Башҡортостан башлығы төбәктең белем биреү учреждениелары вәкилдәренә мәктәп автобустарын тапшырҙы

Бөгөн Өфөлә Башҡортостан башлығы төбәктең белем биреү учреждениелары вәкилдәренә мәктәп автобустарын тапшырҙы. Бәләкәй, уртаса һәм ҙур һыйҙырышлы ике йөҙҙән ашыу транспорт сараһы республиканың 54 районына һәм 6 ҡалаһына юлланды. Улар Тахограф һәм Глонасс системалары менән йыһазландырылған. Республикала 2 мең 800 тораҡ пунктта йәшәүсе 52 меңдән ашыу малай-ҡыҙ уҡыу урынына тиклем мәктәп автобусында барып етә. Уҡыусыларҙы ташыуҙы ойоштороуға 1 590 мәктәп автобусы йәлеп ителгән.

Радий Хәбиров ярҙамы менән Благовещен районында туризм үҫешә

Республика башлығы Радий Хәбиров етәкселегендә үткәрелгән «Инвестиция сәғәтендә» ҡаралған проекттар яҡшы һөҙөмтә күрһәтә. Уларҙың береһе-Благовещен ҡалаһында урынлашҡан глэмпинг. «БлагоЛэнд» ял базаһы тәүҙә Милли проект сиктәрендә дәүләттән ярҙам алһа, былтыр глэмпингты үҫтереү маҡсатында өҫтәмә ер бүленә.

Асҡын районы ойошторолоуға 95 йыл тулды

Юбилей уңайынан районда бер нисә объект төҙөлә. Шуларҙың береһе-Яңы Ҡаҙансы ауылындағы Мәҙәниәт йорто. Быға тиклем ауылдың барлыҡ мәҙәни саралары 60-сы йылдарҙа төҙөлгән бинала үтә. Мәҙәниәт йорто биш йыл элек авария хәлендә тип билдәләнә. Яңы объект «Социаль маҡсатлы программалар фонды» ярҙамында былтыр төҙөлә башлана. Яңы Ҡаҙансы ауылында 500-гә яҡын кеше йәшәй, эргәлә генә «Танып» шифаханаһы һәм эшселәр ҡасабаһы урынлашҡан. Шуға күрә мәҙәниәт йорто үтә лә кәрәкле ине, ти ауыл биләмәһе башлығы. Бинала 96 урынға иҫәпләнгән тамашасылар залы, китапхана һәм тренажерҙар урынлашасаҡ. Объект сентябрҙә сафҡа инә.

Баймаҡ районы Үрге Иҙрис ауылында «Дәртле гармун моңдары» гармунсылар бәйгеһе үтте

Баймаҡ районы Үрге Иҙрис ауылында беренсе тапҡыр «Дәртле гармун моңдары» төбәк-ара гармунсылар бәйгеһе үтте. Тулыраҡ беҙҙең ижади төркөм әҙерләгән яҙмала.

Өфөлә йәшәүсе 25 йәшлек егет лонгбордта Башҡортостандан Алтайға юллана

Сәйәхәтсе Салауат Зәйнетдинов маршруттың стартын һәм тәүге туҡталыштары тураһында мәғлүмәт менән шәхси блогында уртаҡлашҡан. Уға 2 мең ярым саҡрымдан ашыу юл үтергә тура киләсәк. Егет үҙенә уҙыш барышында тик лонгборд, төп туристик ҡорамалдар һәм үтеп барыусы транспорт менән генә файҙаланыу шарттарын ҡуйған. Шуныһы иғтибарға лайыҡ: Салауат өсөн был тәжрибә беренселәрҙән түгел. Быға тиклем ул дуҫы менән 28 көн эсендә Сочи ҡалаһына тиклем велосипедта барған.

Радий Хәбиров Бөрө ҡалаһында капиталь ремонт эшләнгән мәғариф учреждениелары менән танышты

Яңы уҡыу йылына-яңыртылған уҡыу йорттары. Башҡортостан башлығы Радий Хәбиров Бөрө ҡалаһында капиталь ремонт эшләнгән мәғариф учреждениелары менән танышты. Коррекция мәктәп-интернаты, Бөрө лицейы, Бөрө медицина-фармацевтика колледжы иғтибар үҙәгендә булды. Бынан тыш, педагогтарҙы берләштергән «Август кәңәшмәһе» Радий Хәбиров етәкселегендә Бөрө ҡалаһында үтте. Ултырышта бер төркөм хеҙмәт алдынғыларына дәүләт наградалары тапшырылды.

