#Adliya_xabari

Adliya vaziri “Kambagʻallikdan farovonlik sari” dasturi doirasida Samarqanddagi mahallalarga keldi

Mamlakatimizda kambagʻal oilalar hayotini oʻzgartirish, turmush tarzini yaxshilashga qaratilgan “Kambagʻallikdan farovonlik sari!” dasturi amalga oshirilmoqda. Bu borada “Kambagʻallikni qisqartirish va aholi turmush farovonligini oshirish borasidagi chora-tadbirlarni yangi bosqichga olib chiqish toʻgʻrisida”gi Prezident Farmoni dasturilamal vazifasini bajarmoqda.

Unga koʻra, 2025-yilda 1 million nafar aholini kambagʻallikdan chiqarish davlat ijtimoiy-iqtisodiy siyosatining hamda barcha darajadagi davlat organlari va tashkilotlarining birinchi darajali vazifasi etib belgilangan. Bunda Adliya vazirligi ham hududlarda alohida chora-tadbirlarni amalga oshirmoqda.

Xususan, bu yoʻnalishdagi jarayonlar bugun Samarqand viloyatida davom etmoqda. Adliya vaziri Akbar Toshqulov bugun, 3-fevral kuni viloyat markazidan qariyb 100 kilometr olisda joylashgan Qoʻshrabot tumaniga keldi. Oʻrganishni “Xonnazar” mahallasidan boshladi. Mahalladagi kambagʻal oilalarga kirdi, xonadonda yashovchilar, tadbirkorlar bilan suhbatlashdi, ularning nima muammosi borligi, qanday yordam koʻrsatish kerakligi bilan qiziqdi.

III-guruh nogironi boʻlgan 55 yoshli Karomat opa Ismoilova nogironligi boʻlsa-da yoshligida oʻrgangan tikuvchilik kasbi orqali bugun hamqishloqlarini koʻrpa, yostiq, beshiklarga zeb beradigan yopinchiqlar bilan taʼminlab keladi. U Akbar Toshqulov bilan suhbatda shogirdlarni koʻpaytirish, kasbini hamqishloqlariga oʻrgatib qoʻshimcha ishchi kuchi olishni istayotgani, buning uchun tikuv mashinasiga ehtiyoji borligini aytdi. Adliya vaziri unga zamonaviy tikuv mashinasini topshirdi.

Xonnazar qishlogʻida oilaviy tadbirkorlik bilan shugʻullanayotgan Ahmad Adilov mayizni qayta ishlash uchun qoʻshimcha joy olish borasidagi muammosini maʼlum qildi. Uning murojaati vazir nazoratiga olindi.

Mahalla binosida masʼullar bilan uchrashuvda nochor oilalarni kambagʻallikdan chiqarish tartibi, buni amalga oshirish mexanizmi, fuqarolar huquqiy va ijtimoiy muammolari bilan ishlash, bunda adliya organlari bilan hamkorlik borasida soʻz yuritildi, zarur tavsiyalar berildi. Vazir oʻrtaga tashlangan masalalar, savollarni tinglab, ochiq muloqot qildi.

“Kambagʻallikdan farovonlik sari” dasturi doirasida mahallada joriy yilda bajariladigan ishlar, chora-tadbirlar, koʻrsatiladigan ijtimoiy-iqtisodiy yordamlar haqida maʼlumot berildi. Shuningdek, mahallada Xitoy tajribasi asosida kambagʻallikdan chiqarish loyihasi ustida ish olib borilmoqda. Unga koʻra, bu yerda 10 dan ortiq loyihalar amalga oshirilishi koʻzda tutilgan.

📌 Kanalga ulanish

#Adliya_xabari

Tovar belgisiga ega boʻlishning afzalliklari yuzasidan sayyor qabul oʻtkazildi

Fargʻona viloyat adliya boshqarmasida Adliya vazirligi Intellektual mulk departamenti masʼullari tomonidan tadbirkorlik subyektlariga intellektual mulk obyektlarini yaratish hamda ularni davlat tomonidan muhofaza va himoya qilish boʻyicha sayyor qabul oʻtkazildi. Unda 30 nafardan ortiq tadbirkor ishtirok etdi. 10 nafarga yaqin tadbirkorning tovar belgilari huquqlarini himoya qilish yuzasidan murojaatlari ish yurituvga olindi.

