#8mart #tabrik

Assalomu alaykum.
Muhtarama ayollar, qadrli doʻstlar!

Bugun har birimizning qalbimiz yasharish va yangilanish fasli – bahor koʻrku tarovatidan fayziyob boʻlib turibdi. Mana shunday goʻzal kunlarda mamlakatimizda 8-mart – Xalqaro xotin-qizlar kuni keng nishonlanmoqda.

Bu qutlugʻ ayyomda qarshingizda turib moʻtabar onaxonlarimizni, goʻzal opa-singillarimizni, oqila qizlarimizni qutlashdan bagʻoyat xursandman.

Barchamizga maʼlumki, azaldan koʻhna Sharqda Ayol zotiga hurmat va ehtirom koʻrsatish, ularni eʼzozlash buyuk qadriyat boʻlib kelgan.

Chunki sizlar borsiz, hayotimiz goʻzal, umrimiz mazmunli. Xonadonlarimiz sarishta va nurafshondir.

Ayol nafaqat oila bekasi yoki ona, u jamiyatning ham faol aʼzosi, ishtirokchisidir. Buni bugun ilm-fanda inqilob yasayotgan olima xotin-qizlarimiz, ixtirochilar, hatto uchuvchilar misolida koʻrib, his qilib turibmiz.

Yillar silsilasida toblanib, oʻz ahamiyatini tobora oshirib kelgan anʼana soʻnggi yillarda mamlakatimizda yanada qoʻr oldi.

Muhtaram Prezidentimiz Shavkat Mirziyoyevning qator tashabbuslari bilan ayollarga boʻlgan eʼtibor kuchaydi. Yurtimizdagi har bir yoʻnalish – ishlab chiqarish tarmoqlari deysizmi, tadbirkorlik, ilm-fan, taʼlim-tarbiya, sogʻliqni saqlash, madaniyat, sanʼat deysizmi, qoʻyingki barcha jabhada ayollar samarali mehnat qilib kelmoqda. Bu davlatimiz tomonidan qoʻllab-quvvatlanmoqda.

Prezidentimizning “Iloji boricha, ayollarimizning dardini, tashvishlarini sevinch yoshiga, gʻalaba yoshiga, muvaffaqiyat yoshiga, natija yoshiga aylantirishga hammamiz birgalikda harakat qilamiz. Bitta qiz farzandni oʻqitsangiz – butun oilani oʻqitgan boʻlasiz, deb ota-bobolarimiz bejiz aytmagan”, deya ayollarning qadru qimmatini yuksakka koʻtarishi zamirida ham katta maʼno bor.

Xotin-qizlarning sohada qoʻlga kiritilayotgan muvaffaqiyatlardagi ulushi salmoqlidir.

Masalan, yurtimizda birgina soliq tizimida 2022-yilda 148,4 trillion soʻm soliq tushumlari taʼminlanib, 16 foizga, bojxona qoʻmitasi esa 46 trn soʻm yigʻib, 38,5 foizga oʻsishga erishilgan.

Sugʻurta sohasida esa 2022-yilda 6,2 trillion soʻm miqdorida sugʻurta mukofotlari tushumi taʼminlangan boʻlib, bu bilan 67 foiz oʻsishga erishilgan.

Huddi shunday Pensiya, Gʻaznachilik, Davlat zaxiralari, Kadastr kabi Iqtisodiyot va moliya vazirligining barcha jabhalarida qoʻlga kiritilgan bu koʻrsatkichlarda ayol xodimlarning mehnati va gʻayratini mamnuniyat bilan eʼtirof etish lozim. Ularning bilimi, iqtidori, salohiyati va mehnatkashligi tufayli 2023-yilda marralarimiz baland, natijalarimiz yanada quvonarli boʻladi.

Ayolni eʼzozlash, ayolga ehtirom koʻrsatish xalqimizga xos olijanob qadriyatlardan biri sanaladi. Biz qanday kasb yoki lavozimda faoliyat olib bormaylik, yuragimizdagi jami ezgu niyatlar, samimiy mehr-muhabbat uchun siz – mehribon va munis ayollardan qarzdormiz.

Barchangizni yana bir bor bugungi bahor va nafosat, goʻzallik va latofat bayrami bilan samimiy tabriklayman. Har biringizga uzoq umr, sihat-salomatlik, farovon va yorugʻ hayot tilayman.

Ehtirom ila Sherzod Kudbiyev

Тelegram |Facebook |Youtube| Instagram |Twitter