Башҡортостанда капиталь ремонт өсөн түләү арта

Был турала Торлаҡ-коммуналь хужалыҡ министры Ирина Голованова белдерҙе. - Хөкүмәт менән һөйләшеүҙәр алып алып барыла, иғәнә арттырыу тураһында ҡарар проекты әҙерләнә. Әле сумма аныҡлана, - тине ул. Тариф күтәрелеүен төҙөлөш материадары ҡиммәтләнеүе менән аңлаталар. Башҡортостанда быға тиклем капиталь ремонт өсөн түләүҙе 2022 йылда арттырҙылар.

Башҡортостанда эт-бесәй тотҡан граждандар өсөн ҡаралған закон камиллаштырылды

Уға ярашлы эт хужалары өсөн өҫтәмә яуаплылыҡ һәм хайуандарҙы тотоу буйынса яңы талаптар индерелде. Үҙгәрештәр ҙур эттәрҙе саф һауала йөрөткәндә мотлаҡ морондоҡ кейҙереүгә ҡағыла. Бынан тыш, фатирҙа эт-бесәйҙәрҙе күпләп аҫраусылар өсөн талаптар арттырылды.

Архангел районының Максим Горький ауылы уҡыусылары яугирҙар өсөн ампула һауыттары етештерә

Футлярҙы улар 3 д принтерҙа эшләй. Пластмасс һауыттар ампуланы хәрби бәрелештәр ваҡытында ярылыуҙан һаҡлай.
Ковид ваҡытында вирустан һаҡланыу маскалары, махсус хәрби операция башланғас ампула һауыттары. Ябай ғына әйберҙәр, ләкин улар ике осраҡта ла кеше ғүмерҙәрен һаҡлай.

Өфөнөң канат юлында ҡотҡарыусылар күнекмәһе үтте

Сценарий буйынса, ҡотҡарыусылар 18 кеше менән һауала туҡтап ҡалған күтәргесте ергә төшөрөргә тейеш ине. Мәсьәләне хәл итеү өсөн ҡотҡарыусылар бейектә эшләгән 4 төркөмгә бүленде. Тағы ла бер төркөм зыян күреүселәрҙе ҡаргиҙәрҙәр менән йылыныу бинаһына эвакуацияланы.

Ҡырмыҫҡалы районында республикалағы иң ҙур элеватор төҙөләсәк

«Инвестиция сәғәте» форматында үткән йылдың тәүге кәңәшмәһендә Радий Хәбиров башланғысты хуплап өҫтөнлөклө проекттар исемлегенә индерҙе. Элеватор менән бер рәттән селекция- орлоҡсолоҡ үҙәге лә сафҡа инәсәк.

Өфөлә Яҙыусылар союзы бинаһында капиталь ремонт аҙағына яҡынлаша

Баш ҡала үҙәгендә урынлашҡан ике ҡатлы йорт Поликарпов йорто булараҡ билдәле һәм Мәҙәни мираҫ объекты һанала. Һуңғы тапҡыр ул 6 йыл элек ремонтланған. Тик боронғо объект даими рәүештә яңыртыуҙы талап итә. Ремонт барышы менән Башҡортостан башлығы ла танышты.

Хеҙмәт ҡаһарманлығы ҡалаһы стелаһы халыҡ менән кәңәшләшеп ҡуйыласаҡ

Хеҙмәт ҡаһарманлығы ҡалаһы стелаһы Ишембайҙың иң яҡшы урындарының береһендә халыҡ менән кәңәшләшеп ҡуйыласаҡ. Был турала Башҡортостан башлығы Радий Хәбиров социаль селтәрҙәге сәхифәһендә хәбәр итеп, ҡалаға юғары статус бирелеүе - Бөйөк Еңеүҙең 80 йыллығын байрам итеү йылында символик мәғәнәгә эйә булыуын билдәләне. Иҫегеҙгә төшөрәбеҙ, ил президенты Указы менән Ишембайҙан тыш, тағы ла алты ҡала Хеҙмәт ҡаһарманлығы ҡалаһы исеменә лайыҡ булды.

