#Мулоҳаза

✅ ТАЛАБАНИ КЕЛИН ҚИЛДИМ

🕰 Тўйгача...

💠 Фарзандлар улғайгач ўқитсам, касб-ҳунарли қилсам, дер экансиз. Аввалига ўғлимиз ўзини тутиб олсин, ҳаётнинг оқ-қорасини кўрсин, деган ўйда юрдик. Қолаверса, ёш қизни келин қилиб ҳам барака топиш қийин. Қизлар ҳам ўқисин, бир ишнинг бошини тутсин, имкониятлардан фойдалансин.

💠 Ҳаётнинг ўзи мавриди келганини билдирар экан. Хуллас, одоб-ахлоқи, илми, ҳунари, насл-насаби, ҳусн-жамолини суриштириб бир қиз топдик. Совчиликка бордик, танишдик, суриштирдик. Фарзандларимизнинг бўйи ҳам, ўйи ҳам бир-бирига яқин бўлиб чиқди.

💠 Фақат охирида “Қизимиз контрактда ўқийди. Қийналиб қолмасмикан оила қурса”, деди онаси. Ўринли мулоҳаза. “Ўзимиз ўқитамиз қизингизни”, деб тўйдан кейин тониб кетганлар озми? Аммо бу ҳол бизда такрорланмайди. Чунки мен ҳам оила қурганимда талаба эдим. Қайнонам “қизимизни ўзимиз ўқитамиз, шароит яратиб берамиз”, деб ваъда берган ва устидан чиққан.

💠 Хуллас, ёшлар ҳам рози бўлди, маслаҳатни пишириб ўртача бир тўй қилдик. Ёш оила юз фоиз яхши шароитда яшасин, деган қонун борми? Кам-кўстини ўзлари битириб олади. Ортиқча ғамхўрлик ҳам мўртлаштириб қўяди одамни.

🕰 Тўйдан кейин...

🔸 Аксарият қайноналар “бизнинг давримизда ундай эди, бундай эди” каби иддаолардан ўзини тиёлмайди. Аслида улар ҳам келинлигида роса ҳунарлар кўрсатган-у, ҳа, майли... Хуллас, тўйдан кейин келинимиз бир ҳафта-ўн кун келинлик либосларини кийиб, саломларни жойига қўйди. Шу билан ўқишга чиқиб кетди. Яна кенг ҳовлининг катта келини бўлиб қолдим.

🔸 Ана шунақа, кимки келин олиб, бутунлай уй-рўзғор ишларидан қутуламан, етти қават кўрпачада роҳатланиииб ўтираман, келиним хизматимда бўлади, дейдиган бўлса, бекорларни айтибди. Ахир, келин ҳам бировнинг жон риштаси, янги экилган гулдек парваришга муҳтож. Шундай қилиб, уй ишларида келинимга ёрдамчи бўлдим. Нима қилибди? Шу пайтгача ҳам қилиб юрган ишим, бирон жойим камайгани йўқ.

🔸 Келин хизматкор эмас, оқсоч ҳам эмас. Майли, ҳозир ўқисин, илмини оширсин. Эртага ўзига фойда. Невараларимни комил инсонлар қилиб тарбиялайди.

🔸 Ўғлимга доим айтаман: “Келинга эътиборли бўл. Бирга сайрга чиқинглар, шаҳар айланишга боринглар. Кўнгли тусаган овқатлардан, ширинликлардан олиб бер. Оғир ишлар қилдирма, иссиқ-совуқ кунларда соғлигига қара”.

🔸 Бир куни денг, шамоллаб қолибди. Онамни кўриб келай, дейди. Касал ҳолда бориб, уларни хавотирга қўйманг, ўзим сизни тузатиб, кейин юбораман дедим.

❗️ Одамнинг феъли кенгроқ бўлса, ҳам эпли, ҳам дипломли келиннинг қайнонаси бўлади.

✍️ Наргиза ИШМЕТОВА, ўқитувчи

📌 Мақоланинг тўлиқ шакли "Ёшлар кундалиги" журналининг 4-сонида.

