Һай, афарин, йәштәр!

Әбйәлил районынан Рената һәм Денис Ишҡоловтар туйҙа тәүге ғаилә бейеүен башҡара. Афарин!😍

Тағы ла күберәк милли рухтағы яҙмалар - «Башҡорттар» тапшырыуы төркөмөндә.

Туймазыны һыу баҫҡан

Туймазыла көслө ямғыр яуыуы сәбәпле, Туймазы йылғаһы ташҡан. Башҡортостан Республикаһы Ғәҙәттән тыш хәлдәр буйынса дәүләт комитетының матбуғат хеҙмәте хәбәр итеүенсә, һыу кимәленең күтәрелеүе һөҙөмтәһендә ихаталар, гараждар һәм бер нисә йорт һыу эсендә ҡалған.

Ҡотҡарыусылар шунда уҡ ваҡиға урынына юлланған. Улар хәлгә мониторинг үткәрә, йорттар буйлап йөрөй.

«Календарҙа йәй булһа ла, беҙгә ташҡын менән көрәшергә тура килә. Әлеге ваҡытта халыҡты эвакуациялау талап ителмәй, — тип хәбәр иттеләр дәүләт комитетынан. — Яуым-төшөм кәмегәс, Туймазы йылғаһы ярҙарына ҡайта башланы. Белгестәребеҙ әле лә һыу баҫҡан биләмәләрҙә йәшәүселәргә ярҙам күрһәтергә әҙер тора».

Йәрмәкәй районының Ҡарамалы шишмәһендә һыу кимәле күтәрелгән

Уҙған төндә ҡойма ямғыр яуыуы һөҙөмтәһендә Йәрмәкәй районының Ҡарамалы шишмәһендә һыу кимәле күтәрелгән. Ошо сәбәпле Түбәнге Ҡарамалы ауылында күпер йыуылған. Шулай уҡ 15 кеше йәшәгән һигеҙ йорт биләмәһе һыу аҫтында ҡалған. Ашығыс рәүештә урындағы халыҡты иҫкәртеү үткәрелә. Урында Ғәҙәттән тыш хәлдәр министрлығының оператив төркөмө эшләй.

Ҡыҫҡа ваҡытлы ялдан һуң бер төркөм яҡташтарыбыҙ махсус хәрби операция биләмәһенә юлланды

Ҡыҫҡа ваҡытлы ялдан һуң йәнә алғы һыҙыҡҡа. Мобилизацияланған һәм үҙ теләге менән контракт төҙөгән бер төркөм яҡташтарыбыҙ махсус хәрби операция биләмәһенә юлланды. Яугирҙар ике йылға яҡын ил алдындағы бурысын үтәй. Күптәр иҫәп буйынса өсөнсөгә отпускыла булған. «Өфө-арена» комплексы янындағы майҙандан уларҙы яҡындары оҙатты. Билдәләнгән маршрут буйынса автобустар бүленгән, кире рейста хәрбиҙәрҙең сираттағы төркөмө ялға ҡайта.

Йылайыр районында тиҫтәгә яҡын спорт төрө үҫешә

Тренировкалар үткәреү өсөн күп функциялы майҙансыҡтар, хоккей коробкалары сафҡа ингән. Был һәм башҡа объекттарҙы төҙөү һәр ваҡыт Башҡортостан башлығы Радий Хәбировтың иғтибар үҙәгендә булды. Республика етәксеһе спорт кешеләрҙә тик яҡшы сифаттарҙы ғына формалаштырыуын күп тапҡырҙар һыҙыҡ өҫтөнә алды.

25 июлдә Башҡортостан юлдаш каналында «Батырҙар дәүере» телемарафоны үтә

Еңеү өсөн бөтә ил менән бергә. Һалдаттарҙың тиңһеҙ батырлығы. Ватанға тоғролоҡ һәм хәрби туғанлыҡ. Яугирҙар һәм уларҙың ғаиләләренә ҡаралған федераль һәм төбәк түләүҙәре. Контракт өсөн - бер миллион. Махсус хәрби операция буйынса һорауҙар һәм яуаптар республиканың төп телеканалында «Батырҙар дәүере» телемарафонында! 25 июлдә көнө буйы!

Башҡортостандан «Вагнеровсы» ВСУ танкын шартлатҡан

Күмертауҙан «Вагнер» шәхси хәрби компанияһы яугиры Украина ҡораллы көстәренең һөжүмен кире ҡаҡҡан һәм дошман танкын юҡ иткән.

Егет ҡаршы көстәрҙең урынлашҡан урынын теүәл билдәләй алған һәм тәүге атыуҙа уҡ дошман төркөмөнә эләккән.

