✔️ Очиқ парламент ва халқчил қонун: таълим

🏢 Олий Мажлис Қонунчилик палатасига келиб тушган таълим хизматларини кўрсатиш соҳасини такомиллаштиришга қаратилган қонун лойиҳаси бўйича кенг муҳокама ташкил этилди.

✍️ Қонунчилик палатасининг Фан, таълим, маданият, спорт ва ёшлар масалалари қўмитаси томонидан ўтказилган янги форматдаги очиқ мулоқотга олимлар, жойларда фаолият олиб бораётган ўқув марказлари муассислари, қўмитанинг жамоатчилик кенгаши ҳамда Ёшлар парламенти аъзолари, масъул вазирликлар мутасаддилари таклиф этилган.

✍️ Муҳокама марказида ҳаммага таниш бўлган “мактабдан ташқари таълим”, айрим қонун ҳужжатларига “қўшимча таълим” деб аталадиган тушунчаларни “болалар учун таълим” ва “катта ёшдагилар учун қўшимча таълим” турларига ажратиш, шунингдек, “қўшимча таълим” бериш тартибини белгиловчи ваколатли органларни аниқлаштириш ва катта ёшдаги аҳолининг таълим олишлари учун ҳуқуқий асосларни мустаҳкамлаш каби масалалар ўрин олган.

✍️ Бугунги кунда Республикамизда 2 392 та нодавлат мактаблари ҳамда турли йўналишлардаги кўплаб таълим ташкилотлари фаолият олиб бормоқда. Хусусан, болалар ва ўсмирлар ижодиёти саройлари, уйлари, клублари ва марказлари, “Баркамол авлод” болалар мактаблари, болалар-ўсмирлар спорт мактаблари, болалар мусиқа ва санъат мактаблари, студиялар, ахборот-кутубхона ҳамда соғломлаштириш муассасалари шулар жумласидандир.

✍️ Очиқ мулоқот жараёнида қонун лойиҳасини такомиллаштириш бўйича билдирилган таклиф ва тавсиялар атрофлича муҳокама қилинди. Албатта, буларнинг барчаси халқчил, амалиётда тўғридан-тўғри ишлайдиган қоунлар қабул қилишга хизмат қилади.

Батафсил

✅ Kun mavzusi

✔️ Очиқ парламент: озиқ-овқат хавфсизлиги ва қишлоқ хўжалигини стратегик мақсадлари

🏢 Олий Мажлис Қонунчилик палатасининг Аграр ва сув хўжалиги масалалари қўмитаси томонидан “Озиқ-овқат хавфсизлиги ва қишлоқ хўжалиги соҳасида белгиланган стратегик мақсадлар самарадорлигини ошириш масалалари” мавзусида давра суҳбати ташкил этилди. Янги форматдаги учрашувда Қишлоқ хўжалиги вазирлиги ҳузуридаги Озиқ-овқат ва қишлоқ хўжалиги соҳасида стратегик ривожланиш ва тадқиқотлар халқаро маркази мутахассислари ва олимлар иштирок этди.

✍️ Тадбирда бир қатор халқаро молиявий ташкилотлар билан ҳамкорликда йўлга қўйилган лойиҳалар доирасида 2 млрд. доллар миқдорида имтиёзли кредит маблағлари ажратилгани ва булардан 1,4 млрд. млн. доллар маблағ ўзлаштирилгани айтиб ўтилди. Ушбу маблағлар озиқ-овқат ва қишлоқ хўжалиги соҳасини институционал таҳлил қилишни кенгайтиришга, қишлоқ хўжалиги соҳаларига замонавий технологияларни кенг жорий этишга, юқори қўшилган қийматли экспортбоп маҳсулотлар ишлаб чиқариш ҳажмларини оширишга шунингдек, янги уруғ навларини яратиш каби йўналишларга сарфланиб, 7 500 дан ортиқ лойиҳалар молиялаштирилди ва натижада 58 386 нафар янги иш ўринлари яратилди.

✍️ Бундан ташқари, йиғилишда марказ томонидан қишлоқ хўжалиги соҳасида фаолият олиб борилаётган илмий текшириш институтларини қўллаб-қувватлаш мақсадида, 115 млн. доллар маблағ ажратилгани қайд этилди. Ушбу маблағларни илмий институтлар моддий-техник базасини яхшилашга, қишлоқ хўжалигида амалий тадқиқотлар ва ишланмалар жорий этилишини таъминлашга, тупроқ, сув ва бошқа элементлар таҳлилининг инновацион усулларини жорий қилишга йўналтириш бўйича олиб борилаётган ишлар таҳлили кўриб чиқилди.

✍️ Шунингдек, тадбир давомида қонун ижодкорлиги жараёнлари ва парламент назорат тадбирларини олиб боришда марказ билан ҳамкорликнинг муҳим йўналишлари белгилаб олинди.

Батафсил

✅ Kun mavzusi

💻Очиқ парламент: IT соҳаси

🏢Олий Мажлис Қонунчилик палатасининг Инновацион ривожланиш ва ахборот технологиялари масалалари қўмитаси IT Парк резидентлари билан очиқ мулоқот тадбирини ўтказди.

