Milliy tiklanish milliy bo’lib qolayotgan yot illatlardan qutulishdan boshlandi.

“Milliy tiklanish” illatlarimizdan qutulish yo’lida birlashishga chaqirmoqda.

@alisherQodir

Maqsadimiz 37 million vatandosh roziligi, 21 million saylovchi ishonchini qozonish va yagona O’zbekistonimizning qudratli bo’lishiga xissa qo’shishdir.

@alisherQodir

Milliy tiklanish fraksiyasining majlisida bir qator muhim qonun loyihalari ma’qullandi. Qonun loyihalari bilan quyidagi normalar taklif qilingan:

- Istirohat bog’larida qurilish qilish taqiqlanmoqda;

- Bir maqsadda olingan qurilish uchun yer maydoni shaharsozlik rejasiga zid bo’lmasa, boshqa maqsadda foydalanish uchun o’zgartirilishi mumkinligi belgilanmoqda;

- Elektron sigaretalar tamoman taqiqlanmoqda;

- Tibbiy xizmat ko’rsatish tizimi takomillashmoqda, ya’ni quyidagi shifokor (oila shifokori yoki poliklinika) ko’rigi yoki tavsiyasi bo’lmasa, ixtisoslashgan Tibbiy markazlarda ko’rikdan o’tish pullik qilinmoqda;

- MIB qarzdorning undiradigan narsasi bo’lmasa, uni qarzdorlar reyestriga kiritadi va qarzdorga nisbatan belgilangan cheklovlar qarz bartaraf etilmaguncha kuchida qoldiriladi;

- Qishloq xo’jaligi mahsulotini yetishtiruvchi uchun ehtimoliy zararlardan sug’urta qilish tizimi takomillashtirilmoqda.

Loyihalar ertaga bo’ladigan Qonunchilik palatasi Yalpi majlisida ko’rib chiqiladi.

@alisherQodir

Qonunga qarshi ovoz bergan hamkasblarimga:

Birinchidan, aroq yoki tabiiy tamaki insonga zarar, lekin bu zararni ma’lum bir bosqichgacha davolash mumkin. Sun’iy tamakidagi murakkab kimyoviy elementlar inson tanasidan chiqib ketmaydi, DNKni buzadi, intellektual o‘sishni keskin zaiflatadi va reproduktiv salomatlikka jiddiy ta’sir ko‘rsatadi.

Ikkinchidan, aroq yoki tabiiy tamakini, asosan, katta yoshdagilar iste’mol qiladi, ular o‘zi uchun tanlovini qilib bo‘lgandir, lekin elektron sigaretalar maktab o‘quvchilari yoki 30 yoshgacha bo‘lgan bolalar orasida keng yoyilib ketmoqda. Iste’molchinng 3 tadan 2 tasi yoshlar. Yarmi qizlar. Yoshlar va albatta, xalqimiz bu ofatning kelajakdagi zararidan qutula olmaydilar.

Buni hozir to‘xtatmasak, 20 yildan keyin hech qanday qonun yoki davlat dasturi sezilarli ko’p intelektual zaif qatlamga yordam bera olmaydi.

@alisherQodir

Va’da berganimizdek, "Milliy tiklanish" partiyasining bu chaqiriqdagi asosiy maqsadi natijadorlik bo’ladi.

Bundan buyon, Qonunchilik palatasidagi ishlardan tashqari, har haftada 2-3 kun bir viloyatda tahlillar olib boramiz.

Mahalliy kengashlardagi deputatlarimiz bilan birgalikda partiyaning dasturiy maqsadlari, davlat dasturlarida belgilangan vazifalar ijrosi va albatta, saylovchilar bilan muloqot…

Vatanparvar ajdodimiz Manguberdining yurti Xorazmdan boshladik. Turizm, madaniy me’ros obyektlari va mahalliy ishlab chiqaruvchilar kun tartibimizda…

Yanvar yakunida xulosalar qilinadi va takliflar beriladi.

@alisherQodir

O’zbekistonda tavakkalchilikka asoslangan o’yinlarga ruxsat beradigan qonun loyihasi ikkinchi o’qishdan o’tdi.

Virtual reallik qonundagi taqiqlarni osongina oshib, sog’lom hisobni yo’qotib qo’ygan yosh-u kattani tovlamachilar oviga aylantirmoqda, huquqiy asosi bo’lmagani uchun ularni himoya qilishni ham imkoni yo’q edi.

