Бөрө медицина-фармацевтика колледжы «Профессионалитет» федераль проекты сиктәрендә грант еңгән

Субсидия аҡсаһына белем биреү учреждениеһы корпусы танымаҫлыҡ булып үҙгәртелгән. Ремонттан башҡа, колледж иң алдынғы медицина кәрәк-яраҡтары, күнекмәләр өсөн манекендар менән йыһазландырылған. Бындай лабораториялар республикала ғына түгел, хатта илдә лә юҡ.

Бөтә донъя башҡорттары ҡоролтайы тарафынан 2024 йыл Йәштәр йылы тип иғлан ителде

Был турала бөгөн ойошманың Президиум рәйесе Эльвира Айытҡолова Фән һәм мәғрифәт йылын йомғаҡлау сараһында билдәләп үтте. Сара сиктәрендә мәҙәниәт, гуманитар фәндәр һәм мәғариф өлкәһендә Сосланбәк Тавасиев исемендәге йәмәғәт наградаһына лайыҡ булған тәүге лауреаттар тәбрикләнде.

Башҡортостанда милли проект буйынса 7 күпер ремонтланған

Транспорт һәм юл хужалығы министрлығынан белдереүҙәренсә, Бәләбәй, Ғафури, Иглин, Белорет, Ҡырмыҫҡалы, Ҡариҙел һәм Күгәрсен райондарында гидротехник ҡоролмалар тәртипкә килтерелгән. Бының өсөн 241 миллион һум тотонолған. Киләһе йылда “Хәүефһеҙ сифатлы юлдар” милли проекты буйынса 10 күпер төҙөкләндерелә.

Башҡортостанда иң яҡшы күп фатирлы йорттар, ихаталар һәм подъездар асыҡланды

Торлаҡ-коммуналь хужалыҡ министрлығында конкурс һөҙөмтәләре менән таныштырҙылар. Быйыл 217 заявка ҡабул ителгән. Иң яҡшы күп фатирлы йорт һәм ихата номинацияһында еңгәндәргә 750 мең һум тапшырыла, иң яҡшы подъезд хужалары 375 мең һум премия менән бүләкләнә. Аҡса йорт һәм биләмәне артабан тәртипкә килтереү өсөн тотонолорға тейеш.

600 меңгә яҡын кеше коммуналь хеҙмәттәргә түләү буйынса субсидия алған

Башҡортостан статистика хеҙмәтенән белдереүҙәренсә, 70 меңдән ашыу ғаилә социаль ярҙам юллаған. Бының өсөн бюджеттан 1,2 миллиард һум бүленгән. Һәр ғаиләгә яҡынса 1 мең 870 һум субсидия тура килә. Мохтаждарға торлаҡ һәм коммуналь хеҙмәттәргә түләү өсөн аҡсалата субсидия йәки социаль ярҙам тапшырыла.

Өфөгә тиҙҙән Ҡыш Бабай килеп етә

Яңы тылсымсыһы поезын баш ҡала тимер юл станцияһында 19 декабрҙә көтәләр. Майҙансыҡта балалар өсөн күңелле тамаша ойошторола. Ҡыш Бабай һәм Ҡарһылыу халыҡты Яңы йыл менән ҡотлап сығыш яһай. Вокзалға килгәндәр тылсымлы әкиәти поез буйлап кискә тиклем экскурсияла йөрөй ала. Ҡыш Бабай 5 декабрҙә Бөйөк Устюгтан юлға сыҡты.

Башҡортостанда ике боҙ күпере асылды

Ғәҙәттән тыш хәлдәр буйынса дәүләт комитетынан хәбәр итеүҙәренсә, Ҡариҙел ауылы янында Өфө йылғаһы аша боҙҙан сығыу мөмкинлеге бар. Шулай уҡ Краснокама районы Иҫке Йәнйегет ауылы янында Ағиҙел аша боҙ юлы булдырылды. Был урындарҙан еңел машиналар ғына үтә ала. Тиҙҙән Бөрө ҡалаһында ла боҙ күперен асыу көтөлә. Краснокама районында Кама йылғаһы аша ла боҙҙан үтеп була ине, быйылдан хәрәкәт туҡтатылды.