🎖Һалдат «Батырлыҡ өсөн», «ЛХР-ҙағы хеҙмәте өсөн», «Бахмут бәрелеше», «Вагнер» ҡара тәреһе» һәм «II дәрәжә яуҙа йәрәхәт алған өсөн» миҙал-ордендары менән бүләкләнгән..

Радий Хәбиров Өфөлә Геном үҙәге төҙөлөшө менән таныштырҙы

Төҙөлөш Евразия ғилми-белем биреү үҙәге - юғары уҡыу йорттары араһындағы студенттар кампусының икенсе сираты сиктәрендә алып барыла. Геном үҙәгендә фундаменталь һәм ғәмәли биомедицина тикшеренеүҙәре үткәреләсәк. Бында мәғлүмәт технологиялары өлкәһендә дисциплина-ара проекттарҙы тормошҡа ашырыу планлаштырыла. Бина 4 ҡаттан торасаҡ, дөйөм майҙаны - 5 мең ярым квадрат метр. Уны иң заманса ҡорамалдар менән тәьмин ителәсәк.

Ғәҙәттән тыш хәлдәр министрлығы Башҡортостанда көслө ямғырҙар тураһында ашығыс иҫкәртеү яһаны

Иғтибар! Ғәҙәттән тыш хәлдәр министрлығы Башҡортостанда көслө ямғырҙар тураһында ашығыс иҫкәртеү яһаны. Бөгөн төндә һәм иртәгә тәүлек дауамында республикала көслө ҡойма ямғырҙар, ҙур боҙ-борсаҡ яуыуы, елдең секундына 22 метрға тиклем көсәйеүе, йәшен йәшнәүе хаҡында хәбәр итте.

Абитуриенттарҙың күп өлөшө «Дәүләт хеҙмәттәре» порталын һайлай

Өфө фән һәм технологиялар университетының ҡабул итеү комиссияһынан хәбәр итеүҙәренсә, әлегә 63 меңдән ашыу ғаризаның 55 проценты тап ошо ысул буйынса тапшырылған. Документтар 25 июлгә тиклем ҡабул ителә. Республика юғары уҡыу йорттарында асылған яңы йүнәлештәр, бюджет урындарға конкурс барышы хаҡында репортаж.

Өфө 450 йыллыҡ тарихи юбилейын ҡаршы алырға әҙерләнә

Хәҙерге ваҡытта башҡаланың тарихи үҙәгендә төҙөкләндереү эштәре ҡайнай. Башҡортостан ҡулланыусылар йәмғиәтенең бинаһы ла яңы һулыш кисерә. Әле объектты көрән төҫкә буяу бара. Былтыр фасад капиталь ремонт сиктәрендә һары төҫкә буялған булған. Әммә ҡала халҡына оҡшамау сәбәпле төҫтө үҙгәртергә хәл ителгән. Буяу эштәрен ике аҙнала тамамлау ҡаралған.

«Ирҙәр ҡоро» ойошмаһы ағзалары солоҡсолоҡ серҙәренә төшөндө

Боронғо кәсепкә һаҡсыл ҡараш. «Ирҙәр ҡоро» төбәк йәмәғәт ойошмаһы ағзалары атайҙар һәм улдар өсөн сираттағы сараны тормошҡа ашырҙы. Был юлы улар Белорет районында ата-бабаларҙан ҡалған солоҡсолоҡ серҙәренә төшөндө.

Дүртөйлө районынан Альбина Һәм Фәнис Фәррәховтар тимер туйын билдәләне

65 йыл никахта иңгә-иң терәшеп. Дүртөйлө районынан ирле-ҡатынлы Альбина Һәм Фәнис Фәррәховтар тимер туйын билдәләне. Бындай юбилейға бик һирәк парҙар ғына барып етә. Тимер туй ғаилә ептәре ныҡлығын күрһәтә, был йылдар эсендә мөнәсәбәттәр ҙә тимер кеүек ышанслыға әүерелә. Улар баласаҡ, мәктәп, йәшлек йыдарын бергә үткәргән ауылдаштар.

Учалы районының Ҡотой ауылында халыҡ-ара «Олотау йыйыны» футбол фестивале үтте

Оло тауҙың оло йыйыны. Ял көндәрендә Учалы районының Ҡотой ауылында алтынсы халыҡ-ара «Олотау йыйыны» футбол фестивале үтте. Быйыл турнир өс көн дауам итте һәм ҡатнашыусы командалар һаны буйынса ла рекорд ҡуйҙы. Приз фонды ла быйыл миллион һумға барып етте. Бәләкәй генә ауылдың тотош илгә дан алған спорт байрамы тураһында киләһе репортажда.

