Беҙ – башҡорттар, беҙ – рустар, беҙ – татарҙар... Беҙ – башҡортостанлылар. Беҙҙең менән Аллаһ!

Доға – ул ябай ғына һүҙ түгел, ә ҡеүәтле көс. Көслө бул, беҙҙең менән бул, үҙебеҙҙекеләргә ҡушыл!

Тулыраҡ мәғлүмәт 122 һәм +7(347) 248-29-31 телефон һандары буйынса һәм башбат.рф сайтында.

🔹 Рәсәй Оборона министрлығы.

Өфөлә колоннада төҙөлөшө тамамлана

Өфөнөң Ағиҙел йылғаһы ярында Башҡортостан менән Абхазия араһындағы дуҫлыҡты сағылдырған колоннада төҙөлөшө тамамлана. Был турала социаль селтәрҙә Башҡортостан башлығы Радий Хәбиров хәбәр итте.

Бер ай эсендә Евразия күсмә халыҡтар цивилизацияһы музейының визит-үҙәге аша 25 меңгә яҡын кеше үткән

Бер ай эсендә Шишмә районындағы Евразия күсмә халыҡтар цивилизацияһы музейының визит-үҙәге аша 25 меңгә яҡын кеше үткән. Туристар айырыуса ял көндәрендә күп килә. Башҡортостан башлығы Радий Хәбиров музей объекттары төҙөлөшө мәсьәләләренә арналған эшсе кәңәшмәлә ҡатнашып, баш ҡалаға яҡын урынлашҡан биләмәлә туризмды үҫтереү мөмкинлектәре юғары булыуын билдәләне. Август аҙағына тиклем визит-үҙәк эргәһендә концерттар үтһә, көҙҙән билдәле ғалимдарҙың сығыштары көтөлә.

Тирлән һыуһаҡлағысы фажиғәһенә 30 йыл

1994 йылдың 7 авгусында ике тәүлек туҡтауһыҙ яуған ямғыр һөҙөмтәһендә Белорет районында Тирлән быуаһы сафтан сыға. Көслө ағым эшселәр ҡасабаһының тотош өс урам йорттарын ағыҙа. 29 кеше һәләк була. Төбәктә фажиғә ҡорбандарын иҫкә алыу саралары үтте. Тулыраҡ киләһе яҙмала.

Өфөгә "Союзмультфильм" киләсәк

Август аҙағында Республика милли музейында үҙенсәлекле күргәҙмә асыла. Бында Рәсәй анимация һәм киностудия тарихы менән танышырға мөмкин була. Шулай уҡ билдәле йәнһүрәттәрҙән өҙөктәр күрһәтелә. - "Союзмультфильм" - милли һәм донъя мәҙәниәте өсөн уникаль күренеш. Винни Пух, Чебурашка, Бремен музыканттары, "Ну погоди" йәнһүрәтенән Бүре менән Ҡуян айырым дәүер сағылышы, ти киностудия директоры Борис Машковцев.

Стәрлетамаҡ районы махсус хәрби операцияға сираттағы 21-се гуманитар ылау оҙатты

Стәрлетамаҡ районы махсус хәрби операцияға сираттағы 21-се гуманитар ылау туплап, уны хәрбиҙәргә тапшырҙы. Конвойҙы район башлығы Рита Сәмиғуллина оҙатып барҙы. Ярҙамды урындағы халыҡ, ойошма, предприятиелар һәм шәхси эшҡыуарҙар яугирҙар һорауы буйынса бергәләп йыйған.

Башҡортостанда «Финист» электрпоезы йөрөй башлай

Юғары тиҙлекле заманса транспорт ял көндәрендә Өфө- Белорет-Өфө, эш көндәрендә Дим - Шаҡша - Дим маршруты буйынса хәрәкәт итәсәк. Баш ҡала юбилейына бағышланған поезд Рәсәйҙә етештерелгән. Уның мөмкинлектәре менән Башҡортостан башлығы Радий Хәбиров танышты.