Төбәктә МХО-ла ҡатнашыусылар һәм уларҙың яҡындары белем алыу өсөн сертификат алыу хоҡуғына эйә

Башҡортостанда махсус хәрби операцияла ҡатнашыусылар һәм уларҙың ғаилә ағзалары белем алыу йәки квалификацияны күтәреү өсөн сертификат алыу хоҡуғына эйә. Уның күләме 50 мең һум. Былтыр был мөмкинлекте 200 тирәһе кеше файҙаланған. Сертификатты көндөҙгө, киске, ситтән тороп уҡыуға, төркөмдә йәки шәхси белем алыу өсөн файҙаланырға була.

Башҡортостанда эт-бесәй тотҡан граждандар өсөн ҡаралған закон камиллаштырылды

Уға ярашлы эт хужалары өсөн өҫтәмә яуаплылыҡ һәм хайуандарҙы тотоу буйынса яңы талаптар индерелде. Дәүләт Йыйылышы-Ҡоролтайҙа үткән ултырышта йорт эсендә йәки ихатала хайуандар өсөн приют ойоштороусыларға эшмәкәрлеген көйләү һорауҙары тикшерелде. Яңы ҡағиҙәләрҙе үтәмәгән хужаларға штрафтар ҡаралған.

Башҡортостан телевидениеһы ветераны Марсэн Мөхәмәҙиев арабыҙҙан китте

Республиканың телевидение тармағы ауыр юғалтыу кисерҙе. 75 йәшендә Башҡортостан телевидениеһы ветераны, Рәсәй Кинематографистар союзы ағзаһы Марсэн Мөхәмәҙиев арабыҙҙан китте.

Республикала ҡырағай хайуандарҙы иҫәпләйҙәр

Тәбиғәттән файҙаланыу һәм экология министрлығынан хәбәр итеүҙәренсә, бының өсөн улар йөрөгән һуҡмаҡтар өйрәнелә, эҙҙәр теркәлә. Алынған мәғлүмәттәр һунар лимиттарын билдәләгәндә ҡулланыла. Башҡортостанда һуңғы ун йылда мышы, себер ҡоралайы, һеләүһен, бурһыҡ, ҡуян, һыуһар, ҡондоҙ популяцияһы артыуы теркәлгән. Ҡабан сусҡалары кәмегән. Айыу, бүре, тейен, төлкө һаны әллә ни үҙгәрмәгән.

Президент Владимир Путин Ватанды һаҡлаусы йылы тураһында указға ҡул ҡуйҙы

Документ рәсми мәғлүмәттәр порталында урынлаштырылған. - Тарихты һаҡлау, Бөйөк Еңеүҙең 80 йыллығын билдәләләү, ветерандарға рәхмәт белдереү, махсус хәрби операцияла ҡатнашыусыларҙың ҡаһарманлығын күрһәтеү өсөн 2025 йыл Ватанды һаҡлаусы йылы тип иғлан ителә. Сараларҙы ойоштороу комитеты рәйесе итеп Президент хакимиәте етәксеһе Антон Вайно тәғәйенләнде. Башҡортостанда 2025 йыл Махсус хәрби операцияла ҡатнашыусылар һәм уларҙың ғаиләләренә ярҙам йылы тип иғлан ителде.

Мәктәп уҡыусыларының яҙғы каникулы 9 көн була

Уҡыу календарына ярашлы, ял 29 мартта башлана һәм 6 апрелгә тиклем дауам итә. Уҡыусылар өсөн иң оҙон өсөнсө сирек башланды. Иң ҡыҫҡа сирек йәй алдынан буласаҡ.

Башҡортостан шәкәр заводтары уҙған йыл уңышын эшкәртеп өлгөрә алмай

Вице-премьер-Ауыл хужалығы министры Илшат Фәзрахманов белдереүенсә, рекорд уңыш булған, 2 миллион 600 мең тонна йыйылған. Бөгөнгә уның яртыһы ғына эшкәтелгән. Көндәр йылыта башлауға ике ай ҡалды, сөгөлдөрҙөң бер өлөшө эшкәртелмәйәсәк. Бындай уңыш булғаны юҡ ине. Норма 1 миллион 700 мең тонна. Был да республика ихтыяжынан 6-7 тапҡырға күберәк, - тине ул. Быйыл шәкәр сөгөлдөрө майҙаны 10 мең гектарға кәметелә.

