәре башланғас асыла, көҙөн уңыш йыйғандан һуң ябыла.Компаниянан хәбәр итеүҙәренсә, баҡсасыларҙың күбеһе - пенсионерҙар. Уларға юл өсөн ташлама ҡаралған.

Башҡортостан спорт объекттары һаны буйынса илдә икенсе урында

Был турала премьер-министр Андрей Назаров социаль селтәрҙә хәбәр итә. Район һәм ҡалаларҙа 13 меңдән ашыу спорт объекты бар. Стадион, боҙ һарайы, физкультура-һауыҡтарыу комплексы, бассейн, спорт майҙансығы, фитнес-үҙәктәр төҙөлгән. - Спорт объекттары һаны буйынса Мәскәүҙән генә ҡалышабыҙ. "Башҡорт ихаталары" программаһы буйынса ғына һуңғы ике йылда 120-нән ашыу спорт майҙансығы төҙөлдө, - ти ул.

Күмертауҙан Альбина Корниловаға “Герой-әсә” исеме бирелгән

Альбина һәм Александр Корниловтар 10 бала тәрбиәләй. Иң өлкән ҡыҙҙары Рената консерваторияла белем ала. Яна, Давид, София, Рина, Станислав, Елисей мәктәп уҡыусылары. Иң бәләкәйҙәр Радмир, Добрыня һәм Илья балалар баҡсаһына йөрөй. 2015 йылда Альбина Фәнил ҡыҙына Башҡортостандың “Әсәлек даны” миҙалы тапшырыла. Яңыраҡ Рәсәй Президенты Владимир Путин ҡатынға “Герой-әсә” исемен биреү тураһында указға ҡул ҡуйған. Альбина Башҡортостанда бындай наградаға лайыҡ булған өсөнсө күп балалы әсәй.

Дыуан районы Арый ауылында “Сыңлы үксә” конкурсы үтте

Быйыл бейеүселәр ярышы махсус хәрби операцияла һәләк булған Илнар Хәтмуллин иҫтәлегенә бағышланды. Яугирҙең атаһы Сибай филармонияһы солисы Илдар Хәтмуллин ошо ауылда тыуып үҫкән. Ул баһалама комиссияһы ағзаһы булды. Фестивалдә республиканың төньяҡ-көнсығыш райондарынан 30-ҙан ашыу коллектив ҡатнашты. Салауат районы “Йүрүҙән” халыҡ бейеүҙәре ансамбле Гран-при яуланы. Шулай уҡ балалар һәм үҫмерҙәр номинацияһында еңеүселәр асыҡланды.

Өфө моторҙар эшләү берекмәһенә өҫтәмә хеҙмәткәрҙәр талап ителә

Авиация һәм нефть сәнәғәте тармағы ҡоролмаларын етештереүсе предприятиеға 5 мең кешене эшкә алыу маҡсаты ҡуйыла. Башҡортостан Башлығы Радий Хәбиров предприятиены кадрҙар менән тәьмин итеү дәүләт кимәлендә мөһим бурыс тип белдерҙе. Аҙналыҡ оператив кәңәшмәлә юлдарға ҡар төшөү менән бәйле хәл, «Йәшел Башҡортостан» акцияһы йомғаҡтары барланды.

Башҡортостанға Ҡаҙағстандың Рәсәйҙәге ғәҙәттән тыш һәм тулы хоҡуҡлы илсеһе Даүрен Абаев килде

Башҡортостанға Ҡаҙағстандың Рәсәйҙәге ғәҙәттән тыш һәм тулы хоҡуҡлы илсеһе Даүрен Абаев етәкселегендәге делегация килде. Бөгөн ҡунаҡтар «Кроношпан» ағас эшкәртеү заводында, Өфө дәүләт нефть техник университетында, археология һәм этнография музейында булды.

Баймаҡ районы халҡы махсус хәрби операцияла ҡатнашыусылар өсөн ярҙам әҙерләй

Алғы һыҙыҡҡа консервалар, кипкән ҡорот, үлән сәйҙәре, төрлө емеш ҡаҡтары туплана. Изге эшкә олоһо ла, кесеһе лә ҡушылған. Баймаҡтарҙың күстәнәсен, сираттағы гуманитар ылау менән яугирҙарға илтеү ҡарала.

Башҡортостанда мәктәп стоматологияһы үҫешә

Былтырғы уҡыу йылында 130 меңгә яҡын бала һәм 5 мең уҡытыусы теш табибы ярҙамы алған. Өфөләге 1-се республика полилингваль гимназияһының стоматология кабинеты эшмәкәрлеге хаҡында репортаж.

Өфөлә «Башҡорт шәле һәм студент йәштәр: традицияларҙы тергеҙеү» төбәк конкурс-фестивале уҙҙы

Мифтахетдин Аҡмулла исемендәге Башҡорт дәүләт педагогия университетында «Башҡорт шәле һәм студент йәштәр: традицияларҙы тергеҙеү» төбәк конкурс-фестивале уҙҙы. Сарала шәл бәйләү оҫталары студенттарға оҫталыҡ дәрестәре үткәрҙе, иң яҡшы ҡул эштәренән күргәҙмә ойошторҙо.

Өфөлә “Ашҡаҙар моңдары” башҡорт халыҡ йыры фестивале финалы уҙа

Конкурс быйыл Башҡортостандың халыҡ артисы, бөйөк йыраусы Абдулла Солтановтың тыуыуына 95 йыл тулыуға арнала. Әле “Ашҡаҙар” радиоһының Бәйләнештә селтәрендә “Тамашасы һөйөүе”нә тауыш биреү бара. Тамаша 30 октябрҙә Мәжит Ғафури исемендәге Башҡорт дәүләт драма театрында үтә.

Башҡортостандан “Блогер” фильмы Дағстанда наградаға лайыҡ булды

“Золотая лоза” кинофестивалендә ҡыҫҡв метражлы картина “Иң яҡшы режиссер эше” номинацияһында еңеү яуланы. Фильм Республика Башлығының “Геройҙар тураһында хәтер мәңгелек” грантына ярашлы Мәжит Ғафури исемендәге Башҡорт академия драма театры ҡатнашлығында төшөрөлгән.