Илдә "ауыл программалары" оҙайтыла

"Ауыл табибы", "Ауыл фельдшеры" һәм "Ауыл уҡытыусыһы" программалары 2030 йылға тиклем оҙайтыла. Ил президенты Владимир Путин ҡул ҡуйған документ менән Кремль сайтында танышырға мөмкин. Уның үтәлеше өсөн премьер-министр Михаил Мишустин яуаплы була. Уҙған йылда Башҡортостанда "Ауыл табибы" программаһы буйынса 83 табипҡа миллион ярым, 62 белгескә миллион һум бирелде. Шулай уҡ фельдшер һәм шәфҡәт туташтарына аҡсалата ярҙам булды. "Ауыл уҡытыусыһы" программаһы буйынса республикала 150 педагог түләү алды.

Өфөлә танылған режиссер Азат Нәҙерғоловтың хәтер кисәһе уҙғарыла

Башҡортостандың халыҡ артисы былтыр 1 мартта вафат булды. Уға 60 йәш ине. Азат Нәҙерғолов хеҙмәт юлын актер булараҡ Башҡорт дәүләт академия драма театрында башлай. Оҙаҡ йылдар Милли йәштәр театрында художество етәксеһе вазифаһын башҡара. Ул төрлө театрҙарҙа спектаклдәр ҡуя, шулай уҡ ҙур сараларҙың режиссеры була. “Азат Әхмәҙулла улы үҙ эшенең ысын оҫтаһы ине. Тыуған ерен, хеҙмәтен, студенттарҙы яратты”, - ти Заһир Исмәғилев исемендәге Өфө дәүләт сәнғәт институты уҡытыусыһы Гөлсәсәк Саламатова.

Радий Хәбиров Халыҡ-ара туған телдәр көнө менән ҡотланы

«Башҡортостанда 130-ҙан ашыу милләт вәкиле йәшәй. Уларҙың һәммәһенең үҙ телендә һөйләшер, уны үҫтерер мөмкинлектәрен киңәйтеү - беҙҙең бурыс. Татыулыҡ һәм берҙәмлек - төп байлығыбыҙ. Уны һаҡлайыҡ. Халыҡ-ара туған тел көнө менән!» тип яҙып сыҡҡан. Ошонда уҡ туған телдең мөһимлеге тураһында ролик та беркетелгән.

Кушнаренко ауылында маскировка селтәрҙәре яһау буйынса оҫталыҡ дәресе ойошторолдо

Кушнаренко ауылының Миңлеғәле Шайморатов исемендәге ирекмәндәр штабында ҡоро душ, маскировка селтәрҙәре яһау буйынса оҫталыҡ дәресе ойошторолдо. Осрашыу төрлө һөнәр эйәләрен, хаҡлы ялдағыларҙы берләштәрҙе. Гүзәл заттар ялан шарттары өсөн тәғәйенләнгән гигиена сараһын әҙерләргә, септәр үрергә өйрәнде. Камуфляж ҡатламға алғы һыҙыҡта ихтыяж юғары, ул ҡоралланыуҙы, ҡеүәтле техниканы һәм инженер ҡоролмаларҙы йәшереү өсөн ҡулланыла.

Баймаҡта мәктәп уҡыусылары махсус хәрби операцияла ҡатнашҡан яугир менән осрашты

Батырлыҡ дәресе. Баймаҡ ҡалаһының ДОСААФ-да, 4-се һәм 3-сө мәктәп уҡыусылары махсус хәрби операцияла ҡатнашҡан яугир менән осрашты. Ентекләберәк киләһе яҙмала.

Бөйөк Ватан һуғышы ветеранына 102 йәш тулды

Иглин районының Красный Восход ауылынан Бөйөк Ватан һуғышы ветераны Рәйфә Насирова 102-се тыуған көнөн билдәләне.

Рәйфә Ғәбдерәүеф ҡыҙы яҡындарының һөйөүе һәм хәстәрлеге менән солғап алынған: алты балаһы, ун дүрт ейән-ейәнсәре, ун һигеҙ бүлә-бүләсәре, тыуасары бар.

