ወጋገን ባንክ እ.ኤ.አ የ2024/25 በጀት ዓመት የስራ አፈፃፀም ግምገማ በአርባ ምንጭ ከተማ አካሄደ

አርባ ምንጭ፣ሐምሌ 12 ቀን 2017 ዓ.ም

የወጋገን ባንክ የዳይሬክተሮች ቦርድ እና ከፍተኛ የስራ አመራር አባላት እንዲሁም የዋና መስሪያ ቤትን ጨምሮ የዲስትሪክት ዳይሬክተሮች እ.ኤ.አ የ2024/25 በጀት ዓመት የስራ ዕቅድ አፈፃፀም ግምገማ በአርባ ምንጭ ከተማ ሃይሌ ሪዞርት አካሄዱ፡፡

በዕቅድ አፈፃፀም ውይይቱ ላይ በቀረበው እ.ኤ.አ የ2024/25 በጀት ዓመት የስራ አፈፃፀም ሪፖርት ባንኩ በአጠቃላይ ገቢ እና ትርፍ ፣ በካፒታል ማሳደግ ፣በተቀማጭ ገንዘብ እና ብድር አሰባሰብ ፣የውጭ ምንዛሪ ግኝት እንዲሁም ጠቅላላ ሀብት  በመሳሰሉት ዋና ዋና  የአፈፃፀም መለኪያዎች አመርቂ ውጤት ማስመዝገቡ ተገልጿል፡፡

ወጋገን ባንክ በተጠናቀቀው በጀት ዓመት አካታች የባንክ አገልግሎት ከማቅረብ አኳያ የብድር ተጠቃሚ ሳይሆኑ ለቆዩ  በጥቃቅን፣ አነስተኛ እና መካከለኛ የስራ ዘርፍ ለተሰማሩ የህብረተሰብ ክፍሎች እፎይታ የተሰኘውን ያለ ማስያዣ የሚሰጥ የዲጂታል ብድር ተደራሽ በማድረግ በርካታ ዜጎችን ተጠቃሚ ማድረጉ  ተገልጿል፡

በሌላ በኩል በኢትዮጵያ የካፒታል ገበያ መጀመርን ተከትሎ ወጋገን ባንክ አስፈላጊውን መስፈርት በማሟላት አክሲዮኑን በይፋ ለህዝብ መሸጥ እንዲያስችለው በኢትዮጵያ የሰነደ ሙዓለ ንዋይ ገበያ በቀዳሚነት መመዝገቡ እና የመጀመሪያውን የኢንቨስትመንት ባንክ በማቋቋም ስራ ማስጀመሩ በበጀት ዓመቱ ካስመዘገባቸው ቁልፍ  ስኬቶች መካከል ዋና ዋናዎቹ መሆናቸው በመድረኩ ላይ ተጠቅሷል፡፡

በዕቅድ አፈፃፀም ግምገማው ላይ ንግግር ያደረጉት የባንኩ የዳይሬክተሮች ቦርድ ሰብሳቢ አቶ አብዲሹ ሁሴን ባንኩ ይህንን ውጤት እንዲያስመዘግብ ማኔጅመንቱ እና ሰራተኞች ላደረጉት ያላሰለሰ ጥረት ከፍተኛ ምስጋናቸውን አቅርበዋል፡፡ በመርሃ ግብሩ ላይ የባንኩ የ2025/26 በጀት ዓመት ዕቅድ ቀርቦ ሰፊ ውይይት የተደረገበት ሲሆን ዕቅዱን በላቀ ደረጃ ለማስፈፀም የሚያስችሉ ገንቢ ሀሳቦች ከተሳታፊዎች ተነስተዋል፡፡

በዕለቱ የባንኩ ዋና ስራ አስፈፃሚ አክሊሉ ውበት (ዶ/ር) በተያዘው የ2025/26 በጀት ዓመት በካፒታል እና የገቢ ምንጭን ማሳደግ፣ በተቀማጭ ገንዘብ አሰባሰብ ፣ በውጭ ምንዛሪ ግኝት ፣ የዲጂታል ባንክ አገልግሎትን በማስፋፋት ዙሪያ ባንኩ የተያዘውን ዕቅድ እንዲያሳካ ሁሉም ሰራተኞች እና የስራ አመራር አባላት በበለጠ ትጋት እና ርብርብ ሊሰሩ እንደሚገባ መልዕክታቸውን አስተላልፈዋል፡፡