Башҡортостанда Курск өлкәһендә зыян күреүселәргә гуманитар ярҙам йыйыла

Мәрхәмәтлек сараһын төбәктең Йәштәр сәйәсәте буйынса дәүләт комитеты ойоштора. Битараф булмаған граждандарҙан ярҙам көн дә иртәнге сәғәт 10-дан киске 8-гә тиклем Өфөләге республика ирекмәндәр үҙәгендә «Беҙ бергә» проекты төбәк штабында ҡабул ителә. Мәктәп тауарҙары, йылы кейем, көнкүреш һәм гигиена кәрәк-яраҡтары, оҙаҡ һаҡлана торған аҙыҡ-түлек килтерергә мөмкин.

Иглин районында йәшәүсе балалар махсус хәрби операцияла ҡатнашыусы яугир менән осрашты

Махсус хәрби операция ҡатнашыусы яугирҙарға ярҙам. Иглин районында «Барыһы ла Еңеү өсөн» штабы ирекмәндәре алғы һыҙыҡта нацистарға ҡаршы алышҡан «Башҡортостан» мотоуҡсылар полкы һалдаттарының махсус заказын үтәне. Был хаҡта тулыраҡ киләһе яҙмала.

МХО-ла ҡатнашыусы яугир дошман менән көрәштә хәйләкәрерәк булырға өйрәнеү мөһимлеге хаҡында һөйләне

Иң мөһиме - дошмандан хәйләкәрерәк булырға өйрәнеү. Махсус хәрби операция яугирҙарының береһе, «Тихий» ҡушаматлы яҡташыбыҙ бер йыл элек хәрби хеҙмәткә контракт төҙөгән. Уҡыуҙар үткәс ул үҙен пилотһыҙ осоу аппараттары операторы ролендә һынап ҡарарға булған. Әле яугир алдына ҡуйылған бурыстарҙы уңышлы үтәй. Был турала ул беҙҙең телеканалға интервьюла хәбәр итте.

Ейәнсура районында ветеринария буйынса команда-штаб уҡыуҙары үтте

Сценарийға ярашлы, төбәктең Яңы Петровка ауылында себер түләмәһе табылған. Уны бөтөрөүҙә урындағы ветеринария участкаһы хеҙмәткәрҙәре, ауыл хужалығы белгестәре ҡатнашты. Сараға шулай уҡ Татарстандан, Ырымбур һәм Силәбе өлкәләренән махсус ҡунаҡтар ҙа саҡырылды.

Башҡортостанда ҡойма ямғырҙар урып-йыйыу эштәрен тотҡарлай

Ауыл хужалығы министрлығы мәғлүмәттәре буйынса, 37 район иген урырға төшкән. Әлегә 263 мең тонна ашлыҡ урылған, гектарынан 32 центнер уңыш алына. Стәрлетамаҡ һәм Ауырғазы хужалыҡтарында был күрһәткес 40 центнерҙан аша. 8 районда шипкән, 11-ендә борсаҡ уралар- майлы һәм ҡуҙаҡлы культураларҙан 2 мең самаһы уңыш йыйылған.

Башҡортостан башлығы вазифаһына кандидат Владимир Нагорныйҙың йәмәғәт ярҙамы штабы эш башланы

Башҡортостан башлығы вазифаһына кандидат Владимир Нагорныйға ярҙам итеү буйынса йәмәғәт штабы үҙ эшен башланы. «Ғәҙел Рәсәй - Патриоттар - хәҡиҡәт өсөн» партияһының төбәк бүлексәһе советы рәйесе һәм ағзалары әҙерлектең мөһим аспекттарын тикшерҙе, граждандарҙың һайлауҙа ҡатнашыу кимәлен күтәреүгә йүнәлтелгән үҙ идеяларын һәм башланғыстарын тәҡдим итте. Шулай уҡ һайлаусыларҙы кандидаттың программаһы менән таныштырыу - төп маҡсат. Владимир Нагорный билдәләүенсә, документ халыҡтың йәшәү кимәлен арттырыуға бағышланған.

Стәрлетамаҡ районынан эшҡыуар дәүләттән аҡсалата ярҙам алып, техника паркын арттырған

«Эшҡыуарлыҡ сәғәте» предприятие эшмәкәрлеген еңелләштерә. Стәрлетамаҡ районында май һығыу ойошмаһын етәкләгән Альберт Хәйруллин дәүләттән аҡсалата ярҙам алып, техника паркын арттырған. Фронталь тейәгес машинаһы эште автоматлаштырырға мөмкинлек бирҙе, ти йүнсел. Өҫтәүенә, Альберт Хәйруллин «Башҡортостан Продукты» проекты дипломанты. Былтыр «Агрокомплекс» халыҡ-ара күргәҙмәһендә үткән «Иң яҡшы продукт» конкурсында көмөш, быйыл «Иң яҡшы фермер продукты» бәйгеһендә алтын миҙалға өлгәшкән.

