#Toshent_viloyati

“Bu – mustaqilligimizning bir qismini boy berish degani” — faollar Kremlning “taklifi” haqida

Mustaqillik xalq va xokimiyatni har qanday muammo qarshisida mustahkam birlashtiradigan ehtiyoj boʼlishi kerak.
Soʼnggi yillarda, yirik davlatlar xalq va xokimiyat birgalikda yengishi kerak boʼlgan, juda ham tabiiy munozaralarni agressivlashtirishdan geosiyosiy maqsadlarga erishish uchun foydalanishmoqda. Аfsus bilan aytaman, bizda ham bugun “ozodlik” desa, “qornimni toʼydirasanmi?!” deydigan qatlam bor. Mintaqada uzoqni koʼzlagan maqsad va manfaatlari boʼlgan kuchlar aynan shu qatlamga tayanadi va ulardan juda samarali foydalanadi.
Sobiq sovet respublikalarining barchasida sovetlar boshqaruvi tomonidan kelajakda foydalanish uchun koʼmib qoʼyilgan iqtisodiy, siyosiy va ijtimoiy “minalar”dan samarali foydalanayotgan sovetparastlar borligi bugun hech kimga sir emas. Mustaqillikning ilk yillarida millatlararo nizolardan keng foydalanildi, yaqingacha mintaqa davlatlarini oʼzaro urushtirish va alternativi boʼlmagan transport koridorlari orqali vaziyatni boshqarishga harakat qilindi. Endi, uzoq vaqt tayyorlangan siyosiy-ijtimoiy-iqtisodiy taʼsiri kuchli boʼlgan energetika oʼyinlariga navbat kelgan boʼlishi ham mumkin.
Nima boʼlganda ham, muammolarimizni oʼzimiz hal qilamiz.
Ildizlari chuqur ketgan, bilgan taqdirimizda ham tushunish juda qiyin boʼlgan ogʼir geosiyosiy va geoiqtisodiy muammolarni murakkab siyosiy silkinishlar davrida hal qilish uchun kurashayotgan xukumatning vatanparvarligiga shubha qilmasdan, ularni qoʼllab-quvvatlashimiz kerak, deb oʼylayman. Bugungi qiyinchiliklar bir-birimizning yoqamizga yopishish emas, birlashishimizga sabab boʼlishi kerak.
Biz hali ozodligini indamasdan berib qoʼyadigan anoyi emasligimizni isbotlashimiz kerak.

Alisher Qodirov, “Milliy tiklanish” demokratik partiyasi raisi



👇Bizni ijtimoiy tarmoqlarda kuzating👇
Telegram l FacebooklInstagram