Башҡортостанда Ҡорбан байрамы үтте

Республикала йәшәүселәр мәсеттәрҙә иртәнге намаҙ уҡып,вәғәз тыңланы, илгә тыныслыҡ теләне. Дини байрам уңайынан һарыҡтар салынды. Төбәктә бының өсөн 60 махсус майҙансыҡ ойошторолғайны.

Башҡортостанда ҙур археология экспедицияһы уҙғарыла

Өфө янында Алтын Урҙа дәүерендәге ҡаласыҡ тикшерелә. Экспедицияла 100 кеше ҡатнаша. Әлегә тиклем бындай ҙур эҙләнеү 1990-сы йылдарҙа Таналыҡ биләмәһендә ойошторолған булған. Археологтар хәбәр итеүенсә, Подымалово янындағы биләмә 27 гектарҙы алып тора. Металл етештереү, металлы эшкәртеү, керамака, һөйәк әйберҙәр эшләү буйынса 9 объект табылған. Экспедиция бөгөн башлана һәм 4 аҙна дауам итә.

Хеҙмәттәшебеҙ Рафиҡ Әхмәтшин яҡташтарынан посылка алған

Бөгөн Белорет районы башлығы Андрей Иванюта «Башҡортостан» полкына гуманитар ярҙам алып барған. Ул «Журналист» позывнойлы һалдатҡа исемле посылкалар тапшырған.

- Тирлән урман хужалығына, район эшҡыуарҙарына оло рәхмәтемде белдерәм. Миңә яңы генератор, бензобысҡы һәм мотопомпа килтерҙеләр. Былар барыһы ла хәрби заданиеларҙы үтәгәндә бик кәрәк, - тип хәбәр итә «Журналист».

Радий Хәбиров Бөйөк Еңеүҙең 80 йыллығына әҙерлеккә бәйле указға ҡул ҡуйҙы

Документ рәсми хоҡуҡи мәғлүмәт интернет-порталында урынлаштырылған. Указға ярашлы республикала ойоштороу комитеты булдырыла һәм уның составы раҫлана. Ойоштороу комитеты бөтә саралар планын билдәләй. Республика Хөкүмәте документ үтәлеше өсөн яуаплы була. Быға тиклем Рәсәй Президенты Владимир Путин киләһе йылда Бөйөк Ватан һуғышында Еңеүҙең 80 йыллығын билдәләү буйынса указға ҡул ҡуйҙы.

Башҡортостан Башлығы вазифаһына тағы ике кеше дәғүә итә

Республика Үҙәк һайлау комиссияһында ЛДПР партияһынан Иван Сухаревтан документтар ҡабул ителде. Ул Дәүләт Думаһы депутаты, профилле комитет рәйесенең беренсе урынбаҫары булып эшләй. Икенсе кандидат – Илшат Тимерйәнов. Уны “Яңы кешеләр” партияһы тәҡдим итте. Илшат Тимерйәновҡа 44 йәш, ул эшҡыуар. Быға тиклем “Берҙәм Рәсәй” партияһынан ғәмәлдәге Республика Башлығы Радий Хәбиров һәм “Ғәҙел Рәсәй – Патриоттар – Дөрөҫлөк өсөн” сәйәси фирҡәһенән Владимир Нагорный документтарын тапшырҙы. Башҡортостан Башлығын һайлау сентябрҙә өс көн дауам итә – 6, 7 һәм 8 сентябрҙә үтә.

Республика халҡы уҙған ял көндәре мутлашыусыларға 16 миллион һум күсергән

Башҡортостан буйынса Эске эштәр министрлығынан белдереүҙәренсә, Өфөнән 46 йәшлек иргә үҙен мобиль элемтә компанияһы белгесе булараҡ таныштырған кеше шылтыратҡан. Ул алдаҡ юл менән “Дәүләт хеҙмәттәре” порталынан серһүҙҙе асыҡлаған. Аҙаҡ иргә ялған банк хеҙмәткәре шылтыратҡан һәм уның исеменә кредит алырға маташыуҙарын әйткән. Быны булдырмаҫ өсөн алдараҡ аҡса юлларға һәм “хәүефһеҙ иҫәп”кә күсерергә ҡушылған. Мутлашыусылар тоҙағына эләккән ир 2 миллион һумын юғалтҡан. Благовар районынан 27 йәшлек егет ипотекаға бирелгән 6 миллион һум аҡсаһынан ҡолаҡ ҡаҡҡан. Ул интернетта инвестицияларҙа күп аҡса эшләүгә бәйле реклама күреп ҡалған. Егеткә тиҙ арала 1 миллиард һум вәғәҙә иткәндәр. Аҡса алынғас ялған брокерҙар элемтәгә сыҡмаған. Полиция таныш булмаған телефон номерҙарына яуап бирмәҫкә һәм шикле рекламаға ышанмаҫҡа кәңәш итә.