Qonunda sohani litzenziyalash, ishtirokchilarni ro’yxatga olish, voyaga yetmaganlarga taqiq, miqdorga cheklovlar belgilash, ota-onani farzandiga taqiq so’rash huquqini berish kabi normalar bilan birga tartibni buzganlarga jazo choralari kuchaytirilmoqda. Sohaning rasmiy ishtirokchilariga mas’uliyat va majburiyat yuklash bilan birga, tovlamachilar ishi jiddiy qiyinlashadi, deb umid qilyapmiz.

Daromadni har qanday shaklini to’g’ri deb biladiganlar tarbiyada boy berilgan insonlar ekani, ularni taqiq to’xtatmasligi, ular uchun qadr yoki qadriyat bo’lmasligini yana bir bor tushundik.

Bu illat bilan chiroqni o’chirib qo’yib kurashishdan foyda yo’qligiga tashabbuskorlar ishontirishdi. Lekin biz ko’zi bor-u ko’rmaydiganlarga chiroq yorug’ligidan foyda yo’qligiga ishonishda davom etamiz.

Inson o’zgarsa jamiyat o’zgaradi.

@alisherQodir

Toshkentdan boshlab barcha shaharlarimizda tashqi yozuvlar, e’lonlar, ko‘rsatmalar boshqa tillarda, hatto boshqa alifbolarda yozilayotgani achinarli muammo!

O‘zbekistonda barcha tashqi yozuvlar, e’lon, ko’rsatmalar o‘zbek tilida bo‘lishi shart. Zaruratga qarab boshqa tillarda takrorlanishi mumkin.

Tayanch qadriyatimiz sifatida o’zbek tiliga munosabatimiz tubdan o’zgarishi kerak. Birinchi navbatda tadbirkorlar, mulkdorlar va boshqaruv idoralari o’zbek tiliga hurmat, qonunga itoatda namuna bo’lishlari kerak. Jamoatchilik bu masalada murosasiz bo’lishi kerak.

“Milliy tiklanish” partiyasida “Tashqi yozuvlar to‘g‘risida”gi qonun loyihasini tayyorlash ishlari boshlangan.

Urush holatida bo’lishiga qaramasdan, Rossiya dumasida so‘nggi oyda rus tili bilan bog‘liq uchinchi jiddiy, majburiyatlarga to’la qonun qabul qilinmoqda. Bu masalada o’rnak olishimiz mumkin va zarur deb o’ylayman.

@alisherQodir

Seni rad etganlarga ham daromad keltiradigan darajada foydali bo’lish uchun hech kimga hech narsani isbotlashga harakat qilmasdan maqsadga intilish kerak.

“Atrofingda shovqin qilayotganlarni har biriga vaqt sarflasang, maqsadingga yetolmaysan”… Shu gapni aytgan inson bo’lmaganida, bugun balki APL ham Mancity ham bo’lmas edi.

Muvaffaqiyat aybdor emas, yo’l izlaydiganlarnikidir.

@alisherQodir

“Milliy tiklanish” DP fraksiyasi qonunchilikka kiritilayotgan ayrim o’zgarishlarni ma’qulladi, jumladan:

- donorlik rag’batlantirilmoqda. Nishon, bir martalik mukofot va imtiyozlar ko’zda tutilmoqda;

- Milliy gvardiya faoliyati modernizatsiya qilinyapti. Gvardiyachilar qonunga muvofiq oldida rezina kaltakdan boshqa narsa olib yurishi mumkin emas edi. Bu kaltakni zamonaviysi avariyada eshikni ochadi, oynani sindiradi va insonga yordam berish uchun foydali bo’ladi. Endi maqsad ham, kaltak ham o’zgarishi kerak;

- Garov mulkiga nisbatan fuqaro huquqi ustuvorligi ta’minlanmoqda. Qarzni 15 foizigacha miqdorida kechiktirilishi garovni sotishga asos bo’lmaydi;

- Iste’molchilarning huquqlari va qonuniy manfaatlarini himoya qilish tizimi takomillashtirilyapti. Fuqaroga ko’rsatilmagan xizmat uchun jazo kuchaytirilmoqda. Gaz, energiya, avtomashina…;

- Mahbus kitob o’qisa va uni uqsa hamda tegishli komissiyaga imtihon topshira olsa, jazo muddati qisqaradi.

