Үөһээ Бүлүү улууһун история уонна этнография түмэлин дириэктэрэ Изабелла Петровна Саввинова Дьокуускай куоракка үлэ сырыытын чэрчитинэн Өрөспүүбүлүкэтээҕи 4 сүрүн түмэллэр үлэлэрин кытта билистэ.

Бастатан туран аан дойдутааҕы хомус киинин уонна түмэлин исписэлиистэрин кытта уопут атастаһар үлэни ыытта. Хомус түмэлигэр 17 үйэҕэ оҥоһуллубут хомустан саҕалаан билиҥҥи кэм сэдэх чочуйуулаах хомустарыгар тиийэ муһуллубут.

"Аан дойду араас норуоттарын бары хомустарын түмэлэ сахабыт сиригэр мустан турара көрүөхтэн эриэккэс.", - диэн бэйэтин санаатын Изабелла Петровна үллэһиннэ.

Хомус түмэлин кэннэ Саха сирин норуоттарын музыкатын уонна фольклорун түмэлин үлэтин билистэ. Фольклор түмэлин исписэлиистэрэ араас хотугу норуоттар олохторун-дьаһахтарын кэпсиир экспозицияларын көрдөрдүлэр.

Инникитин Үөһээ Бүлүү түмэлин кытта ыкса үлэни ыытарга сүбэлэстилэр. Ону тэҥэ улууспут биллэр-көстөр дьонун туһунан саҥа бырайыак үлэтин былааннастылар.

Бу түмэли Аиза Петровна Решетникова – Арассыыйа үтүөлээх артыыската, Саха Өрөспүүбүлүкэтин норуодунай артыыската, историческай наука кандидата ис сүрэҕиттэн тэрийбитэ, түмэл аҥаардас быыстапкаҕа эрэ буолбакка документальнай киинэлэри устууга эмиэ үлэлиир.

Изабелла Петровна салгыы Саха национальнай уруһуйун түмэлин сүрүн реставраторын Айталина Семенованы кытта рестоврация үлэтин тула сэргэх кэпсэтии ыыттылар. Айталина Семенова бэйэтин үлэлиир эйгэтин киэн хабааннаахтык көрдөрдө, билиһиннэрдэ. Уруһуй түмэлигэр билигин Москва куораттан аатырбыт Третьяковскай галереяттан улуу худуоһунньук Иван Айвазовскай хартыыналарын аҕалан улахан быыстапка тэриллэн үлэлии турар.

Үлэ күнүн түмүгэр Е.М. Ярославскай аатынан Саха Сиринээҕи судаарыстыбанай история уонна культура түмэлигэр киирэн сүрүн методическай үлэни ыытар исписэлиистэрдиин, краеведтардыын көрсөн түмэл үлэтин тула кэпсэттилэр, уопут атастаһар үлэни ыыттылар.

#Түмэл
#МузеиЯкутии
#ҮөһээБүлүү

Үөһээ Бүлүү улууһун дьаһалтатын пресс сулууспата.