«Шул тиклем һөйкөмлө, шаярта, яңылыҡтар ҡарай, сәйәси ваҡиғалар хаҡында белеп тора. Уның менән аралашҡандан һуң яңы көс-дәрт менән эшләге һәм маҡсаттарға өлгәшәһе килә. Балаларына хәстәрлек, яҡшы тәрбиә өсөн ҙур рәхмәт. Рәйфә Ғәбдерәүеф ҡыҙына һәм уның балаларына ныҡлы һаулыҡ», - тип яҙҙы Гүзәл Насирова.

"Башҡортостан" киностудияһы илдә алдынғылар рәтенә инә

Башҡорт киноһы прокатта үҙ урынын яулай. Радий Хәбиров бөгөн кино төшөрөүселәр менән осрашты. - Һәр муниципалитетта яҡшы кинозалдар булдырырға тырышабыҙ, был мәсьәлә әле хәл ителмәгән, тине Республика Башлығы. Быйыл ғына Башҡортостанда 4 районда кинозалдар асылған. 6 йылда 36 кинозал яңыртылған.

Радий Хәбиров бер төркөм хеҙмәтсәндәргә Рәсәйҙең һәм республиканың дәүләт наградаларын тапшырҙы

Бөгөн Өфөлә, Ватанды һаҡлаусылар көнө алдынан, Башҡортостан башлығы Радий Хәбиров бер төркөм хеҙмәтсәндәргә Рәсәйҙең һәм республиканың дәүләт наградаларын тапшырҙы, юғары һөнәри оҫталыҡ, көндәлек хеҙмәт өсөн рәхмәт белдерҙе.

Яңы кинозалдар һаны буйынса Башҡортостан илдә алдынғылар иҫәбендә

Быйыл улар республиканың тағы ла 4 районда барлыҡҡа килгән. 6 йыл эсендә генә төбәктә 36 кинозал яңыртылыуын Радий Хәбиров Башҡортостан кинематографистары менән осрашыуында белдерҙе. Һуңғы йылдарҙа Әмир Абдразаҡов исемендәге «Башҡортостан» киностудияһы тәҡдим иткән картиналар ил кимәлендә танылыу яулай бара.

Башҡортостанда көн һайын уртаса 6,5 миллион һумдан ашыу суммаға 25 мутлашыу осрағы теркәлә

Йыл дауамында республикала йәшәүселәр мутлашыусылар арҡаһында 2 миллиард ярым һумдан ашыу аҡсаһынан ҡолаҡ ҡаҡҡан. Был һандарҙы бөгөн Дәүләт Йыйылышы - Ҡоролтайҙың пленар ултырышында Башҡортостан буйынса Эске эштәр министры Александр Прядко иғлан итте. Парламент алдында отчет телмәре менән Башҡортостандың Кеше хоҡуҡтары буйынса вәкиле сығыш яһаны, Михаил Закомалдин йәмғәтәселекте борсоған төп проблемаларға туҡталды. Депутаттар 4 тиҫтәгә яҡын закон проектын да ҡараны. Ултырышта Башҡортостан башлығы Радий Хәбиров ҡатнашты.

Бүздәк районы Түреш ауылы халҡы хәрбирҙәргә сираттағы гуманитар ылау әҙерләй

Кәрәк-яраҡ яугирҙар һорауы буйынса туплана. Сираттағы партия яҡын көндәрҙә ебәреләсәк. Шулай уҡ гуманитр ылауға өҫтәп ауылдаштар исемле посылкалар һалыу маҡсатын да ҡуя. Түрештәрҙең маҡсаты бер - берҙәмлектә Еңеүҙе яҡынайтыу!

Технология буйынса олимпиадала уҡыусылар практик күнекмәләр үтәп үҙ проекттарын яҡланы

Өфөнөң 1-се республика полилингваль күп профилле гимназияһында «Технология» фәне буйынса Бөтә Рәсәй олимпиадаһының төбәк этабы үтте. Ике көнгә иҫәпләнгән ярыш дүрт йүнәлеш буйынса ойошторола.

Башҡорт селекционерҙары бойҙайҙың яңы камиллаштырылған ике сортына патент алған

Улар юғары уңдырышлы, ҡоротҡос һәм ҡырыҫ һауа торошона ҡаршы сыҙамлы. Фәндәр академияһының Башҡортостан ауыл хужалығы ғилми-тикшеренеү институты белгестәре уларға Башҡорт-12 һәм Башҡорт-29 тип исем ҡушҡан. Әле орлоҡсолоҡ белгестәре яңы яҙғы сәсеү миҙгеленә әҙерләнә.

