Yoshlar kundaligi | Rasmiy

#Муҳокама_учун_мавзу

АЪЛОЧИ БОЛАЛАРГА

Сен тенгдошларингга қўшилиб копток тепмайсан. Ҳар куни институтдаги домлаларингни топшириқ ва вазифаларини киройи садоқату ихлос бирлан адо қиласан. Оқшомлари суюкли дилдорнинг ҳузурига сўзбўрон қилгали бормайсан. Ётоқхонанинг тангу тор хонасида ўлтириб, китоб ўқийсан. Виждонлисан. Сенинг мана шу виждонинг дўстларинг орасида алоҳида мавқе бағишлаб туришини сезасан. Сезасан-у, виждоният қонунлари билан яшамоқ азобларидан тилингни тишлайсан, аълочи бола.

Эрта ёзнинг дилбар оқшомларидан бирида курсдошларинг жамулжам бўласизлар. Чортанг зиёфат. Хайрлашув. Ўқишлар битди. Ким пиқ-пиқ йиғлаган, ким хурсанд. Бу олақуроқ давра ҳам ажойиб. Умуман, таҳсилнинг тўртинчи йилига бориб, қишлоқдан келган жайдари болалар ўзгариб битган, ўрнига аллақандай типлар пайдо бўлган эди. Типларки, орзулари осмон талабалар якунда тош шаҳарнинг жин кўчаларида кўрмаган куни қолмаган, бирдан-бир орзуси шаҳарда қолишдан иборат тўдага айланган-қолган.

Ана, Дон Жуан навбатдаги қурбони билан оғиз-бурун ўпишиб хушҳол ўтирибди. Нарироқда таксист тус жўраларидан вақтини қизғониб, тезроқ суриш пайидан бўлиб турибди. Чамандагул хурсанд: ўқиши битгач, ректоратга ишга чақиришган. Сабабини, бу илтифот ким туфайли эканлигини ҳамма билади. Лекин юзига солмайди. Ҳамманинг орзуси бор. Ҳамманинг танлаган йўли бор. Лекин, аълочи боланинг кўкси ғижимлайди. У дафъатан ҳаётнинг ғирромликларига тўқнаш келган, ҳарчанд аъло баҳоларга ўқимасин, домлаларнинг суюкли шогирди бўлмасин, ҳеч ким унга порлоқ истиқбол йўлларини кўрсатмади. У ўз тақдири қаршисида ёлғиз қолиб кетди.

Аълочи бола қишлоққа қайтди. Шафтолизор боғларига, уни соғинган инилари, жигарлари ҳузурига қайтди. Диплом чўнтакда, юрак дукурлайди. Ишга кирди орзуманда бўлиб. Туман маданият бўлимига ўринбосар бўлди. Санъат ва маданият институтининг аълочи битирувчисини меҳнат фаолияти шу зайл бошланди (шўри қуриганидан ҳали ўзи бехабар).

Куз. Тўйлар бошланди. Аълочи бола қишлоқнинг олди қизига уйланди. Қарсиллаган тўй бўлди ўзиям. Курсдошлар боришди бир гуруҳ бўлиб. Аълочи боланинг порлоқ истиқболи учун қадаҳлар чўқиштиришди, соддадил отанинг дастурхонга тўкканини қоқлаб қайтдилар. Аълочи бола ўша оқшомда илк марта йиғлади. У айтолмади. Ғурури йўл бермади.

Нуфузли институтнинг энг аълочи талабаси шу кунларда Фарғона вилояти, Ўзбекистон тумани маданият бўлимида расман бош мутахассис, амалда эса тадбирларда овоз кучайтиргич карнай, ударник, синтезатор сингари матоҳларнинг созловчиси, ташувчиси, бир тийинга қиммат тадбирларнинг дижурний бошловчисига айланиб қолганини айтолмади. Ғурури йўл бермади. "Баттар бўл, аълочи бола", дейди хўрсиниб ўзига.

Ахири аълочи бола кетди маданият даргоҳидан. Йиғлаб-йиғлаб, пешонасига бир муштлаб кетди. Шу касбни танлагани, маданият соҳаси ривожига недир ҳисса қўшишга орзуманда бўлгани учун ўзини қарғади. Деҳқончилик қилганим яхши, деди аълочи бола.

Вақт ўтди. Аълочи бола оёққа турди. Енгилмади. Жаҳли чиқди унинг. Маҳаллага ишга кирди. Ҳозир у "Давлатботир" МФЙда ёшлар етакчиси. Ҳар замонда телеграмдан узун-қисқа хабарлар йўллаб туради: "Фалон китобни топиб беринг, ўқишим керак"; "Мусобақадаман. Маҳалламнинг воллейболист йигитлари чемпион бўлди. Сиз ишлайдиган Тошкент вилоятидан келган маҳаллани енгди, акажон..."; "Ака, бир кун Тошканга қайтаман, унгача тажрибамни ошириб, иш ўрганишим керак..."

Бунчаям содда бўлмасанг, Иззат? Нимага бунақа тартибли, виждонли одамсан, аълочи бола? Сен қандай яшайсан ахир бу кожлар орасида? Сенга хат ёзма, безовта қилманг, юрагимни сиқма, дегим келади. Айтолмайман.

Баттар бўл, аълочи бола.

P.S. Бу воқеа кўз ўнгимда бўлган. Аълочи бола "Давлатботир"да ризқини ботирларча териб юрганини айтдим. Хўш, унинг сабоқдош-курсдошлари қаерда? Бири вазирликда каттакон, яна бири катта бир бошқарманинг шефи. Устамонроғи қай бир каттаконга ёрдамчи – помошник. Дон Жуан дом-дараксиз кетган. Чамандагулнинг "танка"си ишдан учган, кейин эгасиз қолиб, қишлоғига қайтган, ҳозир "Аёллар дафтари"нинг абадий бечорашкаси.

✉

Telegram

📱

Instagram

📱

Facebook

🌐

YouTube

Please open Telegram to view this post