Tadbirkorlarga kontrafakt mahsulotlar, ularni asl mahsulotlardan farqlash, bunday mahsulotlarning iqtisodiyotga zararlari toʻgʻrisida tadbirkorlarga tushuntirishlar berish orqali profilaktik tadbirlar oʻtkazildi.

Shuningdek, Fargʻona shahridagi Yoshlar sanoat zonasida tadbirkorlarning tovar belgilari oʻrganildi. Oʻrganishlar jarayonida ushbu sanoat zonasidagi tadbirkorlar faoliyati bilan tanishildi va ularga oʻz brendiga ega boʻlish hamda uning afzalliklari toʻgʻrisida huquqiy tushuntirishlar berildi.

Mazkur tadbir davomida sanoat zonasidagi tadbirkorlar intellektual mulk sohasiga oid savollarga javob olish hamda vakolatli organlarga joyida murojaat qilish imkoniyatiga ega boʻldilar.

📌 Kanalga ulanish

#Adliya_xabari

TIQQM vakillarining intellektual mulk sohasi boʻyicha bilim va koʻnikmalarni oshirishga qaratilgan 2-bosqich trening mashgʻulotlari yakunlandi

Adliya vazirligi huzuridagi «Intellektual mulk markazi» davlat muassasasi mutaxassislari tomonidan Fanlar akademiyasi, Oliy taʼlim muassasalari, Ilmiy-tadqiqot institutlari va Erkin iqtisodiy zonasi direksiyalari huzurida faoliyat yuritayotgan Texnologiya va innovatsiyalarni qoʻllab-quvvatlash markazlari (TIQQM) masʼul vakillarining intellektual mulk sohasi boʻyicha bilim va koʻnikmalarini oshirishga qaratilgan treninglar oʻtkazildi.

Mashgʻulotlar davomida TIQQM faoliyatini tashkil etish va taʼminlash (yuritish) boʻyicha chora-tadbirlarni amalga oshirilganligi toʻgʻrisida hisobotni toʻgʻri shakllantirish, IMO haqida tushunchalar va ularga talabnoma topshirish qoidalari batafsil tushuntirildi.

Ushbu treningning ajralib turuvchi jihati shundaki, unda asosan endigina oʻz faoliyatlarini boshlagan TIQQMlarning masʼul vakillari ishtirok etmoqdalar. Bu esa yangi tashkil etilgan markazlar masʼul vakillariga intellektual mulk sohasiga oid zarur bilim va koʻnikmalarni egallash imkonini beradi. Ishtirokchilar oʻzaro tajriba almashish, yangi bilimlarni egallash va intellektual mulk sohasida amaliy koʻnikmalarni shakllantirish imkoniyatiga ega boʻldilar.

Tinglovchilarga mashgʻulotlar yakuni boʻyicha sertifikatlar topshirildi.

📌 Kanalga ulanish

#Adliya_xabari

Adliya vaziri Qoʻshrabot tumanida aholi bilan ochiq muloqot oʻtkazdi

Adliya vaziri Akbar Toshqulov Samarqand viloyatiga amalga oshirgan xizmat safari doirasida Qoʻshrabot tumanidagi mahallalarda boʻlib, aholi bilan ochiq muloqot oʻtkazdi.

— Taqdimotlar, rejalar oʻz yoʻliga, menga oʻzingiz duch kelayotgan muammo, turmush sharoitingizni yanada yaxshilash yoʻli, farovonlikka chiqish uchun bizdan nima yordam kerakligi haqida gapiring, — dedi adliya vaziri A.Toshqulov “Navkat” mahallasida oʻtkazilgan ochiq muloqotda. Shundan soʻng uchrashuv samimiy suhbatga aylandi. Eʼtiborlisi, adliya vaziri mahalladagi kambagʻal oilalarni qoʻllab-quvvatlashda hududning ixtisoslashuviga eʼtibor qaratishni ilgari surdi.

Muloqot yakuni boʻyicha mahallada yoʻl boʻyi qoʻshimcha xizmat koʻrsatish, bola parvarishi bilan band boʻlgan xotin-qizlarni qoʻshimcha daromad topishga qaratilgan loyihalar belgilab olindi. Jumladan, boʻsh turgan binoda hudud aholisi va yoshlari uchun kasb-hunar oʻrgatuvchi markazga aylantirish tashabbusini bildirildi.