Депутаттар халыҡ менән йышыраҡ осраша

Дәүләт Думаһы регламентына үҙгәреш индерелде. Уға ярашлы депутаттар кәмендә айына бер тапҡыр һайлаусыларҙы ҡабул итергә тейеш. Быға тиклем ярты йылға бер осрашыу етә ине. Эш графигына ярашлы депутаттар ай һайын аҙна дауамында төбәктәрҙә була. Ошо мәлдә халыҡ менән осрашыу бурысы ҡуйыла.

Башҡортостанда быйыл 1 мең километр юл һәм 8 күпер тәртипкә килтерелә

Транспорт һәм юл хужалығы министрлығынан хәбәр итеүҙәренсә, милли проект буйынса Өфө һәм Стәрлетамаҡ агломерацияларында ремонт дауам итә. Биләмәлә 2 мең километр юлды төҙөкләндереү бурысы тора. Ҙур проекттарға килгәндә, быйыл Өфөлә Көнсығыш сығыу юлын төҙөү тамамлана, Бөрө – Таҙтүбә – Һатҡы трассаһы тулыһынса файҙаланыуға тапшырыла. Стәрлетамаҡта Ағиҙел йылғаһы аша күпер яңыртыла, Ауырғазы районында Талбазы ауылын урау юлы һалына, шулай уҡ Борай, Саҡмағош һәм Ҡырмыҫҡалы райондарында ауылдарға ингән юлдар ремонтлана.

Башҡортостанда “Алға” транспорт картаһын тулыландарыуҙа ҡыйынлыҡтар бар

Транспорт һәм юл хужалығы министрлығынан белдереүҙәренсә, QIWI Банк кредит ойошмаһының лицензияһы туҡтатылды. Ошо сәбәпле мобиль ҡушымтала “Алға” транспорт картаһына аҡса һалып булмай. Белгестәр башҡа банкка күсеү эшен алып бара. Халыҡҡа ваҡытлыса уңайҙылыҡтарҙы аңлап ҡабул итергә үтенәләр. Транспорт картаһын ҙур банктарҙың интернет-сервистары аша йәки почта бүлексәләре һәм терминалдарҙа ҡулаҡса менән тулыландырырға була.

Башҡортостанда “Салауат” сәскә ата

Өфө лимонарийында бөгөн ошондай атамалы лимон сорты менән таныштырҙылар. Ул сиргә һәм ҡоротҡостарға бирешмәй. Эре емештәр бирә. Селекционерҙар уны милли батырыбыҙ Салауат Юлаевтың исеме менән атаған. Хужалыҡ етәксеһе Фәриҙә Садыҡова әйтеүенсә, лимондың был сортын йылы япма аҫтында ла, асыҡ һауала ла үҫтерергә була. Лимондың “Салауат” сорты Рәсәй цитрус емештәре дәүләт реестрына индерелгән.

Башҡортостан хужалыҡтары тағы өс йылға берҙәм һалым түләүҙән бушатылды

Дәүләт Йыйылышы – Ҡоролтай депутаттары закон ҡабул итте. Хеҙмәткәрҙәр һанын артыҡ ҡыҫҡартмаған хужалыҡтар льготалы шарттар менән файҙалана ала. Республикала берҙәм ауыл хужалығы һалымына ташлама 2021 йылдан 2023 йыл аҙағына тиклем ғәмәлдә булды. Уның менән 500-ҙән ашыу ойошма файҙаланған һәм 165 миллион һум экономиялай алған.

Республикала «Мәғарифты үҫтереү» федераль программаһы буйынса 140 белем усағы яңыртылған

Башҡортостан 2019-2023 йылдар йомғаҡтары буйынса республикала төҙөлгән һәм ремонтланған мәктәптәр һәм балалар баҡсалары һаны буйынса илдең алдынғы төбәктәре иҫәбенә инде. Республикала «Мәғарифты үҫтереү» федераль программаһы буйынса 140 белем усағы яңыртылған. Ошо маҡсатта федераль ҡаҙнанан 7 миллиард һумдан ашыу аҡса йүнәлтелгән.