❤Ялға ҡайтҡан СВО офицеры һөйгән ҡыҙы менән ғаилә ҡорған

Межгорьенан Владимир һәм Владислава Филатовтар бер-береһен бала саҡтан белә. Улар бер мәктәптә белем ала һәм бер урамда йәшәй. Мәктәпте тамамлағандан һуң йәштәр төрлө ҡалаларға уҡырға юллана: Владислава Силәбе педагогия университетына инә, ә Владимир хәрби олатаһының эҙҙәренән барырға, Санкт-Петербургтағы Михайлов академияһында белем алырға ҡарар итә.

Бер нисә йылдан һуң улар тыуған яғында осраша һәм мәңге бергә булырға ҡарар итә.

Владимир бер йылдан ашыу Донбасста хеҙмәт итә, «Махсус хәрби операцияла ҡатнашыусы», «II дәрәжә Батырлыҡ өсөн», «Хәрби ҡаҙаныштары өсөн» миҙалдары менән бүләкләнгән. Оҙаҡламай яугир йәнә алғы һыҙыҡҡа юлланасаҡ.

Ҡайғылы хәбәр алдыҡ

Бөгөн билдәле шағирә, бик күп матур йырҙар авторы, Башҡортостандың атҡаҙанған мәҙәниәт хеҙмәткәре Әнисә Таһирова вафат булған.

Яҡындарының һәм туғандарының ауыр ҡайғыһын уртаҡлашабыҙ.

Мәләүез районы Хәсән ауылында мәсет асылды

Яҡташлыҡ көсө. Мәләүез районы Хәсән ауылында мәсет асылды. Ҡорбан Ғәйетендә иман йортонда тәүге аҙан яңғыраны, намаҙ, вәғәз уҡылды. Төҙөлөштә ҡатнашыусыларға рәхмәт һүҙҙәре әйтелде. «Әсә йөрәге» тип исемләнгән мәсеттә БЮТ ижади төркөмө лә булды.

Радий Хәбиров һәм Александр Куренков республика янғын һүндереүселәренә яңы техника тапшырҙы

Башҡортостан башлығы Радий Хәбиров һәм Рәсәй Ғәҙәттән тыш хәлдәр министры Александр Куренков республика янғын һүндереүселәренә яңы техника тапшырҙы. Тантаналы шарттарҙа ҡотҡарыусыларға 36 берәмек техника бүләк ителде.Бынан тыш видеобәйләнеш аша Красноусол ҡасабаһында янғын-ҡотҡарыу депоһы асылды.

Радий Хәбиров урман янғындарында ғәйеплеләрҙе ҡәтғи яуаплылыҡҡа тарттырға ҡушты

Башҡортостан Урман хужалығы министрлығы мәғлүмәттәренә ярашлы, быйыл бер кешегә ҡарата енәйәт эше ҡуҙғатылған. Республика менән идара итеү үҙәгендә ойошторолған оператив кәңәшмәлә һыу объекттарындағы хәл, Өфөнөң 450 йыллығына арналған саралар планы ла ҡаралды. Тулыраҡ киләһе яҙмала

1 июлдән Башҡортостанда коммуналь хеҙмәттәргә тарифтар үҙгәреүе көтөлә

1 июлдән Башҡортостанда, бөтә илдәге кеүек үк, коммуналь хеҙмәттәргә тарифтар үҙгәреүе көтөлә. Һүҙ йылытыу, ҡаты көнкүреш ҡалдыҡтарын сығарыу, һыу тәьминәте, һыу ағыҙыу, шулай уҡ электр энергияһы тураһында бара. Һуңғы тапҡыр тарифтар 2022 йылда күтәрелгәйне. Шул уҡ ваҡытта айырым категория граждандарға коммуналь түләүҙәргә льготалар ҡарала. Уларға кемдәр иҫәп тота ала һәм нисек яҡшы ташлама алыу мөмкинлегенә эйә булырға? Тулыраҡ киләһе яҙмала.

Федоровка районында Бөйөк Ватан һуғышында ҡатнашыусылар иҫтәлегенә мемориаль комплекс асылды

Федоровка районы Яңы Яуыш ауылында Ҡорбан ғәйете көнөндә Бөйөк Ватан һуғышында һәләк булған һәм еңеү яулап ҡайтҡан яҡташтар иҫтәлегенә мемориаль комплекс асылды. Яңы һәйкәл «Атайсал» проекты һәм ауылдаштар көсө менән төҙөлгән. Тулыраҡ киләһе яҙмала.

Башҡортостан яугирҙәре СВО биләмәһендә үҙ көсө менән мәсет төҙөгән

Донецк Халыҡ Республикаһында Салауат Юлаев исемендәге башҡорт батальоны яугирҙәре төҙөгән яңы мәсет асылды. Мәсет Донецк Халыҡ Республикаһының азат ителгән ауылдарының береһендә урынлашҡан.

