📆20.11.2020
Shu sanada hayotimni, rejalarimni, karyeramni butunlay o’zgartirib yuborgan voqea sodir bo’lgan. Hozir bir boshidan aytib beraman.

Prezident Chilonzor tumaniga tashrif yakunida katta yig’ilish o’tkazganlar. Yoshlar agentligi bergan ro’yxat bilan menga o’xshagan yana 20 nafar faol yoshlar shu yig’ilishda qatnashganmiz. “Prezident “Qani yoshlar?” deb so’raydilar, eng oldi qatorga o’tiringlar”, deyishgan o’shanda.

4soatdan ko’p vaqt davomida Toshkentning hamma ijtimoiy-iqtisodiy masalalari muhokama qilingan, mas’ullar muhim topshiriqlar olgandi. Va doimiy an’anaga binoan, Prezident “Qani yoshlar, sizlarda qanaqa fikrlar, takliflar bor?” deb so’raganlar. Birin-ketin sportchilar, davlat mukofoti sovrindorlari so’zga chiqishgan. 3 kishidan so’ng Prezident yana so’raganlar: “Qani, yana kim bor? Aytaveringlar takliflarni, sizlarni eshitish uchun kelganman” dedilar.

Shu paytda o’zim bilmagan holda men ham qo’limni ko’tardim. Ich-ichimdan qandaydir g’ayritabiiy kuch shunga undadi. Prezident ham darrov men tarafga qaradilar va “Siz chiqing, qizim” dedilar.

Minbarga chiqishga chiqdim, xayolimda: “Endi nima deyman, gapni nimadan boshlayman, o’sha o’ylab yurgan muammoyimni aytsam hech kim urishmasmikin” deb bir-necha soniya dovdirab qoldim. Yana o’sha g’ayritabiiy kuch paydo bo’lib, so’zimni boshladim:

“Assalomu alaykum, hurmatli Prezident. Men Mahliyo To’raboyeva, Alisher Navoy universiteti talabasiman hamda “O’zbekiston24” telekanalida reportyor bo’lib ishlayman. Nutqingiz davomida siz mediasavodxonlik va Toshkentda yosh jurnalistlar, blogerlar uchun media markazlar ochish kerakligi haqida gapirdingiz. Yosh jurnalistlardan vakil sifatida buni qo’llab-quvvatlayman va shunga qo’shimcha yana bitta taklifim bor. Men o’zim jurnalistikaga ilk qadamimni Respublika televideniye va radio kasb-hunar kollejida qo’yganman. Bu kollej televideniyega texnik kadrlar - montaj va chiroq ustalari, ovoz rejissorlari, operatorlarni tayyorlab bergan. Hozir shu zalda “syomka” qilayotgan operatorlar ham shu kollejning bitiruvchilari. Ammo, afsuski, hozir bu kollej yopiq. Toshkent - bu televideniyening vatani. Markaziy Osiyoga birinchi videokamerani olib kelgan inson ham Xudoybergan Devonov, bizning vatandoshimiz. Shuning uchun ham bu sohadagi eng yaxshi kadrlar bizdan yetishib chiqishi kerak”

Prezident shu paytda ta’lim masalalari bo’yicha davlat maslahatchisini, Bosh vazirni chaqirib, nega bu kollej yopiqligini so’radi. Bosh vazir Prezidentga agar ruhsat berilsa texnikum qilib qayta ochish mumkinligini aytdi. Prezident shu yilning o’zida texnikum qilib qayta ochish, qabulni boshlash kerakligi haqida topshiriqlar berdilar va birdan menga yuzlandilar:

“Shunaqa tashabbuslaringiz bilan kelajakda o’zingizni qayerda ko’ryapsiz?”

O’zi hayajonlanib, titrab turgan paytimda bunaqa savoldan yanayam dovdirab qoldim. Shu tadbirdan 3kun oldin ustozim Aziza Qurbonova bilan suhbatimizni esladim:

“- Aziza opa, O’zbekiston24 ga kelganimga endi 2 oy bo’ldi. Sizlarga o’xshab Prezident “Pool”iga qo’shishlari uchun hali kamida 7-8yil tajriba kerakmi?
- Yaxshi ishlasang, undan ham tezroq bo’lishi mumkin. Yaxshi niyat va mehnat qilaverish kerak”

Prezidentning savoliga qanday javob berishim mumkinligini topdim. Hayajonlanib, har so’zimda tutilib gapirdim:
“Jurnalist sifatida men kelajakda ko’zlagan cho’qqi bu Prezident matbuot xizmatida ishlash”

Qolganini tasavvur qilavering) Zalda birdan hammaning kayfiyati ko’tarilib, qarsak chalib yuborishdi. Prezident ham kuldilar va o’sha vaqtdagi matbuot xizmatining rahbari Dilnoza Muradovnaga murojaat qildilar:

“Dilnoza Muradovna, olasizmi bu qizni ishga? Darrov oling. Buyoqda bizga ishga o’tadilar va aytgan masalalariniyam hal qilamiz.”

Xullas, shu voqeadan keyin hammasi o’zgarib ketdi. 1oydan keyin Prezident matbuot xizmatining Media-markazi xodimi bo’ldim va eng kuchli, eng ahil jamoa, shu bilan birga juda mas’uliyatli ishda ishlash, o’rganish, o’sish imkoniyati paydo bo’ldi menda.
Prezident tadbirlarda uzoqdan ko’rib qolsalar: “O’rganib qoldingizmi yangi ishlaringizga?” deb so’rardilar doim.

Menga va yana ko’plab yosh kadrlarga bildirilgan ishonch uchun rahmat, janob Prezident. Ana shu ishonchga munosib bo’lish uchun doim harakatdamiz.

Tug’ilgan kuningiz muborak bo’lsin!🎉🕊️
@Sinchalak_blog