💬 #Маълумотимуфид

Кай ва киро метавонанд аз шаҳрвандии Русия маҳрум кунанд?

Ба қонун “Дар бораи шаҳрвандии Русия” тағйирот ворид шуда, мутобиқи он номгӯи ҷиноятҳое, ки содир шудани онҳо ба қатъи шаҳрвандии Русия боис мегардад, зиёд шуд.

Дар ҳамин ҳол, танҳо онҳое аз шаҳрвандӣ маҳрум мешаванд, ки онро на аз рӯи ҳуқуқи таваллуд, балки дар натиҷаи қабул ба шаҳрвандӣ гирифтаанд. Аксарияти кулли шаҳрвандони Тоҷикистон, ки душаҳрвандӣ доранд, ба ин гурӯҳ дохил мешаванд.

Инак рӯйхати кӯтоҳи ҷиноятҳое ки барои он метавонанд шуморо аз шаҳрвандии Русия маҳрум кунанд:

– Барангехтани кина ё адоват
– ташкили бетартибиҳои оммавӣ;
– хиёнат ба ватан (Федератсияи Русия)
– даъвати оммавӣ ба вайрон кардани тамомияти арзӣ;
– бо зӯроварӣ забт кардани ҳокимият;
– даъватҳои оммавӣ ба ифротгароӣ (экстремизм);
– ҷиноятҳои вобаста ба терроризм, иштирок дар созмонҳои террористӣ;
– бадному беобрӯкунии Қувваҳои мусаллаҳи Русия;
– содир намудани амалҳои хатаровар ба амнияти миллӣ;
– ошӯби мусаллаҳона;
– суиқасд ба ҳаёти ходими давлатӣ ё ҷамъиятӣ;
– иштирок дар ташкилоти ғайридавлатии хориҷӣ ё байналмилали номатлуб.

Ба қонуншиканӣ роҳ надиҳед ва худро эҳтиёт кунед. Шакли пурраи ин мақола ва хабарҳои дигарро дар телеграм-канали мо @asiaplustj мутолиа кунед.

🔴Келини Нурсултон Назарбоев ба 7 соли зиндон маҳкум шуд

Додгоҳе дар шаҳри Остона Гулмира Сатибалдӣ, ҳамсари пешини Кайрат Сатибалдӣ, хоҳарзодаи Нурсултон Назарбоев, президенти пешини Қазоқистонро бо гуноҳи “ғасби тиҷорат” ва “одамрабоӣ” ба 7 соли зиндон маҳкум намуд. Дар ин бора пойгоҳи иттилоотии “Фергана” иттилоъ медиҳад.

Гулмира Сатибалдӣ инчунин вазифадор шуд, ки ба ҷабрдида, соҳибкор Турсен Алагузова беш аз 15 миллион доллар ҷуброни зарар пардозад.

Тибқи иттилои нашргардида, Гулмира Сатибалдӣ ба он айбдор шуд, ки гӯиё Алагузоваро маҷбур кардааст, ки аз 43 дарсади саҳмияҳои ширкати худ – “Galanz bottlers” даст кашад. Муфаттишон гуфтаанд, Сатибалдӣ ба Алагузова фишори равонӣ ва моддӣ овардааст.

Сатибалдӣ низ ба он айбдор дониста шуда, ки Ойгул Мекешеваро рабуда, маҷбур сохтааст, ки аз ширкати “Maxi Bottlers” даст кашида, онро ба номи ӯ гузаронад.

Ҳамроҳи Сатибалдӣ ду зердасташ Мади Батиршаев ва Рашид Утебеков бо ҷурми одамрабоӣ ва ғасби тиҷорат 7 ва 5 сол зиндонӣ шудаанд. Худи Сатибалдӣ иттиҳом қисман эътироф карда, аммо одамрабоиро рад кардааст ва парвандаи худро “сиёсӣ” номидааст.

@asiaplustj

▪️Дар як ҳамла ба мактаб дар Покистон 7 кас кушта шуданд

Бар асари тирпаронӣ дар минтақаи шимолу ғарби Покистон дастикам 7 кас кушта шуданд: аввал 1 омӯзгорро паронида, баъди чанде дар мактаб тирпаронӣ шуд, ки дар натиҷа 6 нафар ҳалок шуданд. Ҳарду ҳодиса рӯзи 4 май дар шаҳри Порачинор (Ҳавзаи Курам), каме дуртар аз сарҳад бо Афғонистон рух додааст.

Reuters менависад, ки дар натиҷаи тирпаронӣ 4 омӯзгор ва 2 корманди мактаб кушта шудаанд. Муаллими қаблан паронидашуда - мусулмони суннӣ мебошад. Al Jazeera бо истинод ба Globo TV менависад, кушташудагон дар ҳарду ҳодиса шиаҳо мебошанд.

Ба гуфтаи хабарнигори Al Jazeera, ҳамла замоне сурат гирифтааст, ки дар мактаб барои синфҳои ибтидоӣ имтиҳон гузаронида мешуд. Омӯзгори дигар “каме дуртар” аз ин ҷо паронида шудааст.

Намояндаи пулиси маҳаллӣ изҳор дошт, ки ҳоло дар бораи бо кадом мақсад содир шудани ин амал маълумоти дақиқ нест. “Мо тафтишро оғоз кардем, лекин ҳоло сабабҳояшро дақиқ намедонем”.

Мақомоти маҳаллӣ ба Reuters хабар додаанд, возеҳ нест, ки “оё ҳамлаи дуюм ба ҳодисаи аввал рабт дорад ё не”.

Хабаргузорӣ зикр мекунад, ки дар ҳавзаи Курам аксарияти аҳолиро шиаҳо ташкил медиҳанд, ки бисёр вақт аз ҷониби гурӯҳҳои суннӣ аз ҳаракати “Толибон” мавриди ҳамла қарор мегиранд.

@asiaplustj