@alisherQodir

R. Ermatov futbolni yaxshi tushunadi, bu yagona to’g’ri qaror edi.

Endi keyingi to’g’ri qaror kerak, milliy jamoamiz jang maydonida turibdi, eksperimentlarga vaqt yo’q. UFAni yangi murabbiy bo’yicha qarorini muhokama qilmaslik, jamoamizga yordam bo’ladi.

@alisherQodir

Gaz qimmat resurs, 1 kub gazdan 10 ga yaqin yuqori qiymatli, eksportbop mahsulot ishlab chiqarish, xorijga sotish va uning puliga millionlab qorako’zlarimizga ish o’rni yaratish mumkin.

Tillaqatori milliardlab kub gazni uy isitish va ovqat pishirishga ishlatib yuboradigan xalqni kosasi oqarmaydi.

Elektr energiyasi ishlab chiqarishni ko’paytirib gaz o’rniga elektr energiyasi ishlatishni o’rganishimiz kerak.

Yangi quriladigan uylarda energiya manbasi sifatida faqat elektr energiyasini rag’batlantirish taklifini qo’llab-quvvatlaymiz.

Yashil energetika kelajagimiz.

@alisherQodir

Biz to’g’ri yo’lni topganmiz, lekin bu yo’lda ilgarilash uchun kamchiliklarimizni tan olishimiz, ularni bartaraf qilish uchun birlashishimiz kerak.

Odamlarga yoqadigan emas, o’sishimizga xalaqit berayotgan kamchiliklarimiz haqida gapirishni to’g’ri deb hisoblayman.

Men sabr qilishni o’rgandim, odamlar mulohaza qilishni o’rganadigan vaqt uzoq emas! Bundan 8-9 yil avval, hatto, muhokamani bilmas edik, hozir bilamiz, lekin mulohazada muammolarimiz bor. Trolling, bulling yoki shovqindan foyda izlaydigan bir hovuch shaxsiyati erib ketganlar, ikki og’iz fikri yo’q, lekin bir dunyo nafratga to’lalar o’zgarishlarga mutanosib zaiflashib, yo’q bo’lib ketadi, ishonchim komil.

To’g’rini topish uchun, avvalambor, muhokama kerak! Muloqot bilmaydigan olomon haqni ham, haqqini ham bosib ketaveradi, ikki yuz yildir aynan shu xatoga bo’g’ilyapmiz!

Kelajak - hisob-kitobi bor xalqlarniki! Nemislar va yaponlar qisqa davrda ikkita katta urushda mag’lub bo’ldilar, lekin 50 yil ichida dunyodagi qudratli mamlakatlarga aylandilar. Chunki muammolarini tan oldilar, to’g’ri yo’lni topdilar va bu yo’lda birgalikda harakat qildilar. Biz nafaqat, tugab borayotgan resurslarimizni, hatto qadrimizni isrof qilayotganimizni ham tan olgimiz kelmaydi.

Borimizni boshqacha ko’rsatish uchun qora mehnatda pul yig’ib, kamiga qarz qo’shib, bir soatlik to’yda sochamiz, yaqin yillarda ko’zimizga surtishga ham yetmay qolishi mumkin bo’lgan suvga mashina yuvamiz, yo’q malakani borligiga ishontirish uchun diplom sotib olib, jarrohlik, me’morlik, tarbiyachilikka da’vo qilamiz va oqibatiga aybdor izlaymiz…

Men qat’iy ishonaman, kuchli boshqaruv va odamlarning fidoiyligi davlatni qudratli qiladi! Faqatgina qudratli davlatda farovon xalq yashashi mumkin, insoniyat tarixi buni ko’p marta isbotlagan.

@alisherQodir

Barpo etilgan dunyodagi eng yirik quyosh energiyasi ishlab chiqarish stansiyasining jami puliga biz bir mavsum uchun gaz sotib oldik…

Bu yildan boshlab stansiya uzoq yillar davomida Xitoy aholisi uchun 6 mlrd. kVt/soat elektr yetkazib beradi. Biz esa, eski narxlarga kelisha olsak, yana 1,7 mlrd. dollarga gaz sotib olamiz, aksincha ikki, hatto, uch barobar ko’proq sarf qilishimiz ham mumkin, chunki istemol uchun gazimiz yetarli emas…

Bosqichma-bosqich, gaz iste’molini kamaytirib, iste’molni elektrlashtirish kerakmasmi?

@alisherQodir