Башҡортостан сит илдәргә 426 мең тонна иген һатҡан

Ауыл хужалығын күҙәтеү хеҙмәте 2024 йыл һөҙөмтәләре буйынса шундай һан иғлан итте. Тауар 20 илгә оҙатылған. Башҡортостан игенен Әзербайжан, Беларусь, Бельгия, Германия, Иран, Ҡаҙағстан, Ҡырғыҙстан, Ҡытай күпләп алған. Башҡортостанда "Халыҡ-ара кооперация һәм экспорт" тигән милли проект ғәмәлгә ашырыла. Уға ярашлы, экспортты арттырыу маҡсаты ҡуйыла.

Урындағы башланғыстар программаһы Миәкәлә 117 мәсьәләне хәл итте

Урындағы башланғыстарҙы яҡлау программаһы ярҙамында һуңғы йылдарҙа Миәкә районында йәмғеһе 117 мәсьәлә хәл ителгән. Быйыл да төбәк ауылдары республика проектына ҡушылырға теләк белдергән. Улар ауыл мәҙәниәт йортон төҙөкләндереү, һыу селтәрҙәрен яңыртыу кеүек һәм башҡа бурыстар ҡуйған.

Аҡъяр ауылында традицион йәйәнән уҡ атыу буйынса район-ара турнир үтте

Махсус хәрби операция геройҙарына арналған ярышта ир-егеттәр һәм ҡатын-ҡыҙҙар араһында көслөләр асыҡланды. Уҡ атып мәргәнлектә һынашыу - башҡорт халҡында борондан ҡалған йола. Һуңғы йылдарҙа спорттың был төрө республика төбәктәрендә киң танылыу алды. Хәйбулла районында ойошторолған бәйгелә хужаларҙан тыш, тағы ла тиҫтәгә яҡын төбәктән 50-нән ашыу кеше ҡатнашты.

Белорет юлының бер өлөшөндә мобиль элемтә булдырылды

Архангел һәм Ҡолмас ауылдары араһында 6 станция урынлаштырылды. Һанлы үҫеш министрлығынан хәбәр итеүҙәренсә, был эштәр милли проект буйынса башҡарылған. Элек бында элемтә булманы. Хәҙер Терекле, Ҡурғаш, Күлтабан, Ҡолмас, Уҫаҡлы ауылдары халҡы мобиль телефон ҡуллана ала. Киләсәктә Инйәр-Белорет араһында 5 элемтә станцияһы урынлаштырыу планлаштырыла.

Радий Хәбиров эш сәфәре менән Баҡалы районында булды

Башҡортостан башлығы Радий Хәбиров эш сәфәре менән Баҡалы районында булды. Көн тәртибендә республика етәксеһе йомортҡа етештереүҙә махсуслашҡан ҡошсолоҡ фабрикаһы эшмәкәрлеге менән танышты. Район үҙәгендәге хужалыҡта тауыҡтар тәүлегенә 90 мең йомортҡа һала. Инвестиция проекты буйынса фермала һуңғы ике йылда производство йыһаздары яңыртылған, комплекс майҙаны киңәйтелгән. Бынан тыш, эш сәфәре барышында Радий Хәбиров Ахман ауылында капиталь ремонтан һуң асылған мәҙәниәт йорто, фельдшер-акушерлыҡ пункты һәм Баҡалы ауылындағы «Хәрби дан» паркында булды, халыҡ менән аралашты.

Башҡортостанда яугирҙарға һәм уларҙың ғаиләләренә ярҙам саралары киңәйтелә

Махсус хәрби операцияла улдарын юғалтҡан әсәләрҙе берләштереү, йәрәхәтләнгән яугирҙарға психологик ярҙам күрһәтеү өсөн белгестәр әҙерләү, адаптив спорт үҙәктәре ойоштороу. Был Махсус хәрби операцияла ҡатнашыусылар һәм уларҙың ғаилә ағзаларына ярҙам күрһәтеү йылын үткәреү буйынса Ойоштороу комитетының тәүге ултырышында тәҡдим ителгән башланғыстарҙың бер нисәүһе. Эшлекле һөйләшеүҙә Башҡортостан башлығы, Хөкүмәт ағзалары һәм йәмәғәт ойошмалары вәкилдәре ҡатнашты.

Бәләбәй районынан сираттағы ылау Махсус хәрби операция биләмәһенә барып етте

Тыуған яҡтың ҡайнар сәләме. Бәләбәй районынан сираттағы ылау Махсус хәрби операция биләмәһенә барып етте. Гуманитар миссияны Бәләбәй ҡалаһы хакимиәте башлығы Сергей Караберов етәкләне.