Яҡташтарыбыҙ мосолмандарҙың иман йортона армия йондоҙҙары хөрмәтенә «Йондоҙ-рахман» исемен биргән. Мәсет хәрбиҙәр үҙҙәре йыйған аҡсаға һалынған. Төҙөлөш эштәре хеҙмәттән буш ваҡытта алып барылған.

Мәсет асылған көндә яугирҙәр намаҙ уҡыған һәм байрамса төшкө аш ойошторған. Бында тәүгеләрҙән булып заданиенан ҡайтҡан «юлаевсылар», Ростов өлкәһе мосолмандарының Диниә назараты вәкилдәре һәм Донецк Халыҡ Республикаһының муниципаль берәмеге етәкселәре килгән.

Башҡортостанда сүп-сар майҙансыҡтарында видеокамералар ҡуйыла

Республика Хөкүмәтендә үткән ултырышта ҡаты көнкүреш ҡалдыҡтары менән эш итеү мәсьәләһе ҡаралды. Сүп-сар һауыттарына ҡый үләндәре йәки малсылыҡ ҡалдыҡтарын ташлаған кешеләрҙе видеокамера төшөрөп ала һәм яуапҡа тарттырасаҡ. Бының өсөн айырым майҙансыҡтар бар. 58 район һәм ҡалала ҡый үләндәрен ташлау өсөн 567 урын, шулай уҡ малсылыҡ ҡалдыҡтары өсөн 800-ҙән ашыу мал зыяраты булдырылған.

Рәсәйҙә балаларға энергетиктар һатырға ярамай

Дәүләт Думаһы беренсе уҡыуҙа закон проектын ҡабул итте. Уға ярашлы, бәлиғ булмағандарға алкоголһеҙ тонусты күтәргән эсемлектәр, шул иҫәптән энергетиктар, һатыу тыйыла. Магазинда сауҙа хеҙмәткәрҙәре паспорт һорарға хоҡуҡлы була. Энергетиктар һаулыҡ өсөн етди зыян килтерә. Бындай эсемлектәр юғары ҡан баҫымы, шәрәк диабеты, йөрәк-ҡан тамырҙары сирҙере сәбәпсе булыуы ихтимал, ти табиптар. Закон 1 сентябрҙән көсөнә инергә тейеш.

Дәүләт Йыйылышы-Ҡоролтайҙың Президиум ултырышында 4 тиҫтәгә яҡын закон проекты тикшерелде

Етемдәргә социаль ярҙам саралары, йылға порты объекттарын хосусилаштырыу үҙенсәлектәре, һунарға рөхсәт алыу өсөн электрон йәрәбә. Дәүләт Йыйылышы-Ҡоролтайҙың Президиум ултырышында ошо һәм башҡа закон проекттары ҡаралды.

Республикала һабантуй байрамдары дауам итә

Уҙған ял көндәрендә генә халыҡ байрамы тиҫтәнән ашыу төбәктә билдәләнде. Ауыл хужалығы алдынғыларын тәбрикләү менән бергә, төрлө күңел асыу саралары, конкурстар ойошторолдо.

Башҡортостанда бензин тағы ҡиммәтләнде

“Башнефть” компанияһы яғыулыҡҡа хаҡ арттырған. Бензин һәм дизель был юлы 40 тингә ҡиммәтләнде. Мәҫәлән, бөгөн 95-се марка бензин литры 54 һум 80 тингә һатыла. Шул уҡ ваҡытта 100-се марка бензин 20 тингә арзанайған. Быға тиклем 29 майҙа, 4 һәм 11 июндә яғыулыҡҡа хаҡ 20 тингә күтәрелгәйне.

Башҡортостандан көрәшсе Артур Зөлҡәрнәев үҙенсәлекле рекорд ҡуйҙы

Пермь крайында Бөтә Рәсәй ауыл һабантуйында яҡташыбыҙ бер минут эсендә дәғүәселәрен 25 тапҡыр бөгөлөп ташлаған. Бындай күрһәткес Рәсәй рекордтары китабына индерелде. Милли көрәш буйынса ярышта беҙҙең республика вәкилдәре Артур Зөлҡәрнәев, Юнир Закиров һәм Айгиз Зәйнетдинов үҙ ауырлыҡ үлсәмдәрендә еңеү яуланы.

Радий Хәбиров медицина ҡорамалдарының яңы производствоһын асыуҙа ҡатнашты

Производство ҡеүәттәрен арттырыуға 600 миллион һумлыҡ инвестиция. Өфөлә медицина йүнәлешендәге мебель һәм ҡорамалдар етештергән предприятие яңы производство-склад комплексын сафҡа индерҙе. Объектты асыу тантанаһында Башҡортостан башлығы Радий Хәбиров та ҡатнашты. Шулай уҡ төбәк етәксеһе баш ҡала биләмәһендә тормошҡа ашырылған тағы ла бер инвестиция проекты менән танышты.