“Doʻstlik” mahallasida ham bu jarayonlar davom etdi. Akbar Toshqulov mahalla binosida, ogʻir sharoitda yashayotgan aholi xonadonlarida boʻldi, fuqarolarning muammolari, huquqiy, ijtimoiy masalalarini tingladi. Ularga zarur texnikalarni topshirdi.

Viloyatda “Kambagʻallikdan farovonlik sari” dasturi doirasidagi amaliy ishlar davom etmoqda.

📌 Kanalga ulanish

#Adliya_xabari

Adliya vaziri Akbar Toshqulov xizmat safarining ikkinchi kunida Qoʻshrabot tumanidagi “Mayintepa” mahallasida boʻldi.

Ijtimoiy himoyaga muhtoj, kam taʼminlangan oilalar, fuqarolarning muammolari, huquqiy masalalarini oʻrgandi. Mahallada kambagʻallikni kamaytirish, bu borada ichki resurslardan foydalanish yuzasidan tavsiyalar berdi. Hududdagi ichki imkoniyatlarni borib koʻrdi. Ishlab chiqarish orqali daromad topayotgan yoshlar bilan muloqot qilib, ularning muammolariga quloq tutdi.

Mahalla ahli hududda til oʻrganish kursi, IT-markazi tashkil etishda amaliy koʻmak soʻradi. Buning uchun alohida bino ajratilib, zarur sharoitlar yaratilishi aytildi.

“Qiyqim” mahallasidagi oʻrganishlar ham samimiy suhbatga ulandi. Aholi adliya vaziriga nafaqat muammolari, balki takliflarini ham bildirdi. Muloqotlar chogʻida mahallada tadbirkorlik orqali shaxsiy daromadga kirishni istovchilar koʻpligi oydinlashdi. Ularning aksariyatini joy bilan bogʻliq muammosi bor.

Misol uchun, N.Safarova tadbirkorlik qilish yoʻlida duch kelayotgan masalasi adliya aralashuvi bilan sud tartibida koʻrib chiqiladigan boʻldi. Xonadonida kichik issiqxona tashkil qilgan A.Isroilovning shu yoʻnalishdagi faoliyatini kengaytirish masalasi oʻrganib chiqiladi. Muloqot davomida koʻtarilgan huquqiy muammolar yuzasidan batafsil tushuntirishlar berildi.

📌 Kanalga ulanish

#Adliya_xabari

Stokgolm savdo palatasi Arbitraj institutining bosh kotibi bilan uchrashuv boʻlib oʻtdi

Bugun, 4-fevral kuni Adliya vazirligida Stokgolm savdo palatasi (SCC) Arbitraj institutining bosh kotibi Karoline Falkoner bilan boʻlib oʻtgan uchrashuvda adliya va huquq sohasida hamkorlik aloqalari, xususan, nizolarni hal qilishning muqobil imkoniyatlarini kengaytirish masalalari muhokama qilindi.

Dastavval, Oʻzbekistonda arbitraj institutini rivojlantirishda amalga oshirilayotgan ishlar, soʻnggi tendensiyalar haqida maʼlumot berildi. Jumladan, 2021-yilda yangi “Xalqaro tijorat arbitraji toʻgʻrisidagi”gi Qonun qabul qilinib, unda tijorat nizolarini hal qilish tartibiga jiddiy oʻzgartirishlar kiritilganligi qayd etildi. Ushbu qonun arbitraj jarayonlariga ishonchni oshirishga va arbitraj institutlarini rivojlantirishga qaratilgan.

K. Falkoner, oʻz navbatida Oʻzbekistonda arbitraj institutini rivojlantirish sohasidagi islohotlarni yuqori baholadi. Stokgolm savdo palatasi arbitraj institutining afzalliklari haqida batafsil maʼlumot berdi. Jumladan, SCC arbitraj institutining nizomi oʻzbek tiliga tarjima qilinib, institutning rasmiy saytiga joylanganini aytib oʻtdi.

📌 Kanalga ulanish

#Adliya_xabari

Adliya vaziri Qoʻshrabot tumanidagi 72-umumtaʼlim maktabida tashkil etilgan “Huquq sinfi”ni borib koʻrdi.

Samarqand viloyatidagi eng chekka manzillarda joylashgan 16 ta maktabda “Huquq sinfi” yoʻlga qoʻyilgan. Bu yerda huquq fanlari esa chuqurlashtirilgan holda oʻqitilmoqda.

