Үөһээ Бүлүү улууһугар бэҕэһээ, от ыйын 3 күнүгэр 6 ойуур баһаара бэлиэтэннэ.

Баһаар сирдэригэр миэстэтигэр этиҥ түспүт маһыттан ойуур баһаара саҕаламмытын баһаары умуруорааччылар бэлиэтии көрбүттэр.

Боотулуу нэһилиэгэр "Түҥ" сирин диэки ойуур баһаарын умуруорууга Ньурба уонна Үөһээ Бүлүү улууһун "Авиалесохрана" уонна Кырыкый нэһилиэгин 5-с нүөмэрдээх олохтоох баһаарынай быыһыыр сулууспа үлэһиттэрэ, уопсайа 25 киһи уоту утары үлэни ыыттылар.

Кырыкый ойуурун баһаарыгар 6 парашютист, ону тэҥэ 22 олохтоох уонна Үөһээ Бүлүү сэлиэнньэтиттэн хомуурунан кэлбит дьон үлэлээтилэр.

Үөдүгэй нэһилиэгэр Хампаҕа уонна Тоҥуо диэки барыы сиргэ баһаар тахсыбытын биллэрбиттэрэ.
Хампа баһаарыгар 11 ГАУ РС(Я) "ЯКУТЛЕСРЕСУРС" үлэһиттэрэ уонна 7 Үөдүгэй нэһилиэгин олохтоохторо баһаары утарар үлэни күүскэ ыытан, бүгүн сарсыарда уоту умулуннардылар. Тоҥуоҕа барыы сиргэ Сунтаар улууһуттан 6 парашютист ыстанан баһаары умуруорар үлэни ыыттылар.

Биир баһаар Кэнтик сиригэр, өрүс үрдүгэр тахсыбыта бэлиэтэммитэ. Манна ГАУ РС(Я) "ЯКУТЛЕСРЕСУРС" үлэһиттэрэ уонна Олохтоох нэһилиэнньэттэн 37 эр дьон тахсан баһаары утары охсуһар үлэни ыыттылар. Түүнү супту уоту утары охсуһан ойуур баһаара билиҥҥи туругунан уоскуйан туран. Салгыы уоту толору тохтоторго үлэ бара турар.

Биир баһаар Харбалаах нэһилиэгэр Чыбыыда таһыгар күөдьүйбүтэ. Манна ГАУ РС(Я) "ЯКУТЛЕСРЕСУРС" үлэһитэ уонна 24 олохтоох дьон ойуур баһаарын тутатына саба тутаннар бүгүн умуллардылар.

Бэлиэтээн эттэххэ бу баһаардарга нэһилиэк аҕа баһылыктара, ойуур харыстабылын үлэһиттэрэ суһаллык түргэнник дьон хомуйан ыытаннар, баһаардар улааппатылар, ону таһынан улахан аҥаара умуруорулунна.

Бүгүҥҥү күҥҥэ олохтоох нэһилиэнньэ, ону тэҥэ ГАУ РС(Я) "ЯКУТЛЕСРЕСУРС" үлэһиттэрэ хаалбыт термоточкалары суох оҥорорго үлэни ыыта тураллар.

#ЛесныеПожары
#Лето2024
#ОйуурБаһаара
#ВерхневилюйскийУлус

Үөһээ Бүлүү улууһун дьаһалтатын пресс сулууспата.