"Хәүефһеҙ сифатлы юлдар" милли проекты быйыл да ғәмәлгә ашырыла

Был турала Республика транспорт һәм юл хужалығы министрлығынан хәбәр итәләр. 2024 йылда дөйөм оҙонлоғо 132 километр юлды, 7 күперҙе тәртипкә килтереү планлаштырыла. Бының өсөн 4 миллиард 200 миллион һум тотонола.2023 йылда Башҡортостанда милли проект буйынса 209 километр юл ремонтланды. Эштәр өсөн 10 миллиард ярым һум тотонолдо. Аҡсаның күбеһе федераль ҡаҙнанан бүленде.

Өфө районында ике урам төҙөләсәк

Дәүләт һатып алыуҙары сайтында ошондай контракт тәҡдим ителә. Урамдар Миловка ауыл биләмәһендә була. Һәр береһенең оҙонлоғо 400 метр самаһы. Төҙөлөш өсөн 67 миллион һумдан ашыу аҡса бүленә. Эштәр быйыл йәй тамамланырға тейеш.

Бөрө ҡалаһында «Бөрө билмәндәре» гастрономия фестивале үтте

Бөрөлә билмән бөрөлдө. Республиканың төрлө төбәктәренән йыйылған билмән етештереүселәр ҡунаҡтарға ит ризыҡтары тәҡдим итте. Сарала ҡатнашыусылар билмән, шешлек, манты кеүек ярымфабрикаттар менән һыйланды. Бөрө билмәне фестивале былтыр ваҡиғалы туризм тармағында иң яҡшы гастрономия сараһы тип табылғайны. Билмән байрамында ҡатнашыусыларҙы Башҡортостан Башлығы Радий Хәбиров тәбрикләне.

Ҡыҫҡа ваҡытлы отпускынан һуң махсус хәрби операция биләмәһенә сираттағы яугирҙар төркөмө юлланды

Ике аҙналыҡ ял тамам. Ҡыҫҡа ваҡытлы отпускынан һуң, Өфөнән махсус хәрби операция биләмәһенә сираттағы яугирҙар төркөмө юлланды. Һалдаттар Яңы йылды өйҙә ҡаршы алып, ғаиләһе менән бергә ял иткән. Алғы һыҙыҡҡа уларҙы «Өфө-арена» спорт комплексы майҙанынан туғандары,яҡындары оҙатып ҡалды.

Ҡыйғы районы үҙәгендә һыу торбаларын үткәреү дауам итә

Ауылға таҙа һыу. Ҡыйғы районы үҙәгендә һыу торбаларын үткәреү дауам итә. Үрге Ҡыйғы ауылының ҡайһы бер йорттарында быға тиклем һыуҙы шишмәнән ташығандар. Хәҙер халыҡ өсөн заманса уңайлыҡтар булдырылған. Шулай ҙа яңы биҫтәләрҙә эсәр һыу тәьминәте мәсьәләһе көнүҙәк ҡала.

Борай районы фермерҙары ҡышлатыу миҙгеле менән таныштырҙы

Ауыл хужалығында ял көндәре юҡ. Оҙайлы каникул осоронда күпселек кеше байрам иткән ваҡытта малсыларға тынысланаһы түгел. Сөнки фермаларҙағы һыйырҙар көн һайын тәрбиә талап итә. Ауыл эшсәндәре әйтеүенсә, ҡыштың иң ҡыҙыу мәлендә төп бурыс - алынған тоҡомдоң һаҡланыуын тәьмин итеү, малдың кәмеүенә юл ҡуймау.

Өфөнөң Дим биҫтәһендә Раштыуа байрамы уңайынан саңғы ярышы үтте

Баш ҡалала йәшәүсе йөҙгә яҡын саңғысы дүрт йәш категорияһында көс һынашты. Быйыл унынсы тапҡыр ойошторолған спорт сараһынан репортаж.

Бөрйән районында Филүс Нурғәлин иҫтәлегенә хоккей турниры үтте

Бөрйән районында «Ҡаһарманлыҡ ордены» кавалеры, Кавказдағы локаль бәрелештәрҙә батырҙарса һәләк булған Филүс Нурғәлин иҫтәлегенә хоккей турниры үтте. Сара сиктәрендә Филүс Мөбәрәк улының тыуған мәктәбе стенаһына ҡуйылған таҡтаташ та яңыртылды.