26 һәм 27 июлдә Өфө үҙәгендә автотранспорт хәрәкәте сикләнә. Баш ҡалала ике ҙур эшлекле йыйын ойошторола. 26 июлдә “Аҡыллы ҡала – аҡыллы ил” Бөтә Рәсәй форумы, шулай уҡ “Аҡыллы ҡала. Беҙҙең киләсәк” йәштәр конгресы башлана. 26 июлдә иртәнге сәғәт 6-нан 8-гә тиклем Генерал-губернатор Перовский урамы ябыла. 27 июлдә көндөҙгө сәғәт 4-тән киске 7-гә тиклем Пушкин урамының бер өлөшөндә транспорт хәрәкәте сикләнә. 25-28 июлдә “Торатау” конгресс-холы янындағы парковкала автомобиль ҡалдырып булмай, тип хәбәр итәләр Транспорт һәм юл хужалығы министрлығынан.

💞Башҡортостандан Әсә махсус операцияға улы янына барып ҡайтҡан

Благовещен ҡалаһынан Елена махсус хәрби операция биләмәһенә улының хәлен белешергә барған.

😇 Яугирҙың әсәһе — ирекмән. Ул башҡа ҡатын-ҡыҙҙар менән бергә гуманитар ярҙам әҙерләй, күптәренең улдары СВО-ла хеҙмәт итә.

«Улым санитар инструктор булып хеҙмәт. Беренсе ярҙам күрһәтә, һалдаттарҙың ғүмерен ҡотҡара. Бер нисә ай хеҙмәт иткән осорҙа командирҙарынан бик күп йылы һүҙҙәр һәм рәхмәт ишеттем. Бындай һүҙҙәр күңелгә май булып яғыла», — тип яугир әсәһе.

💌Ҡатын СВО биләмәһенә дарыуҙар, тәмлекәстәр, хаттар һәм башҡа кәрәкле әйберҙәр алып барған.

25 июлдә Башҡортостан юлдаш телевидениеһында «Батырҙар дәүере» телемарафоны

Еңеү өсөн бөтә ил менән, һалдаттарҙың тиңһеҙ батырлығы, ватанға тоғоролоҡ һәм хәрби туғанлыҡ, яугирҙар һәм уларҙың ғаиләләренә ҡаралған федераль һәм төбәк түләүҙәре, контракт өсөн бер миллион һум. Махсус хәрби операция буйынса һорауҙар һәм яуаптар «Батырҙар дәүере» телемарафонында. Башҡортостан юлдаш каналы эфирына ҡушылығыҙ, илдең киләсәге өсөн «Батырҙар дәүере»нең мөһимлеген һәм әһәмиәтен тойоғоҙ.

Баймаҡ районында йәшәүсе ғаилә бәшмәк үҫтереү менән шөғөлләнә

Бәшмәк үҫтереү килемлеме? Был һорауға яуапты Баймаҡ районы Темәс ауылында шампиньон үҫтереүгә социаль адреслы ярҙам алыусы Марковтар ғаиләһе белә. Тулыраҡ БЮТ ижади төркөмө әҙерләгән яҙмала.

Башҡортостан башлығы социаль контракт буйынса бизнес-проекттың уңышлы миҫалы менән тыныштырҙы

Ябай ғына идея һәм дәүләт яғынан ярҙам кешенең, тотош ауылдың тормошон яҡшы яҡҡа үҙгәртергә мөмкин. Башҡортостан башлығы социаль селтәрҙәрҙә социаль контракт буйынса бизнес-проекттың уңышлы миҫалы менән тыныштырҙы. Һүҙ Ейәнсура районынан Әлфиә Ураҙаева һәм уның клининг бизнесы хаҡында бара.

Башҡортостанда йәшәүселәр тәүлек эсендә 23 миллион ярым һум аҡсаһын юғалтҡан

Антирекорд тураһында республика буйынса Эске эштәр министрлығының матбуғат хеҙмәте хәбәр итте. Халыҡты алдауҙың 45 осрағы буйынса ла енәйәт эштәре ҡуҙғатылған. Радий Хәбиров күптән түгел ауыл биләмәләре башлыҡтарынан халыҡҡа телефон аша мутлашыусылар тураһында мәғлүмәт еткереүҙәрен һораны. Аңлауығыҙса, алдау юлы менән аҡса алыу схемаларын махсус хеҙмәттәр әҙерләгән, был аҡса туранан-тура Украина хәрби көстәрен финанслауға йүнәлтелә.

Евразия күсмә халыҡтар цивилизацияһы музейының визит-үҙәге аша ун өс меңгә яҡын кеше үткән

Ике аҙна эсендә Шишмә районындағы Евразия күсмә халыҡтар цивилизацияһы музейының визит-үҙәге аша ун өс меңгә яҡын кеше үткән. Турахан кәшәнәһе эргәһендә асылған яңы объект мөмкинлектәрен Рәсәйҙең башҡа төбәктәренән килгән туристар ҙа юғары баһалап, Өфөгә яҡын урынлашыуы айырыуса ҡыуаныслы булыуын билдәләне.