Талпандан зыян күреүселәр күп

Башҡортостанда быйыл талпандан зыян күргән 7 мең 500-гә яҡын кеше медицина учреждениеһына мөрәжәғәт иткән. Гигиена һәм эпидемиология үҙәге лабораторияһы белгестәре 8 меңләп бөжәкте тикшергән, уларҙың 1 процентында энцефалит вирусы асыҡланған. Республикала балаларҙы һауыҡтырыу һәм ял лагерҙарындағы бөтә майҙандар талпанға ҡаршы эшкәртелгән. Йыл башынан 25 меңдән ашыу кеше энцефалиттан прививка алған.

Өфөгә эш сәфәре менән Игорь Комаров килде

Өфөгә эш сәфәре менән Рәсәй Президентының Волга буйы федераль округындағы тулы хоҡуҡлы вәкиле Игорь Комаров килде. Башҡортостан башлығы Радий Хәбиров менән ул донъя кимәлендәге Евразия ғилми-мәғариф үҙәгенең Вуз-ара студенттар кампусында, Республика балалар онкология һәм гематология үҙәгендә булды. Төбәктә сафҡа индерелгән объекттар Рәсәй төбәктәре өсөн миҫал итеп алырлыҡ кимәлдә тип баһаланды.

Башҡортостанда эшләй башлаған «Рекрут» проекты тәүге һөҙөмтәһен күрһәтә

Акцияға ярашлы, ирекмәндәр төпкөлдәргә сығып хәрби-патриотик йүнәлештә, контракт хеҙмәте тураһында аңлатыу эше алып бара. Сәфәрҙәрҙең береһендә «Туз» ҡушаматын аласаҡ егет махсус хәрби операцияға юлланыу теләген белдергән. Дуҫтарым һәм таныштарым күптән хеҙмәт итә, улар менән бәйләнештәмен, илгә ярҙам итеү теләге мине контракт төҙөүгә этәрҙе, ти ул. Әле егет ректрутсы менән бергә ДОСААФ бүлексәһенә килеп әңгәмә үтә. Һуңынан ул махсус хәрби операцияға ҡушылыр өсөн урындағы хәрби комиссариаттарға оҙатыласаҡ. Унда медицина комиссияһы үтеп контракт төҙөй ала.

Алтын Урҙа археологик экспедицияһы Шишмә районында ҡаҙыныу эштәре алып бара

Алтын Урҙа археологик экспедицияһы Шишмә районы Ябалаҡлы ауылы эргәһендә ҡаҙыныу эштәре алып бара. Тарихи биләмәлә Өфөнөң тарих тел һәм әҙәбиәт институты ғалимдары һәм Башҡортостан райондарынан, Свердловск өлкәһенән уҡыусылар, студенттар ҡатнаша.
Ябалаҡлы-1 тарихи ауылында табылған ҡаҙылдыҡтар яңы фәнни асыштар яһарға булышлыҡ итәсәк.

«Башҡорт аты» фестиваленә һанаулы ғына көндәр ҡалып бара

Унда ат спортын һөйөүселәр, профессионалдар, шулай уҡ башҡорт тоҡомло аттарҙы үҫтереү буйынса эксперттар ҡатнашыр тип көтөлә. Халыҡ-ара кимәлдәге сараға әҙерлек барышы хаҡында киләһе яҙмала.

Дәүләт автоинспекцияһы йөклө ҡатынға бала табыу йортона барып етергә ярҙам иткән

Экипаж Вәлиевтар ғаиләһенә юлдағы тығындар ваҡытында хәүефһеҙ коридор булдыра һәм Өфөнөң Ҡала клиник перинаталь үҙәгенә тиклем оҙата. Инспекцияла белдереүҙәренсә, бындай ғәҙәти булмаған ваҡиға кварталға бер булһа ла осрай. Алина Вәлиева ҡыҙы Камилә менән үҙен яҡшы тоя, бөгөн улар өйөнә ҡайтты.