Һаулыҡ һаҡлау министрлығы "Ауыл табибы" программаһы һөҙөмтәләрен иғлан итте

2023 йылда 83 табипҡа миллион ярым һум тапшырылған, 62 белгес миллион һум алған. Шулай уҡ 49 фельдшер, акушер һәм шәфҡәт туташына 750 мең һум, 19 хеҙмәткәргә 500 мең һум түләнгән. Бынан тыш, "Ауыл фельдшеры" программаһы буйынса 33 фельдшерға ярты миллион һумлыҡ түләүҙәр булған. Был программалар "Һаулыҡ һаҡлау" милли проекты буйынса ғәмәлгә ашырыла.

Яңы йыл каникулында Мәскәүҙә Башҡортостан стендын 350 меңдән ашыу кеше ҡараған

28 декабрҙән 8 ғинуарға тиклем "Рәсәй" халыҡ-ара күргәҙмәһендә беҙҙең республикаһының туристик мөмкинлектәре күрһәтелде. - Беҙҙең маҡсат - ҡунаҡтар өсөн уңайлы шарттар тыуҙырыу, уларҙы ҡыҙыҡтырыу, - тип хәбәр итәләр Эшҡыуарлыҡ һәм туризм министрлығынан. "Рәсәй" күргәҙмәһе - ил ҡаҙаныштарын туплаған майҙансыҡ. Бында 89 төбәктең экспозициялары урынлаштырылған.

2024 йылда Башҡортостан халҡы 118 көн ял итәсәк

Киләһе оҙайлы ял февралдә көтөлә. Ватанды һаҡлаусылар көнө уңайынан өс көн ял ҡаралған. Ҡатын-ҡыҙҙар көнөндә, 8 марттан 10-ына тиклем ял була. Артабан, 10 апрелгә Ураҙа байрамы тура килә. Май байрамдарында ике тапҡыр 4-әр көнлөк ялдар билдәләнә. Йәй айҙарында Рәсәй көнө, Ҡорбан байрамында өҫтәмә ялдар була. Яңы йыл каникулы 29 декабрҙә башлана.

Өфөлә сүп контейнерҙары янында машина ҡалдырыусыларға штраф һалына

Ҡайһы берәүҙәр иҫкәртеүҙәргә иғтибар итмәй. Һөҙөмтәлә, сүп ташыусы машиналар контейнерға яҡын килә алмай. Бер тәүлектә генә 40-тан ашыу ошондай осраҡ теркәлгән. Контейнер майҙансығында машина ҡалдырған өсөн штраф суммаһы 2 мең һумдан башлана.

Өфөлә ауылдар үҫешенә иғтибар арта

Был турала Федоровка, Карпов, Самохвалов, Йылҡыбай ауылдары халҡы менән осрашыуҙа ҡала хакимиәте башлығы Ратмир Мәүлиев белдерҙе. Быйыл Карпов-Шаҡша юлын ремонтлау көтөлә. Шулай уҡ 2 мең 200 урынлыҡ мәктәп проектын әҙерләү тамамлана.

Владимир Путин өсөн ҡултамғалар йыйыла

Башҡортостанда президент вазифаһына кандидат Владимир Путин өсөн ҡултамғаларҙың тәүге партияһы Үҙәк һайлау комиссияһына тапшырылды. Был эш 23 декабрҙә башланды, байрамда ла алып барылды, алдағы көндәрҙә дауам итә. Ҡултамғалар өсөн пункттар сауҙа комплекстарында, күп функциялы үҙәктәрҙә урынлаштырылған. Владимир Путин һайлауҙа үҙен-үҙе күрһәтеүсе булараҡ ҡатнаша. Уға халыҡ ҡултамғалары кәрәк. Президент быйыл мартта һайлана.

Башҡортостанда бер тәүлектә ике кеше янып үлгән

Бөгөн төндә Бишбүләк районы Олховка ауылында ағас йорт янған. Утта 1960 йылғы ир һәләк булған. Ғәҙәттән тыш хәлдәр министрлығынан хәбәр итеүҙәренсә, әле янғын сәбәптәре тикшерелә. Бөгөн Белорет ҡалаһында ла янғын булған. 1969 йылғы ҡатындың тәне ныҡ бешкән. Ул дауаханала, реанимацияла үлгән.