Xususan, Qoʻshrabot tumanidagi 72-umumiy oʻrta taʼlim maktabida tashkil etilgan “Huquq sinfi”da bugun maktab yoshlari huquqiy bilimlarini boyitmoqda. Adliya vaziri Akbar Toshqulov ushbu sinfdagi dars mashgʻulotlarida qatnashdi. Taʼlim sifati, oʻqituvchilarning soʻngi usullardan nechogʻlik foydalanishi bilan qiziqdi.

Taʼlim jarayonida axborot texnologiyalaridan keng foydalanish, oʻquv rejalari asosida oʻquvchilarni taʼlimning keyingi bosqichlariga tayyorlash, faol oʻquvchilarni fan olimpiadalariga jalb qilish boʻyicha chora-tadbirlarni belgilab berdi.

Oʻquvchilarga mazkur yoʻnalishdagi rejalar, huquqiy sohada taʼlim olib, karyera qilmoqchi boʻlgan yoshlar uchun beriladigan imtiyozlar, ragʻbatlar, imkoniyatlar haqida soʻz yuritdi. Yoshlarning savollariga quloq tutdi, ularning huquqiy savodxonligini sinovdan oʻtkazdi.

📌 Kanalga ulanish

#Adliya_xabari

Adliya vaziri oʻrinbosari Sh.Rabiyev Sirdaryo viloyatida “Kambagʻallikdan farovonlik sari” dasturining ijrosi bilan tanishdi

Adliya vaziri oʻrinbosari xizmat safari doirasida Sirdaryo viloyatining Oqoltin va Sardoba tumanlaridagi mahallalarda “Kambagʻallikdan farovonlik sari” dasturi asosida olib borilayotgan ishlarni oʻrgandi.

Fuqarolar, yetakchilar va mutasaddi rahbarlar bilan uchrashuvlar tashkil etildi. Suhbatlar chogʻida dastur doirasida aholini qoʻllab-quvvatlash, bandlikni taʼminlash, ijtimoiy himoyani kuchaytirish va infratuzilmani yaxshilash borasida amalga oshirilayotgan ishlar muhokama qilindi.

Xususan, Oqoltin tumanidagi “Andijon” mahallasida aholining huquqiy muammolarini oʻrganildi. Tadbir davomida fuqarolar uy-joy, kadastr hujjatini rasmiylashtirish, moddiy yordam, order olish, oila va nikoh munosabatlariga oid masalalar yuzasidan vazir oʻrinbosari qabulida boʻlishdi. Aholining kundalik hayotida uchrayotgan masalalar yuzasidan huquqiy tushuntirishlar berildi va ayrim muammolar joyida hal qilinib, qoʻshimcha oʻrganish talab etadigan murojaatlar ish yurituvga qabul qilindi.

Mahallalarning ijtimoiy-iqtisodiy rivojlanishi, aholining bandligi, kasb-hunar oʻrgatish tizimi va tibbiy xizmatlardan foydalanish holati oʻrganildi. Shuningdek, mahalliy mutasaddilar bilan hamkorlikda aholining turmush darajasini yanada yaxshilash boʻyicha kelgusidagi vazifalar belgilab olindi.

📌 Kanalga ulanish

#Adliya_xabari

TDYU Osiyo xalqaro arbitraj markazi bilan hamkorlik qiladi

Toshkent davlat yuridik universiteti delegatsiyasi Kuala-Lumpur shahrida boʻlib utayotgan birinchi Oʻzbekiston — Malayziya taʼlim forumida ishtirok etmoqda.

Bugun TDYU rektori v.b., professor Islambek Rustambekov Osiyo xalqaro arbitraj markazi vakillari bilan uchrashdi. Tomonlar TDYU va Osiyo xalqaro arbitraj markazi oʻrtasida arbitraj, Islom arbitraji, sport arbitraji, mediatsiya yoʻnalishlari boʻyicha hamkorlik qilish, universitet talabalari uchun taʼlim va amaliyot dasturlarini yoʻlga qoʻyish, birgalikda konferensiya, davra suhbati va boshqa tadbirlarni tashkil etish borasida fikr almashdi. Muzokaralar yakunida ikki muassasa oʻrtasida anglashuv memorandumi imzolandi.

Delegatsiya vakillari Osiyo xalqaro arbitraj markazi faoliyati, bu yerda yaratilgan sharoit va imkoniyatlar, markaz kutubxonasi bilan yaqindan tanishdi.

📌 Kanalga ulanish