O‘zbekiston mustaqil diyor!

Surxondaryo viloyati soliq boshqarmasida O‘zbekiston Respublikasi Konstitutsiyasi hamda Davlat madhiyasi qabul qilinganligining 32 yilligi munosabati bilan “O‘zbekiston mustaqil diyor!” shiori ostida ma’naviy-ma’rifiy tadbir o‘tkazildi.

Unda Termiz davlat universiteti Yuridik fakulteti katta o‘qituvchisi tarix fanlari bo‘yicha falsafa doktori Shoira Davlatova ishtirok etib, yangi tahrirdagi Konstitutsiyaning mazmun-mohiyati, unga kiritilgan o‘zgartish va qo‘shimchalar to‘g‘risida atroflicha ma’lumot berdi. Ta’kidlanganidek, yangi tahrirdagi Konstitutsiya xalqimiz xohish-irodasini ifoda etgan xalqchil hujjatdir. Qomusimizda belgilangan har bir modda inson sha’ni, qadr-qimmati, huquq va erkinliklari ta’minlanishi kafolatidir.

Bugun mamlakatimizda olib borilayotgan barcha islohotlar eng avvalo, “Inson qadri uchun” degan ustuvor tamoyil asosida amalga oshirilmoqda. Samaradorlik esa erishilayotgan natijalar, xalq roziligiga erishish borasidagi ezgu ishlarda o‘z ifodasini topmoqda.

Tadbir davomida O‘zbekiston Respublikasi Davlat suverenitetining ramzi - Davlat madhiyasining yaratilish tarixi, uning ma’naviy hayotimizdagi o‘rni va ahamiyati xususida ham so‘z bordi. Ona diyorimiz madhiyasida boy o‘tmishimiz, milliy an’ana va qadriyatlarimiz, tinchlik, osoyishtalik, millatlararo totuvlik va birodarlik kabi umuminsoniy tuyg‘ular tarannum etilgan.

Jonajon yurtimiz madhiyasiga hurmat bajo keltirish, dunyo uzra baralla va mangu jaranglashiga o‘z hissamizni qo‘shish har birimizning burchimizdir.

👉 Telegram Facebook