Башҡортостанда алты ғаилә янғын арҡаһында өйһөҙ ҡалған

Бөгөн төндә Иглин районы Таутөмән ауылында 6 фатирлы йорт янып киткән. Ғәҙәттән тыш хәлдәр министрлығынан хәбәр итеүҙәренсә, ут сығыуын фатирҙың береһендә балалар күреп ҡалған, улар өлкәндәрҙе уятҡан, күршеләргә хәбәр иткәндәр, хәүефһеҙ урынға сыҡҡандар. Янғын һүндерелгән. Әле был йортта йәшәүселәрҙе урынлаштырыу мәсьәләһе хәл ителә.

Башҡортостанда 585,5 миллиард һумлыҡ инвестиция йәлеп ителгән

Быйыл был күрһәткес 107 процентҡа еткән. Республика Хөкүмәтенән белдереүҙәренсә, сәнәғәт, ауыл хужалығы, туризм һәм юл яны сервисы өлкәһендә проекттар әүҙем тормошҡа ашырыла. Импортҡа алмаш мәсьәләләре лә уңышлы хәл ителә. Әле дөйөм исемлектә 1,2 триллион һумға баһаланған 2 меңдән ашыу инвестиция проекты күрһәтелгән.

Ҡырмыҫҡалыла яңы фельдшер-акушер пункты асылды

Райондың Ҡолош ауылындағы модулле медицина учреждениеһы “Һаулыҡ һаҡлау” милли проекты буйынса төҙөлгән. Ул заманса талаптарға яуап бирә. Беренсел ярҙам күрһәтеү өсөн тейешле ҡорамалдар һатып алынған. Пункт 300-ҙән ашыу кешене хеҙмәтләндерә.

Был бит «Аптыраған»!

Яңы йыл төнөндә БСТ каналы менән бергә булығыҙ!

Өфөнөң Октябрь районы хакимиәте яугирҙарға мотоцикл әҙерләгән

Махсус хәрби операция ҡатнашыусыларға ярҙамға мотоцикл. Өфөнөң Октябрь районы хакимиәте яугирҙарға сираттағы гуманитар ылау әҙерләй. Был юлы яҡташтарыбыҙ мөрәжәғәте буйынса тупланған кәрәк-яраҡтар менән бергә, мотоцикл да оҙатыла. Ике тәгәрмәсле техниканы автотранспорт менән сауҙа иткән үҙәктәрҙең береһе әҙерләгән. «Кузбасс» ҡушаматлы яугир уны махсус хәрби операция биләмәһенә кәрәкле техника булараҡ һораған.

Өфөлә «Йәштәр сәйәсәте лигаһы» йәмәғәт ойошмаһы ун йыллыҡ юбилейын билдәләне

Социаль башланғыстарҙы тормошҡа ашырыу, йәштәрҙең һөнәри һәләттәрен асыу, ирекмәндәрҙе тәрбиәләүҙе маҡсат итеп ҡуйған ойошма юбилейында 400-ләп активист ҡатнашты. Малай-ҡыҙҙарҙы өсөнсөгә ҡыҙы тыуыуға бәйле махсус хәрби биләмәнән ҡыҫҡа ваҡытлы ялға ҡайтҡан Башҡортостан хөкүмәте премьер-министрының беренсе урынбаҫары Азат Бадранов, «Бәхет биләмәһе» хәйриә фондының попечителдәр советы рәйесе Каринэ Хәбирова тәбрикләне. Тулыраҡ мәғлүмәт киләһе яҙмала.

Балтас районында яңы юл асылды

Күҙәй ауылын район үҙәге менән тоташтырған объект урындағы халыҡ һорауы буйынса төҙөлгән. Ауылда йәшәүселәрҙең тура бәйләнеш аша Башҡортостан башлығына биргән һорауы властар тарафынан иғтибарһыҙ ҡалмаған. Асфальт юл «Башҡортостанда ауыл биләмәләрен комплекслы үҫтереү» дәүләт программаһы буйынса һалынған.

Ауырғазы районында һыу аҫты тереклегенә ярҙам итеү буйынса экологик акция уҙҙы

Мәке уй ҙа, балыҡты ҡотҡар. Ауырғазы районында һыу аҫты тереклегенә ярҙам итеү буйынса экологик акция уҙҙы. Йылдағыса ирекмәндәр боҙға сығып, мәкеләр уя һәм балыҡтарҙың тонсоғоуына юл ҡуймай. Мәкеләр ҙә ябай түгел, ә махсус технология буйынса эшләнә.