Өфөлә беренсел медицина ярҙамы буйынса Бөтә Рәсәй форум үтте

Өфө «Беренсел медицина-санитар ярҙамы күрһәтеүҙә урта медицина белеме булған белгестәрҙең роле» тип исемләнгән Бөтә Рәсәй форумын ҡабул итте. Унда илдең егерме төбәгенән 600-ҙән ашыу ҡатнашыусы йыйылды, Ҡаҙағстандан да ҡунаҡтар булды.

Башҡортостандың хәрби журналистары «Звезда» телеканалы алып барыусыһы Ирина Лосик менән осрашты

«Армия мәҙәниәте көндәре» сиктәрендә Башҡортостандың хәрби журналистары «Звезда» телеканалы алып барыусыһы Ирина Лосик менән осрашты.
Махсус хәрби операция башланыу менән республиканың матбуғат һәм киң мәғлүмәт сараларында эшләгән 30-ҙан ашыу хеҙмәткәр Донбасс яҡтарына оҙайлы командировкаларға сыға башланы, объектив һәм дөрөҫ мәғлүмәт еткереүҙә БСТ телеканалы журналистары ла әүҙем ҡатнаша.

Өфөлә «Еңеү шиғырҙары» тип исемләнгән илһөйәрлек шиғриәте сәғәте үтте

Әхмәтзәки Вәлиди исемендәге Милли китапханала «Еңеү шиғырҙары» тип исемләнгән илһөйәрлек шиғриәте сәғәте үтте. «Армия мәҙәниәте көндәре» программаһына ярашлы уҙғарылған сарала танылған яҙыусылар, китап авторҙары уҡыусылары менән осрашып, ижади эшмәкәрлегенә ҡағылған һорауҙарға яуап бирҙе.

Армия мәҙәниәте көндәре дауам итә

Саралар Өфөлә генә түгел, республика райондарында һәм ҡалаларында ойошторола.
Екатеринбург ҡалаһынан килгән Үҙәк хәрби округының йыр һәм бейеү ансамбле гастролдәр менән Күмертауҙа булды. Коллективта Башҡортостанда тыуып-үҫкән бер нисә артист эшләй. Беҙгә тыуған яҡта сығыш яһау айырыуса мәртәбәле, ти улар.

Өфөлә белорус техникаһын етештереү-сервис үҙәге асылды

Объектты асыу тантанаһында Башҡортостан башлығы Радий Хәбиров менән Белоруссияның Рәсәйҙәге ғәҙәттән тыш һәм тулы хоҡуҡлы илсеһе Александр Рогожник ҡатнашты. Күләмле проект 2022 йылдың майында үткән «Инвестиция сәғәте» ултырышында хупланғайны. Республикалар араһында хеҙмәттәшлек буйынса юл картаһы ла төҙөлгән, 8 йүнәлеш буйынса 74 сараны үҙ эсенә ала. Мультибрендлы яңы үҙәк эшмәкәрлеге һәм Белоруссиянан килгән делегеция менән осрашыу һөҙөмтәләре тураһында репортаж.

Автоһәүәҫкәрҙәр өсөн 1 сентябрҙән алып дәүләт пошлинаһы күләме артыуы ихтимал

Закон проекты Дәүләт Думаһының тәүге уҡыуында хуплау тапҡайны. Һүҙ водитель таныҡлығын һәм автомобилдең регистрация номерҙарын биреү тураһында бара. Уға ярашлы, водитель таныҡлығы өсөн 2 мең урынына, 4 мең һум түләргә кәрәк буласаҡ. Дәүләт номерын алыу 3 мең һумға төшәсәк. Тарифтар мотоцикл һәм прицеп хужалары өсөн дә арта. Шулай уҡ сентябрҙән медицина күрһәтмәләре һәм транспорт саралары менән идара итеүгә сикләүҙәр үҙ көсөнә инәсәк.

Өфөнөң Октябрь Проспектында 25-се йылылыҡ магистрале ремонтлана

Эшселәр иҫке торбаларҙы һәм бетон плитәләрҙе алмаштыра. Хеҙмәтләндереү ваҡыты 25 йылға иҫәпләнгән. Төҙөкләндереү эштәрен киләһе айҙа тамамлау планлаштырылған. Инженер инфраструктураның яңырыуы баш ҡала үҙәге һәм көньяҡ өлөшөндә йәшәүселәрҙе йылы һыу һәм йылылыҡ менән тәьмин итеүт сифатын яҡшырта.