✍️ Бугунги кунда барча ҳудудларда IT Паркнинг филиаллари мавжуд бўлиб, унинг резидентларига бир қатор имтиёз ва преференциялар тақдим этилган. Хусусан, резидентларнинг экспортини оширишга қаратилган дастурлар ишга туширилган бўлиб, экспорт қилувчиларни қўллаб-қувватлашга қаратилган Zero Risk ҳамда компанияларни жаҳон бозорига киришда ёрдам берадиган Local to Global дастурлари жорий қилинган. Шунингдек, улар учун Виртуал офис хизмати, IT Visa дастурлари мавжуд.

✍️ Ҳозирда 3 мингга яқин тадбиркорлар IT Парк резиденти сифатида фаолият юритмоқда. Рақамлаштириш соҳаси экспорти 2024 йил якуни кўра 900 млн. долларга етган. Марказда ва ҳудудларда экспортёрлар ва хорижий компаниялар сони ортиб бормоқда ва ҳозирда ҳудуддаги экспортёр резидентлар сони 240 та, хорижий компаниялар 206 тани ташкил этмоқда.

✍️ Таҳлилларга кўра, компанияларнинг 96 фоизи ва IT мутахассисларининг 82 фоизи Ўзбекистонда қолишни режалаштирмоқда шунингдек, компания вакилларининг 93 фоизи ва ходимларнинг 81 фоизи ҳамкасбларига мамлакатни тавсия қилишга тайёрлигини билдирган.

✍️ Учрашувда IT Park резидентлари ўз таклифлари, кейслари ва аниқ муаммолари билан фаол фикр алмашдилар. Якунда эса томонлар доимий мулоқот форматида ўзаро ҳамкорликни кучайтиришга, шунингдек, фикр-мулоҳазалар асосида бир қатор қонунчилик ҳужжатларини такомиллаштиришга келишиб олдилар.


✅ Kun mavzusi

✍️ Очиқ парламент ва халқчил қонун

Олий Мажлис Қонунчилик палатасининг Коррупцияга қарши курашиш ва суд-ҳуқуқ масалалари қўмитаси томонидан давлат органининг ёки унинг мансабдор шахсининг қонунга хилоф қарори ёки ҳаракати ёхуд ҳаракатсизлиги туфайли етказилган зарарнинг ўрнини қоплаш соҳасидаги муносабатларни тартибга солишга қаратилган қонун лойиҳасига муҳокамасига бағишланган давра суҳбати ташкил этилди.

✔️ Муҳокамаларда манфаатдор вазирлик ва идоралар, ақл марказлари, илмий муассасалар вакиллари иштирок этиб, қонун лойиҳасини такомиллаштириш юзасидан ўз таклиф ва тавсияларини билдиришди.

Қайд этилганидек, бугунги кунда давлат органлари мансабдор шахсларининг қонунга хилоф қарорлари натижасида етказилган зарарни  қоплаш ягона қонунчилик ҳужжати билан тартибга солинмаган. Зарарларни бюджет ва бошқа манбалар ҳисобидан қоплашнинг ягона амалиёти мавжуд эмас. Амалда Тошкент шаҳрида зарарлар фуқаро (юридик шахс)ларга Компенсация жамғармалари ҳисобидан, бошқа ҳудудларда маҳаллий бюджет маблағларидан ундириб берилган. Шунингдек, етказилган зарарлар учун компенсация ундириш, шу жумладан зарарни қоплашнинг регресс тартиби қонун ҳужжатлари билан аниқ очиб берилмаган.

✅ Қонун лойиҳаси билан, етказилган зарарнинг ўрнини компенсация қилиш, ҳудудий компенсация жамғармаси ҳисобидан қоплаб берилган маблағларни кейинчалик айбдор деб топилган давлат органининг мансабдор шахсидан тўлиқ миқдорда регресс тартибида ундириб олиш, ҳудудий компенсация жамғармаси маблағларини шакллантириш тартиби белгиланмоқда.

Муҳокамалар давомида тадбир иштирокчилари ҳудудий компенсация жамғармаси маблағларини шакллантириш тартиби ва амалга ошириш механизмларини аниқ белгилаш, республика ташкилоти ёки унинг мансабдор шахси томонидан етказилган зарарни қоплашнинг аниқ механизмлари очиб бериш лозимлиги бўйича таклифлар ва бошқа таклифлар киритишди. Давра суҳбатида билдирилган фикр ва мулоҳазалар, таклиф ва тавсиялар қонун лойиҳасини иккинчи ўқишга тайёрлаш жараёнида инобатга олинадиган бўлди.

🟡 Депутатлар ва соҳа мутахассислари иштирокида ташкил этилаётган очиқ мулоқотлар халқчил ва  тўғридан-тўғри ишлайдиган қонун ишлаб чиқиш ва қабул қилишда хизмат қилади.

✍️ Батафсил

✅ Kun mavzusi