Стәрлетамаҡта Гөлфиә Юнысованың «Урман оркестры» шиғырҙар циклы яңыса яңғыраны

Тәүге тапҡыр филармония сәхнәһендә. Балалар өсөн яҙылған шиғырҙар оркестр оҙатыуында. Стәрлетамаҡта Гөлфиә Юнысованың «Урман оркестры» шиғырҙар циклы яңыса яңғыраны. Тулыраҡ киләһе яҙмала.

Балалар өсөн байрам тамашалары әҙерләнә

Башҡортостан мәҙәниәт учреждениелары махсус хәрби операцияла ҡатнашыусыларҙың балаларына яңы йыл кәйефе бүләк итә. Байрам программаһы бөтә район һәм ҡалаларҙа әҙерләнгән. Өфөлә яңыртылған ҡурсаҡ театры ишектәрен 23 декабрҙә аса. - Махсус хәрби операцияла ҡатнашыусылар һәм уларҙың ғаиләләренә ярҙам сараларына ярашлы, балалар һәм ғаилә ағзалары яңы йыл байрамында ғына түгел, йыл әйләнәһенә тамашаларҙы бушлай ҡарай ала, тип белдерҙе Мәҙәниәт министры Әминә Шафиҡова. Байрам саралары 18 декабрҙә башлана һәм 14 ғинуарға тиклем дауам итә.

Владимир Путин һайлауҙа үҙен-үҙе күрһәтеүсе булараҡ ҡатнаша

Һайлаусылар төркөмө Рәсәй президентын һайлауҙа ҡатнашыуға Владимир Путиндың кандидатураһын хупланы. Был турала Халыҡ фронты башҡарма комитеты етәксеһе Михаил Кузнецов белдерҙе. Һайлаусылар йыйыны Мәскәүҙә үтте. Законға ярашлы, кандидатты кәмендә 500 һайлаусы хупларға тейеш. Владимир Путин өсөн меңгә яҡын кеше килде. Протокол Үҙәк һайлау комиссияһына тапшырыла. Ошонан һуң кандидат өсөн ҡултамғалар йыйыу башлана. Владимир Путин киләһе йылда ил Президентын һайлауҙа ҡатнашасағы тураһында белдерҙе. Тауыш биреү 15, 16 һәм 17 мартта ойошторола.

Баймаҡта яңы балалар поликлиникаһы тиҙҙән ишектәрен аса

Тәүге пациенттарҙы быйыл ҡабул итеү көтөлә. Учреждение 2021 йылда төҙөлә башлаған. Эштәр "Һаулыҡ һаҡлау" милли проекты буйынса алып барылған. Бина өс ҡатлы, поликлиника заманса ҡорамалдар менән йыһазландырылған. Учреждение 15 мең баланы хеҙмәтләндерәсәк.

Республикала торлаҡ төҙөлөшө йылдам бара

Башҡортостанда быйыл 2 миллион 790 мең квадрат метр торлаҡ файҙаланыуға тапшырылған. Был турала Республика Хөкүмәтенән хәбәр итәләр. Күрһәткестәр уҙған йылдың ғинуар-ноябрь айҙарында булғандан 4 процентҡа яҡшыраҡ. -Йыл һөҙөмтәләре буйынса 3 миллион квадрат метрҙан күберәк торлаҡ файҙаланыуға тапшырылырға тейеш, - тине премьер-министр Андрей Назаров.

Башҡортостанда Яңы йыл каникулында янғынға ҡаршы махсус тәртип индерелә

Ғәҙәттән тыш хәлдәр буйынса дәүләт комитетынан хәбәр итеүҙәренсә, ҡышын янып үлеүселәр һаны арта. Тәмәке тартыу, төҙөк булмаған мейес һәм электр приборҙарын файҙаланыу арҡаһында йыш ҡына ут сыға. Ошоно ла иҫәпкә алып 30 декабрҙән 8 ғинуарға тиклем республикала янғынға ҡаршы махсус тәртип индереү тураһында ҡарар ҡабул ителде. Бөтә район һәм ҡалаларҙа хәүефһеҙлек саралары көсәйтелә.