УСТОЗЛАРГА ЭҲТИРОМ

Шаҳрихон туманида ҳам 1 октябрь - «Ўқитувчи ва мураббийлар куни» умумхалқ байрами кенг нишонланмоқда.

Сана муносабати билан «Эко-парк»да байрам тадбири ташкил этилди. Унга таълим соҳасида узоқ йиллар фидойилик билан меҳнат қилган фахрий устозлар, илғор педагог ва мураббийлар таклиф қилинди.

Тантанада туман ҳокими Ҳ.Дадахонов, Ўзбекистон Республикаси Олий Мажлиси Қонунчилик палатаси депутати О.Отахоновалар мамлакатимизда таълим тизимида амалга оширилаётган ислоҳотлар, ўқитувчи-мураббийлар меҳнатини муносиб рағбатлантириш, уларга зарур шарт-шароитлар яратиш борасида қилинаётган ижобий ишлар хусусида сўз юритиб, иштирокчиларни қутлуғ айём билан муборакбод этдилар. Тадбирда бошқаларга ўрнак кўрсатиб меҳнат қилаётган педагогларга туман ҳокимлигининг фахрий ёрлиқ ҳамда қимматбаҳо совғалари топширилди.

Шодиёнада туман маданият бўлими санъаткорлари томонидан тайёрланган байрам дастури намойиш этилди.

Facebook | Twitter | Instagram | YouTube | Telegram | TikTok

1 октябрь - Ўқитувчи ва мураббийлар куни” арафасида Андижон вилоятида “Бир миллион дастурчи” лойиҳаси доирасида “TOP-100 ўқитувчи”лар тақдирландилар

Ахборот технологиялари ва коммуникацияларини ривожлантириш вазирлиги, Халқ таълими вазирлиги, IT Park ҳамда «Dubai Future Foundation» ҳамкорлигидаги “Бир миллион дастурчи” лойиҳаси доирасида ўқув курсларини муваффақиятли якунлаган умумтаълим мактабларининг 100 нафар энг яхши “Информатика ва ахборот технологиялари” фани ўқитувчилари ҳар йили анъанавий равишда рағбатлантирилиб, базавий ҳисоблаш миқдорининг 20 баравари миқдорида бир марталик мукофот пули билан тақдирланиб келинмоқда.

Жорий йилда IT таълим ва лойиҳани ривожлантиришга қўшган ҳиссаси учун республика миқёсида умумтаълим мактабларининг 100 нафар энг яхши “Информатика ва ахборот технологиялари” фани ўқитувчилари орасидан Андижон вилоятидан 11 нафар ўқитувчилар ҳам мукофотга лойиқ деб топилдилар.

Шу муносабат билан, “Andijon Digital City” технопаркида “1 октябрь - Ўқитувчи ва мураббийлар куни” арафасида Андижон вилоятидаги 11 нафар фаол ўқитувчи-мураббийларни тақдирлаш маросими ташкил этилди. Вазирликнинг ҳудудий бошқармаси бошлиғи З.Саматов ва вилоят халқ таълими бошқармаси бошлиғи в.б. Д.Турдиевлар томонидан иштирокчиларга пул маблағлари ва эсдалик совғалари топширилди.

Facebook | Twitter | Instagram | YouTube | Telegram | TikTok