Башҡортостанда вейптар һатылыу тулыһынса тыйылыуы ихтимал

Шыйыҡсаны йылытып, һулау өсөн аэрозолгә әйләнгән препарат никотин бәйлелеге тыуҙыра. Йөрәк тибеше йышая, ҡан баҫымы күтәрелә һәм мейе үҫешенә кире йоғонто яһала. Быйыл Рәсәйҙә вейптар һатыуҙы тулыһынса тыйыуҙы тәҡдим иткән закон проекты индерелде. Ҡануни башланғыс шыйыҡсаны үҫмерҙәргә һатыуҙы кәметеүҙе күҙаллай.

Яңы уҡыу йылы алдынан Балаҡатай районында педагогтарҙың август кәңәшмәһе уҙғарылды

Муниципалитеттың мәғариф системаһына 43 учреждение ҡарай. Коррекция мәктәп-интернаты һәм Дыуан күп профилле колледжы филиалы ла-улар иҫәбендә. Белем усаҡтарында Шайморатов кластары уңышлы эшләй, балалар баҡсаларында ла кескәйҙәргә патриотик тәрбиә биреү эше яйға һалынған. Август кәңәшмәһендә ҡатнашыусылар илһөйәрлек күргәҙмәһе менән таныша алды, майҙанда төрлө оҫталыҡ дәрестәре ойошторолдо.

Асҡын районы үҙәгенең иң ҙур мәктәпкәсә учреждениеһында быйыл йәй ремонт үткән

Яңы уҡыу йылына балалар баҡсалары ла әҙерләнә. Асҡын районы үҙәгенең иң ҙур мәктәпкәсә учреждениеһында быйыл йәй ремонт үткән. 2015 йылда сафҡа ингән 2-се балалар баҡсаһының ҡыйығы яңыртыла, аҙыҡ блогы өсөн канализация селтәре һуҙыла.

«Армия мәҙәниәте көндәре» сиктәрендә Өфөнөң Совет майҙанында «Геройҙар ваҡыты» конкурсы үтә

«Армия мәҙәниәте көндәре» сиктәрендә Өфөнөң Совет майҙанында «Геройҙар ваҡыты» Бөтә Рәсәй илһөйәрлек йыры конкурсы үтә. Быйыл илдең 31 төбәгенән 232 ҡатнашыусы заявка ҡалдырғайны. Финалға 19 бәйгесе сыҡҡан. Бүләкләү фонды 1 миллион һум тәшкил итә.

Зәбир Теүәлев Баймаҡ районында ижади йорт-музей булдырҙы

Республикала билдәле пейзаждар төшөрөүсе рәссам, тыуған яҡты өйрәнеүсе Зәбир Теүәлев Баймаҡ районы Бәхтегәрәй ауылында булдырылған йорт-музейҙа шәхсән экскурсиялар ойоштора.Тулыраҡ киләһе яҙмала.

Республика Башлығы Радий Хәбиров террорға ҡаршы комиссия ултырышын уҙғарҙы

Унда министрлыҡ-ведомстволар вәкилдәре ҡатнашты. Белем көнөндә, шулай уҡ урындағы үҙидара органдарына һайлау барышында хәүефһеҙлек тәьмин итеү мәсьәләһе ҡаралды. - Барлыҡ мәғариф учреждениелары тикшерелде. Террорға ҡаршы эш яҡшыра. Әммә был өлкәне айырым контролдә тоторға кәрәк, - тине Радий Хәбиров. 1 сентябрҙә Башҡортостанда 500 меңдән ашыу уҡыусы мәктәпкә бара. 14-ендә берҙәм тауыш биреү көнөндә 256 һайлау учаскаһында тауыш биреү ойошторола.

Республика Башлығы Радий Хәбиров Воскресенск кафедра соборы төҙөлөшөн ҡараны

Был объект Спорт һарайы янында урынлашҡан. Ҡорам төҙөлөшө 2003 йылда башлана. 2007 йылда эштәр туҡтатыла, бинаны консервациялау тейешенсә башҡарылмай. Уҙған йылдың декабрендә төҙөлөштө дауам итеү тураһында ҡарар ҡабул ителә. - Республикала ике ҙур дини объект - "Әр Рәхим" мәсете һәм Воскресенск соборын төҙөп бөтөү буйынса ғәҙел һәм мөһим эш алып барабыҙ, - тип билдәләне Радий Хәбиров.