#НОВОСТИВЕРХНЕВИЛЮЙСКОЙЦРБ

Үөһээ Бүлүүтээҕи 2-с N-дээх оскуола медисиинискэй кылааһыгар быйылгы үөрэх дьылыгар 7 оҕо үөрэнэ киирдэ. Кинилэри медициинэ эйгэтигэр сүрэхтиир тэрээһин алтынньы ый 17 күнүгэр буолла. Үөрэнээччилэр маҥан халаат кэтэн, эмчит буолуохтаах бастакы үктэллэригэр туран, андаҕар тылын эттилэр. Кинилэри оскуола дириэктэрэ Васмар Анастасиевич Руфов уонна киин балыыһа кылаабынай бырааһын тэрийэр үлэҕэ солбуйааччы Туйаара Дмитриевна Иванова эҕэрдэлээтилэр, медик буолан үүнэн-сайдан тахсалларыгар, ханна да сырытталлар эмчит үтүө аатын түһэн биэрбэттэригэр, үөрэххэ-билиигэ ситиһиилэри баҕардылар.
Медициинискэй кылаас 2019 сыл сэтинньититтэн оскуола салалтата, улуустааҕы киин балыыһа, улуус дьаһалтата уонна Дьокуускайдааҕы медисиинискэй институт түөрт өттүттэн сөбүлэҥ түһэрсэннэр, арыллыбыта. Быйылгы сылга бу кылаас төрдүс выпуһун таһаарыа.
Бу иннинээҕи бүтэрбит оҕолортон медик идэтигэр 14 оҕо ситиһиилээхтик үөрэнэ сылдьаллар.
Оскуолаҕа үөрэх уопсай бырагыраамматын таһынан оҕолор медисиинэ эйгэтигэр уһуйуллаллар. Киин балыыһа быраастара графигынан уруоктары ыыталлар. Үөрэнээччилэр ылбыт билиилэрин практикаҕа туһаналлар. Ол курдук, боростуой медисиинискэй манипуляциялары толорорго доруобуйа харыстабылынан хабыллар балыыһа ыытар араас тэрээһиннэригэр барытыгар кытталлар, волонтердууллар.
Тэрээһини видеоҕа, хаартыскаҕа көрүҥ.
#МОЯБУДУЩАЯПРОФЕССИЯ
#МЕДИЦИНСКОЕОБРАЗОВАНИЕ