Башҡортостан халҡы инвалид балаларға яңы йыл бүләктәре бирә ала

“Ҡаршылыҡтарҙы емереп” хәйриә фонды “Шыршы аҫтында бүләктәр” тигән акция иғлан итте. Һәр кем сайтҡа инеп мөмкинлектәре сикләнгән балалар өсөн аҡса күсереп супергерой була ала. Аҙаҡ был суммаға 30 балаға кәрәкле әйберҙәр һатып алына. Акция 19 ғинуарға тиклем дауам итә. 2024 йыл республикала Һаулыҡ мөмкинлектәре сикләнгән кешеләр тураһында хәстәрлек йылы тип иғлан ителде.

Башҡортостанда 50 ауылға мобиль интернет килә

Федераль проект 37 районда тормошҡа ашырыла. Быйыл бәләкәй һәм төпкөл ауылдарҙа интернет-станциялар урынлаштарыла. Исемлектә Миәкә районында Тауҡай-Ғәйнә ауылы, Архангел районы Әйтмәмбәт, Ҡыйғы районы Туғыҙлы ауылы бар. Халыҡ 4G мобиль интернет мөмкинлектәре менән файҙалана аласаҡ. Былтыр 125 ауыл бөтә донъя селтәренә тоташтырылды.

Яңы йылдың тәүге оператив кәңәшмәһе эшлекле маҡсаттарҙан башланды

Яңы поликлиникаларҙы ваҡытында файҙаланыуға тапшырырға, Өфөлә автобустар маршрутын арттырырға. Яңы йылдың тәүге оператив кәңәшмәһе эшлекле маҡсаттарҙан башланды. Башҡортостан башлығы Радий Хәбиров торлаҡ-коммуналь хужалыҡ һорауҙарҙы иғтибарға алып, байрам осоронда башҡарылған эшкә йомғаҡ яһаны.

Күләмле реконструкциянан һуң Белореттағы 8-се мәктәп уҡыусыларҙы ҡабул итте

Оператив кәңәшмә барышында Радий Хәбиров белем усағы эшмәкәрлегенә старт биреп, ҡотлау һүҙҙәрен еткерҙе. Иҫегеҙгә төшөрәбеҙ, 2018 йылдың декабрендә төбәк етәксеһе эш сәфәре барышында авария хәлендәге бинаны төҙөкләндерергә ҡушҡайны, объектта эш өс йылдан һуң башланып ниһайәт, тамамланды. Проект буйынса, төп корпусҡа төкәтмә төкәтелгән, был уҡыусылар һанын яҡынса ике тапҡырға арттырырға булышлыҡ иткән.

Башҡортостанда контракт буйынса хеҙмәткә алыу дауам итә

Махсус пункттарға 65 йәшкә тиклем ирҙәр һәм 45 йәшкә тиклем ҡатын-ҡыҙҙар мөрәжәғәт итә ала. Гүзәл заттар махсус хәрби операция биләмәһендә медицина белгесе, элемтәсе йәки ашнаҡсы булараҡ ярҙам күрһәтә. Хәрби көстәр төрөнә йүнәлткән саҡта, контракт төҙөүсенең теләге иҫәпкә алына. Төбәктә йыйылған исемле хәрби берәмектәргә эләгеү мөмкинлеге лә бар. Контракт төҙөүселәр һәм уларҙың ғаиләләре өсөн социаль льготалар ҡаралған.

Ағиҙел ҡалаһында МХО-ла ҡатнашыусыларҙың ғаилә ағзаларына һүрәт төшөрөү буйынса оҫталыҡ дәресе үтте

Ағиҙел ҡалаһында махсус хәрби операция ҡатнашыусыларының ғаилә ағзаларына һүрәт төшөрөү буйынса оҫталыҡ дәресе үтте. Яугирҙарҙың тормош иптәштәре, әсә-өләсәләре картина аша хәүефле кисерештәр менән көрәшергә, көсөргәнешлекте кәметергә өйрәнде. Сара ҡаланың «Катюша» клубы башланғысында тормошҡа ашырылды.