Yoshlar kundaligi

#Мулоҳаза

Кечаси болалар майдончасига чиқиб бўлмай қолди

💠 Уйимиз олдидаги болалар майдончасига набирамни етаклаб чиққан эдим, ўттиз ёшлардаги қўшним эндигина тетапоя бўлаётган қизчаси билан келиб қолди. Болаларни ҳалинчакка солиб тебратар эканмиз, ҳалиги йигит салом бериб, ҳасрат қила бошлади:

– Ака, кечалари бу ерга болалар билан чиқиб бўлмай қолди. Мана бу ўриндиқларни тарбиясиз йигит-қизлар эгаллаб олишади.

– Нима, чекишадими?

– Э, чекиш ҳам гапми, бир-бирининг пинжига тиқилиб, бемаза ишларни қилишади. Биз катталарни кўрсак, уялиб, улар турган жойни узоқдан айланиб ўтар эдик, буларда тортиниш деган нарса йўқ.

🔹 Кечки пайт айланиб, ўзим ҳам кўрдим, бир-бирининг бўйнига осилган, қўлидаги телефонга қараб, “хи-хи”лашаётган ўсмирлар ўриндиқ бор жойга танда қўйиб олишар экан. Катта ёшдаги одамлар ўтаётганини кўриб на салом, на эътибор беради денг! Бамисоли роботнинг ўзи.

🔻 Ўша лаҳзада Эркин Воҳидовнинг яна бир шеъри – “Зангори шуълалар”даги мана бу сатрлар эсга тушади:

Бир йигит ўзганинг бағридан
Қайтган ёр лабини сўради.
Ўтишиб қўғирчоқ баҳридан,
Бу ҳолни қизчалар кўради.

🔸 Қаранг, бедор ва донишманд ижодкор қарийб 50 йил олдин – шеър 1976 йилда ёзилган – замонавий ахборот воситалари билан бирга маънавиятимизга бутунлай ёт ғоя ва қарашлар кириб келаётганидан огоҳлантирган экан.

📢 Афсуски, бугунги кунда бундай хуружлар жузъий ҳолатлар эмас, аниқ мақсад ва манзилни кўзлайдиган алоҳида руҳий таъсир шаклига – мутахассисларнинг ўзлари тан олиб айтаётганларидек, “оммавий” ёки “кўча маданияти”га айланди...

✍️ Муртазо ҚАРШИБОЙ

📌 Муаллифдан "Ёшлар кундалиги" журнали учун махсус мақола. Батафсил журналнинг 4-сонида ўқинг.

Yoshlar kundaligi

#Мулоҳаза

⚖️ ИНТЕРНЕТ ВА ИНТИЗОМ

🌐 90-йилларда туғилиб, интернетсиз болалик даврини ўтказдим. Кейинроқ ўнга яқин давлатда бўлдим. Дунё қанчалик тез ўзгараётганини ва бу замонавий ўсмирларнинг турмуш тарзига қандай таъсир қилаётганини Ернинг турли нуқталарида туриб кузатдим.

📲 Одамзотни муқаррар технологик тараққиёт кутмоқда. Бугунгилари ҳали ҳолва. Смартфонлар, ижтимоий тармоқлар, видео стриминг ва онлайн ўйинлар ва бошқалар ҳаётимизга қулайлик олиб кирди. Бироқ, бунинг ортида потенциал қоронғулик ҳам бор. Ёшлар бир парча экранга қарам бўлиб қолмоқда, мустақил фикрлаш қобилияти камайиб, реал дунёдан узоқлашиб кетди.

🔥 Буларнинг барчасига интизом даво бўлади, деб ҳисоблайман. Интизом орқали техника ютуқларидан меъёрида баҳраманд бўлиш, соғлом турмуш тарзига амал қилиш, реал дунёда ўзаро муносабатларни тартибга солиш, шахсий ривожланиш кўникмаларини шакллантириш мумкин.

✅ Натижада, тез ўзгарувчан дунёга муваффақиятли мослашиш, технология ва реал ҳаёт ўртасидаги олтин ўрталиқни топиш осон бўлади. Шунда Интернет биздан эмас, биз Интернетдан фойдаланамиз.

✍️ Искандар Шодатов
🎨 Фаррух Авелов

Yoshlar kundaligi