Мажбурий ижро бюросининг Чилонзор туман бўлими иш юритувида ИИББ ЙҲХБнинг қарорларига асосан қарздор А.К.га нисбатан 363 ижро ҳужжати мавжуд бўлиб, қарздордан 240 млн. 872 минг 750 сўм миқдорида жарима суммалари ундирилиши белгиланган. Қарздор катта миқдордаги жарималар борлигини билса ҳам жарималарни тўлашдан бош тортиб юрган. Бюронинг туман бўлими томонидан олиб борилган мажбурий ижро ҳаракатлари давомида қарздорнинг номида бўлган "Spark" русумли автотранспорт воситасига қидирув эълон қилинган. Мажбурий ижро ҳаракатлари давомида автотранспорт воситаси қарздор томонидан Сергели туманида "Тошкент Индекс" бозорига сотиш учун олиб чиқилганлиги аниқланган ва шу ерда холислар иштирокида хатланган.

Ҳозирда давлат ижрочиси томонидан "Spark" 363 та жарималардан 240,8 млн. сўмлик қарздорликни қоплаш учун аукцион савдоларига чиқариш чоралари кўрилмоқда.

Шундан сўнг,  фуқаролик ишлари бўйича Зангиота туманлараро судининг суд буйруғига асосан қарздор Д.Р. дан, ундирувчи Р.Р.  фойдасига 3 нафар фарзандларининг таъминоти учун 1/2 қисм миқдорида алимент ундириш тўғрисидаги ижро ҳужжати Бюронинг Тошкент тумани бўлими иш юритувига келиб тушади.

Дастлаб, ижро ҳаракатлари даврида, қарздор  Д.Р. алимент пулларини тўлашдан бўйин товлаб юрди ва қарздорга нисбатан суд томонидан  ҳам жарима жазоси қўлланилди.
Ҳаттоки, давлат ижрочилари алимент қарздорлиги бартараф этилмаса, унга нисбатан жиноят иши қўзғатилиши ҳақида расмий огоҳлантирилади.

Шунда, қарздор шахснинг яқинлари унга ёрдам беришга киришди, чунки қарздор  хориж давлатига даволаниш учун кетиши  керак ва унга ўз навбатида, хорижга чиқиш учун МИБ тақиқ ҳам халақит бераётган эди.

Шундан сўнг, қарздор шахс алиментни фарзандларининг 18 ёшгача бўлган қарздорлигини олдиндан тўлаш истагини билдирди ва МИБ давлат ижрочилари  2023 йилдан 2039 йилга қадар  3 нафар фарзандларнинг алимент тўлови 1 млрд. 748 млн. 902 сўм бўлишни билдиришди.

Ваниҳоят, қарздор шахс алимент пулларини олдиндан, яъни фарзандлари вояга етгунга қадар бўлган, жами 1 млрд. 748 млн 750 минг сўм алимент пулларини тўлашини билдирган ва ундирувчига тилхат асосида топширилган.

Биз ушбу хабар бўйича МИБ ахборот хизмати раҳбари билан боғланганимизда, алимент тўловчи шахсга оид маълумотларни тўлиқ очиқламади, бунга томонлар хоҳиш билдиришмабди.

Бироқ инсайдерлар маълумотига кўра, у аёл киши ва Туркияга даволаниши лозим бўлган.

МИБ тарихида йирик алимент тўловлари - Бухорода 810 млн. сўм (2020 йил, сентябрь) Тошкент шаҳрида 800 млн. сўм (2021 йил, июль) ва Андижон вилоятларида 547 млн.сўм (2024 йил, август) миқдорида амалга оширилган.